DAHME E KIN UHD KANG

translated by Oliver Johnny
illustrated by Calvin Fujioka

Elias nainiki malek riemen. Malek koa mihmi nan kelen maleko. Emen kihng ah emen litok. Emen kihng ah emen litok.

Elias kamwakamwenge malek koa. E kihkiheng pihl malek koa. E kin kamwenge malek ko ni soutik oh ni menseng koaros.

Mie nein Elias pwutak riemen. Emen ede Sohn ah emen ede Salis. Sohn me laud ah Salis me tikitik. Ira kin mwahuki kilang malek koa. Ira kin doahke malek koa oh kin damwer pohn tihnsewen malek koa.

Litoko wihwia pese. Pesehu mi nan opwong ehu. E onopadahr kutohr.

Sohn oh Salis mwoadoamwoadong ki malek koa. Ira ekehker malek koa. Malek koa wie kokoul. Pwutak koa pahn kihiei sang malek koa nan kehlo. Ira kin mwahuki kol malek koa.

Sohn kadarala kihngo. Ira wie mihmi rehn malek koa. Kihngo pein alialu seli.

Elias pwurasangehr ah doadoahk. E kommoal ier oh ih kolahr pwe en kamwenge malek koa. E diaradahr me malek tehmen me mihmi. Kihngo sohte mie.

Elias ekerehr nah pwutak koa. Oh ih idek, "Ia kihngo?"

Pwutak koa ahpw nennenlahr. Irahpw sapeng ohlo oh nda, "Se sehse E alialu seli limwahn ihmwo ngkapwan."

Na kitail rapahki," Elias nda. Irail ahpw rapahkihier maleko. Re kohla pidakih ihmwo, imwen kaineno, imwen Pihda, re pil lel ni imwen Endio.

Re pil rapahki la ni imwen pwihko. Re pil kohla rapahki limwahn mwahto. Sohn ahpw kilangada mehkot weitahta oh pohn pwehl nan pwungen pedehde koa. E tangalahr oh kilang. E diaradahr kihngo. E wie memeir.

Sohn ahpw ekerehr ah pahpa, "Ipa iet kihngo. E wie memeir nan pedehde kat."

Elias oh pwutak koa ahpw kilangehr kihngo. Kihngo wie memeir. Ohlo ahpw kadehde ier maleko oh diaradahr me maleko soumwahu. Pwutak koa inenen nsensuwed lahr.

Ohlo ahpw kilang seliher wasahu oh ih kilangada kisin denden mwosihkei. Mie kisin koasukoasuk en pwoaisin ieu limwahn kisin denden mwosih koa.

Ohlo ahpw padahkiong ehr nah pwutak koa duwen meleko ah kangada pwoaisin koa. Irail ahpw kolahr nan ihmwo pwe ren kamweng wenie maleko.

Ohlo ahpw kamweng weniehier maleko oh maleko mwur kommoal ier. Salis ahpw idek rehn ah pahpa, "Ipa dahme wiawihong maleko?"

Ara pahpa ahpw nda, "Maleko kangada dendenmwosi koa. Dendenmwosi koa kangada pwoaisino."

Sohn ahpw nda, "Oh ih pwoisin en me pwetepweto? Ihme kahrehda. Ahpw isime wahdo pwoisin oh kihdi wasahu?"

Ohlo ahpw nda, "Nohnokahlap me wahdo. E sohte mwahuki dendenmwosi koa, pwe re kin kang pedehde koa. Nohno laud kin poadokedi pedehde koa pwe kitail en kang."

Salis ahpw nda, "Met wehwehki me maleko kangada dendenmwosi koa. Dendenmwosihkoa kangada pwoaisin koa. Pwoaisin ko kahreda maleko ah soumwahuda. Koasoaii pwoatet me pil reirei."

Ohlo ahpw nda, "Litoko me paiamwahu. E sohte kangada pwoaisin. E kutohrehdi kiden kutohr. Nohno pwoailiadahr kentail mehkei. Kitail pahn kang kutohr soutiket."

Rahno ohlo ahpw katamaniki nah pwutak koa oh nda, "Me keieu mwahu, komwa en tamataman me pwoaisin suwed iong mour."

Mwurin rahn riau kihngo mehla. Kisin pwutak koa inenen nsensuwed la mehlel. Peneineio koaros inenen pahtoula mehlel.

Ohlo ahpw ndahng nah pwutak koa, "Kitail pahn sarepedi maleket. Kitail sohte kak kang pwe mie pwoaisin reh."

Mwurin ahnsou kis irail ahpw alehier sapwel kei oh sarepedier maleko.

Mwurin mwo pwutak ko inenen kanaiohng ala malek. Litoko kasawa dier oh nah kiden kisin pwurok. Pwutak koa inenen apwalih mwahu kisin pwurok koa.

Nohnokahlapo ahpw ndahng kisin pwutak koa irahn rapahkihdo mpwa pwe mpwa koa en kemehla dendenmwosihkoa.

Mpwa kin kemehla dendenmwosi oh uhd mihla nan powirail koa. Ma mpwa koa kin laudla re kin uhd kemehla dendenmwosi laud koa oh uhd mihla nan powirail koa.

Nohnokahlap sohla doadoahngki pwoaisin en kam dendenmwosi. E uhd doadoahngki mpwah koa pwe ren uhd kemehla dendenmwosi.

 

Kisin pwutak ko kakehr kihiei malek koa liki. Re kin mwoadong seli likin ihmwo.

Ekei kisin malek koa wiahla kihng kei ah ekei wiahla litok kei. Kisin pwutak mwahuki kamwenge malek koa oh ira inenen kanaiohng irail.