Keiuhn Tuhke Mahi

translated by Oliver Johnny

illustrated by Eric Woo

Mie kisin dekehkis mahs. Pohn kisin dekehu mie tuhke kalaimwun pwoat. Aramas kin kohpenen sang wasa tohto pwe ren kin kilang tuhke pwoatet. Ahnsou koaros me emen pahn kin pelehsang oapwoat rahn tuhkehu, mwahmw kin owopwidi sang nan wasa lopidahu, oh irail kin kang.

Aramas en deke wet sohte kin kohla pohn mad akan de likin pahina pwe ren laid. Ihte me re kin wia, re kin lopukedihte oapwoat rahn tuhkehu oh irail dapereki arail kopwou kan mwahmw. Ihte duwen arail kin ale mwahmw en mwo oh re kin inenen pereniki soang wet.

Ahpw ahnsou koaros me re kin lopokedi oapwoat rahn tuhkehu, re kin rong ngilen lih emen ah kin sengiseng, wasahkis pohn dekehu. Re kin rong ah kin pekipeki rehrail ren dehr lopokedi rahn tuhkehu.

Aramas oakoa ahpw peidek ki pene nan pwungarail, “Ihs lih me kin sengiseng ahnsou me kitail kin lopuk rahn tuhkehu? Kitail idek mahs reh.”

Irail ahpw kapell ehr sahpwo raparapahki liho. Irail ahpw diarehr liho. Liho kin kelekelehpw oh ih lih loalokong men. Irail eri idek reh dahme E kin sengiseng ki ni ahnsou me re kin lopuk rahn tuhkehu.

Lih ahpw sapeng irail oh nda, “Ahki tuhkehn pahn kihong kumwail mwenge. Ma komwail pahn lopolopuk asang rah kan E pahn mehla oh soangen tuhkehn mehte pwoat nan sampah.”

Ahnsouo sohte mehmen me ese dahkot mahi. Rahpw peipeidek ki pene nan pwungarail, “Tuhkeht pahn kihong kitail mwenge? Soang wet kak wiawi?”

Liho ahpw nda, “Miehier tuhkehn rehmwail oh komwail kanaiohng.”

 “Dahme kitail pahn wia?” Iei duwen en aramas akan ahr koasoaii.

Liho ahpw nda, “Keieu komwail dehr pele tuhkehn oh komwail pahn kilang pwe E pahn wa. Wah kan pahn pohn tehn dipw oh me pahn iou en mwenge. Komwail awiete oh kilang.”

Aramas koa ahpw solahr pwurahng pele rahn tuhkehu. Irail pil pwuralahr laid nansedo. Mwurin ahnsou kis, tuhkehu ahpw tapiadahr wa, oh ih tepin mahi ah miehla. Irail pil eselahr duwen kukiada. Mahi wiahla ehu kanarail mwenge kesempwal lel rahn wet.