written by Hanover Ehsa
designed and illustrated by Donald L. Buchholz

Mie peneinei semwehmwe ieu kin mihmi ni imwara wasa me dohsang nan kahnihmw. Mwohn ara kelehpwila, ira sohte nohn apwal pwe mie pahpa me kin doadoahk nan sahpw oh wahla kenerail mwenge. Eri ah mwurin ansou kis ah ohlo ale ah seilok ni pali erir ni ansou me nei ra pwutak, Pehder, saikinte kak wia mehkot.

Eri Pehder ih ah nohnoh ahpw kelehpwilahr oh liho me uhdehr wia soangen doadoahk koaros me pahn sewese kamaurira oh kakairada nah pwutako.

Kedekede oh mwurin sounpar eisek ah lihho pil sohla kak kohla nan sapw oh rapahki de koadoahkiada kisin mwenge. Ah ara kisin mwetuwelin pedehde me ira kin momourikio pil pahn nekier. Ahri liho ndahng nah pwutako:

"Pehder, mwein e lelehr ansou me ke kak doadoahk. I mwahuki ken kohla rapahki omw doadoahk me ke kak wia pwe kitahn uhd mouriki." "Mehlel," Pehder sapeng, "I mwahuen uhd doadoahk. Ahpw mwein sohte me pahn men doadoahngkinie pwe I saikinte kak wia soangen doadoahk laud me aramas akan kin mwwahuki. Eri ahpw I pahn wia dahme ke nda I en wia."

Pehder eri mwesel samwahlahr nan kahnihmwo. E lel ni keieu en ihmw ih peki rehn ohl me imwe mwo en menlau kiheng ah doadoahk pwe e inenen anahne. Sohte nohn anahnepen doadoahk rehn ohlo pwe pil mie nah tohndoadoahk. Ahpw ohlo kilang wen Pehder eh mesen anahne laud doadoahko ahri e nda:

"Na, mwahu. Ihte me ke pahn kak wia, mwet likin ihmwet rahn wet. Ma nek ah sohte me ke pahn uhd wia pwe miehier sounsile nei kow oh mie sounnet. Pil mie me pwukoahki doadoahk nan sahpw."

Pehder eri ale nah naip oh tepidahr mwet. E mwatih likin ihmwo sohte kommoal oh lel ninsoutik ih nek. Ohlo eri kiheng pweine sent eisek. Eri pwehki Pehder eh sohte kin doadoahngki pwekidin ah rausiso, e sahn kiheng mehkot loale kahrehda e roakeepene sento ih kohkohla rehn ah nohnoh. Eri e wie alialuhte kohla oh mwohnio pwupwisang nan peho. E ahpw rapahkiseli nan reh ko oh pwang. Ih kohkohlahsang.

E lel rehn ah nohnoh liho eri idek reh ia pweinen ah doadoahko, ah Pehder nda me sent eisek eri e pwupwisang nan peho pwupwidi nan rehpadil ko ih rapahki oh sohte kak diar.

"Pweipwei - pwe dahme mie ahmw pwekid ah ke sohte kihengki loale?" liho nda. "Mwurin met ke pahn kin kiheng nan omw pwekiden pwe e dehr pwupwila."

"Okehi," Pehder nda. "Met I pahn uhd kiheng nan ahi pwekidet." E uhdahn sohte kak kasapwuhgehla dahme ah nohnoh kin ndahng.

Manda ih pil mwesel pwurala nan kahnihmwo. E lel mwo ih pil diar ah doadoahk rehn emen ohl tohrohr. Met e uhd iang sewese kuk ko pwe irail pahn kamadipw. Pehder wiewie doadoahk oh lel ninsoutik ah ohlo ekerala ih nda:

"E itarehr omw doadoahk. Ale pweinomwenkowe pwur pwe imwomwo me doh," owo kiheng kepen ehu. Ihte me e ese en kiheng nan ah pwekido. Eri kepo kepwedipwedieng nan ah pwekido ih eri samwalahr. E ahpw seiseimek kohla oh lel rehn ah nohnoh sohte kanengen kepo pwe ehu eh kahk ah e widekidi nan ah pwekido. Kahrehda nehn apali ah rausiso wisekesekala likamwete piahia me mihie. Soh me mwomw kasaut duwe.

"Dahme ke kihengki milik me mi nan kep nan omw pwekiden?" ah nohnoh nda. "Mwohni me I ndahwei ken kiheng nan omw pwekiden. Kaidehn ken kiheng mehkot me pil oh mi nan kep de mehkot me duwehte kep ape. Mwurin met kaleke ke kiheng nan omw pwekiden, ke pahn kidahng pohn moangomwen."

"Mwahu I sohahr pahn kiheng nan ahi pwekidet," Pehder nda. "I pahn kapwaiada mehkot me ke nda I en wia."

Manda Pehder pil mwesella nan kahnihmwo ih pil diar ah doadoahk rehn emen ohl tohrohr. Mwurin doadoahk ah ohlo kiheng koakon en ais kirihm ieu. Ah rahno me pil inenen ketipin, karkarakar, kahrehda Pehder mwadangete nek ninsouwaso. Ia duwen Pehder eh pahn wa koakon en ais kirihmo?

Ni ansou me Pehder kohkohla nan ahlo ah ais kirihmo tepidahr peipeipeseng. E wie kohkohla oh lel rehn ah nohnoh, ah nohnoh ahpwite sallikihda eh kilengilahng ais kirihmo eh kerpesengehr oh podokala nan moange lel mese, kohdi lel pohn pwopwe ape.