written by Kolden Manuel

illustrated by Deby Nakamura

Mahs mahs mie kout silimen mie me kin dalap kohdahla ni keilen dohl ien pwe ren mwenge ie. Elen kohdahla ni dohlo mie pairis pwoat mie oh pahn piriso mie kieil men kin koausen ie. Mesen kieilo me kalaimwun oh timwe reirei.

Kisin kout tikitiko kohdo oh kote piriso. Kieilo werda nda, “Ihs me alialu pohn ai pirisen?”

Kisin kouto nda, “Ngei, kout me keieu tikitik wasaht.”

“Ari I pahn kadanleiukala,” kieilo nda.

Kout tikitiko nda, “Oh awih, kilang I me tikitik oh tihti. Awih riei me lahudo.”

Kieilo ahpw nda, “Ari kohkohwei.” Sohte pwand rien me tikitiko pa kot pohn piriso.

Kieilo ahpw nda, “Ihs kowe me alialu pohn ai pirisen eh!”

Keriemen en kouto nda, “Ngehi keriemen en kout.”

Kieilo nda, “Sohte manaman I pahn rukoaiukpene.”

Kout keriemeno ahpw sapeng koasoaia, “Awih riei me laudo pwe e mwoaroauroau oh pil wih mehlel.”

Kieilo ahpw ndahiong, “Kaselel, ari mwadang kohkohwei.”

Sohte pwand kout laudo pa kot pohn piriso. Ngilen e aluh ko me laud mehlel. Kieilo ahpw pitirengkihda pahn piriso.

Kieilo werda oh koasoaia, “Ihs kowe me tomtom pohn ai pirisen!”

Kouto ahpw nda, “Ngeih kout me keieu kalaimwun.”

Kieilo nda, “I pahn kanguhkala.”

Kouto ahpw nda, “Menlau kohdo, I pahn pwadikeisang pwoaren mesemw kan koaros oh I pahn sukpene udukemw kan oh tihmw kan.”

Kieilo kohdahte ira peida. Ira pepeite oh kouto kodomete kieilo pwar kesedilang nan pihlo.

Kieilo mehla oh kout ko uhd sapwenkihla wasao irail pereperen.

Lih laud men koakoahkseli nan ihmwehu oh diarada sens kei, ahpw nda. “Dahme I pahn wiahiong sens kat? I pahn kohla alehda nei kisin pwihk.” Ni ansou me e pwurupwurodo e lel piris ehu oh nah kisin pwihko sohte kak doaula powe.

Lih laudo ekis aluhla tuheng kidi men ahpw ndahiong kidio en kohla ke nah pwihko pwehn lusla pohn piriso oh ira kohkola ni imwarao. Kidio kahng.

Liho ekis aluhla tuheng lepin tuhke lep, lih laudo nda, “Poakih kidio pwe kidio sohte kak ke pwihko oh pwihko sohte kak doauda pohn piriso oh se sohte kak lel ni ihmwato soautiket.” Tuhkeo kahng. Liho pil aluhlahte tuheng kisinieio ahpw ndahiong kisinieio en kohla isik tukeo pwe tuhkeo en poakin kidio en kohla ke pwihko oh pwihko en aluhla pohn piriso ira kohla ni ihmwarao. Kisinieio kahng.

Liho pil tuheng pihl oh ndahiong en kohla koakunla kisinieio pwe kisinieio en tangala isik tuhkeo; tuhkeo en kohla poakih kidio; kidio en kohla ngalis pwihko oh pwihko en kohla pohn piriso oh ira kohkohla ni ihmwarao. Pihlo pil kahng.

Liho pil aluhlate rehn kou kou men. Liho nda, “Kou kohla nim pihlo pwe pihlo en kohla koakun kisinieio; kisinieio en kohla isik tuhkeo; tuhkeo en kohla poakih pwihko oh pwihko en alula pohn piriso ira kohkohla ni imwarao. Kouo kahng.

Liho aluhlahte tuheng olen loptuhkeo ih ndahiong, “Kohla kemehla kouo pwe kowe en kohla mim pihlo, oh pihlo en koakun kisinieio, kisinieio en isik tuhkeo, tuhkeo en poakih kidio, kidio en kohla ke pwihko oh pwihko en aluhla pohn piriso oh ira kohkohla ni imwarao. Ohlen loptuhkeo pil kahng.

Liho aluhlate tuheng sahl, liho peksawas reh ah e nda, “Soh.”

Liho lel rehn kitik oh padakihong en kohla ke sahlo, kitiko pil kahng.

Liho ahpw tuengadahr kahto oh peki re en kohla ke kitiko pwe kitiko en kohla ke sahlo, sahlo en kohla saliedi, ohlo, ohlo en kohla pele koua kouo en kohla nim pihlo, pihlo en kohla koakun kisinieio, kisinieio en kohla isik tuhkeo, en kohla poaki kidio; kidio en kohla ke pwihko oh pwihko en aluhla pohn piriso ira kohkohla ni imwarao.

Kahto tangalahng kitiko, kitiko tangalahng sahlo. Sahlo tangalahng ohlo, ohlo tangalahng kouo, kouo tangalahng pihlo, pihlo tangalahng kisinieio, kisinieio tangalahng tuhkeo, tuhkeo tangalahng kidio kidio tangalahng pwihko, pwihko lusda pohn piriso ih lih laudo kohkohla ni imwarao.