written by Hanover Ehsa

designed and illustrated by J. S. Santos

Mie kisin pwutak silimen kin kalap kohla pampap nan sed. Eri ansou me irail kin papehla nan namwo ah lahp me adaniki Tika kin werkihda:

"Poako! Kitail tang!" ahri e kin pwururin pap pwe lahp teiko en kin masepwehkada. Keti ara pil wendieng ara pap oh lel nan wasa pedepedo. Ira kesihnenda kilengila Tika melahn mehdengki ah kouruhr pwe e pitihra ah ira pil kamehlele.

Lahp teiko mwehl ahpw ira pil mendahkihla. Ira eri pil pwurala pampap. Ahpw ira solahr iang keila wasa loalo. Tika ahpw kin wiaseli soangen pap akan nan wasa loalo; e kin duhdi oh pwarada ih kadekedek. Ah lahp teiko pil men iangada duhdi ahri ira papehla rehn Tika.

Irail wie pampapseli, de duhduseli wasa loalo ah iet, Tika pa kin weriki, "Poako! Kumwa kilang poakohn!"

Lahp oko pil oudahte papolongala wasa pedepedo. Ira pil kilengila Tika pil wie sansarahki ah kouruhr.

"Nahn keieu aramas pitiniau kowe," lahp oko nda. Ah Tika kouruhr. Eri ira wie mihmi wasa pedepedo oh ira kohla kommoal nan pihko. Ansouo Tika pil lemedahr en kohla rehra. Eri e kin duhdi, pwarada oh pil werkilahng lahp oko me mie poako nan sedo. Eri e saik papala rehn lahp oko ah uhdahn poako men pa kohdo rehn Tika. Tika kilangada ih masepwehkada oh weriki me poako ah lahp oko sohte mwahn tehk pwe ira sohte kamehlele. Poakoh kohdohte tahr apali nehn Tikao. Tika eri mwur kihridi.

Ansou me e pwarada ahri e weriwer ndinda lahp oko en kohla sewese ah ira kin kilengilahte kouruhr pwe ira lemehieng me e likilikamw. Ahri poakoh pil pwurodo ih tahrasang neh teio. Ih ansou me lahp oko kadehdehla me Tika olahr, ahpw pwandala pwe neh ko koaros tokisangehr. Ira eri kohla papikihlongehng ni oaroahro.

Ih Tika eh ahpw diarada me likamw ansou koaros me suwed pwe ansou me e nda mehkot me mehlel, sohte me kak kamehlele.

ME PAHN WIAWI:

1. Kiheng lepin lokaia me konehng de pwungieng nan blank de lain kan.
   1. Ansou me irail kin papeila nan namwo, Tika kin kalap weriki me mie ____________ . (poako, sarau)
   2. Mwurin pak kei me Tika werki me mie poako, lahp oko sohla ________ _________. (kamehlele, poakapoake)
   3. Me suwed likamw ansou ____________ pwe sohla me pahn ______________ ansou me ke pahn, nda _____________ me mehlel.
2. Peidek: Sounpadahk pahn idek rehn tohn skuhl kan (discussion).
   1. Soangen pwutak dah Tika?
   2. Ia duwen ma kowe (kumwail) me Tika, ihs me ke pahn kapwokohnki omw ohla rehn poakoh? Pwikida?
   3. Ah ia duwen ma kowe (kumwail) me pwutak teiko, dahme ke/kumwail pahn wia ansou me Tika kin pitihuk/pitih kumwailo?
   4. Ke/kumwail leme Tika sohla pahn pwurehng likamw de pitih aramas?
   5. Ma kowe/kumwail me neh koaros tokisang, dahme ke/kumwail pahn wia?
3. Ntingiada ehu koasoai mwotomwot me mouri duwehte met; me kin imwikihla iren padahk de mehn kaskuhl.