written by Oliver Johnny

illustrated by Deby Nakamura

Mahs mie nahnmwarki men me kin inenen lemei oh sohte kin men rong nah aramas akan. Pwehki ahnsou koaros eh kin lemei iong irail kahrehda re kihong ede Lemei. Rahn koaros oh pwohng koaros aramas akan kin wie kapakap oh pekipeki emen arail Nahnmwarki kapw en miehla.

Ehu rahno aramas akan inenen pwuriamwei mehlel. Nahnmwarkio eker irail pene reh ahpw kosoiia, "I wia nahnmwarki lemei oh sapwung men, sang rahn wet kohla I pahn wiahla nahnmwarki kadek oh mwahu men."

Nahnmwarkio ahpw kapwaiadahr ah inou ohng aramas akan. Rongen ah mwahulahu pil lohkpeseng ier oh lelehr wasa koaros. Aramas akan pil inenen nsenamwahu lahr mehlel.

Ehu rahno emen nein nahnmwarkio ohl oakoa ahpw kohdo rehn nahnmwarkio oh nda, Maing Nahnmwarki, I poatohwen peki ren ketin poahngok ihong ie duwen ar ketin wekila."

Nahnmwarkio ahpw nda, "Ehu mwurin souwaso I dakadake neii oahso kohdo nan sapweio, iapw kilangada kidi men eh wie pwakipwakih fox men. Foxo pitisang kidio ahpw E inenen ohla. Ahnsou me kidio pwurupwuralahr ni imwehu ahpw uhd tuhwong ohl emen. Ohlo uhd katehte kidio oh kauwehla oapwoat neh koa. Ohlo uhd pil aluhlahte tuhwong oahs emen. Oahso kikim ete ohlo oh katipw oapwoat neh koa. Ahnsou me oahso tang, E tangete ih pwopwidi nan pwoahr ehu oapwoat neh koa pil tipw. Ihme kahrehda I lemeh-kihda ien wekila. Iapw ndahngehr pein ngehi, me kin wiahda mehkot suwed pahn pil lohdiong me suwed."