Kohsang Tiger Kolahng Rehn Ilikan

a folk tale adapted by Hanover I. Ehsa

illustrated by Shirley Fukuhara

Nan mahn en sampah kan koaros, Tiger me nahnmwarki. Ih me mahn koaros kin masak oh kin wauniki. Sohte mehmen kak kasapwungehla dahme Tiger kin nda. Pwehki eh wia nahnmwarki, soangen soai de poadoapoad akan koaros me mie ih me pil ahniki. Soahng koaros kin wiawi de ndandada ni eden Tiger.

Nin soutik kan, ansou me mahn akan kin mwohdpene koasoakoasoai oh pil kokouruhr, ah Sinek kin idek:

"Ihs me keieu kehlail nanpwongatail?"

Ah Kidi kin sapeng, "Tiger. Tiger me keieu kehlail pwe ansou me e kin mwenginingin, tuhke kan kin rong. Ah ansou me e kin lingeringer oh wer, tuhke kan kin itihtikek."

"Ah ihs me keieu sakanakan oh luwetakahu nanpwungatail?" Sinek pil kin idek.

Ah Kidi pil kin sapeng, "Anansi. Anansi me keieu sakanakan oh luwetakahu. Ansou me e kin mwenginingin sohte me kin rong. Ah ansou me e kin wer koaros kin kouruhriki." Koaros pa kin kapihrala lapalahn ngarahk me sohla me kak rongki wasa.

Likan me adaniki Anansi. Nin soutik koaros mahn akan kin kouruhriki Anansi. Ahpw na wadekala koasoaiet? Anansi pil kaidehn kisin Likan mwamwahl emen.

Eri kedekede oh rahn ehu me keieu luwetakahuo oh me keieu kehlailo ahpw tuhpene, Anansi ih Tiger. Ira tuhpene nan kisin mall ieu nanwel. Eri ansouo, kairu me rukuruk pahn tehn mengimeng ko me kilangira. Oh iangahki serehd kei me mihmi nan tuhke ko.

Ansou me ira tuhpene, Anansi poaridihsang Tiger, Tomwe pa pil lel nanpwelo. Ah Tiger sohte men rahn mwahwih Anansi. E ahpw kangkakilete sohte marep. Ahri Anansi werki kehlail nda, "Menseng mwahu, Tiger. Mie ahi anahn ieu me I men peki rehmwi."

"Oh, dahkot, mwo Anansi?" Tiger idek ni ngilen lemei.

"Tiger," Anansi nda.

"Kitail koarohsie ese me kowe me keieu kehlail nan sampah. Ihme kahrehda kitail kiheng edomw ni soahng koaros. Oh kitail koaros pil ese me ngehi me keieu luwetakahu nan sampah. Ihme kahrehda sohte mehkot me mi ni edei de ahi. Eri, Tiger, I men peki ken menlau mweidehng pwe eden okotimehn en tepisang rehi de ni edei. I peki mehlel ni karakarahk oh ngidingid ken mweidada pwe aramas akan en kak ese ihs ngei."

Ahri Tiger ikintengila rehn Anansi oh nda, "Iaduwen, soahng dah me ke men en wa de tepisang ni edomw?"

"Soai de poadoapoad akan," Anansi sapeng. "Soai me kitail kin soasoaia nin soutik kan."

Ih soahng me Tiger keieu sohte men emen en iang akiki met. E kolokol soai koaros pwe dene ah oh e koasoanehdi me sohte emen pahn kihsang.

Eri Tiger ahpw medemedewe soangen kisin pwidik, kiahweliwel men Anansi oh ih lemehda widinge. "I pahn wiahng lahpet widing me mahn Koaros pahn kouruhriki," Tiger nda nan kapehde.

"Okehi, Anansi. Soai koaros pahn mihla ni edomw ma ke pahn wia dahme I pahn ndahwei." Tiger ahpw kin itikseli ikio.

"Tiger, I pahn uhdahn wia soahng koaros me ke pahn ndahiengie."

"Oh, mehlel pwa! I kamehlele me ke kak, ke uhdahn pahn kak," Tiger lokaia ni ngilen kapailok. "Kisin mehkot mwahl me pahn ndahwei ken wia. I mwahuki ken wahdo Mesde Sinek rehi ni eh momour. I mwahuki ken poaromourih. Ke kin ese Mesde Sinek, me kin mihmi paho, limwahnte pillapo, eh Anansi? Ih mwo. Kamaurete kowe wahdo rehi ah I pahn mweidehng soai koaros en mihla ni edomw."

Tiger sohla lokaia oh pil sohla kamwakid ikio. E ahpw kilenglahng Anansi oh awiawih dahme a pahn nda. Mahn koaros pil mwasamwasahn oh onopalahr kouruhr.

"Tiger, I pahn wia me ke nda koaros," Anansi sapeng. Keti mahn koaros ahr ngarahkpeseng.

Kairu kan mihte pahn tehn mengimeng ko kouruhr ah serehd ko nan tuhke ko. Tiger me keieu weringidi wasa, dah e seu ngilsiedek! Pwe ia duwen kisin pwidikidik kiahweliwel men Anansi eh pahn poaromouriedi Sinek?

Eri Anansi wikidek samwalahr. E ahpw alialu kohla nan katairong en kouruhr me peipeisang wasa koaros nanwelo. Mahn teiko kin wer ndalahng, "Soko kowe, soko kowe!" Ihte Kidi eh sohte pekekihdi eh mehdek.

Anansi manda ni menseng en Niehdo ih mwohndi nan wenihmwen imweo. E ahpw medemedewe soangen wiepe dah me e pahn kolekihdi Mesde Sinek. Ih eri lemehda en molehdi.

Lel ni menseng en Niare, Anansi ahpw wiahda ah molo. E rapahkihda sahl me keieu kehlail ih eri wiahda imwi elep. E pirehdi wiahda pwe Sinek en kak duwalla loale. Oh en pil kak kihrpene ni ansou me e pahn sereki.

Ih eri kihdi nan rehpadil ko oh kiheng soangen apel ehu me Sinek inenen kin iouki. Ih eri rokila limwahn ahlo. Sohte pawnd ah Mesde Sinek pa limwilimwahdek kohdahla nan ahlo. Sinek kilenglahte kilangada apel ko, ahri e douluhla. E kohlahte ih pwedila nan molo ih kang apel ko. Ahri Anansi uhdahte sereki sahlo e pa teng nan lukopen Sineko. Eri ahpw paisuwed pwe Mesde Sinek me nohn toutou kahrehda sahlo mweisang.

Ahpw lel ni menseng en Niesilo, Anansi (Likano) uhd weirada pwoahr. Ih eri pil kesedieng uht mat ekei loale pwe Sinek en nedada. E ahpw masieng iriskihla kirihs ni keilen pwoahro oh nekidi. Ih pil keila nan reh ko ih rokila.

E mihmi ah iet, Mesde Sinek pa pil limwiiimwahdek kohdihla. E pwurupwuralahng ni imweo pwe e inenen duhpek oh men nimpil.

E lel limwahn pwoahro ih usuwerla kilengidi. Pilen ewe pa kerekerki eh men kang uht ko. Ahri e kadehdeh keilen pwoahro, soh me melengileng duwe. Ah e uhdahte pidikihla ikio tepin tuhke pwoat pohn keilen pwoahro. Ih eri reireipesengte mwotoudihla nan pwoahro, oh kangala uht ko. Anansi inenen lok pwe e luhsisang kene uht ko ah e sohte koledi Sinek.

Manda ni menseng en Niepeng. Anansi uhd wiahda soangen lidip me kin pitidao. Ahpw uhd kiheng kutohr nan lidipo oh pil awiala Mesde Sinek. Mesde Sinek pil kohdohte ih kawaiada moangeo paliet lidipo ih kosedihte kihdahsang kutohro.

Eri dahme Anansi pahn uhd wia? Solahr mehkot e kak wia pwehn kolekihdi Sinek. Eri manda ni menseng en Nialemo, Anansi sohte wia mehkot. Ihte ah mwohd rahn apwoat oh medemedewe dahme e pahn uhd wia.

Manda Rahnkaunopo, keimwiseklahn rahn, Anansi ahpw lemehda en mwemweitdihia ni pillapo. E kohkohla oh lel pohn pilo ih mwur uhdi kilikileggseli. Ah Sinek mehlahn wie uluhieila nan ewen pwoareo. Ih eri wie kilikilang ketipino eh wie dakadakada pohn nahna ko.

Anansi sohte kilang Sinek. Ihte eh pwuriamweiki Sinek eh nda, "Menseng mwahu, Anansi."

"Menseng mwahu, Mesde Sinek," Anansi pirekekite pil rahn mwahu.

"Anansi, I inenen sall pahmw," Sinek nda. "Sangete Niehdo ko songosong ken koliehdi. Ke wiahda lidip pwe I en pitidaie. Ah ke pil weirada pwoahr likekiris. Ah Niehdo ke moleie ah I ahpw pitisang. Kilang, met uhdahn e konehng I en kemeiukala."

"Mehlel," Anansi sapeng. "Mehlel uhdahn ke me loalekeng. Omw loalekengen inenen dauliala. Mehlel soahng koaros me ke nda kan. I songehr I en koluhkedi eri uhdahn I sohte kak. Kahrehda, Met I sohte kak pwurehng kamehlele me kowe me keieu reirei nanpwungen mahn koaros. Oh I en pil pwurehng nda me dene ke reireisang pehri, pwe soh."

"Dahkot?" Mesde Sinek ekis kotuwahu. "Ngehi me keieu reirei nan pwungen mahn koaros I pil reireisangkeduluhl pehri kau."

"Ekek!" Anansi kouruhr ih idek. "Dene ke reireisang pehri kau?"

"Pwe dene dah?" Mesde Sinek nda. "Na kilang!" Sinek limwahdekieila likio pwehn uhdahn kasalehda paliwereo. Ih karairaipeseng paliwereo lao lel idi.

Anansi kilengdieng oh pil kilenglahng pehri kau ahpw nda; "Mehlel me ke me reirei, ahpw ni ei kilang uhk oh kilang pehri kau, ke mwomwen mwotomwotasang pehri kau. Ahpw I pil sohte kak nda pwe pehri kau me doh."

"Okehi, na wahdo met pwe ken kak kadehdehki kerimwen," Sinek pwusirek nda. "Mwadang! Kohwei pelehdo oapwoat pehri pwe ken kilang!"

Anansi pitipitte tangala ih pelehdi oapwoat pehri reirei ko. Ih pelehsang rah koaros Likamwete tuhkehn pilaik pwoat wen eh reirei oh pil inen.

"Iau?" Sinek idek. "Na pwilikihdi limwahi kowe kasosohngehngie."

Anansi eri kareireihla pehrio limwahn Sinek ahpw nda:

"Sinek, ansou me I pahn kohdahla lep me moangomwen mi ieo, ah kahpw kin limwahdekdahla. Oh ansou me I pahn kohdihla ni ikimwen, ah ke nek pil tohrekidihla pwe ken mweomwen reireisang pehriet. Ahda pwe uhdahn pehriet me reirei!"

"Nahn, dahkot kowe, eh?" Sinek peidekin lingeringer. "Na pirehdi ikiet! Kanahng pwe I ese me I reireisang, ah soh."

Anansi eri pirehieng ikin Sinek ni imwin pehrio. Ih ahpw tangadahla ni imwi lepio.

"Na, dengpeseng, Sinek, dengpeseng pwe kitahn kilang ihs me reirei rehmwa." Ansouo mahn koaros pil pokonpenehr. Pwehde met pil kaperensang weirentang ape.

Irail koaros pil iang weriki Sinek en dengpeseng. Ahri Sinek pil sohnekieng eh parikihn dengpeseng. Ah Anansi tangala ih pil pirehdi nan lukopeo pwe en dehr pwurpene. Mesde Sinek pil uhdahn men pwurehng sohnekieng ekis pwe e ese me ma e nantiheng, e pahn daulih pehrio.

Ahri Anansi tangala rehn Sinek oh nda, "Kommoal ekis, Sinek. Kommoal ah kahpw pil pwurehng dengpeseng pwe insistehr weneu ah ke wihn. Mwurin met, ke uhdahn pahn wia omw pariki koaros. Ke pahn meirtengetengdieng omw sohnek. Ke onopadahr."

"Ehng," Sinek sapeng. Sinek wendieng eh sohnek lao pwoaren mese ape pil kunkipene. Ahpw kin rong mahn teiko ahr kin werki, "Soko kowe, Sinek! Ke pahn kana; ekis, ekis! Insistehr riau luhwe!"

Anansi pitipitte tangala ih pirehdi moangen Mesde Sineko.

E pa mwelehdi. Mahn koaros sohla mwekid pwe mehlel, Sinek selidier oh onopalahr wisikila rehn Tiger. Ih kisin lahp me kiahweliwel, luwetakahuo me re solahr kak pwurehng kouruhrkio.

Eri sang mwurin rahno kohdo sohla soai de koasoai ehu me en Tiger. Soai koaros wialahr en Anansi de Likan.

I. Ia wen me ke koledi de temataman nan koasoaiet.

Peidek kan: Wiepe: Wadek peidek kan kowe ntingihdi omw pasapeng nan doaropwe tohrohr. Ntingihdi omw pasapeng kan ni sentence me unsek.

1. Ihs me wia nahnmwarki en mahn koaros nan sampah?

2. Dahme kahrehda ih me nahnmwarkihki?

3. Ihs me keieu pwidikidik oh luwetakahu?

4. Dahme Anansi peki rehn Tiger?

5. Dahme Tiger ndahng Anansi en wia?

6. Dahme kahrehda mahn koaros kouruhriki Anansi ansou me e sapeng Tigero?

7. Dahme Anansi wiahda Niareo? Niesilo? Niepengo?

8. Soahng dah me Anansi kolekihdi Mesde Sinek?

II. Rapahkihda lepin lokaia oh kiheng wehweh sang nan koasoaiet.

Direction: Sounpadahk pahn idek peidek kan ah tohnskuhl kan pahn wadek de kilang nan neirail pwuhk kan oh kihla pasapeng ni lokaia. Peidek:

1. Nan page keweneu, ia wehwehn lepin lokaia, "Karakarahk?"

2. Nan page keisek ehu, ia wehwehn lepin lokaia, "ngilsiedek?"

3. Pil nanpage keisek ehu, ia wehwehn lepin lokaia, "kiahweliwel?"

4. Nan keimwiseklahn sentence en nan page men, mehnia lepin lokaia me wehwehki, kouruhr?

5. Nan page eisek siluh, ia wehwehn lepin lokaia, "sereki?"

6. Nan page eisek pahieu, mehnia lepin lokaia me wehwehki, men mwenge?

7. Nan page eisek waluh, ia wehwehn lepin lokaia, "sall?"

8. Nan page rieisek, ia wehwehn lepin lokaia, "kerimwen?"

9. Nan page rieisek limau, mehnia lepin lokai me wehwehki, kana?

10. Ia wehwehn lepin lokai, "mwelehdi," nan page rieisek isuh?

III. Thought questions: Teacher will ask the following questions to lead the class to get to the main idea of the story.

1. Ihs me pwarada nan soaiet? Mehn ia mahn me soaiet kasalehda?

2. Ihs me keieu kesempwal de ahniki pwukoah laud nan koasoaiet?

3. Dahme Anansi de Likan mwahuki? Ia kahrepe?

4. Mie mehkot me inenen apwal me Anansi pahn wia. Soangen apwal dah mwo?

5. Ansou dah me Anansi maiausang nan eh doadoahk apwalo?

6. Dahme kitail kak ndahki Mesde Sinek? Soangen mahn dah ih?