KIDI OH KAHT

AUDEPE

NAN PWUHK WET, KE PAHN WADEK KOASOAIEPEN KAHT EMEN OH KIDI MEN ARA KIN WEREK MAHSO. PEIN KOWE NEK DIARADA MEHNIA ME KE MEN DUWEHTE.

PWUHK WET KAUNOPADAHR ONG M I C A L PROGRAM NI SUKUHL EN OHMINE.

KIDI OH KAHT

MAHS MAHS MIE KIDI MEN OH KAHT EMEN KIN MIHMI NI SAHPW EHU. EHU RAHNO IRA AHPW INOUKIHDA IRA EN KOLAHN MWEMWEIT. IRA ERI MWESEL KOHKOHLA OH IRA DIAR PWOAHR EHU. KAHTO ERI NDAHIENG KIDIO, "NA AWIHIE PWE I EN LUSDI NGEHI KILANG LOALE MA E MWAHU."

KAHTO AHPW LUSDIER OH DIARADA ME NAN PWOAHRO INENEN KANSENAMWAHU. KAHTO ERI EKER KIDIO EN LUSDIHLA REH. KIDIO AHPW LUSDIER REHN KAHTO ERI IRA WIE MWADOMWADONG OH IRA PWANGADA. IRA AHPW INOUKIHDA IRA EN MEIR ERI MA EMEN MWADANG PIRIDA, E PAHN KARPWUDE USOL EN EMEN. IRA ERI MEIR.

IRA MEIRLA SOHTE PWAND AH KAHTO PIRIDAHTE KARPWUDE USOL EN KIDIO. KIDIO SIPEDETE KAHTO PWUPW POHN EWEN PWOAHRO. KIDIO UHDAHN SALL PAHN KAHTO AHPW E SOLAHR KAK DOUDAHSANG NAN PWOAHRO. KIDIO AHPW WIE PWURUPWURURSELI NAN PWOAHRO OH IH PITIDAHSANG NAN PWOAHRO. E DOUDAHTE IH PWAKIADA KAHTO.

IRA PWEMPWEPWEKI KOHLA OH KAHTO KILANGADA POUNDAL EHU IH ERI PIPIHSIENG LOALE IH AWIHKI KIDIO. KIDIO TANGATANG KOHDO OH KERENDO AH KAHTO NDA, "KE DEHR! KE DEHR! PWE I SINSILE KOANOAT EN NAHNMWARKI PILAKARAKAR." KIDIO KOHKOHDOHTE OH SONG IH DIARADA ME KENT, AH IRA PIL PWUREHNG PWEPWEKIHDA.

IRA PWEPWEKIHLAHTE AH KAHTO PIL PEKEDIENG NAN TEHNMET EHU IH PIL NDA, "KE DEHR! KE DEHR! PWE I SINSILE KOANOAT EN NAHNMWARKI PILAWA." KIDIO PIL SONGETE DIARADA ME PWUSE AH IRA PIL PWUREHNG PWEPWEKIHDA.

IRA TANGATANG OH DOHLA AH KAHTO KILANGADA PESEN KOAHTE EHU IH KOHLA DOUDA MPE. KIDIO LEL REH AH E NDA, "KE DEHR! KE DEHR! PWE I SINSILE SAPWELLIM EN NAHNMWARKI KESENG." KIDIO UHDAHN PERENDA PWE E RONG, ME NGILAMWAHU. ERI KIDIO DOUDA REHN KAHTO IRA WIE RONGORONG PESEN KOAHTEO.

KAHTO ERI NDAHIENG KIDIO, "MA KISINIENG PAHN PWUREHNG IPIDO, KE PAHN KAPWADOLONG LEWEMWEN LOALE PWE INENEN KANSENAMWAHU." KIDIO PIL PWUNGKI PWE E MEN KEHN SOANGEN KANSENAMWAHUO.

PWANDASANG AH KISINIENGO IPIDOHTE KIDIO KAPWADOLONG LEWEO NAN PESEN KOAHTEO. PESEN KOAHTEO AHPW DOLUNGASANG LEWEN KIDIO IH ERI MEHLA. KAHTO AHPW INENEN NSENSUWEDKIHLA KEMPOAKEPAH KIDIO EH MELAHRO. IH ERI PWURALA NI IMWARAO OH KELEKELEHPW IE.

"KEMPOAKEPAHI MEHTE EMEN MIE POHN SAHPW WET ERI E SOLAHR PAHN KIN IANGIE WASA ME I PAHN KIN KOHLA IE KAN. DAHME I PAHN KIN WIEWIA?"

IHS ME KE MEN DUWEHTE,

KAHTO?

KIDIO?

PWEKIDA?

LEPIN LOKAIA WEHWEH

EKER = LUKUWER; LUKUWERIH.

IPIDO = KODOHN KISINIENG.

KEMPOAKEPAH = EH KOMPANI DE ARAMAS ME KE KIN AHN.

KOANOAT = KENEN SOHPEIDI.

PESEN KOAHTE = TUHKE RIOAPWOAT ME KINPATPENE OH ANSOU ME
KISINIENG KIN KOHDO DE IPIR, E KIN LOKOLOKAIA.

POUNDAL = KILIN LOALEN MWANGAS ME KEKELUAKO.

PWANDASANG = MWURIN EKIS ANSOU MWOTOMWOT

SALL = LINGERINGER.

SAPWELLIM = NEIN SOHPEIDI DIPWISOU DE MEHKOT ME EN SOHPEIDI.

SIPED = KISE MEHKOT NI MWOMWEN WIAKAU.