translated by HANOVER EHSA

illustrated by DONALD L. BUCHHOLZ

Kilang kilel kan. Dahme kumwail kilang? Soangen ngihl dah me mahn akan kin wia?

Mahn akan/akat men wiahia sounkeseng oh koul. Soungen keseng dah me kumwail leme irail pahn men kesengki?

Mie soangen mahn emen me duwehte oahs ahpw kin tikitiksang oahs. Ih eden soangen mahnet ass.

Mahs mie ass emen kin sounwisik kepwehieng ohl me nainikio. Ass menet kin sounwalahng ni wasahn wiahda pilawa soangen wahn tuhke me kin wiahda pilawa. Eri kedekede oh mwurin sounpar kei ahpw tepidahr luwetala, kaidehn soumwahu ahpw eh mahlahr, oh solahr kak wa soangen wisik me ohlo kin kidahng powe. Eri ohlo ahpw medewehda en kemehla. Eri e saik wia ah asso pein mwilikihda me ah kauno solahr anahne, ih eri

tangasang rehn ohlo. E tang nan ahl me kolahng nan kahnihmw ieu me adaniki Bremen pwe e medewehda me mwein e kak kohia wasao oh iang wiahla sounkeseng de sounkoul. Eri e kohkohla saik kerenla ah e tuhweng kidi men eh pahn mehkilahr ah nget; duwehtehte e ahpwte tangasang wasa me inenen doh.

"Dahkot me olkelik men komwien ngngingngetiki?" asso idek.

"Ohtier!" kidio sapeng, "I sehselahr dahme I pahn wia pwe I luhluwetalahr rahn koaros oh solahr kak pwek ah ahi kauno lemedahr en kemeiehla eri ngehi sopohsang.

Eri met I sehse soangen mour dah me I pahn uhd ahniki."

"I pahn ndahwei mehkot," asso nda, "I kohkolahng Bremen pwe I en wiahla sounkeseng. Ke pil mwahueng iangiehda kita kohla skuhlki keseng oh koul. I kak wia sounkida ah ke nek sounduroamw."

Kidio pil pereniki ira eri kaparada samwalahr. Ira kohkohla pil saik keren ah ira pa pil tuhweng kaht emen me pil mwomwohdehr nan ahlo mesemesen nsensuwed. Likamwete e dilinketeukiher rahn siluh ape.

"Ekei!" asso nda, "pil iet emen. Dahme sapwung mwo souket?"

"Pwe ia duwen?" kahto nda, "mie me kak mesen peren ni tepinwere eh miher nan apwal? I ollaudalahr met oh ngih kat inenen pil konsilahr oh ihtehr me I mwahuki wia, I en mwohdete ahpw karakarawan kitik kan pwe I solahr kak pwakihrailseli. Eri ah lih me nainikinieo lemedahr en pirehieng takai ni tepinwereiet ih kakihriehla, kahrehda I tang dowi. Eri ah peneu pil kin keper kahrehda I sehselahr dah I pahn wia nan irariet."

"Na iangkitada kitail kohla Bremen," asso pil nda, "pwe ken pil iang wiahla sounkeseng oh sounkoul en nan kahnihmwo."

Eri kahto pil pwungki ih iangada asso oh kidio. Mwurin mwo ah irail silimeno lel ni ihmw ieu. Irail aluhla likin ihmwo kasaing kihng men eh mehlahn mweimweiselin koakoroht pohn keilen kehlo.

Ahri asso pil idek, "Dahme ke nohnte wiewiahki soangen lapalahn koakoroht wen me pil kakete pwalangpeseng takai?"

"Pwe ia duwen met?" kihngo sapeng, "ih ngehi me kin kohpada ma rahn akan pahn kin ketipin de soh kahrehda lih akan kin kak lpworada seht de rausis kan oh kak madala. Ah dene ni mensengin rahn sarawiet mie aramas ekei pahn kohdo rehn ei kauno eri dene ngehi me pahn lopitikpene oh kohieng nan suhpw, oh ei kauno ndahngehr kuko en

ahpw lopukasang moangeiet ninsoutiket. Kahrehda I wiewiahla ahi komwuruwur en koakoroht."

"Sohte me mwahusang omw iangkitada pwa, souking," asso nda. "Kitail kohkohla Bremen, mwahusang omw pahn mehla. Mwahu pwe ngilemwen me kehlail. Ansou me kitail pahn kin keseng oh koul e pahn inenen mwahu oh ngillaud."

Eri kihngo pil pwungki, irail pahmeno eri kaparada samwalahr.

Ahpw Bremen me inenen doh kahrehda irail sohte kak lelkihla mwo rahn ehu. Eri lel ninsoutik irail lelehr nan wel oh lemehdahr ren pweiekidi oh kadakahda ketipino wasao. Eri asso ih kidio wendi nan tepin tuhke pwoat ah kahto douda nan kasangen tuhkeo. Ah kihngo pihrdala nan koadoken tuhkeo, wasa me keieu apwalen diar apwal. Eri mwohn kihngo eh pahn meir e ahpw kilengseli mahs ni pali kan koaros en wasao; ih eri

kilangada kisin marainkis eh wie lingilingalingdohsang nan kisin mohskis. Ih eri eker ienge ko me e kilangada marain ehu oh uhdahn ihnw me pahn mi mwo, oh e sohte pil doh mehlel wasao.

Eri asso nda, "Ah na, kitail mwahuen mwesel kohla washn pwe wasaht me kansensuwedin meir." Ahri kidio uhdahte kangala kisin luhwen tihn pwihk kei pwehn pil kak kehlailki. Irail koaros eri pil mweselier kohkolahng wasa maraino mihieo. Irail wie kohkohla ah maraino wie lalaudila. Irail lel mwo kadehdehla pwe nahn imwen sounpirap kei. Eri asso me waila ni wenihmwtoko ih kilenglong nan ihmwo, pwehde ihme keieu laud.

"Iau, dahme ke kilang?" kidio idek reh.

"Dahme I kilang?" asso nda. "Ke pahn kamwaniki! Iet tehpel ieu soh me diren soangen mwenge iou oh soangen mehn niminim koaros oh sounpirap kei me mwomwohd ie ahpw nsinsenamwahuki."

"Met uhdahn pahn konehng kitail," kihngo nda.

"Oh, uhdahn, I men pa kitail me pwihno," asso nda. Eri irail rahpw wie lamalamehng duwen arail pahn kak pwakiasang pwihnen pirapo nan ihmwo. Irail eri pilahniada mehkot.

Asso pahn kihdahla peh ko ni wenihmwtoko ah kidio pahn douda powe. Ah kahto pahn douda pohn kidio ah kihngo pahn mi pohn moangen kahto. Ansou me irail soandier oh onopadahr, ruwes wiawi, irail koaros wiahkintehieu mwutidi. Asso wia ah wer koaros ah kidio wia ah kehlailen ngong koaros. Kahto miauh ah kihngo koakoroht; ni ansouohte irail koaros luslongalahte wahlongalahsang kilahso oh pwalangpene kep koaros me mihmi pohn tehpelo.

Pwihno masepwehkada pwe re lemehieng me eni men me wia soangen ngil ko. Irail eri sopohieisang nan ihmwo soposopohla nan tuhke ko. Ahri pwihn pahmeno ahpw isanikihla mwohndi oh kangala luhwen mwenge ko.

Ansou me irail medehr irail ahpw koakundi lamp oko eri emente pilada wasa me mwahueng en meir ie. Asso pidohi ih ulla phon kisin kumwukumwkis ah kidio limwahn ehu wenihmw ko ah kahto kohla wendi limwahn wasahn kuko ah kihngo pihrda nan temwen ihmwo. Irail eri meirla pwe re inenen pwang.

Ni eh lel nan lukopenpwong oh sounpirap oko solahr kilang lingen mehkot, patehng eh pil meleileidiero, ahri arail kauno ndahng irail me e lemehleme me re sopohda mwahl. Ih eri ndahng emen irail en kolahn mwasahn ma mehlel mie mehkot. Eri emen kohla lel ni ihmwo soahng koaros mwomwen mwahu; sohte mehkot mwesemweseisei. Ih eri kohla ni wasahn kuko pwehn isikada kisiniei ahpw idingada nah masiso, ihte eh pwuriamweiki mehkot riau eh wie okohk limwahn sidohpo.

E lemehieng me mwoalus riau me wie okohko. Ahri e kohla ih pahn isikada kasaing kahto eh ngiringir, wer oh kapihrehng paker kei ni mesen ohlo. Ohlo werte tangala nan wenihmwo ihte eh pil wereiwer pwe kidio ngalisehr apali neho. Ohlo pwurupwurur oh pitisang ih sopohieila likio, pahn mwutidien tang kasaing asso eh kikim kahweo e pa dikidikou rahnsakau kohla. Kihngo mihte nan temwen ihmwo wer nda, "Koak-o-roht-eh!"

Eri ohlo tang dowi kohla rehn ah kauno ahpw nda, "Ohtier! Nan ihmwo mie soangen liet emen me pihrdohte kandipihiehte pil rakih meseie. I tangala nan wenihmwo ah e doakoahki nah naipo apali nehie. Ah I lel likin inmwo kasaing eh wiahng lapalahn wok ieu ni kahweie. I tang ah ihte ei rongala eh werki, "Wahdo sounpirapen wasaht!" Ahpw I pitipitte tang dowi.

Sang ansouo kohdo lel met sounpirap oko sohte pwurheng pwurala ni ihmwo. Ah sounkeseng pahmeno me uhd kousoanla wasao oh diar arail mour me inenen mwahusang mahs.

Ah ih uhdahn me miehn met.

Ih met me sounpirapo lemehieng me eh kilang. Mie pak me kumwail kin lemwikihda ngihl de ngeni mehkot? Kosoiahda dahme ke kilang de rong.