adapted by Oliver Johnny

illustrated by Deby Nakamura

.

Mahs mahs mie soun sukmete men me nah pwutak riemen. Emen pwutak ko inenen pwerisek ah emen inenen pounkahke. Ohlo inenen poakoapoake pwutak pounkahkehu. Pwutak pweriseko adaniki Mpahi ah pwutak pounkahkehu adaniki Lemei.

Ehu rahno ohlo ahpw diaradahr me ah doadoahk solahr wihni. Aramas akan pweipwand dier oh solahr kapwungehng ohlo. Ohlo ahpw tapiadahr kohseli rehn aramas akan pwehn ale arail pweipwand kan. E pil inenehdi te ahnsou me aramas akan pil solahr neirail kisin sent.

Ehu rahno ohlo kohkohseli oh pwangadahr ahpw mwohndiong limwahn wenihmw en ohtehl ieu. Mwurin ahnsou tikitik ohl emen pa lel nan ihmwo sang ekis wasa. Ohl me ahpw tehn pwaredo wasahu ahpw kosoiia iong tohn nan ohtehlo me mie nein Nahnmwarki en wasahu serepein men. Serepeino kepikipik lahr oh wialahr sansal takai ieu. Dene mehmen me pahn kak pewehdi manaman siluhte me pahn kak kapwurehdo serepeino.

Soun sukmetehu rongete ahpw mwadang samwalahr ni imwehu. E lemeleme me nah pwutak pounkahkehu me loalekeng oh dene pwutako kak kapitala serepeino.

Soun sukmetehu ahpw kiohngehr Lemei oahs emen, pisdor pwoat, kedlahs pwoat oh likou kaselel kei. Lemei ahpw nda, "I pahn kohla kapitala serepeino ngehi kadaredo dakapamwa oh dakepen riei pwutak pweipweien. Dakapamwailo pahn oahs wenemen me tangahki." Lemei eri samwalahr.

Ahnsou me Lemei kohkohla E kin kilangete mahn akan a ekin kateirail. E diar ketitik kei ih eri katanga nah oahso poh rail. Ketitik ko eri dauradahr ih oh nah oahso. Lemei doudihte kemeirail pene koaros. E pil douluhllahte kilangada tehk ehk riemen ahr wie pampap ih eri pil kemeirail la koaros. E pil diar pesen loangalap ieu ih pil kauwehla.

Ni soutik en rahno E lelehr ni wenihmw en ihmw me serepeino mihmi iehu. Lemei ahpw leteletehr ni wenihmwo. Sohte me sapeng A E uhd suk wenihmwo. Lialaud men pa ritingada wenihmwo. Lialaudo eri idek reh dahme E mwahuki. Lemei ahpw sapengki lialaudo me E kodohn kapitala serepeino. Liho eri mwadang ritingada wenihmwo. Liho ahpw ndalahng Lemei, "Ke dehr karuaru, ke nek pwurodo lakapw kuloak duwahu, ni menseng."

Lelete kuloak duwahu hi menseng en mandahn rahno A Lemei lelehr ni wenihmwo. Lemei ahpw pil pwurohngehr wia soangen letelet me E wiahier ni soutiko.

Lialaudo ahpw ritingadahte wenihmwo ih wideki peseng weren tuhke kei me inenen tohto ahpw nda, "Rikada weren tuhke kan. I pahn pwurodo mwurin awa ehu oh ansouo ke pahn kanekepenehr." Liho eri samwalahr.

Pwehki Lemei ah inenen pounkahke, E sohte wia me Liho nda en wiahu pwe dene E sohte men kamadak ki tihn sewehu rikirik weren tuhke sohte katepe pwukoa.

Liho eri pwurodo oh diarehr me Lemei sohte wia me E ndahng en wiahkoa. Liho ahpw nda, "suwed," pak ehu.

Liho pil alehte dal pwonopwon eisek riau oh keselahng nan pihl ieu me inenen loal mehlel. Liho ahpw ndahng Lemei en pil duhpada dahl koa. Mwurin awa ehu liho pil pwurodo Lemei sohte pil wia me en wiahu. Liho apw nda, "suwed, suwed."

Liho eri pil kahrehla Lemei ni sansal takai kei ahpw nda pilada ia serepeino rehrail. Lemei sohte ese mehnia me serepeino. Ahpw pil soukautih ete oh mwohndi oh kemmoal. Liho pwurodo Lemei saikinte onopada. Ahnsou me Liho idek ia me E piladahn, Lemei likamwadahte idih sansal takai en pali mauno. Sansal takaio uhdahte poakihkih ikio Lemei oh kemehla. Ahki sansal takai en pali mauno oh meingo drakon kei. Me mi nan pwungo me serepeino.

Soun suk metehu oh Mpahi oh en Mpahi ah nohno ahpw awiawih ier iahdete Lemei pahn pwerido dake wararail kuruma me oahs wenemen pahn tangahki. Re awiawiher oh pahr ehu dou powe sohte me pwerido.

Ohlo ahpw ndahng ah pwoudo, "ma Mpahi me kohlahtehu pwe E kerin pweipwei sohte soangen apwal wet pahn pwarada. Iapw men kilangada nei pwutak loalekengo."

Mpahi rongete en ohlo lokaiahu A E peki rehn ah pahpahu en mweidohng en uhd kohla. Ohlo sohte men kaluhsih ki nah oahs, nah pisdor de likou mwahu Mpahi pwe dene E me kerin pweipwei.

Mpahi eri pein mwesel. E alu pwe sohte oahs ohlo kihong. Ni Mpahi eh kin kohkohla E kin tuhwong mahn akan ih apwalih irail. E diar tehk kei ahr wie pampap ih eri kihong irail ekis kene lopwon en pilawahu. E pil diar pesen loangalap ieu ih darada wahn rohs kei oh kihong limwahn pahso pwe loangalap koa en kang sukehn wahn-rohs koa. Menpihr kan kin pihrdo limwahn Mpahi oh kin kouliong.

Ni Mpahi ah lelehr ni wenihmw en wasa me Lemei kolahr iehu, E letelet inenen kawaii. Liho ahpw ritingadahte oh idek reh dahme E mwahuki. Mpahi eri sapeng liho oh nda, "I men song ma I sohte kak kapitala nein Nahnmwarki serepeino."

Liho ahpw nda, "Song ahpw ma ke sohte kak ke pahn mehla." Liho eri koskipeseng ier weren tuhke koa, ih pil samwalahr.

Ni en Mpahi ah wie rikirik weren tuhke koa, ketitik kei pa pwaredo. Emente rikada ehu weren tuhke A koaros nekda. Liho ahpw pwurodo oh diarehr me Mpahi nekier.

Liho ahpw alehte dahl eisek riau oh keselahng wasa me inenen loal nan pihlo, ih pil samwalahr. Mpahi ahpw tepdahr duhp dahl oakoa. Mehn dahte eh sohte kak duhp ada nan kepin pihlo, E inenen nannantihong. Ni eh nannanti tehk ehk riemen pa pwar limwah, re wahier dahl oakoa.

Liho pil pwurodo Mpahi kanekelahr ah pwukoa. Liho ahpw uhd kahrehla Mpahi ni sansal takal koa ahpw uhd nda, "Pilada ia serepeino rehrail." Liho eri pil samwalahr.

Ni en Mpahi ah wiewia ah pilipil E sohte kak esehda mehnia me serepeino. Loahng koa pa pihrdo oh pidipidakih sansal takal en nan pwungo oh irail kin ndinda, "Nan pwung, nan pwung." Mpahi eri rongehr oh esehier mehnia.

Liho pwurodohte idek mehnia a Mpahi idih mehn nan pwungo. Ahnsou ohte drakon koa tangdowi oh sohla pwurodo.

Mpahi oh serepeino pwopwoud lahr. En Mpahi ah pahpa pil wesikdohr rehra. Mpahi uhd kaunlahr imwen Nahnmwarkio oh ahniki lahr soahng koaros.

Irail pereperen ier sangehr rahno kohkohla.