Mahs mie ohi emen me kin mihmi rehn a pwoud oh nan kisin serepein man nan ihmw ehu me sakanakan oh mpwi.  Ohlet ihte ah doadoahk rahn koaros kin kohla pal tuhke.  Rahn ehu ni doken ah wie palapal tuhke, serepein men pwaredong ih. Serepeinet nan monge kapwatki kohl oh silper.  Moangeo piripir duehte lingan en usu en pahn lang.  Serepeino ahpw ndahiong ohlo me emen peki nah kisin serepeino.  Ohlo rongete pwungki pweki e kamelele me irail pahn ekis paiamwahula. Ohlo oh ah pwoudo koaros pwungki oh serepeino ahpw wadahr kisin serepeino kohkohla.

Ni ansou me ira lel ni ihmweo, kisin serepeino ahpw kilangehr wen lingen en pere kan en nan ihmwo, mwurin ah kilangselier nan ihmwo ahpw kangehr pilawa oh nim melik.

Kedekede oh ehu rahn liho ahpw kihong kisin serepeino kih en ihmw oh padakihong me e kak ritingada wenihmw eisek riau en ihmwo ahpw wenihmw ehute me soh.  Ni en serepein tikitiko a kin ritingada wenihmw kan lingen manihmwo kin pir duehte lioal.  Kisin serepeinet sohlahr nsenamwauki ah sohte kin kilang nan wenihmw keisek siluho.

Rahn ehu ahpw lemedahr en kawai-peseng oh kilanglong loale.  Liho padakihong kisin serepeino ma e ritingada pere eisek siluho e pahn ale paiesiwed.  Rahn ehu kisin serepeino ahpw ritingadahr wenihmwo.  Ni ansou me e doahdoahkseli ni keilen perehn ihmwo pehu ahpw wiahla kohl.  Serepeinet ahpw tanger rokla nan ehu pere nan ihmw-wette.  Sohte pwand liho pa pwurodo oh ekerpene na lidu ko koaros oh ndahiong serepeino en wahdo kihn pere ko.  Ni en serepeino ah pwiliki kih ko nan peho, liho kakiledi pwehki me e wiadahro.  Liho pil idek keriapak ah e sapengkihte me soh.  Liho pil idek kesilpak a serepeino sapenokihte me soh.  Liho ahpw nda pwehki omw likamwen ke sohlar pahn mi wasaht. Mwurin koasoai pwukat serepeino ahpw meirlahr oh kihrdililangehr nan kapin sampah.

Ni ansou me serepeino kehnla wasa e mihmiher nan mohs, ahpw likwer ah sohte me kak rong pweki sohlar ngile oh ni ah kin aluhla ekis wasa pwehn pidoi sang nan mohs wet teken karer kin doakoa kilih kan oh ih kin sengiseng.

Kising serepeinet wiewia soahng wet lao ih lel nan pwoahr ehu.  Kisinieng ipido oh keteu mweredi sohte wasa me e pahn rokula ie.  E kin kang kalewen tuhke oh wahn berries sakanakan kan.  Kie lirop iei tehn tuhke kan.  Ehu rahn Nanmwarki en wasaht ahpw kesikesikselier nanwel oh pwakiher tie men.  Tieo tangalahte nan welin dihpw ehu oh sohla mie.  Nanmwarkio tangala mwuri ahpw kilangadahr serepeino. Nanmwarkio rahnmwahu ah serepeino sohte sapeng pweki e loh tengalahr.   Nanmwarkio pil nda, "Iangie kohla nan ai kahnihmw." Serepeino itwelte oh iangada.  Ni ansou me ira lel ni ewen kehlo nanmwarkio kiheng kilou kaselel kei kalkawiada ih. Mwurin ansou kis ih oh nanmwarkio ahpw pwopwoudlahr.  Pahr ekei mwuri serepeino ahpw pil liseiandahr oh neitikier ni a lohteng.

Ehu rahn lih me kesesang ih nan dewe mahso ahpw pil pwureng idek re, "Ke ritingada pere keisek?  Ma ke lokaia mehlel ke pahn lokaiada a ma so a ke pahn mehla oh ipahn wasang noahumw serien." Dahme ke lemeiong serepeino pahn sapengki met?  Kilang dahme e nda, "soh!"

sEn Nanmwarkio a pwoud lohtengo pil lokaia likamw kahrehda liho ah wasang nah kisinserio.  Mwurin ansou kis tohn wasaho ahpw tapiadar rapahkiseli kisin serio rahpw sohte diar.  Aramas oko kainakiher me en Nanmwarki ah pwoudo me pein kemela serio   Pwehki Nanmwarkio a inenen poakowang ah pwoudo, e sohte rong koasoai en aramas akan.

Pahr ehu mwuri lih me wahsang nein lih Nanmwarkio serio pil pwaredo reh pwehki e pil neitikier oh idek peidek en mahsohte ah en Nanmwarkio ah pwoudo pil sapengete koasoaia, "I sohte ritingada wenihmw keinepwiho."  Sang e likamw liho pil wahsang nah keriemen en serio. Mwurin met e pil neitik oh nan serio pil wesikisang pweki ah sohte lokaia mehlel. Ni ansou me tohn wasaht rongadahr me serio pil solahr mie rahpw inenen lingeringerda oh karaunki serepeino me e kin kangala nah seri kan, kahrehda ahr koapwungehr oh koasoanehionger me re pahn isikala ni e momour.  Re saliediongehr ih ni tuhke pwoat oh isikadar serepeino. Ni ansou me angin kisinieio kehlailla serepeino ahpw medekla oh pein lemeda en lokaia mehlel.  En Nanmwarkio ah pwoudo ahpw werda koasoaia, "I wiadahr dihpwet."

Lih me kausasang ah wasao oh wahsang nah seri ko ahpw kamwerehdi keteu moasul ehu oh koakunla kisineio oh mwuri koapwurehdo nein serepeino seri ko. Serepeino ahpw lokaiahda oh na seri kan ahpw koapwurpwurdo.  Irail pereperen mwurin ansoauo kohdo.  Me kin wehkada dipe, dihp wet kin mahkala.