translated by Oliver Johnny

illustrated by Carrie Shiramizu

Mie lih emen me sohte ah pwoud oh sohte nah pwutak. E nainiki te kisin serepein men me E inenen poakoapoake oh kesempwaliki.

Liho oh nah serio inenen paisuwed. Kanara mwenge kin kalapw sohte itar, pwe serio saikinte kak doadoahk. Ahpw ira kin mihmi pene oh pereperen.

Ahnsou me serio ipwidi, liho sounpar pahisek ier. E tepier mworourou lahr oh pil moangepwet alahr, oh kili pil mwerekirek ier.

Liho inenen nsensuwed ki soang pwukat pwe E men en mwomw mwahu oh mas pwulopwulla.

Liho ahpw nda, "Nei serepeinet mwahu en nohno ki lih me pwulopwul oh masamwahu."

Ehu rahno ahpw rongadahr me mie pillap manaman pwoat pohn nahnahu. E mi nan pwungen ara wasahu oh ehu wasahn kousoano. Dene me mah kan kin duhdihte nan pihlo irail pil pwurehng pwulopwul la. Liho ahpw kahre dahr nah serepeino irahr samwalahr ni nahnahu.

Serio ahpw idek, "Kita pahn kohia ia?" Liho ahpw sapeng, "Kita pahn kilang pillap ieu." Liho sohte kosoiia iong serio duwen pillapo pwe emen kilang serio ah pahn pwuriamwei kio.

Ira aluhwer inenen dohla nan welo. Irahpw lelehr nan wahu ieu limwahn nahnahu. Wasahu inenen lingan. Wahnrohs tohto oh mahn pihr kan pil kokoul seli nan tuhke koa. Pillapo mi nan pwungen tuhke kei oh takai kei.

Liho ahpw ndahng serio, I pahn mwur kotala mahs palio, oh I sohte pahn dohla. Ke pahn awih ie met oh kedehr pa kohsang met.

Liho ahpw samwalahr. Ih duhdier nan wasa loalo. A serio mihmi ekis dohsang.

Liho ahpw pwaradahr oh doudahr. Ih diar adahr me E pwulopwul lahr. E inenen pwulopwul oh masamwahu lahr. Liho ahpw tangalahr rehn nah serio oh nda, "Nei seri ke lelkinie?"

Serio kilenglahng ete liho oh kounsop di. Liho ahpw nda, "ke sehseie lahr? Kilang soangen ei lel lahret?" Serio itikete moangehu.

Liho ahpw pil nda, '"Nei seri, kohdo kita kohla ni imwatahu." Ahpw serio sohte kak mwekid sang wasa me E mihmi iehu. Serio ahpw nda, "I awiawih ei nohno." Liho kapwukapwure iong ete me ih ah nohno mwo. Serio kin itikete moangehu oh sohte men iang liho.

Ahnsou me liho mwomwehda en wahda serio, serio ahpw lingeringer dahr. Serio ahpw nda, "Kaidehn kowe ai nohno." Serio ahpw tomitom kahlek oh lusulus kihier ah lingeringero. Serio ahpw sengisengier oh wendiong pohn takai ehu.

Liho ahpw pwurohng tangala ni pihlo oh lusdiong loale oh duhdi pak kei lahu ih pil pwurohng lialand la. Ih eri eker serio oh nda, "Iet ngehi!"

Serio ahpw tangalahr reh oh nda, "I pwangala awih iuk ahnsou reirei."

E wia kosonned ieu ohng pihlo me sohte me pahn duhdi nan pihlo pak kei. Sangehr rahno kohdo pihlo sohla manaman. Sohla me kak duhdi loale oh pil pwurohng pwulopwul la.