translated by Oliver Johnny

illustrated by Don Dougherty

Mie lapalahn kihs men me naineki kisin seri mwahmw kei. Rahn koaros kisin mwahmw koa pahn kin kapell pene kihso irail kin kar moangen kihso. Kisin mwahmw koa kamehlele me arail nohnou me keieu kehlail.

Ehu rahno rahpw karakar moangen kihso oh diar piten moang pwetepwet pwoat. Rahpw sengiseng ier pwe dene arail nohnou kereniongehr mehla.

Kihso ahpw idek rehn serihko dahme re sengisengki. “Se sengiseng pwe se diar piten moang pwetepwet pwoat oh se esehier me ke lialaudlahr oh kereniongehr mehsang kit, oh ma roahso esehier E pahn kohdo oh peiiong uhk.” Kihso sohte katapaniki. E ndahiong kisin mwahmw me roahso sohte kak kaluhsih. Oh E pil pahn kasalehiong irail duwen ah kehlail.

Kisin mwahmw koa inenen pwuriamwei ki en arail nohnou koasoai koa, ahpw re pil nsensuwed te.

Kihso ahpw ndahiong nah serihkoa ren kolahn ndahiong roahso me ira pahn peii. Kisin mwahmw ahpw samwalahr. Ni arail kohkohla, re kin likilik wer iong soangen mwahmw koaros en nansed ren kohpene oh iang kilang peii me pahn wiawi nan pwungen arail nohnou oh roahso. Mwahmw lapala koaros oh mwahmw tikitik koaros ahpw tangpenehr. Ni en kisin mwahmw koa ahr kohkohla re keid limwahn imwen poako lemei men. Re inenen wawaii, emen ahpw lel rahr ehu oh kesehdi. Poako lemeio ahpw piridahr oh nda, “Ihs komwail me kodohn kauwe ei meiret? Komwail mwadang sapengie.”

Kisin mwahmw ko esehier me re mihier nan apwal. Re uhdier oh kilekilengt seli. Poakohu pa pil lokaia sang pahn mwutin rahr ehu. Kisin mwahmw koa ahpw nda, “Menlau mahk ohng kit.” Poakohu ahpw poakeir - railla oh kadar irail la. Kisin mwahmw koa inenen masepwehk ada mehlel re pa rerrer.

Rahpw lelehr ni imwen roahso oh ndahiong duwen arail nognohu ah ilakih irailo, rahpw pil mwadangete pwuralahng rehn arail nogno. Ahnsou me re lel ni imwarilo, re kilang soangen mwahmw koaros, me lapala oh me tikitik, re awiawih ier peiio en tepida. Roahs kehlailo ahpw leledohr oh peiio tepidahr. Kihso uhdahte lusdahng pohn roahso oh pinahla pwoahr me roahso kin esingek kio. Roahso lusda nan wehwe ah kihso pil kolete teng. Roahso duhdihla wasa loalo ah kihso pinahla pwoaron mesen roahso koa. Roahso ahpw loieng ehr takai ehu oh moange inenen medekila mehlel. Roahso ahpw pekimahk ehr oh ih wawaii kohla ni imwehu.

Mwahmw koaros ahpw pwurpeseng ier oh irail koaros esehier me kihso me pahn kakaun te.