written by Oliver Johnny

illustrated by Joy Goodenow

Mie kisin dekehkis me adaniki Takaiuh. E sohte nohn sansal ohng koaros me kin pasakapw dohng Pohnpei kan me dekeh ieu met. Met pwehki nan tihn sewen dekehu me E kak sansal ie. Ahk oh sehd me ire peseng dekehu oh uhdahn kahlap en sahpw.

Pohn kisin deke kiset mie lapalahn takai reirei riauh. Iei takai pwukat me deke wet adasang ie. Takaiuh, wehwehki takai kesikesihker.

Kisin deke kiset mihte limwahn dahu me kohlongalahng Sapwalapo, ni pali maunomw ma ke pahn kohla Sapwalapo, ni pali meing omw ma ke pahn kohsang Sapwalap.

Mie ahnsou ieu me kisin pwutak kis oh ah nohno kahlap kin koukousoan pohn kisin dekehu. Ahnsou kisin pwutako sounpar isuh A ah nohno kahlapo inenen lailaud lahr mehlel.

I pahn uhd nda se, pwehki ngehi me kisin pwutako. Se kin mihmi ni kisin deke keiset oh pak malaulau me at peneinei kan kin pwaredo reht. Na song medewehiong ma kowe mwo, ni omw sounpar isuh. Ke sohte pahn sangat?

Ihme se kin kalapw kang: uht, mahi, mwahmw, malek oh menihke. I kin pein wiahda neii kisin ketieu me pahn kakete doakohdi kisin mwahmw. I kin daur mahi kan me mengei pwe I kin lengk. Se kin kolekihdi malek lidip. Malek kan me mand ahpw lidip me mengei ohng kiht.

Ni ahnsou me I kin umw, ai nohno kahlapo kin mihte limwahi pwe E kin periki ide pwopwiong nan uhmwo. I kin wiahda uhmw me tikitik me itar ohng ie ien kin komwpwaldi.

Rahn koaros I kin inenen sangat pwe sohte me I kin kak mwoadongehng ape. Ihte me I kin kak wia, I kin kahrehda neii kidio kiht kin kohla alialu seli pohn oaroahro. I kin kak lokaiahng kidio mehnda ma E sehse dahme I kin ndahng ahpw I pereniki lokaiahng pwe likamwete E kin ese dahme I kin ndahng. E kin kamwakid ikio oh wiahda soangen ngihl ieu likamwete E kin kokouruhr iong ie. Ahnsou koaros me se kin kohseli, ma I kin tang kidio pil kin tang. Ma I kin alu kidio pil kin alu.

Ehu soutiko ngehi ai nohno kahlapo ahpw mwomwohd nan imwato oh kilekileng lahng nan sedo. Liho eri kin koasoakoasoai iong ie. Ekei ahnsou I kin sapeng ah ekei ahnsou sou pwe I kin pwangahki koasoaii iong liho pwe eme salengopon. Se kin koasoai pene nan pwungat ah aramas me kin seii nansedo pil kin iang rong.

Pwohng koaros I kin mwadangete meirla mwohn liho pwe I kin kahng pepehd pwe ide rongada de kilangada mehkot. I kin inenen lemmw.

Se meirlahr ehu pwohngo oh lelehr ni menseng. I piridahr oh men mwenge iapw alehier kisin mwengehkei oh pahn tepidahr mwenge. I kin ahn mwenge ni mensehng ieh pwe liho me kaianehkiniehda. Mwohn ei pahn mwenge iapw men panginda liho pwe sen wiahkinteh ieu mwenge. Iapw tapiadahr eker liho.

I eker liho pak tohto ahpw E sohte sapeng. I lemehiong me E sohte rong ai likiwero pwe eh salengopono. Ngehi uhd keilahr limwah oh uhd itik. Ni ei itihtik liho iapw pil lemedahr ien kadehdeh ma E esiesingek de soh.

.

I sohte men kamehlele me E solahr esingek ni ei diaradahro. I kilekilang ahnsou werei. Iapw kamehlele ier me E solahr esingek, oh paluhwere me lemwulemwur. Ahnsouo E kidahrek nan kilihkat oh likamwete I pouda. I pil kehn likamwete piten moangei kat pil uhda. I kin wia met ma I kin lemmwda. Iapw mwohndier limwahn liho oh sehse lahr dahme I pahn wia oh pilen mesei pil kerpenehr.

Likamwete sohla angi oh I pil nsensuwed lahr pwehki ih liho me I keieu ahn oh I esehier me E solahr pahn mihmi rehi. Iapw medewedahr ien pakair kihla rohng kansensuwed wet rehn ei pahpa oh ei nohno oh kisehi kan. I sohte men kohla sang limwahn liho pwe I kahng emen aramas de peiien seila oh sop oh diarada me liho kelekelehpw ni ahnsouo. Pwehki sohte me kak seweseiie, kahrehda pein ngehi me wia mehkoaros.

I lemedahr ien seila rehn ai pahpa oh nohno ahpw I pil diar apwal. Mie kisin wahr kis me mwein ngahp riau mihmi nan at imwen waro ahpw kisin wahro pil sakanakan. Mie lapalahn pwoahr ieu nan elep kisin wahro. Iapw lemedahr ien pwekedi kisin waro oh song.

Ni ei pwekedier ahpw mwowidier. Iapw pil pwurehng pwekada wahro. I wia soahngo pak riau A iapw pil lemehda ien uhd kihong pinepen pwoahro. I ale token likou kei ngeki kidiong pohn pwoahro. Iapw uhd ale kisin dinapw kis kidiong pohn token likou koa ngehi kauwada sang kisin tuhke kei powe. E pil sohte mwahu.

Iapw uhd lemehda ien douda elep wahro. Ni ei douda elep wahro, lep pwoaro sakehda. Ahpw ni ilok kan ahr kin lel wahro pihl kin kuslong nan wahro. I seisei kohla oh lel rehn ai pahpa oh nohno. Mwohn ei pahn ndahng ira irehu, ira esehier pwe dene mwomwen meseiet ni ahnsouo me mas saloh.

Ahpw ira awihete dahme I pahn nda. Ni ei kosoiia iong irahier duwen rohng kansensuwedo, iei ahnsouo me pein ngehi ahpw sengisengier.

I lemeleme me mwein ei nohn saloh, pwunod oh masepwehko me kahrehiong ie ei sohte sengiseng te ni ahnsou me I diaradahr me liho solahr esingeko.

I sohte kak oh I sohte pahn moanokehla rahno erein.