Koasoai pen Indrel o Lih Maskun

retold by Kolden Manuel
illustrated by Eric Woo

Mahs mie pwutak men me adaneki Indrel. Ah nohnoh mehla oh ah pahpao pwoadikihda emen lih. Eden Lihet Lipwoaur. Lipwoaur sohte kin apwalih mwahu Indrel oh ni en ohlo a kilang wiewia me liho kin wiaiong nah pwutako, ahpw pil alasangehr pwehki ah poakohng Lipwoaur. Ni ansou me re kin mwenge re kin kihong Indrel en kang tihn mwahmw oh pwurien mahi. Soangen mwomwen mwenge wet karehiongehr Indrel ah tihtihla oh luwetala mehlel.

Ehu rahn. Indrel oh ah pahpa lemeio kohla laid. Ohlo ahpw lusdier oh lalaid. E koledi mwahmw kei oh kesedahng nan wahro shote pwand Indrel sengiseng. Ohlo ahpw idek, "Dahme ke sengsengki eh?" Indrel sapeng, "Kenei mwahmw akat me doakoahdi pehiet." Ohlo ahpw pil sapeng koasoaia, "Kosangia kenemw mwahmw, kilang kenen Lipwoaur mwamw akan."

Rahn riau mwure re pil kohla laid. Ohlo lusdiong nan sehdo oh tapiadahr lalaid. Ahpw pil koledier mwahmw kei oh kesedahng nan wahro. Ni ansou e pil pwureng papalahng laid. mahn emen pihrdo pohn waro oh lokaiahiong Indrel.

Mahno: "Indrel dahme ke kin kalap kang?"

Indrel: "Ih kin kang tihn mwahmw oh pwurien mahi."

Mahno: "Poakepoake! Eri kohdo iang ie."

Indrel inenen masak, ahpw mahno pihrdihte koledi peh ko oh pihrki. Ni ansou me e likepipen pihr e sohte kakada pweki Indrel me toutou. Met kahredahr pehn Indrel ko ah topwala ih eri sengiseng. Ohlo ahpw pil idek dahme e sengisengki ah e sapeng, "Kenen liho mwahmw akat me doakoaiehla."

Pil rahn riau mwuri ira pil kohla laid oh ohlo ahpw lemeda en rokih dahme kin wiawiong Indrel. E ahpw lusdier oh rokilahr pahn parapen wahro. Sohte pwand mahno pihrdo idek pedek en masokehte oh Indrel pil sapengkite pasapeng kohte. Mahno ahpw pihrdi koledi peho oh pihrki. Pwehki Indrel ah toutou nehn mahno pil kawehla pehn Indrel ko oh ih pil sengiseng. Ohlo pwarete apali wahro oh idek dahme e sengisengki a pwutako sapeng. "Kenen Lipwoaur mwahmw akat me doakoala pehiet." Ohlo, pwehki ah kilangehr me wiawiong Indrelo koasoaia, "Kaiden kenen Lipwoaur mwamw akan, kenemw." Ohlo mwelekidahr me iei a pwouden mahso me kin pwarapware-dohng Indrelo. Sang raho kohdo e apwaliher Indrel mwahu oh kihong kene mwenge mwahu koaros oh irail pereperen pohn sapwerail kisin dekehu.

Mahs mie lih emen me lialaudlahr oh maskun. Ah pwoudo mehla ah ira naineki pwutak emen oh serepein men. Kedekede oh ehu rahn liho ahpw ndahng nah pwutako, "Kaleke ke pwoupwoud ni ansou me ih moamoahur, pweki kowehte me kak apwalihe ma ih soumwahuda. Riomw serepeinet me tikitik oh sohte kak apwalihe." Pwutako ahpw nda, "Ih sohte pahn kak keseiukala, menda ma ih pwopwoudda."

Ehu rahn ni a pwaredohsang ah laid e kilangada serepein men mwomwod pohn takaiko, serepeino likweri pwutako ni ngihl malamal. Pwutako ahpw kohlahr reh oh ira ahpw koasoai. Mwuri ahpw men pwoudikihdahr serepeino.

Pwutako kohla rehn a nohnoh oh ndahiong a nohno liho kahng a e pekipekih te, lao liho mweidada. Ahpw liho ndahiong na pwutako en wahdo serepeino reh, edepahno iangala. En pil padahkihong serepeino me e lialaud oh maskun.

Serepeino ahpw wesikdohr oh mihmiher rehn lihlaudo. Kedekede oh wereila mehlel. Serepeino ahpw tepdahr loalsuwedda oh nda, "In sohlar men mi wasaht kungkukhong lih maskun men oh seri men. I pahn pwurala rehn ai pahpa oh nohno."

Serepeino men pwutako en iang ih. Pwehki ah inenen poakohng ah pwoaudo e iangada kohkohla. Lialaudo oh serepein tikitikohte luehdi. Ekei ansou re sohte kin mwenge pwehki sohte me pahn wahdo kenera mwenge.