written by Keropin David

illustrated by Deby Nakamura

Mahs mahs pwehk sohte ahneki pehnpihr. Pwehk uhdahn menkerep emen. Iei ih emen mahn lemei nanpwungen menkerep tikitik kan. Pwehk kin natihseli mahn laud akan pwe ren poakepoake.

 Ma e kin iang mahn laud akan ah e kin lamaihseli mehtei kan. Irail ahpw kin masak pwehki mahn laud oko. Pwehk ahpw kin kouruhr oh kin nda, "Masakie amwailen." Mahn teikan sohte kin sapeng.

Kedekede oh ehu rahno menpihr oh menkerep ahpw mahwinda. Nin tapio menkerep akan me kanakana. Pwehk ahpw kin kapailokeseli menpihr kan. "Kumwail pil rorok men peliankit," pwehk kin nda.

Mwurin ahnsou kis menpihr laud kan pil lelpene. Irail ahpw tepida keme menkerep akan. Pwehk eri duwallongohng nan tepin kipar oapwoat. E pahn wie rerrerki ah masepwehk.

Ih eri medewehda, "I pahn iangala menpihr. I sohte men iang pali me pahn pehride." Pwehk eri duwalehisang nan tepin kiparo. Ih eri wiahda ah pehnpihr. E rikada winen menpihr me mweredi ko. E ahpw padokohng wihn oko reh ih eri pihr.

Pwehk pihrdahte ah menpihr oko pihrpene kemeseli. Irail keme, keme, keme oh kamwerehsang wine ko. Pwehk eri pwupwidi. E pwupwite wekidekida nanpwungen menkerep akan. Irail pil mwutpenehte kemeseli. Kaht kesehkilahte ngalisasang ikio.

Mahn koaros ahpw sohla pei irail eri pwonte mwutpenehng pwehk. Menkerep akan pwakih pwehk oh ih eri pihrdahla sok pohn rahnmei pwoat. Menpihr kan pil pihrpene keme, keme oh ih eri luwetala sohla kak kesihnen.

Ih eri kirisdihla mwotomwotou ni rahnmeio. Ih me kahrehda pwehk sohla kempokepah. Pwehk pil kin mwotomwotouseli nin rahn tuhke kan lel rahnwet.

I. Wadek lepin koasoai me mi pah kan. Ma lepin koasoaio me pwung ohng nin duwen koasoai me ke apwtehn wadeko ah ke kiheng pwonopwon ni mesen nting P. Ma lepin koasoaio me sapwung ah ke kiheng pwonopwon ni mesen nting S. Ke kak pwurehng wadek koasoaio.

1. P  S   Nin duwen koasoaio, pwehk menpihr men sangete mahs.

2. P  S   Nin tepin mahwino pwehk iang menpihr akan.

3. P  S   Pwehk rikada pehnpihr kei.

4. P  S   Sohla ikin pwehk pwe kaht ngalisasang.

5. P  S   Pwehk iangala menpihr pwe e men kana.

6. P  S   Mahn koaros kailongkihla pwehk pwe e ndahng ihr arail masak.

7. P  S   Menpihr akan inenen masak pwehk.

II. Ntingihdi lepin lokaia me konoahng pohn lain akan. Doadoahngki ehu lepin lokaia pak ehute.

Menkerep  

Pwehk   

Natihseli

Pehnpihr

Wihn

Ikin

Duwallongohng

Mwotomwotou

1. Pwehk padokohng ______________ oko reh ih eri pihr.

2. Pwehk uhdahn ______________ emen sangete mahs.

3. ______________ sohla kempokepah.

4. E tangalahte ______________ nan tepin kiparo.

5. Kaht kesehkilahte ih ngalisasang ______________ pwehk.

6. Lel tahn wet pwehk kin ______________ nin rahn tuhke kan.

7. Pwehk wiahda ah ______________ pwe en kak pihr.