Table
of Contents
Piipiy We Ye Kamammael
adapted by: Mariano Laimoh
illustrated by: Donald Buchholz
Itey Mele Be Mel Bo Tamwol?
written by: Mariano Laimoh
illustrated by: Don Dougherty
Riumal Bisbis
translated by: Mariano Laimoh
illustrated by: Don Dougherty
Pes We Ye Mmwosloh Melwe Pachal
translated by: Mariano Laimoh
illustrated by: Donald Buchholz
Semal Moongki Mo Riumal Pes
adapted by: Isaac Langal
illustrated by: Vernie Miner
Tarmwal We Ma Toa Tawullaegel Chog Pahow
adapted by: Isaac Langal
illustrated by: I.S. Santos
Karbow We Ye Ppungdiy Lal Llib
translated by: Mariano Laimoh
illustrated by: Donald Buchholz
Melwe Biullel Moongki
translated by: Isaac Langal
illustrated by: Don Dougherty
Langdae
translated by: Mariano Laimoh
illustrated by: John Lennon
Sibis Yalweech Mo Seew Koakomw Yaar
retold by: Mariano Laimoh
illustrated by: Donald Buchholz
Piipiy
We Ye
Kamammael
Ho wiri Ana? Ho wiri floras? Ho wiri piipiy?
Meda toet mele ho wiri?
"Ben kallodoh," yalool Ana. Kamahoiy
piipiy le ye kamammael. Kalngael mele pecheey. Ye kukkuriu mele
peechey."
Ben sa kalngael iy piipiy we ye kamammael.
Sa kkaengalu bo be ligdi melwe pecheel Ana. Ana sa kkaengalu piipiy
we bo be loh irel melwe sil. Bo melwe pecheel ngo towe hangi.
Piipiy we te loh irel melwe sil bo ye loh irel
seew porow. Ye loh irel iy porow we sala giusiu. Ye giusiu ngo
ye rammasow.
Ben sa kkaengalu bo, "mwaelae yaamw giusiu
porow la. Ho loh irel melwe soelomw."
Ye ligdi porow we sa loh irel seew pulgul floras.
Sa wa kakkangi iy floras kowe. Ana sa soer bo, "Katoesoel
bo gel semal piipiy kowe ye kamammael."
Iwe ngo ye mel semat laang lea ye paleng ngo
ma kukk. Ye ma ruchuppung mo parangrang mala ddoelal. Mala idel
tappel iy laang le ila, bee.
Ye mel semal liuwol iy pel floras we. Melwe
iy piipiy we sa kakkargi floras kowe ngo iy sa ssoong. Sa kkaengalu
piipiy we bo, "Meda mele hola buudoh kakkangi maka imwey
iyang. Chiu mo igae bo ide kkusiu mala matamw ho sala nganga."
Sa ssoong piipiy we irel melwe bee we yela
kkaengalu bo be kkiusiu melwe matal. Iwe ngo ye wa ddar bo ye
moetog iy bee we bo de giusiu melwe matal.
Piipiy we sa loh irel melwe sil sa kkaengalu
bo, "Kamahoiy bee laay le iy mommongoy floras kalaay ngo
iy sa kkaengaliyey bo be giusiu mele matay." Iwe ngo iy melwe
sil sa soer bo, "Ngo meda mele hola mommongoy floras iyang?
Ligdi bo toar malog lea ma mongoy floras. Ho loh ho bla ffag halamw
samat mongoy lea malog re ma mongoy."
Iwe ngo iy piipiy kamammael we sa soer bo,
"Hare isae koeloh iwe ngo iy towe mongoy floras. Widiyey
bo hare iy towe mongoy imw hare ilae." Iwe sa ddipiloh siugfed
mo irel iy imw we imwel Ana mo Ben sa kakkangi. Ana mo Ben re
sa mammael chog irel iy mokwe iy piipiy kamammael we ye foefoeriu.
Be mmwal lea hobo yawli maka?
kallodoh
kukkuriu
kamammael
piipiy
haangi
bee
porow
floras
Meda mele piipiy we ye wiri? Ye wiri porow
we? Ye wiri bee we? Meda mele piipiy we ye mwemweri?
Healwe git ye mel toet yig loal. Paangal ral
ngo ir yig kowe loal iy git we re ma taldi melwe chemwal. Re ma
soer bo hadal bo iy melwe selear chog mele ye kkeal mo imoar paangaerloh
yig fael taed.
La rallawe seral ngo re sa wa buudoh taldi
iy melwe chemwal melwe selear. Re sa taldiloh chog yee, semal
ir yig kowe ye la wiri seyal moesius mo woal melwe chemwal iy
git we. Melwe chog ngo re sa teang ir yig kowe bo re sa golae
bo sa yiloolap iy melwe selear lea tea wa ssiulay ngo ye blea
mes. Re sa tattaldi iy melwe chemwal melwe selear lea re sa rool
tattaengloh chog. Iwe ngo iy git we sa kassiyaer hare medae mele
re tettaeng iyang.
Semal ir yig kowe sa kkaengaliu bo, "Ha
tattaeng bo ha sa wiri seyal moesius mo woal mele chemwomw. Ilae
ha sa golae bo te wa ssiulay ngo ho blea mes." Iwe ngo iy
git we sa kkaengaliur bo, "Ha towe ma taeng ngo iy towe paegel
mes blea iy chiil kkeal chog mo imoar paangaer yig."
Iwe ngo ir yig kowe loal re sa hatiugili chog
lea ras blea lliy iy melwe selear bo iwe re sa wiri moesius we
mo woal melwe chemwal. Lea ye tiugil chog bo ye sa yiloolap lea
re bla fedeg mo ras ngo ras blea lliy. Sa tayikofloh chog depear
ir yig kowe.
Iy git we sa fahoor ir yig kowe loal irel melwe
sa tayikofloh chog depear. Sa kkaengaliur bo re bla mweridoh ras
bo re be haglae fangalli hare itey mele be chiil mel chog bo tamwol
fael taed. Iy git we chiil hatiugili chog lea ye be chiil lliy
ras.
Iwe re sa buyoy ir yig kowe llemdaw bo re bla
mweri mwal we ras. Re sa buyoy buyoy yee re la buudoh irel melwe
imwel pahow. Pahow sa mwalili ngaliir sa soer bo, "Hami itey
makla ha ssabarbar liugiul imwey?" Iwe ngo ir yig kowe re
sa soer bo, "Hamem loal git. Ha mwommweri mwal we ras bo
re bla fedeg mo git." Iwe ngo pahow we sa soer bo, "Oey,
ha loh."
Iwe ngo ir yig kowe re ligdi melwe bugtal iy
pahow we re sa buyoy toet. Re sa buyoy buyoy yee re la hola melwe
imwel mwal we ras. Iy mwal we ras sa mwalili sa soer bo, "Hami
itey makla ha ssabarbar liugiul imwey?" Iwe ngo ir yig kowe
re sa soer bo, "Hamem loal git. Ha mwommweri mwal we ras
bo re bla haglae fangaliir mwo mo git." Iwe ngo iy ras we
sa soer bo, "Ngaeng iye le. Ha le tefael ha sa kkaengal git
bo iy ble buyoy ngo sa lliugiu dapal." Iwe re sa tefael ir
yig kowe re sala kkaengaliu melwe selear iy mokwe ras ye soer.
Paangearloh yig ngo re sa tteydoh irel melwe
imwel git bo re be kamaahoy semal lea ye be kkeal. Ye tayissiulay
ngo sa ngung fael taed bo ilae melwe sa buulong iy mwal we ras.
Sa buulong chog yee la ppengahloh mo lengchel iy git we. Sa kkaengaliu
iy git we bo hare sa fel ngo sa gerngali bo re blea haglae hare
itey mele ye kkeal. Melwe chog ngo git we sa liut ngali sala mel
woal melwe tagriul. Sa ppeltaeloh melwe hoasiusiul ngo ye hadli
fadaley mokwe haddoel lal mokwe talngal mo lal mokwe matal. Sa
tappung tappung iy mwal we ras yee la siddmmwaayloh. Iwe ngo ye
mwoach harahdiy iy git we mo woal melwe tagriul. Sa tattafaelway
iy mwal we ras irel melwe imwal lea sa siugfed mo siugfed chog
bo ye sa peyaegius. Iwe, sibis ir yig kowe re tteydoh ngo re sa
tefaelloh irel bugtear bo re sa golae bo git mele ye kkeal chog.
Iwe sa si.
Riumal bisbis re ma mel woal seew fiuliuy. Sa
mesloh mokwe selear mo temaer. Sa ma ir loh chog mele re ma mel
woal iy fiuliuy we. Iwe ngo iy we mwoal yarmat semal mwal lea
ye wechiich, ngo iy we rnwiril yarmat, semal mwal lea ye palleng.
Iy iwe mwoal yarmat, paangal ral ngo ye ma
loh fetae. Iy wea we waar ilae seyai wa lea ye mwitiyal. Re te
ma takk ir roeriumal yiuchiul. Hare re be loh re roeriumal ngo
be halfedmal yig lea ye be chill takk yiuchiul iy wae we waar.
Ilae faal lea iy chog iwe mwoal yarmat mele
ye ma loh fetae bo iy mele ye wechiich. Iy we mwiril yarmat ngo
ye palleng ye ma ssoongloh chog irel melwe ye tea ma loh irel
fetae. Blea mel tefael woal fiuliuy lea blea lunglungloh chog.
La rallawe seral ngo iy tarmwal we mwoal yarmat
sa soer bo ye ble hasi mwo iy melwe bisil we mwiril yarmat bo
sa ngiuch irel yaal ma lunglungloh chog. Iwe re sa dage iy wea
we waar we ye wechiich re sa loh mo lengchel seew fiuliuy lea
ye mwitiyal re sala feffetae mo iyang.
Re feffetae ngo iy we mwiril yarmat ye ma yafiyef
chog yig kowe ye paechigchig. Iwe ngo iy we mwoal yarmat ye ma
yafiyef chog yig kowe ye paalingling. Re sa feffetae lea taay
fel dapal iwe mwiril yarmat.
Re sa fetae toet yee ngo healwe mwiril yarmat
sa soer bo, "Tayikof loboes le bo gel ho ma yafiyef
chog yig kowe ye palleng ngo ngaeng iye yig kowe ye mwitiitiyal
chog mele imae hola."
Iy mwiril yarmat we sa kkaengal iy melwe bisil
bo re be liiweli yoa kowe yaar. Iwe re sa buudoh liiweli iy yoa
kowe yaar, ngo chiil tappwe chog bo iy mwiril yarmat we chiil
yafiyef chog yig kowe ye mwitiityal.
Iwe ngo iy mwiril yarmat we sa wa soer bo,
"Si be hatagiuliu wea lea waach bo mal bo tabla mele ye choalop
yig iyang." Re sa hatagiuliu iy wae we waar ngo chiil tappwe
chog. Mwoal yarmat we chiil yafiyef chog yig kowe ye palleng ngo
mwiril yarmat we chiil yafiyef chog yig kowe ye paechigchig.
Ra sa mwachlohol chog yaar fetae ngo re taay
liuliuwaley melwe ye halsemwitiyal iy wea we waar. Re sa fetae
fetae ye mwoosloh iy wae we waar.
Iwe re sa habeyae iy wae we waar re sa tefael
ngal melwe faliuyaer. Re hola chog melwe faliuyaer ngo re sa chapi
yaar fla seyai wa lea ye sa sar palleng toet bo waar. Iwe ye la
moal iy wea we waar ngo iy mwiril yarmat we sa ma dabey iy melwe
bisil irel fetae paangal ral. Iwe sa mwomwaay dapal iy mwiril
yarmat we bo sa ma yor yig kowe ye palleng lea ye ma yafsi.
PES
WE YE
MMWOSLOH
MELWE PACHAL
Haelwe semal pes. Iy pes le ila ye rochuppung.
Iwe ngo mala pachal mele ye bbech. Hasafaliuy yaal beday iy pes
we. Ye ma dar fadal chog bo ye ma faffaeg mele be yoh ngaeli bo
hal. Seewel yaal daddarloh lal iy yallap we ngo sa wiri sehay
manga. Sa mmachmachloh mokwe uwaal iy manga we.
Sa dahloh chog melwe chalyewal iy pes we irel
melwe ye la wiri iy mokwe uwal iy manga we. Sa mwarrodiy sa liuliuwaley
hare meda mele be foeriu ngo sa hola iy manga kowe. Taay mwal
yaal mwallemal iy manga kowe sa mmach. Sa liuliuwal hare meda
mele be foeriu. Ye ttaweloh chapil iy manga we sala wiri seew
taraap le ye siu ngael chapil iy manga we. Sa harahdah woal iy
taraap we yee la mel yiuchiul iy manga we.
Sa la hafle mo woal seew iy ral manga we sa
yiuyiul ikowe ye harpa. Ye retloh manga kowe ye harpa irel yaal
hangi ngo sa gerway toet woal mechel iy ra we yemel iyang. Sa
maliglalaoh melwe ye paleng ngo sa mwimwitiyalloh iy ra we sa
kekkerway iyang. Tayisiulay ngo sa mmahos ngaeli iy ra we ye mel
uwoal. Sala mwadengdeng sa biidiy. Ye biidiy mo lal yangel seew
iy ra kowe ye katabdiy toet. Ye biidiy chog mo lal yangel iy ra
we ngo ye la mmwachloh melwe pachal. Sala chechengaegloh le ye
telediy melwe chemwal.
Sa giurfafa fadal iy pes we yee mmwosloh iy
melwe pachal sa chingidiy sala taflang
fael iy manga we. Melwe pachal chill mmwach
lal yangel iy ra we. Sa chimwdah sa mwaroro sa wiwidiy iy melwe
pachal hare be ppungdiy. Tayisiulay ngo sa fildoh setab yaeng
sala ppungdiy iy melwe pachal. Ye ddorfiy chog melwe pachal ngo
sa ddar. Ye kakkamdaeloh ngo sa wiri seew buraah.
Sa hamadaeloh loebos we ye buudoh iy buraah
mo iyang. Ye loh sala chiungiu semal yiloolap lea ye fisfis pes.
Ye buudoh irel iy yiloolap we ngo iy yiloolap we sa kassiyae bo,
"Towe mmwal lea hobe foer ngaliyey faamat hagloey?"
Iwe ngo iy pes we sa soer bo, "Meda iy hagloey kala yaamw?"
Iwe ngo iy yiloolap we sa soer bo, "Widiyey bo be igil walsiu
ngo isae mwoach kkaengalug."
Llemaeliyel chog ngo pes we sa buudoh irel
iy yiloolap we sa kassiyae bo, "Meda mele ibe foerui?"
Iwe nog iy yiloolap we sa kkaengalu bo, "Matamwoal mala hobe
foeriu ila hobe la yidifidoh seew pakit irel chael." mes
we sa loh mo seew pakit. Towe poag seyal tamaaho ngo sa tafael
mo pakitel chael we. Yiloolap we sa kkaengalu bo, "Haruwowal
mala hobe foeriu ilae hobla riurrdoh yaay tamwoach." Tayi
siulay chog ngo sa tafael pes we mo seew pulgul tamwoach.
Iwe yiloolap we sa wa kkaengalu bo, "Hasiuliuwel
mala ho be foeriu ilae hobla falgidoh lomow liu." Pes we
sa wa loh bo choal falfalal liu. Tayi siulay ngo sa tafael mo
lomow liu. Yiloolap sa wa kkaengalu bo, "Hafaawal mala hobe
foeriu ilae hobla gilsidoh wolow maey. Tayi siulay chog ngo sa
tafael pes we mo wolow maey.
Sa rray iy yiloolap we irel mokwe pes we sa
foer ngaeli ngo sa fahoiy irel melwe
pachal we ye mwos. Sa loh sala kaek yaalp didd
sa buudoh digidah melwe pachal iy pes we. Iwe ngo yagel melwe
chil sar bong, tead kel yaal werloh, tayiwel yaal digidah melwe
pachal iy pes we. Melwe mechel melwe pachal mele ye far kkataba
ngael melwe holngol iy pes we.
Chil tayikof chog depel iy pes we irel iy melwe
pachal. Iwe iy yiloolap we sa wa beesi tafaeli sa mwoach hataguliu
sa digi tafaeli. Iwe sa rray iy pes we sa loh.
Semal
Moongki Mo
Riumal Pes
Healkowe pes re la darfadal yee rela buudoh
fael sehay irea re sa la wiri riudep patal fodogol karbow lea ye
mel fael iy irea we.
Iwe resa buudoh kkachocho fangal mo ifael iy
irea we. Semal ir ngo ye soer bo iy mele be hangi madpil we ye
sor palleng.
Re mel fael iy irea we resa kkachocho fangal
yee resa chob fangal re sa fedeg. Re sa tahcheeloh mwo iy madipdipil
fodog kowe bo re sa fefedeg mwo mo iy loboswe.
Chil iwe sangal yaar fefedeg mo ifael iy irea
we ngo healwe moongki sa la buudoh. Sa buudoh yee lengcher ngo
ye la siuloh mo iyang.
Ye buudoh chog mwal lea ye siuloh chog ngo
sa kassiyaer ir pes kowe bo, "Aaeei, aaeei, mada mele sa
ila sangal yaemi fedegloh chog iyang?" Iwe ngo ir pes kowe
re sa soer bo, "Ha fefedeg bo semal hamam ngo ye soer bo
iy mele ye be hangi madipil fodog le ye sor palleng."
Iwe chog ngo iy moongki we sa soer bo, "Aaeei,
ha widyey, ha widyey, bo iy be faoriu ngalgiumi makla halmi."
Mwal sa hasi seew hachaw ngo sa sseb ngali iy madipdipil fodog
kowe. Iwe ngo ir pes kowe resa ppaoloh mo irel yar fedeg re sala
siu resa kakkamaahoy iy moongki we.
Iwe ngo iy moongki we sa hasi iy patal fodog
kowe riudep sa yeteddah woal iy hachaw we. Sedep ngo ye itol woal
setab iy hachaw we. Iwe sa buudoh kakachawu.
Iwe, mwal ye la kkamaaho, ye sor chaw sedep.
Iwe ngo mwal ye ttongoa ngal iwe sedep we ye sor chaw, sa buudoh
ngarnger toet mo iyang.
Ye la moall yaal ngarnger mo iyang ngo ye la
hatfaelidah woal iy hachaw we, sa ppal tang iwe teed ngarnger
mo iyang. Iwe mwal sa kalngal iy hachaw we yee ngo ye yiuchiuchgaloh
melwe chemwal.
Iwe ngo mwal ye wa hasi iy madipil we sa chowloh
ngo ye wa ngarnger toet mo iyang. Iwe ngo ye la hatfaelidah woal
hachow we, sa ppaltang iwe sa matamwoal ngarnger mo iyang.
Sa iwe chog sangal yaal ngarnger toet mo irel
sedep iy madipil fodog kowe ngo ye hachawu. Sa iwe chog iwe chog
yee ya la chingchingiihamwayiuloh iy madipil fodog we riudep.
Melwe ye retloh chog madipdipil fodog kowe
ngo sa llang mwal lea sa tteang sehay irea lea ye sor harepdoh.
Sa chingiloh madipdipil fodog kowe halear ir pes kowe ngo sa liuwalley
lea be lea ppaesdah yiuchiul iy irea we bo be la hallos iyang.
Healwe semal tarmwal paangal lemaeliyel ngo
ye ma biidiy diudiu letted. Be lea diudiu yee melwe be tahachdah
YAAL ngo mwal be lea tawul chog ngo be lea soer bo, "Ooooy,
ha tteydoh re yarmat bo semal pahow teyikuchigmwo iye be lea giusiuyey."
Yarmat re be lea rongrong chog iy melwe yalool ngo semal ngo be
lea kaek chog sohol piiskea ngo be lea ddar chog sa hamdaediy
metaar. Re be la biidiy re be la siuloh, ngo iy yalwiich tarmwal
be lea la bor fadal irel mammal ngo be lea soer bo, "Ngaek,
iy kakkachapar chog iy melwe ngo hami hasla rol cheparloh iyang."
Ralawe matamwoal yaal faoriu iy melwe ngo malbo be siliig hare
faeyeg yarmat lea re hamdaediy metaar irel iy tawul we yal.
La lemaeliyeleldah ralawe seral ngo mwal sa
wa biidiy bo choal diudiul letted. Sawa diudiu chog siugfed ngo
mwal sawa tawul chog ngo ye soer bo "Ooooy, ha tteydoh re
refaliyey bo semal pahow hammetaeg iye be lea giusyey." Melwe
yarmat re rongrong chog tawul we yaal ngo semal ngo sawa kaek
sohol piiskea lea re sawa ddar chog re sa biidiy ngo ila melwe
iy tarmwal we sawa la bor fadal irel mammal ngo sawa kkaengaliur
ir rechoakowe bo, "Ifa iy pahow la hasla kaekdiy piiskeal
lea iy kachapar chog iy melwe." La ralawe hariurallel yael
tarmwal kachapar ngo malbo be lea hall riyeeg chog yarmat lea
re dabediy iy tawul we yaal.
Iwe, wol la lemealiyelel chog rallawe chog seral
ngo mwal sawa biidiy bo choal diudiul letted. Ye wa diudiu chog
siugfed mwal ngo sawa tawul chog ngo ye soer bo, "Ooooy,
ha tteydoh re refaliyey bo semal pahow iye hasfaliuy mele lapal
lea be lea giusyey." Melwe yarmat re rongrong chog melwe
yalool tarmwal we ngo semal chog ngo ye ddorof sohol piiskea ngo
taaymel bo sa ddar sa biidiy metaar. Re la biidiy lea re la siuloh
wulpiy ngo iy sawa la bor fadal irel mammal ngo sawa soer bo,
"Ngaek, ha te ma ger chog irel melwe iy sa mwoal kachaparaakmi
talengellalow mo lalow lea igla ngo hasa la wa biidiy mo sohmi
piiskea." Aaaey, la ralawe hasoelrallel ngo sa hall limmal
chog yarmat lea re biidiy.
Iwe, sawa bongdiy yee la lemaeliyeldah chog
ngo iy tarmwal we sawa ddar chog sa biidiy yee la mmwusway letted.
Lea melwe mmwusway ngo ye la kalloh, healwe paholmedaw iye sa
la buudoh lea sa siugiu chog melwe yawal ngo sa haretretway mokwe
ngiil. Melwe chog ngo tarmwal we sa mwoach halngol kattoesol tawul
ngo ye ngaangaa ngo semal pahow iye be lea giusyey.Yarmat re
rongrong yaal tawul ngo taichaelmwo le ye la
sor ttalngaeloh mwo bo re sa soer chog bo iy tarmwal we ye sawa
kakkachapar. Iwe taichaelmwo le ye biidiy irel.
Iwe ngo healwe pahol medaw sala hattayi ngali
chog iy tarmwal we. Sa giurfafa fadal ngo ye hapius ngo iy pahow
tea la sor lew mwo siugfed. Sa buudoh chog yee serea melwe michingil
pecheel iy tarmwal we ngo ye la ppachlahoy. Ye ppachlahoy yaal
haltiuloh iy melwe pachpachal pecheel sa la hall setab. Iwe sa
ngaangaa chog lea taay chep.
Fili ye la buyoy fael mae we ye ma mel iy karbow
we loal iyang, taay mel iy karbow we. Sa loh healwe sala mweri
fadaley iy karbow we loal. Sa daddarloh yee, la darloh lengchel
seew liib sala rongrong yalool karbow yaal bibbidah mo lal iy
lib we. Ngo ye la kaladiy lal iy lib we, ye mel iy karbow we loal
iyang. Iwe ngo ye loh sala kassiyae semal poliis hare towe tipngi
bo re be yetaddah iy karbow we loal.
Fiyong le ilae fiyongol semal yarmat lea Fili
mala idal. Iy Fili ye la chiuwaeyi semal karbow bo mel melwe he
ma yorloh chog lemal meelik paangal ral. Ye ma lemtagliu iy karbow
we loal fael sehay maey. Iy karbow we ma mommongoy mayimmach kowe
ye ma ppungdiy fael iy mae we. Re sa miilmiil yee sa ngiuch iy
karbow we irel mongoal mayimmach. Sa ddar iy karbow we sala ffag
fadal semat mongoy lea ye be wel taeng mwo mayimmach.
Matamwoal chog ngo ye la chiungiu seew peel
waliuwol. Ted yor mwo siugfed iy waliuwol kowe lea ye hangi ngo
sa buudoh semal yiloolap mo seew yalguw sa ddabeyloh bo towe hangi
iy waliuwol kowe. Sa loh yee la wiri seew melaey. Melwe chog ngo
sa dabey ttafal irel yaal hangi mokwe yaddol iy melaey we. Sa
hattiri chog irel mongoy bo ye de buudoh chog yarmatawe yaal iy
melaey we. Ye mmoal chog irel mongoy ngo sa wa tabo yaal darloh.
Sa darloh toet yee, ye la wiri soomw wuuch
mmach le ye mel isrea iy yallap we. Iwe ngo ye buudoh hangi lapal
mele be chiil yoh irel lea be hangi.
Sa mwomwaay chog dapal iy karbow we irel mongoy
kowe ye sala kakkangi ngo taay dapal lea ye be tefael ngael melwe
bugtal. Ye loh sala wiri toet waliuwol mo ngachel iy yallap we;
sa loh sala mommongoy iy yiul waliuwol kowe. Ye toglae bo ye mel
toet laang liuwol iy peel waliuwol kowe. Samat laang lea re ma
kukk. Idel tappel iy laang le ilae re ma soer bo "bees."
Ye mommongoy fadal yiul iy waliuwol kowe ngo ye tiuwiri melwe
haftaer ir laang kowe lea
ye mel liuwol raal iy waliuwol kowe. Seewel
yaal ddafngidoh sera iy waliuwol kowe ngo re sa mmwetreway ir
"bees" kowe yaar giusiu fadaley melwe chemwal. Sa ttagiul
iy karbow we ngo sa hartaloh fadal lea sa ddar. Ye kakkamdaeloh
ngo ye te kakkamaahoy yallapal. Ye hamdaeloh chog yee la ppunglohg
lal seew liib.
mo lal lib we. Poliis we sa kkaengaliu bo ye
ttir chog lea re be pakkiy ngo re sa yetaddah. Fili sa ligdi iy
poliis we bo te depal lea re be pakkiy iy karbow we loal. Sa loh
sala chiungiu semal choal fetae. Sa kassiyae hare towe tipngi,
iwe ngo iy choal fetae we sa kkaengaliu bo ye mwomwaay lea re
be piiskaeli ngo re sa
mwoach yetaddah mo lal iy lib we. Sa ligdi
iy choal fetae we bo ye te dipli lea re be piiskaeli iy karbow
we loal. Sa loh sala kassiyaer choal giulgiuliul yaef hare towe
yoh lea re be tipngi. Iwe re sa buudoh ir choal giulgiuliul yaef
kowe re sa poomlong chael lal iy lib we yee la ssogloh. Iwe ngo
ye ppisdah iy karbow we sala mmwal lea be gibloh woal ngachel
iy lib we.
Fili sa kkaengaliur ir choal giulgiuliul yaef
kowe bo re sa hachigchgi. Iwe ngo ye paali iy karbow we loal re
sa tefaelloh irel melwe bugtaer. Sa rrayloh healwe Fili bo sa
yoh ngaeli iy karbow we loal, ngo iy karbow we sa rray bo sa dohdah
mo lal lib we ngo ye sa wa ddaaw taengiir "bees" kowe.
Iwe chog ngo tayor seral lea karbow we chiil ma liuliuwaley bo
ye be ddar taeng Fili. Iwe, sa si.
Healwe moongki ma mel woal seew fiuliuy. Ye mel
sehay harfad lemal lea ye mel metaarol iy melwe fiuliuyal.
Lemaeliyelel ralawe seral ngo sa biidiy healwe
sa buudoh gil lemal uwaal iy harfad we. Iwe ngo ye biidiy sa la
mwarro hataalpiy sa la yiuyiul iy harfad kowe lemal sa pipisway
letted.
Iwe ngo healwe pahow sa la yildoh. Ye sa yillong
yee hataalpiy ngo ye la kalladah sa la wiri iy moongki we yal
mwarro wulpiy.
Iwe sa mmwaliliy ngal iy moongki we sa kassiya
bo, "Towe dopomw lea ho be dabeyay si bela yasfaliuy fadal
letted?" Iwe ngo iy moongki we ila, "Ngoa, ye heat;
halaachog ila ye der bo iy tiugla yaaf."
Iwe ngo iy pahow we sa soer bo, "Be yoh
lea ho be buudoh choechoy woal mele tagriuy ngo si ya loh."
Iwe, healwe moongki sa lliut woal melwe tagriul
iy pahow we. Iwe re sa loh loh yee la dolloh melwe fiuliuyel iy
moongki we. Iwe resa la kkoakoamw fadal ngo re kakkamaahoy fadaley
semat mo semat yig.
Re sa koakoamw fadal koakoamw fadal yee melwe
sa palpalloh YAAL ngo iy pahow we sa soer bo, "Ho gola lea
sa mmwal halay biullel moongki." Ila melwe sa liuliuwaley
bo belea lliy iy moongki we ngo sa hangi melwe biullal.
Iwe ngo iy moongki we sa soer bo, ""Yak,
ilang mada mele ho tea soer chog irel yodwe si chil mel hataalpiyel
melwe fiuliuyey iyang. Hare ho soer ilang iy sa hasi melwe biulley
we iy changili yiuchiul harfad we ye mel mataarol melwe fiuliuyey."
Iwe ngo iy pahow we sa soer bo, "Yak, ilang
belea ifa sangal, si bele tafael? Towe mmwal chog lea si be tea
tafael bo ngaeng ila taay mmwal mwalol halay biullel moongki."
Iwe healkowe re sa tafael ngal melwe fiuliuyel
iy moongki we. Re sa buulong yee hataalpiyel iy fiuliuy we ngo
yela haseserdah iy pahow we mo iyang.
Melwe ye haseserdah chog pahow we ngo moongki
we sa ppalang seew liut sa la chobdiy mo wulpiy. Sa la kal tafael
sa kkaengal iy pahow we bo, "Yoyoe, ho takkababbog ngae,
ho sa liuliuwaley lea hobe hochayey ngo ho soer bo iy tiugla.
Iy kachparaah chog iy melwe ngo gel ho sala chaparloh iyang. Ho
soer bo yor le ma ligid biullal mo soelbos iwe ngo sa loh bo bela
ppay fadal mo soelbos."
Iwe, sala mmahaayloh iy pahow we. Iwe ngo iy
sa wa ppachadagey harfad we sa buudoh hatarpungudiy toet iy mokwe
uwaal. Iwe ngo mwaal ye biidiy sa buudoh kaek lemal ngo ye wa
biidiy hataalpiyel iy fiuliuy we sa yiuyiul iy harfad kowe ngo
ye pipisway letted.
Seew fiuliuy lea ye choalop mongoy iyang. Paangear
yarmat ngo re rray. Mwal re ma loh fetae ngo feafel re sa loh
ibol. Yarmatal iy fiuliuy we ye weres lea re be koeloh bo ye choalop
hames halear mongoy. Sa rray chog iy melwe tamwol iy fiuliuy we.
Ye mel semal tarmwal lea loal iy tamwol we
lea hasafaliuy yaal hachangchangi. Ye ma mel chog lal iy fal we
fall iy tamwol we tamal. Te ma yengaeng bo te depel iy melwe tamal.
Yarmat re ma kakkdoh chog hal lal iy fal we.
Seral ngo mwal re sa loh fetae. Re fefetae
loh chog ngo sa chingingaelir setab laeng. Sa kkaelloh yaeng ngo
ye loaloa loh. Taay mmwal re be fetae yaar tafael ngael fiuliuy.
Re la holadoh fiuliuy we ngo sa kkael hames
yaeng mo laaw. Sa mommoar fangal liu mo maey. Re sa rol nganga
fangal yalweech mo feafel. Sa puppung imw. Yarmat re sa mwol fadal
liugiul imw kae chil sar mmwal siugfed. Si taay madaf irel pes
mo yiul waliuwol bo sa yal fadal lal laeng. Sa biidah laaw liuwol
fiuliuy ngo taay lah metal Yaal bo sa ruchuppung hames lal laeng.
Iwe ngo poetog, sa wochog bo yarmat re kakkasre chog mo lal tapiy.
Sa iwe chog sangal yee ruubong ngo sa mwoach
chib iy laeng we. Tayor loh yaeng ngo swa ddoelloh metal Yaal
bo tayor loh poetog. Tamwol we sa hatteylir paangear yarmatal
iy fiuliuy we. Sa kkaengaliur yarmat bo re be ttey fangal chog
soelbos bo re be golae fangaliir chog.
Paangal mongoy kowe halear ngo sa towas loh
irel iy laeng we. Sa mesloh bulah ngo ye retloh liu mo maey irel
yaal moarloh. Sa langdaeloh rael iy fiuliuy we re mel iyang. Iwe
ngo rael fiuliuy we ye mel yiloolap we mo lefeechig we loal iyang,
te kkael yaal towas ngo toar le ye mwechal loh iyang bo iwe re
soer bo bugtal yalius.
Paangaer yarmatal iy fiuliuy we ngo re sa mel
chog lal seew fal. Ye bla yoh ngael semal siugfed mongoy ngo re
sa hamahla uwoar paangaer yarmat.
Yarmatal iy fiuliuy we re ma kakkapta iy tarmwal
we lea ye tahaayreg. Iwe ngo towe mmwal lea re be kkaengalu bo
re moetog iy melwe tamal. Mwalallap kowe toet re sa mwalili ngael
iy tamwol we irel kofal iy tarmwal we loal. Re kkaengaliu bo towe
ma itol chog iy melwe loal iliimw. Tamwol we te talngae mokwe
ir mwalallap kowe re kkaengaliu. Tarmwal kowe wochilal mo wolyaal
taer re wa ma kakkapta iy tarmwal we irel melwe toar mele ma foeriu.
Iy tarmwal we ye ma kkaengaliu iy melwe tamal bo bla dabeer tarmwal
irel koakomw mo yengaeng ngo iy melwe tamal te ma mwechal.
Ye mel semal yiloolap lea ma mel liugiul fiuliuy
we rea we serea. Ye mel semal lefeeching loal. Ir loh chog mele
re ma mel liugiul iy fiuliuy we rea we serea. Iwe ngo ir yarmatal
iy fiuliuy we re te ma loh rael iy fiuliuy we serea bo re ma soer
bo bugtal yalius. Iy tarmwal we loal tamwol ye toglae bo toar
le ye kkaengaliu.
Seral ngo tarmwal we loal tamwol ye toglae
hare yor yalius rael iy fiuliuy we serea hare meda, ye buyoy chog
mo lal iy fal we sa loh. Sa darloh rael iy fiuliuy we re ma soer
bo bugtal yalius. Ye la hola iy loebos we ngo toar le ye wiri.
Sa siu sa kakkal fadal yee seewel yaal kalloh sala wiri seew buraah
le ye bibbiidah mo liuwol waliuwol. Mwal sa dabeyloh iy buraah
we yee la buudoh irel seew imw. Ye la harpadoh iy imw we ngo sa
wiri semal yiloolap lea ye mel fael seew mwitiyel mwuluumw yaal.
Ye sa liuliuwaley hare itey iy yiloolap we.
Sa loh iy tarmwal we irel sa kassiyae hare
towe mwechal fang hal mongoy. Iwe iy yiloolap sa buudoh fang hal
iy mongoy kowe. Sa rray iy tarmwal we.
Sa mongoy mongoy yee la maed ngo sa kassiyae
iy yiloolap we hare iy chog mele ma mel iy loebos we. Iwe ngo
iy yiloolap we sa kkaengaliu bo ye mel semal lefeechig loal le
ye masor iliimw.
Sa loh iy tarmwal we sala kamaahoy iy lefeechig
we. Ye la kamaahoy ngo ye dipli lea be hasi bo riil. Sa tafael
ngael iy yiloolap we sala dangro hare towe yoh lea be hasi iy
melwe loal bo riil. Iwe ngo iy yiloolap we ye mwechal bo ye golae
bo loal tamwol iy mel we.
Iy tarmwal we sa kkaengaliur lapal yaar sa
hafohoy rael iy fiuliuy we serea. Iwe iy yiloolap we sa kkaengaliur
bo re be dabey irel foerol mongoy.
Re sa foer mongoy le ye choalop. Re mwol ngo
iy yiloolap we sa kkaengaliu iy tarmwal we bo be biidiy bo bla
kkaengaliu melwe tamal bo be fangdah yarmat bo choal kakkal mongoy
kowe.
Tarmwal we sa tafaelloh irel mokwe choal faliuyal.
Sa rray melwe tamal bo sa tafaeldoh iy melwe loal. Sa kassiyae
hare ye buudoh mo iyae ngo iy tarmwal we sa soer bo ye buudoh
mo rael fiuliuy we serea. Swa kkaengal iy melwe tamal bo sa yor
riil, ngo ye wa soer kofal iy mongoy kowe re sa foeriu.
Re sa buudoh ttey ngo toet ir mwal kowe yaar
resa soer bo tayor halear mongoy. Ilae ye mwomwaay lea re be dabey
tarmwal we bo re bla kakkdoh halear mongoy. Toet ir tarmwal kowe
re sa dabey iy tarmwal we loal we tamwol re sa loh irel melwe
imwel yiloolap we mo lefeechig we. Re sa loh re sala haapidiy
iy mongoy kowe ngo iy yiloolap we sa wa fang yaar fadah. Iy tarmwal
we sa tipngiir yarmat irel yaar fadah tafaeli iy melwe faliuyaer.
Yarmat re sa golae lea tarmwal we te tahaayreg. Re sa yedmagel
irel yengaeng hasiigsiig yee la tafael iy melwe faliuyaer llifadol.
Sa rray iy tamwol we bo re sa mmwal yarmat.
Ye swa rray bo sa yor riil melwe loal. Iwe ngo iy yiloolap we
swa rray bo sa yor riil melwe loal. Tarmwal we loal tamwol we
sa mwomwaay dapal bo sa yor riil ngo yarmatal fiuliuy we re sa
dipliloh bo hare te yagli ngo re ble mes irel yaar koeloh.
Tamwol we sala mwoach liuliuwaleyloh ngo hare
ye dabey chog mokwe yaloor mwalallap kowe, irel melwe ma hammwachiu
chog melwe loal iliimw, ila ngo malbo ye choalop mele iy melwe
loal bo foeriu lea be mmwal yarmatal fiuliuy we iyang.
Sibis
Yalweech Mo Seew Koakomw Yaar
Healwe semal tarmwal lea Meterrael mala idal.
Ye mel seew. tawi loal.
Seral ngo Meterrael sa hangiungiu iy tawi we loal.
Sa ffasahgiurdoh mokwe marereel irel seew hoahoyael.
Meterrael sa soer bo, "Toar mele iy wiri. Ye
ruchuppung fael hoahoyael le." Ifaeng sa soer bo, "Medae semat
koakomw lea si be foeriu?" Meterrael sa soer bo, "Te dipmi si
be somla melwe fiyongol haatuw mwachoh we? Meldew ble mel bo iy
haatuw we." Meldew sa mammal sa soer bo, "Ngo, ngaeng iy be mel
bo haatuw we."
Meterrael ye dipli bo re ble chapi yaar koakomw.
Re sa rol ttey fangal re sa hatiufili hare be ifae sangal yaar
koakomw. Meterrael sa soer bo, "Ifaeng, gel ho be mel bo choal
pakkel mael we." Re sa buudoh hatteyli fangali toet yiul waliuwol
kae." Iwe, ir yalweech kowe re sa chapi yaar koakomw.
Hadal bo sa mel lal tafich we iy haatuw mwachoh
we.
Hadal bo sa liulliut fadal ngo ye ngaanga.
Hadal bo sa ssoong iy haatuw mwachoh we, mgo sa wa moetog. Sa
ngaanga ngaanga chog.
Sa ngaanga iy haatuw we sa soer bo, "Ha hachiuyaeyey."
Sa siuloh iy choal pakkel mael we sa kal tefael. Sa tagiul sa
dartefael. Sa liuliuwaley bla hachelahoy iy haatuw mwachoh we.
Sa loh sala siugiuloh hatamal iy tafich we.
Haatuw we sa nganga. Sa ssoong ngo sa wa kkoeloh.
Sa soer bo, "Iy ble hangiug igla." Iwe ngo iy choal pakkel mail
we sa soer bo, "Fael pecheemw ngo ho towe hangiyey. Widiyey bo
si be hapatpat." Haatuw we sa dar ngaeli. Iy haatuw we mo choal
pakkel mael we re sa buudoh hapatpat.
Haatuw mwachoh we sa soer bo, "Si be mweri
soelmol choal tattelel hapatpat. Ir mele re be hatiugili kofach.
Iwe ngo iy golae chog lea re be soer bo iy be hangiug." Re sa
chiufangal re sa loh. Re sala mweri ir choal tattalel hapatpat
kowe soelmol. Ir choal tattalel hapatpat kowe ilae, mael kowe
toet.
Iwe ngo iy choal pakkel mael we sa soer bo,
"Yaeb. Chil mel chog semal lea si gbe kassiyae." Sa mammal iy
haatuw we sa soer bo, "Haramwo ngo ye tiufil chog lea iy be hangiug."
Iwe, re sa wa chiufangal re sa loh. Re la wiri
iy choal tattalel hapatpat we ngo ye mel yiuchiul sehay irea.
Semal mongki iy melwe. Meterrael mele iy monki we. Re sa hapatpat
iy haatuw we mo choal pakkel mael we ngo iy mongki we sa tattalngae.
Re la moal irel hapatpat ngo iy mongki we sa soer bo, "Ha paliyeyloh
irel iy tafich lae bo iy blae kamaahoy hare kattoes."
Iwe re chiufangal re sa loh irel iy tafich
we. Re la hola iy tafich we ngo iy haatuw we sa soer bo, "Ho sa
wiri lea kattoes." Iwe ngo iy mongki we sa kkaengaliu bo, "Harahlong
lal iy tafich lae. Iy dipli iy be wiri mala wiuliuliumw yaamw
matamwoal mel lal tafich alae." Haatuw we ye hasi chog, harahlong
lal iy tafich we.
Melwe ye la mel haatuw we lal chomwoal we ngo
iy mongki we sa kkaengaliu chol pakkel mael we bo, "Kamaahoy,
tayor seral lea haatuw lae be chiil holah." Sa rray iy choal pakkel
mael we. Sa soer bo, "Haatuw, tayichaelmwo seral lea ho be chiil
soer bo ho be hangiyey." Iy mongki we mo choal pakkel mael we
re sa maligli haatuw we ngo hadal bo sa ngaanga iy haatuw we.
Iwe ngo Meterrael sa ttawul sa soer bo, "Oooy,
hale buudoh pangami bo sa mwoal yaach koahomw." Re sa hamdaedoh
ir yalweech kowe sibis re sa mammal chog bo chiil me iy haatuw
mwachoh we lal tafich we.