translated by Oliver Johnny

illustrated by Deby Nakamura

Mie ahnsou ieu sounkesik men ahpw kolahr nan welo pwehn kesik.  Ahnsou me E kohkohla nan ahlo ahpw kin kukuwaii, ih eri tuhwongehr lialaud men.

"Meseng mwahu," Lihio nda. "Ke pereperen A ngehi I men nimpil oh men mwenge dahr. Menlau sewesei ie."

Sounkesiko ahpw kihongehr liho pihl oh mwenge. Ahnsou me sounkesiko pahn douluhl ier liho ahpw nda, "I pahn kisikisei iuk pwehki omw kadeken.  Ahnsou me ke pahn kokkohwei nanwelen, ke pahn tuhwong menpihr duwemen ahr pepeii ki sekid ehu. Ke pahn uhdahte kasikih nan werengen sekido. Ke pahn wahda sekido, kihong pohn pwopwomwen A E pahn wei iuk ala wasa koaros ke men kohla ie. Emen mahn oakoa pahn mehla. Ale mohngiongio kowe kedellahla. Ke pahn kin diar mwohni kohl ieu pahn omw uluhlo ni menseng koaros."

Sounkesiko ahpw kalahngan ohng ehr liho ih eri samwalahr. Ni eh kohkohla ahpw kilangadahr menpihr duwemeno ahr pepeii ki sekido. Ahpw kainenehiong ete nah kesiko nan werengen sekido ih kasikih, sekido oh mahn emen pa pwopwidi ong nan pwelo. Ih alehte mohniong en mahno ih eri kangala.  Sounkesiko ahpw alehier sekido oh kihong ehr pohn pwopwehu. Ni eh medewehda me E men lelehr ni imwehu ahnsouohte E lelehr ni imwehu. Sekido inenen manaman.

Sangehr ahnsouo E kin pirida mwohni kohl ieu pahn kin kohsang pahn ah uluhlo.

"Da katepen neii mwohni kohl kat ma I sohte pahn doadoahngki?"  Sounkesiko eri lemedahr en kolahn mwemweit pwe en kak doadoahngki nah mwohni kohl koa. Ih eri rahn mwahu ih ah pahpa oh nohno ih eri samwalahr.

Ahpw kohkohla oh ehu rahno ahpw kilangadahr ihmw kaselel ieu.  Lialaud men oh serepein kaselel men wie kesikesihker limwahn ehu wenihmw tok koa. Ahpw sounkesiko sehse me lialaudo lih manaman men.

Lialaudo ahpw ndahngehr nah serepeino, "Kilang pwe mie mohngiong en mahn emen mihmi rehn pwutako, menseng koaros E pahn kin kihsang mwohni pahn ah uluhlo. Nantihong kowe kihsang reh."

Pwutako ahpw pedelongehr nan ihmwo. E inenen men pwoudkidahr serepeino, pwehki serepeino ah nohn kaselelo.

"Ih ahnsou wet me ke pahn kihsang mohngiong en mahno rehn pwutako met," Lialaudo ndahng nah serepeino. Lialaudo ahpw doaloadahr kep in pihl ehu oh kihongehr nah serepeino en walahng rehn pwutako. Ahnsou me pwutako nimehr pihlo ahpw sahliel kidahr oh mohngiong en mahno ahpw pwopwiiei sang nan ewen pwutako de saunkesiko. Serepeino ahpw alehte mohngiong en mahno oh kedellahla pwehki liho anahne mohngiong en mahno.

Sang ahnsouo sohla mwohni kohl kohsang pahn en pwutako uluhlo.  Serepeino me uhd kin kihkihsang mwohni pahn ah uluhlo. Sounkesiko sohte katapaniki pwehki ah inenen men pwoudiki serepeino.

Liho ahpw uhd ndahng serepeino, "Met ke pahn uhd ale en pwutako ah sekido."

Serepeino ahpw nda, "Menlau eriher pwe kita kihsang ehr ah paii koa."

Liho ahpw lingeringer dahr. Serepeino eri wia dahme liho nda en wiahu.

Serepeino ahpw ndahngehr pwutako me E men kohla ni nahna kilahso. E men ale takai kesempwal kei sang ni nahnahu. Sounkesiko ahpw alehier serepeino oh ira pil pihr kiher sekid manamano. Mwurin ahnsou kis irahpw lelehr ni nahna kilahso. Irahpw rikadahr takai me serepeino men ale wasahu koa.

Lih manamano ahpw wiahier pwutako en meir la pwutako eri meir lahr. Ahnsou me E meirlahr serepeino ahpw alehte sekid manamano ih pihr ki dowi. Sounkesiko ahpw piridahr oh esehier me werepeino wahsang ehr sekido.  Pwutako ahpw nda, "Serepein mwersuwed."

Nahnahu pwe kodon lemei kei me kin mihmi powe. Mwurin ahnsou kis pwutako ahpw kilangadahr kodon koa ahr kohkohdo ih eri mwomwehda me E meir kelik.

Ni en kodon koa ahr lel limwahn pwutako, emen nda, "Kamwetel men met kitail kemehla."

Emen ahpw nda.  "Kitail dehr sair pwe E sohte kak mihmi met. Ahnsou me E pahn kei dahla pohn koadoken nahnahu, depwek koa pahn wahsang.

Ahnsou me kodon koa samwalahr pwutako ahpw kohdahla pohn koadoken nahnahu ahpw iangalahr depwek ehu. Mwurin ahnsou kis shpw pwopwdier nan mwetuwel nan mwetuwel ehu oh inene nan dihpw kei. Ehu oh inene nan dihpw kei.

Pwutako ahpw men mwenge dahr ahpw alehier nappa ehu oh kangehr.  Ni eh kangehr nappahu ahpw kehn dahr me neh pahpwoatalahr. Pil miehier salengo reirei riahu. E diaradahr me E wialahr oahs emen. E pil alehte ehu nappa pil kangala E pa pwuriamwei ki eh wialahr aramas emen.

Ih eri meirlahr. Ni menseng en pweidi manda sang rahno, ahpw alehier ehu nappa mwahu koa oh ehu nappa suwed koa ih wahda.

Pwutako lelehr ni imwen lih manamano ahpw wialahr mwomwen nein nahnmwanki liduhmen. Ih pedelongehr rehn peneineio ahpw ndahng ira, "I weuwa mehn wiahda koanoat en nahnmwarkio mehn wia salad ahpw me inenen karakar rahn wet. I periki nappa kat de mengila kahrehda I sopido met.  I pil kak kihwei pwe kumwahn pil son." Ahnsou me peneineio kangehr nappahu irahpw wialahr oahs riemen.

Soun kesiko de pwutako ahpw kahrehla oahs oakoa rehn soun kamwenge mahno en epwelih ira. En kin poakih oahs mahu pak siluh rahn ehu oh kamwenge pak ehu.

Ohlo en kin kamwenge oahs pwulopwulo pak siluh rahn ehu oh ieremen E kamakam. Ohlo eri wiahier en sounkesiko ah koasoaii koa. Oahs mahu eri melahr. Sounkesiko ahpw pwurodohr oh kihong nappa mwahuo oahs pwulopwulo oh ih pil pwurohng wialahr serepein mwahu men. Soun kesiko oh serepeino eri pwopwoud lahr.

1. Ale ehu doaropwe kowe ntingiedi pasapeng en peidek pwukat:
   1. Iaduwen sounkesiko eh uhd koaloke liho oh nah serepeino?
   2. Mehnia rehn mahn oakoa me mehla?
   3. Iaduwen omw kasawih koasoai wet, me kin wiahda me suwed ki ale pweine mwahu? Pwekida?
   4. Ma kowe me sounkesiko, ke pahn doarehla serepeino kowe pwoudkihla?  Pwehda?
2. Nan ehu doaropwe tohrohr, medewehda mesen nting me sohte kan kowe ntingiedi lepin lokaiahkan ni pwungi.

1. s _ _ _ k _ _ _k
2. l _ h
3. w_ _ _ _ g _ n
4. mw _ _  n _
5. k _ _ l

III. Mahleniedi dahme sounkesik men doadoahngki

Translated from: Children's Reader for Enjoyment

The Salad by J. Ona-Calixihan, G. Evangelista & C. Logue

With permission from St. Mary's Publishing, Manila 1970