translated by Oliver Johnny
illustrated by Eric Woo

Ehu rahno dahko ahpw kilangada kisin karahso eh kerekerep pohn oaroahro. Dahko ahpw kepitikihda karahso. Dahko nda, “Ke inenen alu pwand oh mwomw suwed. Kilengie, kilang duwen ei pahn tangseli nansede.” E kin pap seli oh du seli oh wekidek seli inenen marahra.

Karahso ahpw kilekilang dahko ahpw nda, “Keme marahra ah ime tangapwand.” Ahpw I lemeleme me I kak kaluhsih iuk ma kita weir limwahn oaroahre.” Dahko ahpw nda, “Kedehr likamw! Iaduwen omw pahn kak kaluhsih ie? I kin tang duwehte lioal ah ke kin kerekerep kohwei inenen wawaii.”

Karahso ahpw nda, “Kita pahn weir lakapw, ni menseng. Kita pahn tepida met limwahn takaiet oh kita pahn weirih nih pwoat me kesikesihnen ni imwin oaroahro. Ke pahn pam A I pahn kerep pohn oaroahret.

Dahko pa kokouruhrla, ahpw E pwungki irahn weir mandahu. Dahko ahpw nda, “Ke me nohn pwikikidik. Iaduwen ei pahn kak ese ke mihmi ia?” Karahso ahpw nda, “Me mengei, ke pahn kin ekerie A I pahn kin sapeng uhk.” Dahko ahpw kokouruhr ier oh ih kohkohla.   

Karahso me tikitik ahpw me loalokong. E kerep ier ni oaroahro pwohngo oh padahkihong iengehkan duwen ara pahn weiro. Ahpw kin nda, “Dahko me nohkin kala, I pahn sukuhlih mahs.”  

Karahso padahkihong ienge kan koaros ren kohla oh irek dihla limwahn oaroahro. Ren irekdihla sang ni takaio oh lel ni niho. Ma ahnsou dahko pahn kin eder A emem en kin sapeng pwe dahko en kin lemehiong me karahso me kanakana. En lemeleme me ahnsou koaros karahso me tihtieng.

Karahs teiko inenen pereniki weiro. Re pwungki en karahs teiio ah pilahno. Ni menseng en weiro ahpw lelehr. Irahpw tapiadahr weiro. Dahko tepite tangki lioal, A kisin karahso sohte tang. Kisin karahso ahpw nda, “Ihei ahnsoun ei uhd kourukr en met.” Ih eri kokouruhr ier. Dahko ahpw tangatang ehr oh ih likiwer nda, “Karahs, karahs ia kowe?” Emen karahs oako nda, “Ieih ngehi pohn oaroahret.”

Dahko inenen pwuriamwei oh ih pil kereniong lusdahsang nan sedo. Ih pil mwut diong ah tang ahpw pil idek,” Karahs, karahs ia kowe?” Kisin ngihl kis pil peido nda, “Iet ngehi mwohmw.”

Pak koaros kahko kin likiwer emen kisin karahs kin sapeng oh kin nda, “Iet ngehi mwohmw.” Dahko wia wen ah kak koaros pwehn uhd tieng ahpw sohte kak pwe karahs koairekite lel ni niho. Ahnsou koaros dahko kin idek ia karahso, kisin ngihl kis kin peido sang pohn oaroahro oh nda, “Iet ngehi mwohmw.”

Dahko wia uwen ah kak koaros ahpw E sohte kak tiengala mwohn karahso. Ahnsou me dahko lel ni niho kisin karahs kis mihmi limwahn tepin niho oh E sohte nget de pwang. Karahso ahpw nda, “Ke lelehr met ahpw pwand.”

Dahko kereniong poskipeseng ah lingeringero. E lusdahsang ete nansedo oh ewehu tengala ni niho. Inenen idila oh ih langalang ahnsou reirei. Ahpw pwupwidier oh ih mesemesen pweipwei kohla. E song en moanokehla weiro ahpw sohte kak pwe aw powehu tipwehng ni niho. Sangehr rahno aw powehn dahk mwotomwot ala lel rahn wet.