| 
written
and illustrated by Ioanis Santos
Mahs nan wasa me adaniki, Erek nan Eihr.
Mie lialaud men. Liho kin kaudekiong Nahnullap.
Kedekede oh rahn ehu Nahnullap ahpw kadarodo kisin
mwahmw kis. Kisin mwahmwo ede Limwaluhlu. Nahnullap
kadarodo mwahmw menet pwe liho en kang.
Mwekid
wet wiawi ni manaman ehu. Liho mwomwohd oh ihte e puriamweiki mwahmwo
ah pitipitirek nan ah pehso. Ahri e ale ih eri kalewihala, ih eri
kang.
Mwurin
ah kang mwahmwo e ahpw diarada me e liseiandahr. Murin ansou kis
liho ahpw neitik. E neitik pwutak riemen. Ih eri kiheng adara.
Ouhndau en Iap oh Ouhndau en Eihr.
Pwutak
ko ahpw kin wie duhdu nan kahlipw ehu. Muri ah ira uhd lemehda ira
en kohla duhdu ni pihl ehu. Pihlo adaniki Pilenauleng. Mwurin ara
duhdu ni pihlo, ira ahpw uhd kohla duhdu ni oaroahr ehu.
Rahn
ehu ira ahpw inoukihda ira en wiahla mwahmw. Mepwukat wiawi ni manaman
en Nahnullap.
Ira
eri kawada pehra kan pohn tihnsawara kan ira eri pampapeila nan
sedo. Ira pikila oh wiahla poako. Nahnullap ahpw kasapwuilirahda
ira en kaun sedlap. E pil kiheng ira mwarera Sau Sedilap. Ara nohno
lialaudo ahpw awiawih ira oh pwang.
Ahri
e kohla ni oaroaro pwe en kilang ira. E ahpw lel mwo ih eri tuhong
ira, ara awiawih pwe ira en sakarada. Ira wialahr poako. Ih eri
rahnmwahuih ira oh ih kamwurkinirahla ahd riau. Iet ahd kan: Tenipei
oh Mwahnlil.
Eri iei tepin Poako met oh tepisang dipwinmen.
Liho dipwinmen oh ede Lienerek. Iei met me dipwinmen pelikihki mahmw
Poako.
ACTIVITY
WIEPE:
Sounpadahk en idek peidek kan oh tohnskuhl en
sapeng ni lokaia pwe irail en discuss koasoaiet. PEIDEK:
- Ia oaralap en koasoaiet?
- Dahme lienerek naitikihdi?
- Lienerek dipw dah?
- Dahme pwutak ko kin mwahiki wia?
- Dahme liho kang me e liseiankihda? Ia eden
mwahmwo?
- Iaduwen ma dipwinmen men pahn ohla nansed,
dahme poako pahn wiahng.
|
