Sechou me a Deroech

written by Mahensia T. Thomas
illustrated by Joanne Tome

A Ngerberuuch a beluu el mo er a Imeliik Ng ngar er a delongelel a Ngchemiangel me a Chelechui. Tia el cheldecheduch a dilubech er isei.

A ta el tutau e a chimo el sechou a reboreb er a dereberebellel e omes er a sechelil er a Deroech. Ngika el Deroech a dirk tutau e ng melechelbakl el omereberek a osebekel. Ng omereberek a osebekel el merrau a ngikel.

A Sechou a okere er ngii el kmo, "Rrang, ngara a chised me ng kmal dirk tutau e ke merrau? Ke oungalek? Aika a medam el ua a dersechimo el olechesobel."

A Deroech a kmo, "Rrach, ng diak kuungalek. Ng di diak el ua a klengerenger. Seikid a uchul e ng dirk tutau e ak melechelbakl."

Ng dula a Sechou el kmo, "Rrang, ng diak mei me di ta el kurolid. A debong e ke er di mengang e diak dolechelbakl. Ng diak de ua ikau er a chelechang el ko er a olechesobel a medam. Ak omdasu e ng kmal diak a ngikel lekau tilecha el dirkak a chomsebngii."

A Deroech ulerrenges er a Sechou a longedecheduch. Ng dula el kmo, "Ng kmal mera el tekoi e rrang. Becherei e kede bai mong. Ng di kau a oba a omeroled."

A Sechou a dula el kmo, "Becherei e kede bai mo er a klukuk. Ke er di me kaisiuekl er tiang e merael. "

A Deroech a kilengei a tekingel a Sechou. Te mocha a kasmesumech e mo kebii.

A bocha el kukuk e te merema a kebetech er tia ledillii. A Sechou a mocha a melekoi er a Deroech el kmo, "A debong e lebo lebetok e kid a di sobechid. Ke er di sobechid me kede chachelechel me ng diak bo de kelsakl e me remei."

A Deroech a kmu er a sechelil el kmo, "Ng diak e rrang. Ngii di de mereched el mong me desang. Ng kmal orrecheda a renguk el mo merrau. Ak kmal semeriar."

Te sobekang el teru el sechelei el mo er a chelmoll. A lebong e te mlo reboreb er a chiloil. A Sechou a dula er a sechelil el kmo, "Msall e kau a kmal mereched a rengum. Bo mkilmeklii a rengum e bo leblengkangk a chei. A bo leblengkangk e ke er di meruu. Ng mo medeel er kid."

A Deroech a di rireboreb el telkib e kmo, "Rrach ngak a me a mochung. Ak mochu er a di bita er kau e merrau. Ak kmal orrechedang."

A Sechou a kmo, "Ke mo merrau e a bo lemeched me di doruu e kele bo mongoit?" A domekbat e ng bai mekngit er a di doruu."

A Deroech a di kmo, "Ng diak. Kau msall e bai ba kbong."

A Sechou a dula el kmo, "Me a da ng di kau."

A Deroech a metengela el mo merrau. Ng merrau e ngii a obengkengka a chei.

A lobengkengka a chei e ng di mlo berriid a ngikel. Ng mera el di ulisur a omengang. Te mengang e a Sechou a kmo, "Kede ko er a medngesang. Ng diak el ungia el bo derei?"

A ldu a Sechou el ua isei e a Deroech a ko er a omes aika el ngikel el dirk berriid Ng kmu er a Sechou el kmo kau msall. Ng kmal meringel a rengul er a aika el ngikel el di berriid me ng liluut el mo mengang. Ng di milengang me ng di ultom ku a kemril a ngikel er a ngerel A lekea el sebechel a ngikel el mo tmuu er a ngerel e ng dula er a sechelil er a Sechou el kmo mereko e dorael.

Te sobekang el teru el sechelei. A lsebek e te dirk ngar er a medal a chiloil e a Deroech a omudech. Ng ulemudech e mocha a blechakl er a daob.

A Sechou a sobeka el mo reboreb er a tkul a chiloil. Ng reboreb e kmu er a sechelil er a Deroech el kmo, "Ke ongellau el mo ungil a rengum lekau ia a oba a omeroled."

Te ullengull el telkib e kuk luueta el suebek Te dirrek el di silebek el telkib e a Deroech a lmuut el ruebet. A Sechou a mocha a suebek el meliuekl er ngii. Ng dula er ngii el kmo, "Ak mo er ise el debla er ngii er a chelii e choielau. " A Deroech a kilengei a tekingel a Sechou.

A Sechou a suebek el mo er tia el le bla er ngii. Ng mlo me ng reboreb el telkib e ngii a merema a Deroech. A leme ngii el Deroech e ng kmal mesel. Ng mesel e ko er a kmal mechitechut a bedengel. Ng mlo reboreb er tia el osisiu el rachel el reboreb er ngii a Sechou.

Ngika el Deroech a reboreb e kmal el ko er a di mechitechut a bedengel. Ng dirrek el kmal diak bo lekie a rengul er a klengerenger. Ng diak bo lekie a rengul er a klengerenger le ng di miludech a kllel el rokui. Ng kmal mochu ngmelt a sils e ngii a luueta el mocha metengel. Ng mlo metengel er a daob el mo merrau a kelel. Ng mlo merrau a kmal di kelel se el kesus.

Tia a mera el cheldecheduch el ollachitnger el kmo, "Bo moserechii a rengum e monglou er ngii e ng ngar er ngii a belkul."