Dahme Pepper Poadki Phnpei?
written by Kolden Manuel
illustrated by Joy Goodenow
Pepper tuhke kekilikileng ong
wein sampah kan. Mehn kaiouih mwenge tohto mie oh ekei tehrail
kan me aramas kin doadoahng-ki onions oh garlic tapirail kan me
kin doadoahk. Vanilla wah kan oh Pepper wah me peleng oh ngalangalehr
kan.
Pepper iei ehu mehn kaieuih mwenge
me apwtehn dierekda oh e kin dolehng uduk pwehn pil kak mihmi
werei. Aramas diarada me doaloahki Pepper oh soangen mehn dol
mwenge teikan kin kaieuihla mwenge kan. Mehn dol mwenge kan ahpw
tepdahr ndandla nan poadoapoad oh pil ih me keieu pweilaud. Mehn
Europe sohte kak poadok tuhke wet pweki sapwerailo me lemwilemwir
oh irair wet sohte aramas kak koapwungala. Met ihme kahrehda e
pahn aleale ah Pepper sang liki.
India me Pepper tepsang ie oh
iei wasa Europe kin kihsangie ah Pepper. Pwehki met kahredahr
ahr raparapahki ahl keren me re kak tangie oh lel Inda pwehn ale
soang pwukat. Sang ni posongsong tohto rahpw diaradahr wein America.
Pwehki ahr men pil alehdi soangen mehn dol mweng me duehte Pepper
rahpw tangseliher oh diaradahr dekehn Micronesia kan.
Pepper tepin lelodhng nan Micronesia
nan pahr 1938 ni ansou me mehn Japan kan wia arail sosohng pohn
deke Palau. Tepin Pepper me lel Pohnpei kohsang wein Fijini February
1954. Sang met kohdo poad Pepper riaute wiawi oh me keieu mwuhro
me pil keieu kalaimwun. E wiawi nan pahr 1960. Pali laud en Pepper
kan me poadidier rahn wet kohsang ni dih en Pepper en nan pahr
1960.
Pepper iei ahd wet me koweng
songen Pepper me toantoalo, me pwetepweto oh me weitatao. Black
Pepper kohsang ni wahn pepper me pohn dihpw kan. White Pepper
kohsang ni wahn pepper me matehr kan, oh red Pepper kohsang ni
ehu soangen tuhke tohrohr ahpw pil adaneki Pepper.
Pepper pil wia kisehn peneinein
tuhke silipwoat me mi Pohnpei. Ehu sakau (pipermethisticum) me
mehn pohnpei kin doadoahng ki kalewe pwehn wiahki sakau. Keriau
kapoi (piper bittle). Aramas kin doadoahng ki teh kan ni ahr kin
kang pwuh oh kesilu, iei konok (Piper Ponapenci). Ekei kin doadoahng
ki lukepe ong ngih medek.
Paliweren Pepper likamwete e
pahn mwomwen tuhke ahpw soh. Lukopeo mewterek. Mie rah tohto kin
poanssang ni pwukele kan. Teh kan me pohndihpw rotorot oh mwomwen
kengkeng imwi ko. Soangen paliwar riau mie ni Pepper. Ehu adaneki
terminal stem, stem de paliwar wet teh kin kohdahsang ni pwikele
kan oh ni en Peppero ah kin mahla teh kan kin mwerasang.
Lateral Stem (branches) kin poanssang
ni paliwar me kin douo oh iei me kin kihda emwi kan oh rohs akan.
Emwih mwahu ka kak reireiki inches siluh lel limau. Ni ahr kin
masal rohs akan kin poh oangoahng.
Ni ansou me berries kan mahier
re kin pohn tehndipwla. Mwurin sounpwong waluh wah pwukat kin
mahier oh poh weitatahla. Ni ansou me re kin pwaildahr oh pelengier
re kin adaneki Pepper Corn.
Ekei wahn Pepper kan kin ohl
ah ekei lih. Ekei ansou lih oh ohlo kin mihpenete ni ehu emwih
(spike). Iei soangen Pepper wet me mwahuen lopidi pwehn wia mehn
poad. Pepper me ahneki ohl oh lih ni ehute emwi me kin keieun
wahn pwehi re kin inenen mengein kaparapar.
Nan sampah rahn wet aramas tohto
kin doadoahng ki Pepper. United State kelehpw kin alehda tenin
Pepper rienen nan pahr ehu. Pepper sohte nohn rek nan United State
ihme kahrehda e kin anahne alehsang sapwen liki kan. United State
kin kesekihla tala million 13 nan pahr koaros pwehki Pepper.
Pepper inenen tuhke kesempwal
ehu ong mehn Ponape. Pepper me kohsang Pohnpei kan me kin inenen
iang mwahu, koasosohngohng me pil kohsang nan sapwen sampah teikan.
Soangen kahrepe tohto me Pepper mwahuki Pohnpei.
