written by Kolden Manuel

illustrated by Deby Nakamura

Dahkot Calories?

Nan rahn pwukat likamwete aramas tohto kin tetehk calories kan me re kin aliale rahn koaros.  Mie imwen mwenge tohto kin kihong pohn dahl akan wen calories me aude mwenge kan me mi nan dahlo!  Pwehn wehwehkihla dahkot calories oh ia eh doadoahk nan paliwar, kitail pahn tepida mahs ni nutrition.

Rahwet science saikinte kak kawewehda ni unsek ia duen cell e wekid mwenge ong kehl.  Kitail pil saikinte kak kawehwehda dahme kahreda cell anahnehkihte ekei songen mwenge ah ekei soh.

Kitail kak ese me mwenge kin kamweremwerdi sang ni e kin patehng oxygen.  Kitail kak nda me e roangala, mehn sohng weh laud en doadoahk wet iei calories.

Gram en calorie ehu iei wen karakar me kakarakarihla gram en pihl ehu ong degree ehu centrigrade.  Calorie me keieun laudkihsang uhdahn wen calorie pak kid.  Sosohng en wen calories me kin mi nan mwenge kin wiawi sang ni calorie laud te.

Soangesoangen mwenge, ni ahr kin roangala nan paliwar kin kihla calories kei.  Karasepe ehu, gram en protein ehu kin roangala nan paliwar oh kihda calories pahieu.  (4).  Ah gram en wih ehu kin roangala nan paliwar oh wiahda calories duau (9).  Paliwar sohte kin lipilipilki mehnia songen mwenge me kihda kehi, ihte en alehdi angiangi de kehl wet.

Wen tohtohn calories me paliwar anahne kin pahsoansang ni wen doadoahk me paliwaro ahneki.  Karasepe, ohl emen me toutouki pound 150 anahne calories kid wenepwiki welihsek (1,680) ma e mwomohd oh sohte mwekimwekid.  Ma ohl menet pahn wia doadoahk tikitik anahnepen calories kan pil pahn laudla.  Met kak lel silikid silipwiki weneisek (3,360) rahn ehu   Ari ma ohlet te pil doadoahk laud anahnepen calories nan paliwere pahn kohda lel wenekid isipwiki rieisek (6,720) nan rahn ehu.  Met anahn pwe paliwaro en doadoahk nsenamwahu.

Seri kan anahne calories laud de tohto sang me mah kan.  Kitail kin doadoahng ki calories tohto nan ansoun karakar sang ansoun lemwilemwir.

Dahme Kitail Kin Menmwengekihda?

Ni ansou me kitail anahnehda mwenge paliwar pil kin mwekidki.  Ari, ia duen atail ese me kitail men mwenge?  Ia duen mwahliel e alehdi rohng wet oh kamenmwengeihkitailda?

Men mwenge kin tepida ni ansou me soangen Nutrient ehu kin sohla nan nta. Ni ansou me soahng wet kin sohla nan nta, rohng kin kolahng mwahliel oh pwedlongehng nan pere ehu me adaneki "Perehn men mwenge."  Perehn men mwengeho ahpw uhd kadarala ehu rong ong mpweihn mwenge oh mwasahl akan   Sang met mpwein mwenge oh mwasahl akan ahpw mwekid mwadangada.  Ma nta alehier itar Nutrient wet ah mwekid en mpwei oh mwasahl pahn wawaila.  Ma ke pahn men mwengehda ah ke pahn rong ngilen nan kapehdemwen.  Met kohsang ni en mpwei oh mwasahl ara mekimwekid laud.

Ni ansou me kitail kin men mwengehda paliwaratail sohte kin inengkihda soangen mwenge dah me mwahu, ahpw wasa me kin tetehk anahn en paliwaro me kin kapehmekin kitail soang dah me iou ni ansouo.  Wasaht pahn pil nsensiwed ma soangen mwengeteieu kitail kin kang.  Kitail sohte kak kihsang anahn en paliwar nan soangen mwenge tehieu, pwe sang soahng tohto.  Soangen mwenge pwukat sohte pahn laud ansou tehkis.

Ari ia pahn werein atail pahn kak momour sohte mwenge?  Met pahn pahsoansang soangoasoange aramas.  Aramas nenen ka kin sohte kehn men mwengehda.  Met pwehki protein me nahkpenehng reh kan nan paliwere kin doadoahk wawai.  Ah me kin mwekidseli kan me kin mwadangete men mwengehda.

Dahme Kitail Kin Pwangkihda?

Fatigue kak wehwehki poison en nan paliwar.  Ni ansou me uduk kan doadoahk re kin wiahda LACTIC ACID.  Ari ma kitail pahn ale pihl poison wet oh doakoahieng emen kidi, kidio pahn pil dangahngahla.

Nan rahn ehu kitail kin kapoisonihla paliwaratail ki Lactic Acid.  Mie songen pihl teikan me muscle kin wiahda.  Met adaneki "Fatigue toxins."  Nta kin uhd waseli toxin pwukat oh kahrehiong wasa teikan nan apliwar ahr pil kin pwangada.

Aramas loalokong kan (scientists) wiahda mehn kadehde ehu.   Re kihsang ntahn kidi riemen. Emen udahn pwang ah emen sohte nohk pwang.  Ni ansou me ntahn me pwango uhd dokehng me sohte pwango.  Me sohte pwango uhd pwangadaah me pwango uhd sohla pwang.

Wekideklahn Fatigue inenen apwal oh kitail pil sohte kak oudahte kiheisang nan paliwar.  Kahrehda kitail pahn anahne kihong ansoun en cell kan ahr kommoal, wasa me ohla kan anahne onohnda, selin mwahliel kan anahne pwurehng sahs, koakon kan anahne weliandi pihlen kamwakid koakon kan me doadoahklahr. Meir udahn kesempwal pwehn koapwureiong paliwar me e doadoah ng kilahr kan oh pwurehng kihong paliwahr kehl.

Ohl men me doadoahk laud ni ah tepel ntinting oh pwangada en dehr meir ah en uhda aluseli.  Seri men me kohsang skuhl oh pwang en dehr meir ah en tangatangseli.

Ia kahrepen wiewia pwukat?  Pwehki ma ekei wasahte ni paliwar me pwangada, ele pahn mwein mwahliel, peh de neh ape, ihte me pahn kamwakidada, iei ma kisehn paliwaro pwon pahn mwekid.  Mwekid laud kin kahrehda pwudo ah kerada.  Nta pitipitla e mwekid iangahki glands (kisinwar teikan) oh met kahrehda ahr sikenieisang nan paliwar soahng siwed akan oh ihr kerehi liki ni mwomwen pihl (pwudoh).  Ari ma ke udahn pwangada me keieu mwahu ken meirila pwe kisehn paliwar teikan ken kak onehda wasa ohla kan.