translated by Oliver Johnny

illustrated by Calvin Fujioka

Ehu rahno Soulik oh nah pwutak riemeno kohla pwe ren rapahki mwahmw mehn selien soutik. Re kohla ni iimwen mwahmw en Kolohnia.

Ahnsou me pwoht en laid kohkohlong, re pil pouk sowi pwe re inenen kauwehla mwahl mwahmw. Pwoht koa inenen tikila.

Soulik pwainda karangahp kei. Ekei laud ah ekei tikitik. Pwutak ko inenen men souwese ara pahpahu wia mwahmw koa.

Re lelete ni imwarailo ah Soulik tepier wia mwahmw koa. Pwutak ko ahpw keilahr oh kilekilang. Ohlo doadoahk ki naip pwoat uhdahn keng. E kihsangehr mwasahl en mwahmw koa.

Pihda inenen kadehdeh wie mwahmwo. E kilangehr mwasahl koa. E kilangada saip kei nan kapehden karangahp koa.

Pihda ahpw idek, "Pahpa dahme saip kat mihki nan kapehden mwahmw kat?"

Ohlo ahpw sapeng, "Karangahp kin kang saip. Mwahmw laud kan kin kang me tikitik kan."

Ohlo ahpw lopok penehr mwahmw koa oh onopadahr kukih. Koaros awialahr mwengehn soutik.

Pihda ahpw idek rehn ah pahpa, "Iaduwen karangahp eh kin diar kene mwenge?"

Ohlo ahpw sapeng oh nda, "Karangahp kin kohsang ekis wasa oh kohla ekis wasa pwe ren rapahki kanarail mwenge. Re kin kohseli oh pwipwihn seli. Re kin saik kanarail mwenge. Saip kan pil kin kohseli oh rapahki kanarail mwenge. Re pil kin pwipwihn seli.

Saip kan kin kohseli oh ma menpihr kan kileng irailda re kin saik irail. Saip kan kin tang de lus seli pwe ren kin pitila. Ahnsou me karangahp akan kilang, re kin kohdo oh pil kang saip kan.

"Ahnsou me met wiawi pwoht en laid kan kin idawehn mahn akan. Iei ahnsou wet me re kin kak koledi mwahmw tohto."

Pihda ahpw nda, "Oh, mwahmw laud kan kang me tikitik kan. A dahme mwahmw tikitik kan kin kang!"

Ara pahpa nda, "Karangahp kan kin kang saip kan. Saip kin uhd kang kisin mehkan me kin pampap seli nansed. Mepwukat kisin mwahmw kei me inenen tikitik, kitail sohte kak kilangki masatail kan."

Pihda ahpw pil nda, "Saip kan kin kang kisin mahn me inenen tikitik. A dahme mwahmw me inenen tikitik kan kin kang?"

Ara pahpa pil sapeng oh nda, "Mwahmw me inenen tikitik me kitail sohte kak kilang koa kin uhd kang kisin dihpw en nansed kei me inenen tikitik."

Pwutak ko inenen rong kanaiohng koasoaiio. Pihda ahpw nda, "Ipa, koasoaiio tepida rehn tuhkehkan oh imwila rehn aramas. Koasoaii reirei pwoat met."

Ohla ahpw nda, "Koasoaii wet me reirei oh ihme re kahdaniki food chain." (Dahme kin kang dah)

Pehder ahpw kangkangehr mwahmw koa oh nda, "Ohtier, I wie kangkang karangahp me kin kang saip, saip me kin kang kisin mahn tikitik, kisin mahn tikitik me kin kang kisin dihpw. Oh ihme wiahda food chain."