written by Ioanis Santos
illustrated by Joy Goodenow

 

 

WEREN UHK

Soangen laid wet aramas kin wa uhk pohn wahr oh seiseiseli. Oh ni ansou en kilangada mwahmw pohn mad, ahri aramas keredi oh kihpeseng uhk, oh kate mwahmw ko pwe ren tangodo nan uhko.

DUHSE

Laid wet aramas kin duhkihdi uhk nan mesenlam, wasa me mwahmw kin tang peian. Aramas kin koasukedi uhk. Pwiliki takai pohn leht kan. Aramas ahpw kin seila lel lepio, oh seisei kohdo oh poakipoak pohn sehd kohdo. Mwahmw kan pahn tangodo nan uhko. Oh aramas ahpw duhdi oh ale nan uhko.

URELIK

Laid wet aramas kin wa uhk oh alialu pohn mad, de likin iloksawa oh kekehl mwahmw kan kohwei.

PWEKINAMW

Met aramas kin wia nan nahmw me sohte loal. Soangen nahmw me aramas pahn keredi oh pwarapwar kohwei. Aramas pahn irek sang apali nahmwo lel apali dodpene. Re pahn wa uhko, leht kan pahn mi ni patehnnehraihl kan. Oh re pahn kol uhs kan. Irail ahpw alialu koaroakoarehd uhko kohwei, lao lel apali. Soangen laihd wet kin wiawi ni uh ngalangal. Mwahmw kan pahn tangala oh lel ni ngalangalo oh pwurodo lel ni uhko. Ma wasahu pedeped me mwahmw kan senserseli, ahri aramas pahn koasoanehdi uhko. Ahpw tepida saik mwahmw kan.

TAHTAKAI

Soangen laid wet, aramas pahn kin seisei pohn mad tangasang wahro, oh pwedilong pahn takai kan. Re pahn kin rukila, ah aramas ahpw pahn kihdi uhk, kapelkipene takaio. Aramas ahpw arihki ketia de ukehda takaio. Mwahmw kan ahpw pahn tangehi sang pahn takai oh teng nan uhko.

KOAHL UHNIAK

Laid wet kin wiawi wasa me dahu kin uhlongohng nan iak. Oh weliniak de uhniak kin mi nan ewen dahuo. E pil kin wiawi soangen ansou me uh kin loal nimenseng. Aramas pahn kohla kihdi uhk maslikin uhniako, sang apali ewen dahuo lel apali. Aramas ahpw awih. Mwahmw kan pahn kin kohkohieido sang nan iako. Re pahn ieiang ei uho ni ah pahn kohkohdi. Re pahn kin kohdo teng ni uhko oh pwurala. Re pahn uhd dindillong nan uhniako. E pahn lahu ngalangal. Ahri aramas pahn kihpene uhko, pidakihekipene welin ahko oh tepida saihk mwahmw kan.

KASAR

Laid wet aramas pahn kin seiwei keredi ni mesen nahmw, oh kihpeseng uhko. Sohpeisang nahmw. Aramas ahpw pahn soai kohdalahsang ni elep uhko. Seidahla oh wet pwuredihdo nan uhko. Aramas pahn kin woakwoakki ketia kohdihdo. Mwahmw kan ahpw pahn kin tangdidohng nan uhko.

OAUDAU

Soangen laid wet aramas kin kihdi uhk, nan ewen kisin dahu me uhlongehng nan iak kan. Koapin uhko pahn kin kohlongola nan dahuo. Ah imwi riau (2) pahn kin peiandahdo koahiloan dahu pali riau (2). Aramas ahpw pahn mi pohn kalewen ahk kan, ni imwin uhk kan. Ansou me mwahmw pahn kohlongala daulih aramas, aramas pahn kin lusidi nan sedo. Mwahmw kan pahn kin tang oh teng ni uhko. Aramas pahn kin kihsang mwahmw kan. Pil pwurehng do uda oh awih met kin wiawi erei n ah sohla mwahmw kohdo.

SEHPWONG

Laid wet mwokidi duwehte mwekid kan en soangen laid me adaniki (Kasar). Ihte e kin wiawi nihpwong. Ansou me uh sohte loal oh sohte inenen pedeped. Soangen uh wet aramas kin nda (uhkos en Pwong).

OUWARAWAR

Soangen laid wet kin wiawi ni pahina. Masloalen pahina. Mie warawar kin uhlongodo sang ni wasa ilok kan kin sawahdo ie. Aramas kin kohla kihdi uhk ni kapin warawaro. Sohpeilahng ilok sawa kan. Masloalen pahina kaidehn likin ilok sawa. Ni ansou uh pahn kohkohlong mwahmw kan pahn kin iangolong. Aramas ahpw pahn kin katehki takai, oh re pahn kin tangodo nan uhko.

LIKOAPWUNG

Soangen laid wet aramas kin duhkihdi uhk ilehisang ilok sawa kan. Wasa me mwahu kai dehn wasa me rahr dir ie. Pil kaidehn wasa me ilok kalaimwun. Murin aramas ah duhkidier uhko, aramas pahn papadahlahsang ni miwin uhk riau (2). Wekidek papdihdo, karawan mwahmw kan kohdihdo ong nan uhko. Oh duhdi ale mwahmw kan nan uhko.

Iei metakan ekei soangen laidki uhk. Metakan likin Ukalap, Sohuhk, Episoal , Pakatei , Dokalap, oh Kakei.