Table of Contents

Ngaeng Meda?
written by: Mariano Laimoh
illustrated by: Starla Stone

Mala Matamwoal Maey
written by: Mariano Laimoh
illustrated by: Eric Woo

Geech Mo Pahow
written by: Isaac Langal
illustrated by: Joy Goodenow

Hareg Mo Fla Re Haagurum
written by: Mariano Laimoh
illustrated by: Eric Woo

Sa Chiuloh Melwe Kkamlal Chael We
written by: Mariano Laimoh
illustrated by: Carrie Shiramizu

Ngaeng iy seyai mo seyai.
Ibe mmach ngo imae parangrang.
Iy harawraw le ibe chil maraw.
Mwiliy re dipliyey le ibe mmach.
Ngaeng meda?

Ngaeng iy mwitiyal.
Iy mae mel lal laeng.
Ye choalop chillay lal laeng.
Ha ma wiriyey lloebong.
Iy wechich taeng maram.
Ngaeng meda?

Iy tabaliyel ngo iy harawraw.
Iy mae pappallengloh yee iy bla masow ngo isae paleng.
Yarmat re ma foeriuyey bo yaar maar.
Ngaeng meda?

Iy mae werr loebong.
Iy mae mel lal laeng.
Iy paleng taeng fis.
Iy te bichikkar.
Ngaeng meda?

Yarmat re ma yiulimiyey lea re be batbat.
Re wa ma diudiuliyey lea re be bichikkar.
Iy mae mel lal teeng.
Ngaeng meda?

Ngaeng iy wochog chael.
Iy mae mel lal teeng.
Be pach ngaeliyey chog yaef ngo isae bbul.
Yarmat re ma hasiyey bo chal misiin.
Ngaeng meda?

Iy bbech.
Fael seew isaechal ngo fael seew isae mwormwor.
Iy buudoh mo irel chalddiul karbow.
Rema hasiyey bo lemaer yaliweech.
Ngaeng meda?

Ngaeng iy bichikkar.
Iy mae mel lal laeng.
Iy mae hawere ngo iy habichikkara fiuliuy.
Lerrael chog mele hamae wiriyey.
Ngaeng meda?

Iy mae soomw mo soomw.
Iy bw mmach ngo sa kkael yaay rochuppung. Yalweech re be yiulmiyey ngo ma rochuppung yewear.
Ngaeng meda?

Ngaeng iy tabaliyel.
Iy mwal.
Yarmat re ma hasiyey bo mel halear sasimi.
Yor fasoey.
Ngaeng meda?

Iy sar yiuloel taeng mengaeg.
Yarmat re ma hapleyey woal layen.
Re ma taptap ngaeng le re be moal irel diudiu.
Ngaeng meda?

Ngaeng iy sar tabaliyel loh.
Iy be cho ngo isae mwoach llomwlomw.
Yarmat re ma hasi piuyoeloey bo hooch.
Yarmat re ma yiulmiyey.
Ngaeng meda?

Iy mae ppungdiy mo lal laeng.
Iy mae haloyiuloh faormel.
Yarmat re ma tolmiyey lal taeng.
Ngaeng meda?

Iy halsemwitiyal.
Iy mae yal fadal lerrael mo loebong.
Iy mae gusiur yarmat isae yiulmi chaar.
Ngaeng meda?

Ngaeng iy lallaay.
Toar pecheey mo payi.
Iy mae tatolfool fadal chog liuwel yooch letted.
Iy mae mel fael yooch ngo iy wa ma mel lallngat.
Ngaeng meda?

Iy paleng tangi laang.
Iy mae yop fadal chog woal yiul irea.
Iy rochuppung mo parangrang.
Ye makk fada maka payi.
Ngaeng meda?

Iy mwitiyal ngo iy rochuppung.
Iy te ma yael.
Iy ma harah fadal chog.
Be sardiy siukar soelbos ngo isae buudoh iyang.
Ngaeng meda?

Faaw pecheey.
Iy mae mongoy pisil mongoy mo yiul waliuwol mo cho.
Iy mae mel lal chomwoal.
Yalweech re dipli maka talngey irel siussiul.
Ngaeng meda?

Faerea pecheey.
Iy mae mel ligtam ngo iy wa ma mel iliimw.
Iy mae ddab gech.
Iy mae mongoy gech.
Ngaeng meda?

Faerea pecheey.
Ye sar lallaay iyoey taeng karbow.
Kaboiy kowe lal kachido re ma dageyey.
Ngaeng meda?

Faerea pecheey ngo ye mwochoch talngey te taeng karbow.
Iy mae mel Yochlap.
Re sa lliyey bo iy mae hangiloh yiul fadah mo floras.
Iy mae hatwasi yaal yarmat fadah.
Ngaeng meda?

Hal riurea pecheey.
Yalweech tarmwal re ma haruprup irey.
Iy mae koegoe lemaerral.
Ngaeng meda?

Yor payi le iy mae yal iyang.
Iy rochuppung ngo iy mwitiyal fael haengaw.
Yalweech tarmwal re ma pachingko giliyey isae ppungdiy.
Iy mae mongoy uwael irea kowe ye mmach.
Ngaeng meda?

Yor pachay ngo yor yingiy.
Iy mae mel letted.
Iy llay irel fraypang mo siussiul mo hamad.
Ngaeng meda?

Toar chiiy.
Iy machagchog hames.
Iy llay irel fraypang.
Iy mae mel lalngat letted.
Yarmat re ma hasiyey bo paar mo halear.
Ngaeng meda?

Faerea pecheey.
Iy mae mel iliimw mo liuwol waliuwol.
Iy mae ngarsi ngarsi uwael yadool sa ppungdiy.
Haatuw ma ddabeyey.
Ngaeng meda?

Ye choalop haddoy.
Iy mae mel fael porow mo fael chapil irea mo liuwol chofar.
Iy mae geesi geesi cho yee la bang ngaeliyey isae hangi.
Iy llay irel siussiul.
Ngaeng meda?

Yor pecheey ngo yor paeyi lea iy mae yilloh letted iyang.
Iy mae biidah wolfiuliuy isae faed iyang.
Be seew chog yaay faed ngo choalop choalop fadiyey.
Yarmat re ma hasiyeyloh woal.
Magmwog re sala lliyey mo iyang.
Ngaeng meda?

Faerea pecheey.
Iy paleng taeng haatuw.
Iy mae ddab haatuw mo haluuf.
Semal lea bo ssoong ngael semal, sa soer bo be ngaeley hoalbuw we yaay.
Ngaeng meda?

Iy paleng siugfed chog taeng laamw.
Pangal foarmel ngo imae yop iyang.
Yarmat re ma halwayey mo woal halear.
Ngaeng meda?

Mala
Matamwoal
Maey

Ye mel seew fiuliuy lea ye mel sehay irea lea ye foad loechoechoel. Ir yarmatal iy fiuliuy we re toglae hare seew irea medae iy melwe. Yarmat re ma buudoh mo paangal loebos bo re be kamaahoy iy irea we semat. Ye semat iy irea we bo, be buudoh lea re be siupi sera mokwe raal ngo sa pungpungway yig mo iyang lea chiil moalow.

Iwe ir yarmatal fiuliuy we re te ma loh fetae bo be mmwal chog halear yig ngo re sa loh irel iy irea we re sala siupi sera iy mokwe raal sa pungpungdiy yig mo iyang. Iwe semal ngo ye roprop hal sa loh lubugtal sala hamad. Sa mwomwaay chog depear ir choal fiuliuy we irel iy irea we re sa yolbuwloh lyang.

Iwe ngo paangal yaar ma siupi sera iy raal ireawe ngo re ma rongrong yael yarmat tettaengdoh mo soelbos chog mo woal iy fiuliuy we. Iwe ngo ye wochog yael semal feafel taeng. Ye ma tettaeng ngo ye kakkafaelpech bo yarmat re towe ma siupi raal iy irea we. Sibis ir yarmatal fiuliuy we re sa soer bo, "Hadal bo itey mele ye ma taeng lea si be siupi sera raal irea le? Siyae mweari Si be kassiyae hare medae mele ma ila sangal iyang."

Re sa mwadar liuwol iy fiuliuy we re sala mweari fadaley iy ramtawe ma taeng lea re be siupi raal iy irea we. Re sa mweari mweari yee sibis re la wiri lea ye mel liuwol waliuwol. Semal feafel iy melwe. Re sa kassiyae hare medae mele ye ma taeng lea re be siupi raal iy irea we iyang.

Iwe ngo iy feafel we sa kkaengaliur bo iy irea we mele ye be fang halear maey. Ye wa kkaengaliur bo toar tappel iy irea we woal paangal fiuliuy, iwe ngo hare re be ma siupiloh chog mokwe raal ngo foetoet ngo be mes iy irea we.

Irel yodla ngo teediyor mwo semal lea ye wiri seew maey. Re sa kkasiyae iy feafel we bo, "Lea yor seew foarmel lea maey idal?" Iwe ngo iy feafel we sa kkaengaliur bo, "Hare ha be ppoaloh mo irel yaami ma siupi makla raal irea la ngo foetoet ngo blea buyoy makla uwaal lea ye harawraw. Iwe ha sa gilsi makla uwaal ha sa hamad halmi lea ye mwomwaay.

Iwe ir yarmatal fiuliuy we re sa talngae melwe yalool iy feafel we. Tayissiulay mo wolmwiril melwe re taay siupi mokwe raal iy irea we ngo sa buyoy uwaal. Re sa gil halear iy mokwe uwaal iy irea we re sala hamad. Re la mongoy ngo hasafaliuy yaal mwomwaay. Iwe re taay ma siupi mokwe raal iy irea we bo re dipli iy mokwe uwaal.

Re sa kakk mokwe wahral re sala fadagiu fadaley liuwol iy fiuliuy we yee la choaloploh maey woal iy melwe faliuyear. Ilae, gel, towe mmwal chog halamw yig ho sala siupiloh raal halamw maey bo de toar yig lea ye buyoy sala tea yig ngo tea maey. Sa si.

Geech Mo Pahow

Healwe geech ma mel woal seew fiuliuy. Mala imwal ye mel lal siibol sehay fotoiy. Ye mel seew teraap taraapal le ye foaru lea ye ligdiy mo yiuchiul iy foroiy we.

Ye mel seew fiuliuy lea ye llagngal iy melwe fiuliuyal iwe ngo haliye ye sor ddaawloh. Paangal lemaeliyel ngo belea la mwaroro imatal iy melwe imwal yiuchiul iy fotoiy we sa la kakalloh chog woal iy fiuliuy we ye llahdoh. Haasfaliuy yaal sa kakabele chog hare be yoh lea be loh be la wiri iy fiuliuy we seew.

Lemaeliyelel ralawe seral ngo sa biidiy hataalpiy sa la kakapakmaa fadal iyang ngo ye kakalloh woal iy fiuliuy we ye llahdoh. Sa daddarfadal woal iy piiy we ngo sa haasfaliuy yaal chang chog dapal lea be la wiri iy fiuliuy we seew. Iwe ngo ye la chichiy hare be yafloh ngo ye gola lea towe paegel hola iy fiuliuy we seew ngo sa soeloh.

Chil iwe sangal yaal daddarfadal woal iy piiy we ngo ye liuliuwal tamwaayloh chog ngo healwe pahow sa la yil taweydoh piiy. Iwe sa kakamaahoy iy pahow wee ye sala mmaeng ngali lea be kachapara iy pahow we.

Melwe chog ngo mwaal sa hareprep ngal taed. Sa biidiy yee mwachngatted ngo mwal ye la mwarrodiy mo iyang.

Iwe sa ffasangu iy pahow we sa kkaengalu bo, "Harepdoh mo igea bo iy be kkaengalug seew foarmel." Iwe, iy pahow we sa yillong yee lengchel chog ngo ye la haseserdah mo iyang.

Iwe ngo sa kkaengaliu iy phow we bo, "Ho gola seew formel, hamam geech ila ha choalop mo imwoami paangmiloh pahow. Ila mwo hala tteiy fangal paangmiloh mele pahow ngo ha chil choalop chog geech mo imwoami." Iwe chog ngo ye la ssongloh iy pahow we iyang.

Iwe sa kkaengaliu iy gech we bo, "Yeab, towe yoh. Hamam chog pahow mele ha choalop. Ila mwo ho la hatteiyiliirdoh paangearloh geechel faliyey ngo ha chil choalop chog pahow mo imwoami."

Iwe resa kkapata fangali bo semal ir ngo ye la fasangiurdoh choal fiulyal bo re be paapaa sibis ir lea re choalop. iwe healwe geech sa ddar sa hamdaedah luwul fiuliuy sa la fasangiurloh paangear mele gech. Toar semal gech lea ye mel mo soelbos mo woal iy melwe fiulyal lea ye tea la fasangu. Re sa la rool tteiy fangal ngo re biidiy re sala rool tteiy mo mataarol iy fiuliuy we. Si bela kalloh ngo si taiy wiri siyael geech yaar rool tteiydoh.

Melwe iy geech we ye foaru ngo wa ila chog sangal mele iy pahow we ye sa foaru. Ye wa loh sawa la hatteiyiliirdoh paangear mele pahow. Semal mele pahow lea ye la mel mo soelbos ngo ye la fasangudoh. Re sa roodoh re sala hapespeseerdah mo mataarol iy fiuliuy we. Si bela wa kalloh ngo si tewa wiri siyael pahow yaar lohloh yee re la llefidiingal peegilleng.

Melwe iwe sangal ngo iy geech we sa la siuway mo hataalpi sa kkaengal iy pahow we re mwoal kkapatapat bo, "Aaei, kkamaahow, ngaeng mele iy he matamwoal paengumi pahow. Iy be igil moall ngo gel ho sa mwoach paengumam geech. Ha sa fel, ha chapiy yaemi ragloh mo igea hasa loh yee ha la hola piiyel fiuliuy la ye llahdoh mo iglaay. Ha sa rongrong?" Iwe ngo ir pahow kowe re soer bo re sa rongrong.

Iwe healkowe pahow re sa rag chog mo mataarol iy melwe fiulyel iy geech we re sa loh loh yee re la hola piiyel iy fiuliuy we seew we ye lahdoh. Iwe ngo iy geech we sa soer bo, "Ha sa fel?" Iwe ngo ir pahow kowe re sa soer bo, "Ngoa, ha sa fel." Iwe ngo iy geech we sa kkaengliir bo re be hapespeseerdah woal taed bo iiy ye belea dar woal mokwe chemwear bo ye be paengiir.

Iwe healkowe pahow re sa la hapespeseerdah ngo iy gaach we sa lutlut woal mokwe chemwear lea sa paapaa sa darngal iy fiuliuy we seew we ye llahdoh. Sa paapaa chog sa loh yee la buulong mataarol iy fiuliuy we. Melwe ye la siu woal chemwel pahow we ye haseserdah woal piiyel iy fiuliuy we seew ngo mwaal sa la ttagul sa mamal.

Iwe ngo sa so bo, "Tahallaeng yaemi buchuppuchloh hami paangmiloh pahow ngae. Hea togla bo iy kachaparaahmi chog iy melwe bo iy luluwaley lea iy be buudoh wiri faliyey ngo iy gula lea towe mmwal bo iy tiwe dohdoh lea iy be yafloh chog. Iwe iy sa kachaparaahmi chog ngo hami ha sa la chaparloh iyang. Ila ha le mel bo ngaeng iy bele loh woal fiuliuy be iy be la yasfaliuy fadal iyang."

Iwe, mwaal sa luwalley lea belea lut chog mo woal melwe chemwel iy pahow we ngo ye la chobdiy mo wulpiy. Lea melwe sa mmeal lea be lea ppalang seew liut bo be la chobdiy mo wulpiy ngo iy pahow we ye ttongoadah chog sa la giusiu melwe pachal. Iwe mwaal sa rrigaegili ngo sa ppalang iy liut we yaall ye la chobdiy mo wulpiy ngo taiyorlog pechal bo iy pahow we sa giusiuloh. Sala ngaanga woal iy piy we ngo iy pahow we sa kkaengaliu bo, "Ilae mala paliyel mele si ma kkachapar ilae." Sa yilloh iy pahow we ngo iy gech we iwe sa ngaanga chog irel baeregel melwe pechal.

Chiil ngaanga ngo sa buudoh semal yalius mwomwaay irel sa kassiyae hare medae mele ye tettaeng iyang. Iwe ngo iy gech we sa kkaengaliu bo, "Iy towe taeng lea iye tayorloh pechay bo semal pahow hattareng sa ffichngaeloh." Iwe ngo iy yalius mwomwaay we sa kassiyae hare medae chog mele ye feoriu ngo iy pahow we sala ffichngaeloh iy melwe pechal iyang.

Iy gech we sa buudoh kakkaengaliu mokwe ye foer ngaliirir pahow kowe. Iwe ngo iy yalius we sa kkaengaliu bo, "Iwe, ho sa mwoach meefi hal kachapar? Hare ho tea kachaparaar ila ngo toar mele re be foer ngaliug. Ilae igla iy blea foer pechamw ngo tayor seral lea ho be chiil ma kachapar, ho sa golae?" Iwe ngo iy gech we sa soer bo, "Ngoa." Iy yalius we sa buudoh ffag taefey ngo ye hasi chog seyal yal yamwiyemw sa buudog happachadah bo pechal iy gech we. Iwe sala rrayloh iy healwe gech bo sa yor pechal ngo ligidi chog bo toar yiulel iy melwe pechal. Ilae faal lea tea ma yor yiulel mokwe pechear gech iyang.

Hareg Mo Fla
Re Haagurum

Seral ngo healwe fla ye kalloh sala wiri semal hareg lea ye mel hataelpiy. Sa loh iy fla we sala mmaligli iy hareg we. Sa kkaengaliu bo, "Tahaliitag yaamw tayittir ngae. Choe kamaahoyey lea iy be yilloh." Sa yilloh iy fla we lea hasafaliuy melwe fadal.

Iy hareg we sa kamaahoy iy fla we yee, la tefaeldoh ngo iy hareg we sa kkaengaliu bo, "Kattoes bo ho mmid ho fla ngo ngaeng iy tayi mmid. Iwe ngo haffedeg chog bo iy hatiuwgili lea si be haagurum ngo iy be hawaagliug. Fla we sa soer bo, "Tamwachog yewamw ngae. Be ifae sangal ngo ho sala hawaagiliyey lea iy be yilloh ngo iy wochog ffis, ngo gel ho be harahloh ngo ho wochog semal yiloolap kowe blea mes."

Iwe ngo iy hareg we sa kkaengaliu bo, "Ilae ngo siyae haagurum waalsiu. Si be chap mo irel porow le siyaeloh irel liu laay ye harepdiy mwachngatted. Gel ho be yilloh matal hataelpiy la ngo ngaeng isae harah wulpiy."

Iy fla we sa mammal mammal ngo sa kkaengaliu iy hareg we bo, "Ho halse mwitiyal. Be ifae chog sangal ngo isae golae loboes le ho sa hola?" Hareg we sa kkaengaliu bo, "Aek, ye mechrag hames. Ho be ma yiyilloh ngo be ma meal ngo ho sa ffasangiuyey ngo ngaeng isae mmwalili." Iwe sa yiyilloh iy fla we lea sa mammalloh chog.

Iwe ngo iy hareg we, toes bo ye hal seew mwitiyal ngo ye mwomwaay chemwal. Melwe ye bongdiy ngo ye sa dahar yelael piy we lea sa hapatpat ngaliir paangearloh hareg kowe re mel wulpiy. Sa soer bo, "Ha be tipingiyey bo si be kamaahoy mele si be foer ngal fla le sa kkeal hames yaal habos."

Sa kkaengaliur ir mokwe maerereel bo re be ragreg chog mo irel porow we be chaep yaar haagurum mo iyang re sa ragregloh yee re la hola liu we ye harepdiy mwachngatted. Iy hareg we sa soer bo, "Waalsiu lea fla we be foffoas bo be kamaahoy hare iyae mele isae hola, ngo semal haami sa mwalili. Ilae ngo ye be soer bo ngaeng chog mele iy hamwo."

Ir hareg kowe wolmaerereel re dipli iy liuliuwal we yaal. Iwe re sa soer bo re be foeriu. La llemaeliyel chog rallawe seral ngo re sa chiu fangal iy hareg we mo fla we mo lengchel porow we be chaep yaar haagurum mo iyang. Re sa hafedlae mo loboes we ngo re sa loh. Sa loh iy fla we lea wochog bo fadal yoangol piipi. Iwe ngo iy hareg we tea ddar bo ye mwarro chog iy loboes we sa mammal chog. Sa soer bo, "Igla, ngaeng mele iy ble mmaliigliug ho fla."

Tayissiulay ngo sa mwalilidah iy fla we mo letted sa soer bo, "Hareg, hareg, ifae gel?" Iwe ngo semal ir hareg kowe ye mel wulpiy sa soer bo, "Ngaeng iye iy mel chog siugfed mo imwoamw."

Melwe ngo fla we sa harttangali toet mele fadal. Sa memmeal chog lea blea chengaegloh mo woal taed. Sa loh toet yee, ngo sa wa ffasangiu iy hareg we. "Hareg, hareg, ifae gel?" Iwe ngo semal ir hareg kowe sa wa mwalili sa soer bo iy ila ye chiil mel chog mo imwoal. Iwe ngo iy fla we ye harttangali toet fadal. Sa iwe sangal chog. Be ffasangiu iy hareg we ngo semal ir hareg kowe ye mel wulpiy sa mwalili.

Sa kkeal kkeal yaal ssoong iy fla we. Sa hasafaliuy melwe loasosool irel melwe sala harttaloh fadal. Melwe ye la hola iy liu we ngo ye la kalladah, semal hareg iye, sa ssiulay chog yaal mel lal chapil iy liu we lea tea la sar hachigchig mwo. Melwe ye bbeadah iy fla we ngo iy hareg we ye mel lal chapil liu we sa soer bo, "Yak, fla, ho mwoach dohdoh melwe?"

Sa mmeal chog lea blea ngaloh iy fla we irel yaal ssoong. Sa lliutdah mo liuwol taed yaal la ddubloh melwe matal yewal irel chapil liu we. Sala chechengaegloh irel chapil iy liu we.

Sa giurfadal giurfadal yee mmahosloh serea melwe matal yewal ngo ye mwoach ppungdiy. Sa tagiul sa yiyillway mereaway lea sa siugfed mo siugfed. Ye la liuliuwaley bo hare be maliigliloh liuwalel iy haagurum we, towe mmwal lea be maliigli bo sa mmwochooch serea iy melwe matal yewal. Sa chaep chog irel yodla sa buudoh yee la holadoh iye igla lea paangearloh fla ngo sa mmwochooch chog serea matal yewear. Iwe, sa si.

Sa Chiuloh Melwe
Kkamlal Chael We

Ye mel semal feafel lea tayor riil ngo ye wa toar loal tarmwal. Hal semal chog tarfeefel mele loal. Re haffohoy iy yalweech tarfeefel we mo melwe sill. Tea ma yoh halear mongoy bo chiil yalweech iy tarfeefel we lea bla ffag fadal halear. Ye la sub iy tarfeefel we ngo sa yiloolap iy melwe sill. Sa moasiusloh melwe yiul chemwal ngo sa rrefloh melwe woal matal. Sa tayikofloh chog depel iy yiloolap we. Ye ma liuwalley loh chog bo hare ye be lefeechig tefael.

Ye ma soerloh chog bo, "Farhabel ngo isae lefeechig tefael." Iwe ngo seral ngo sa rongrong kaptal seew chael lea ye mel liuwol waliuwol lea rochoakae re sa yiloolap mo mwalallap re be buulong diudiu ilal ngo re ma tarmwal mo lefeechig tefael. Melwe chog ngo iy yiloolap we sa fasangiu melwe loal re sa loh re bla mweari iy chael we. Ye ssiulay yaar darloh bo ye ddawloh lliuwel iy chael we.

Iy tarfeefel we sa kassiyae iy melwe sill bo, "Iyae mele siyae lolloh iyang? Iwe ngo iy yiloolap we sa kkaengaliu bo, "Si be loh irel seew chael." Te kkaengaliu iy melwe loal kkofal iy chael we bo ye liuliuwaley be haliuwae ngali iy melwe loal melwe ye blea la lefeechig tefael. Re sa loh chog yee re la buudoh irel iy chael we. Hasafaliuy yaal mwomwaay iy chael we bo ye ssog floras iyang lea ye tabaalililoh melwe ngachel. Re hola chog iy chael we ngo iy yiloolap we sa kkaengaliu iy melwe loal bo, "Widiyey chog igae bo iy be loh iglaay ngo towe ssiulay chog ngo isae tefaeldoh."

Sa loh sala mmwuslong lal iy chael we. Sa yilldiy lal melwe hapil iy chael we yee la bbedah. Sa yaff ngal ngachel iy chael we ngo sa lefeechig tefael. Sa biidah mo lal iy chael we sa hamdaeloh irel melwe loal. Sa kkaengaliu bo, "Kallodoh layi. Ho te dipli mele wuliulliuy lea isae lefeechig tefeal?" Iwe ngo iy melwe loal ye kal ngali ngo ye te mammal. Sa kassiyae iy melwe loal bo, "Ho taay golaeyey?" Melwe loal sa kalngali ngo sa yiuchgiu melwe chemwal.

Iy yiloolap we sa soer bo, "Ho lea buudoh layi bo si blea biidiy irel melwe imwach." Iwe ngo iy melwe loal taay mwechal bo sa soer chog bo, "Ngaeng iy towe dabooh bo iy be widi chog melwe seley." Iy yiloolap we ye la kkaengaliu kkaengaliu iy melwe loal bo iy mele sill ngo iy yalweech we sa yiuchgiu chog melwe chemwal bo teeyi iy melwe sill.

Iy yiloolap we sa darngali bo be hasi ngo iy yalweech we sa ddar taengi. Sa soer chog bo, "Te gel melwe seley. Melwe seley sa yiloolap, ngo gel ho chiil lefeechig." Sa loh mo real chael we serea sala tattaengloh chog mo iyang.

Iwe iy melwe sill sa wa lliutlong lal iy chael we. Sa ddiulong ngo ye bbeadah hasiigsiih yee ye wa la yiloolap tefael. Iwe ngo ye loh irel melwe loal sala mmwalili ngali sa soer bo, "Ngaeng iye le." Melwe loal sa mmwus ngali sa hammwachiuloh. Iwe iy melwe sill sa mwoach golae lea toar pelal yaamw la yiloolap hare lefeechig gel semal yarmat ngo, semal mo loal ilae re hachangiir fangaliir chog.

Irel yodla chog ngo sa chiuyloh melwe kkamlal iy chael we bo kkapatal iy chael we ilae semal yarmat ngo be hal seew chog yaal ddiulong lal iy chael we. Iwe ngo iy yiloolap we iwe sa choalop yaal ddiulong ddiulong lal iy chael we. Iwe re sa ligdi iy chael we ngo tayorloh iy melwe semal lea be ddiulong ilal ngo sa tarmwal tefael hare ye lefeechig tefael. Haramwo semal yiloolap kowe sa ma ssohsoh chog be buulong lal iy chael we ngo bla bbeadah, ngo taay lefeechig tefael bo sa ffoerol chog hare ya far kkealloh toet yaal yiloolap.