Menpihr Kan Wia Kempoakapahtail

written by Oliver Johnny

illustrated by Eric Woo

Menpihr kan koaros duwepenehte ni soahng kei. Menpihr kan koaros neh rail kan meh rioapwoat oh pehrail kan pil meh rioapwoat. Koaros irail kidikid ki pene winarail kan.

Mie noumw menpihr ni imwomwo? Ke Kilangehr soangen menpihr tohto? Iaduwen omw kin kak esehki me menpihr men me ke kilang?

Menpihr kan duwehte kitail me kin mwenge, nimpil, ned wasa oh rong wasa. Mwomwen paluhwararail kan ehu soahngasang paluhwaratail kan ahpw re kin wia ekei soahng me kitail kin wia.

Awarail kan sohte duwehte awatail kan. Awarail kan me keng pwe ren kin kak kangki kisin mwahs akan, ketitik kan, oh pil soangen wahn tuhke tohto. Re kin diar kisin mwahs akan sang nan pwehl oh pil sang ni kilin tuhkehkan. Re pil kin kihsang ketitik kan pohn pwehl oh pil sang ni kilin tuhkehkan. Re pil kin ekei ahnsou pwalangki peseng awarail kan ekei wahn tuhke kekeluwak kan. Irail pil kin kang dihpw oh kisin mahn sang nan atail mwetuwel kan.

Menpihr kan sohte duwehte aramas me mie ngih ahpw awarail kan oh lawarail kan me keng.  Awarail oh lawarail kan me kin sewese kamwutehla kanarail kisin mwengehkan. Mie ekei mahn me pil kin kangala kisin rakied pwe en kak sewese oh kamwutehla kanarail kisin mwengehkan.

Menpihr kan sohte tumwarail ahpw re kin esingengki kisin pwoahr riakis me mi limwahn awarail kan. Re pil kin esingek duwehte kitail me kin esingek kihla ahng kolahng nan ngolingolitail kan.

Menpihr kan sohte pil salengarail sansal ahpw re pil kin inenen rong wasa. Pwehki salengarail kan eh mwahu kahrehda re kin pil kak tangasang arail imwin tihti kan.

Pehn pihr kan me re kin pihrki oh ihme re pil ekei ahnsou doadoahngki ni arail kin saikedi kanarail kisin mwenge. Re pil kin doadoahngki pehn pihr kan ohng ni perehsang paluhwararail kan lemwulemwur oh ihme re pil kin koarukih kihla neirail kisin serihkan.

Nehrail kan me re kin aluhki, sokekihdi pohn rahn tuhke kan oh ihme ekei mahn kin kolekihdi kanarail kisin mwenge.

Tehiap oh ikel kan kin poarokedi kanarail kitik kan ki patehn nehrail kan Mahn riemen pwukat inenen kataan ohng kitail. Ira kin iang sewese kemehla emen atail imwin tihti. Patehn nehra kan me kehlail oh kikirahkan me inenen keng. Ahnsou me ira pahn koledier kitik men, kitiko sohte pahn kak pitisang ira.

Menpihr kak kin kousoan nan tuhkehkan. Re kin wiahda pasarail kan pohn rahn tuhkehkan. Menpihr kin kutohrehdi kutohr. Kutohr pwukat kin mihmi nan pahs akan erein ahnsou ieu ah rahpw kin kasawa. Mahn pihr kan ni ahr kin kasawa re sohte kin kak pihr lahu miehda winarail.

Kitail anahne apwalih mahn pihr kan. Kitail anahne kanaiohng kisin menpihr me mihmi nan pahs akan. Mie soangen menpihr kei me ma aramas pahn doahke pasarail kan ah pahpa oh nohno en kisin mahno pahn pihr dowi oh sohla pwurodohng ara pahso. Met pahn kahrehiong kisin mahno ah mehla. Kitail anahne Kanaiohng menpihr kan pwe re wia sawas patail ah re pil wia mehn kapwat ieu ohng sapwatail kan.

Menpihr tohto me kin kousoan nan wasahkan me duwehte nan wel, nan tuhke laud kan, nan tuhke tikitik kan nan tuhkehn nan lehpwel kan oh pil naniak ape. Wasahn kousoan en menpihr kan oh kanarail mwengehkan me keieu kesempwal ohng irail. Ma sohte mepwukat a kitail pahn kak luhs sang soangen menpihr tohto. Mwuroi pil solahr duwehte mahs. Mahs mwuroi kan kin kakete pihrdo nan tuhkehkan me mi limwahn ihmw kan. Ahnsou wet irail inenen milahr nanwel kan. Ma soun kesik mwuroi kan sohte pahn idawehn kosonned me koasoanehdi ahnsoun kesik mwuroi A mwuroi kan pahn kakete nekla.

Kahrepen kosonned wet pwe en kak kihong ahnsoun mwuroi kan ar kutohr oh kasawa. Kisin mwuroi kan en pil kak laudla.

Nan wein Hawaii soangen mahn tohto me solahr mie. Mie soangen kisin mahn kis me wine ekei weitahta oh oangoahng. Soangen kisin mahn kiset nekla pwe pwilidak en Hawaii kan kin wiahki winen soangen kisin mahn kiset likou en aramas lapalap.

Menpihr en nansed kan pil duwehte men pihr en nan sapw akan. Ihte kanarail mwengehkan me wekpeseng. Menpihr en nansed kan kin kousoan naniak oh nan nih kan. Kanarail kisin mwenge kin kohsang nan sed. Ke ese dah? Re kin kang kisin mwahmw tikitik kan.

Menpihr en nan sed kan kin kak sokedi nan sed oh re pil kin kak duhdi oh palih ada kanarail kisin mwenge de kisin mwahmw. Re kin kak dohkihla sang sahpw mwail tohto. Irail me kin kasalehiong soun laid kan wasa me Tuna mihie. Wasa me menpihr kan kin pokon ie nansed iei wasa me soun epiep kan kin kohla ie, pwehki iei wasa me mwahmw kin tohto ie.

ACTIVITIES: