pageok
PDF version (3.66m)

OMESUBEL A BEBIL ER A DELLOMEL ME A CHARM

Picture

written by:
Maxie T. Thomas
Bernie Keldermans
Riosang Salvador
Helbert Fritz

Table of Contents

Ngakl
illustrated by Gué

Ngiradidall
illustrated by Joy Nagata

Chaibebelau
illustrated by Deby Nakamura

A Charm Ng Melekoi?
illustrated by Kathy Kagawa

Semum Me A Char
illustrated by Deby Nakamura

Mekebud
illustrated by Steph McClaran

Eungel Me A Ngirbabul
illustrated by Joy L. Goodenow

Kakerous El Omerael
illustrated by Kathy Kagawa

Cherchur Me A Kesako
illustrated by Remasch Teriong

Ng Eim
illustrated by Gué

Ke Ousbech er Ngak?
illustrated by Jennifer Matsuda

Bngal a Dellomel
illustrated by Gué

Picture

Picture

Ngcheangel

A beluu er a Ngcheangel a betok a ungil e meduch el such er ngii Aika el such a lemechaus e ng kmal ungil el tet me a lechub e ng chedecholl.

A remekekerei me a remeklou el redil er a Ngcheangel a kmal meduch el mengaus.

Picture

Ngerchur

A Ngerchur a ngar er a bita er a Ollei me a Ngerchelong. Ng kmal klebokel el iungs. Ng dirrek el kmal betok a Kaming me a Babji er tia el iungs. Aika el charm a chermir a re di mekesai el chad.

Picture

Ollei

A kereker er a Ollei a betok a bek el bedengel a cheled er ngii. Ng kmal imis el betok a Delebekai er ngii.

Ng dirrek el ngar er ngii a omoachel er ngii. Tia el omoachel a bliongel el mo kldei. Se el kmal bedul er ngii a ilumel. Se el ngar er a belngel a lolecholb er ngii a resechal. Se el kuk ngar er a uriul a lolecholb er ngii a redil.

Picture

Ngeremlengui me a Ngerdmau

A Ngeremlengui me a Ngerdmau a kmal betok a Cheremrum er ngii. Ng dirrek el kmal betok a Ngduul er ngii A jus me ng kmal betok er a aika el beluu. Ng betok a ius er ngii e le ng kmal meklou a omochelel.

Se el kot el klou el Taki er a Belau a ngar er a Ngerdmau.

Picture

Ngetbang me a lbobang

A Ngetbang me a lbobang a kmal betok a Chemang er ngii Ng dirrek el kmal betok a kakerous el bedengel a cheled er ngii.

Se el bo leblul er a Chemang e a rechad a mo diak blai. A blul a ta er a rolel a ungil el omengereomel me ng diak bolak a Chemang er a aika el beluu.

Picture

Imeliik

A Imeliik a kuk kmal blil a Kmai. A Kmai a di ua teletelel a Chemang. Ng di telkib el mekekerei e mekekemanget a omengchel. Ng dirrek el kmal ungil el odoim.

A kereker er a Imeliik a dirrek el kmal betok a bek el bedengel a cheled er ngii.

Picture

Ngerchebal

A Ngerchebal a diak el keed er a Imeliik me a lechub el Oreor. Ng ngar er ngii a ta er a ngakl el lousbech er ngii a rechad er a ngebard. Te omekedong er a Ngerchebal el kmo Diall-el-Beluu (Ship Island). A uchul me te kmo Diall-el-Beluu ngii el ua teletelel a Diall.

Ng ngar er ngii a Bedaoch el kie er a Ngerchebal. Ng di diak el sal betok.

Picture

Oreor

A Oreor a meseked er a bek el bedengir a rechad. Te betok el chad a ngar er ngii e oureor. Tirka el chad a kakerous a blekerdelir a bo loureor. A rebebil a ngar er a mlai me a rebebil a kuk di merael.

Ng kmal betok a beches me a mechut el mlai el ngar er a Oreor. Aika el mlai a uldimukl er ngii a mlai er a beluu me a mlai er a daob.

Picture

Chelebacheb

Ng kmal betok a Chelebacheb er a delongelel a Oreor me a Beliliou. Aika el Chelebacheb a ngar er ngii a chelechol 9r ngii. Ng kmal becheleleu el chelechol. Ng dirrek el kmal ungil el oililaol.

Aika el Chelebacheb a kmal betok a ngikel er ngii. Ng dirrek el kmal betok a bek el bedengel a cheled er ngii.

A Ngerukuid a uldimukl er a aika el Chelebacheb. Ng di diak el sebechir a rechad el mo milil er ngii. Aika a blul el diak a chad el mo er ngii. Ng blul me ng sebechel el mekereomel a charm me a ngikel er ngii.

Picture

Beliliou

A Beliliou a kmal blil a Rekung (Kakum). A Rekung a kmal ungil el odoim. A remechas er a Beliliou a kmal meduch el meruul a Rekung. Ng sebechir el kitiit a techel a Rekung e locha er a ukaeb e chemuit. Se el leruul e kede omekedong el kmo, "Ukaeb."

A Brak er a Beliliou a kmal di mekekerei el diak bo lemeklou. Ng dirrek el kmal beot a dosubech. Se el de ngiokl e ng kmal ungil. Ng dirrek el kmal ungil el ongraol. Ng kmal ungil el dongang ngii me a Rekung.

Picture

Ngeaur

A Ngeaur a dirrek el di ua a Beliliou el betok a Rekung er ngii. A remechas er a Ngeaur a dirrek el kmal meduch el meruul a Ukaeb.

A Ngeaur a di ta el beluu er a Belau el betok a Mongkii er ngii. Ng dirrek el mla mo er ngii a dersechimo el lus er ngii Aika el lus a kiei a delluchel el chutem el ultil a Ringko (Phosphate).

Picture

Dimsngebard

Ng ngar er ngii a kllolem el beluu er a Dimsngebard. Aika el beluu a kakerous a ngklel. Ng ngar er ngii a Meriir me a Sonsorol me a Tobi me a Pulu Anna me a Fauna me a Helen Reef.

A rechad er a Dimsngebard a diak el betok e ng di kmal mellomes a rengrir. Ng sebechir el meruul a Ilaot. Ng dirrek el sebechir el meruul a Katsuo-busi.

Picture

Helen Reef

A Helen Reef a kmal betok a charm er ngii. Ng kmal bek el bedengel a charm a ngar er ngii. Se el debong e ng sebeched el di mesarech a ngais er a chelechol le ng kmal imis el betok.

Ng dirrek el kmal betok a Uel er a Helen Reef. Aika kakerous el bedengel a Uel. Ng dirrek el kmal kakerous a meklungel.

A Kuel me ng ta er a bedengel a charm el de betik er tia el beluu. Ng dirrek el ngar er ngii a meklou me a mekekerei.

Picture

Irrai

A Irrai a kmal blil a Bambuu. Ng kmal betok a Bambuu er a ked er ngii. A Bambuu a kmal ungil el ulaol. Ng dirrek el kmal ungil el reakl.

Ng dirrek el betok a kakerous el bedengel a cheled er a kereker er ngii. A ta er a bedengel a ngikel el kmal betok er a Irrai a Meas. A Meas a kmal ungil el odoim.

Picture

Ngchesar

A Ngchesar a dirrek el betok a cheled er a kereker er ngii.

A Ngchesar a di ta el beluu er a Belau el mla dosechii a Kabekel er ngii er a chelecha el taem. Tia a kmal dirk mildasech el Kabekel. Ng sebechel el otekterir a rekmeed el mo okouang el chad. A ngklel tia el Kabekel a "Bisebusech."

Picture

Melekeok

A Melekeok a ngar er ngii a kot el klou el omoachel er ngii A ngklel tia el omoachel a Ngerdok. Tia a ua teletelel a Madedok el ralm er ngii a di ngar er a chelsel a chutem e me tuobed. A Ngerdok a uchelel a rokui el omoachel er a Belau.

Picture

Ngiwal

A Ngiwal a kmal betok a kukau er ngii Ng kmal meklou e mesisiich el kukau. Ng dirrek el kmal betok a mekemim el meradel er ngii. A ngklel aika el meradel a "Kingkang."

Picture

Ngerard

A Ngerard a ta er a kmal meklou a kukau er ngii el beluu. Ng dirrek el kmal ungil e mesisiich el kukau.

A rechad er a Ngerard a kmal meduch el meruul a Demok. A Demok a kmal ungil el odoim. Ng kmal ungil er a bedenged. A Demok a mengai er a llel a dait. Ng dirrek el sebechel el mengai er a chelebedel a dait.

Picture

Choll

A Choll a dirrek el ta er a betok a kukau er ngii el beluu. Ng kmal meklou e mesisiich a kukau er ngii.

Ng dirrek el kmal betok a Kangkum er ngii A Kangkum a dirrek el ta er a kmal ungil el odoim. Ng dirrek el kmal ungil er a bedenged.

A Choll a ta er a kemangel a chelechol er ngii. Ng betok a Chesechol er a chelechol er ngii Ng dirrek el kmal betok a Lius er a chelechol er ngii.

Picture

Ngerchelong

A Ngerchelong a kmal betok a kim er ngii. Aikang a kakerous el bedengel a kim. Ng ngar er ngii a mekekerei el mo lmuut er a kmal meklou. Ng kakerous a ngklel aika el kim. Ng ngar er ngii a Duadb me a Kism me a Melibs me a Otkang me a Ribkungel.

A kim a kmal ungil el odoim. Ng dirrek el kmal ungil el klalo a ulekngellel.

A Ngerchelong a dirrek el kmal ungil a kukau er ngii Ng dirrek el kmal meklou e mesisiich.

Picture

Picture

Picture

A Ngiradidall a ngelekel a Ngirur me a Ngiraked. Ng kmal soal a dellomel Ng blechoel el melaml a delul a dellemelel. Ng dirrek el blechoel el melai a Katatsumuri me a Melaitul er a dellemelel. Ng diak el a soal a lemeka er a charm aika el dellemelel.

A ta el Ongeim el urreor e a Ngiradidall me a resechelil a mlo milil. Tirka a mlo milil er a tkul a omoachel. A resechelil a mlo mengedub e ng di ngii a diak. Ng bai di ulsiik a delemelel. Ng ulsiik a mekekere el dellomel Ng dirrek el ulsiik a melekesako el dellomel. Ng miltik er a ngelekel a meduu me ng medelii. Tia el meduu a Meriaur. Ng ngiluu el milii er a llel a Bisech e lochetii. Ng mlo kmedii er a uchul a klou el kerrekar.

A Ngiradidall a kuk mlo metengel er a omoachel. Ng mlo omdechem a chermel el Cherchur. Ng uleba a chimo el beached el blil a chermel. A Ngiradidall a mildechem a kloa el Cherchur. A teblong a redil e a teblong a sechal.

Ng di mle telkib e a Ngiradidall a merael el mo remei. A lebo er a blil e a delal a dengchokl. Ngika el mechas a uleker er a ngelekel el kmo, "Rungalek ng mo ngara tia el meduu?"

A Ngiradidall a ouchisa er a delal a teletelel tia el dellomel. Ng dilu er a delal el kmo, "Tia a kmal ungil el dellomel Ng soak el mo melalem er ngii A bo leklou e ng sebechel el ourodech e kede mengang a redechel." Ng di mlo merek el mengedecheduch er a delal e merolang. Ng mlo nguu a osbul e merael el mo melalem er a delemelel.

A bocha lemerek a Ngiradidall el melalem er a delemelel e ng kuk mocha mengedmokl a chermel el Cherchur. Ng ngiluu a klou el baket el smuk a ralm er ngii e locha a chermel er a chelsel. Ng dirrek el kmal mle kerekikl el mengedmokl aika el chermel.

Picture

Picture

A bo lekukuk er a kebesesengei e a Tarkong a milrael el mo engelakl er a blil a Ngiradidall. A lomes er a Ngiradidall e ng melubs a dellemelel er a ralm. Ng mocha dechor e te chachedecheduch.

A Tarkong a oker er ngii el kmo, "Rrang, ng soam el kie er a chereomel? Ng ko er a kmal dikea a mekesekesem. Ke mla dualem a kall me a diak el kall er ngii el rokir."

A Ngiradidall a ulerrenges er a sechelil er a longedecheduch e kimir a cheril. Ng dula er a sechelil el kmo, "A rokui el dellomel a kmal meklou a belkul. Ng ngar er ngii a dellomel el kall. Ng dirrek el ngar er ngii a dellomel el di besiich. Ng dirrek el ngar er ngii a dellomel el kuk di meskid a chuu. Ng di se el kmal kot el klou el ultutelel er a dellomel a meskid a eolt."

A Tarkong a kmo, "Ak medengei. Ng di ke mla dualem a betok el dellomel. Ng ngar er ngii a kall me a diak el kall. Ng dirrek el ngar er ngii a bebil el diak a bngal. A lemei a klou el eolt e ng sebechel el mukel el tomellii a blimiu."

A Ngiradidall a dilu, "Ng mera el tekoi. Seikid a uchul e ng delalem a meklou er a tkul a mekesokes. Ak dirrek el blechoel el melobech a rechelel me ng diak bo lemetongakl."

A Tarkong a mlo chelellakl e omdasu el telkib. Ng luueta el melekoi er a Ngiradidall el kmo, "Ng ngara el eolt a chomolekoi? Ng ko er kid tia el di mla outeliil."

A Ngiradidall a mocha ouchais er a Tarkong. Ng dilu er ngii el kmo, "A dellomel a meskid aike el eolt el diak el ousbech. Kid a rechad me a charm a kuk msang aike el eolt (C02) el diak dousbech. Aika el eolt el lengai er kid a dellomel a kuk bo lousbech." Aike el eolt el kuk dengai er a dellomel a bo dousbech." Ng di mlo merek a Ngiradidall el mengedecheduch e a Tarkong a melmesumech er ngii e merael.

A Tarkong a mlo remei e di rrau a rengul. Ng mocha merek a blsoil e ngii me a ochedal er a Limei a mocha chachedecheduch. A Tarkong a uleker er a Limei el kmo, "Ng ua ngara el eolt a lebeskid a dellomel? Ng kuk ua ngara el eolt a debsa a dellomel?"

A Limei a mocha mesaod aika el eru el bedengel a eolt (Oxygen & C02). Ng dilu el kmo, "A eolt a kmal betok a mekere el klalo el ngar er a chelsel. Aike el dengai (oxygen) er a dellomel me. a kuk debsa (C02) a dellomel a bebil er ngii. Se el doltuu a telid e kede ngmai a eolt (Oxygen) er a dellomel. Se el kuk doltobed a telid e kede msa dellomel a eolt (CO2)."

Picture

A dellomel a ngmai a eolt el debsang kid me a charm me ng ousbech. Ng kuk meskid a eolt kid me a charm me kede ousbech. Tia a ko er a meliuekl el tekoi. Ng ngara a uchul me koker?"

A Tarkong a mocha ouchais er a bo lengelakl er a blil a Ngiradidall Ng dirrek el uluchais aika el tekingel a Ngiradidall Ng dilu er a Limei el kmo, "Ng dimlak kudengei el kmo ngara el eolt a lolekoi a Ngiradidall Ng di dimlak kuker e le ak merur."

Picture

A bocha el kukuk e a Tarkong a mo er a skuul e mocha osiik er a Ngiradidall Ng oker er ngii el kmo, "Rrach, ng sebechek el eko ngmai a delemelek er a blim?" Ng kmal klou a mekesekesam e diak a dellomel er ngii Ak omdasu ak kot el dualem aike el kall el dellomel. A uriul e ak mochu melalem a di besiich. A delak a dirrek el diak el soal a lechudel a mekesokes er a blimam."

A Ngiradidall a dilu becherei me a detobed er a skuul e bo mngai. Ng sebechem el ngmai a betok me a lechub e ngike el soam el dellomel.

A ltebeda er a skuul a Tarkong e ng milrael ngii me a Ngiradidall el mo remei. Te mlo touchakl er a blil a Ngiradidall me a Tarkong a ngmai a delemelel. Ng di ngilai a delemelel e merola el mo remei. Ng di mlo er a blil el oidii e mo melalem a delemelel. Ng di dilalem el rokui. Ng dirrek el kmal mle meses el melubs e melai a Katatsumuri er ngii.

A delal a Tarkong a kmal mlo ungil a rengul. Ng kmal soal el omes er a ngelekel el ko er a kmal meses el mengedmokl a dellemelel.

Picture

Chaibebelau

Picture

1 Ngak a charm. Ak kie er a daob. Ak kmal ungil el odoim se el kmechuit. A tengdek a di ultom er a budek.

Ka molangch el kmo ak ngara el charm?

Picture

2 Ngak a charm er a daob. Ak bereked er a bad me a lechub e ng mechut el deel. Ng di bita a ulekngellek ng di kmal medecherecher. Ng diak ki msal betok el charm. Aki di kmal ungil el odoim. A lsekum ke melai a mo odimem e ng kirem el di ngmai a kldei. Ng diak meterekakl er kemam le ki kmal mekesai.

Ka molangch el kmo ak ngarang?

Picture

3 Ngak a charm er a daob. Ak di blechoel el mengol er a blik el omais. Se el bo kmesaul e ak tmuu er a chelsel e mo mechiuaiu. Tia el blik a kmal obereod. Ng dirrek el kmal medecherecher.

Aki kmal kesiokel el charm. Ng di kmal meklou a ultutelam. Ng sebecham el mo Urodech. A rechad a melai er kemam el mo olterau er kemam. Ng di diak el ngii di el taem el lolai er kemam. Ng kmal di ta er a ta el rak. Te melai er kemam er a ongelolem me a lechub e ng ongeuid el buil.

Aki dirrek el kmal ungil el odoim. A chelsel a ongelolem me a lechub e ng ongeuid el buil e ng sebechir a rechad el melai er kemam el mo odimir. Se el lolai er kemam e te ousbech a Oluis. Te oba a Oluis el meluis er kemam el oltobed er kemam er a blimam.

Ka molangch el kmo ak ngara el charm?

Picture

4 Ngak a charm. Ngak a kie er a chelsel a chelechol. Ak becheleleu e kmal kekerei. A rechad a kmal sorir el menga er ngak. Te blechoel el meruu a betok el ua ngak. Te ngmai el mei me te menguit. Se el bo lemarek e ng kmal ungil a telemtemul.

Ka molangch el kmo ak ngarang?

Picture

5 Ngak a charm. Ng diak a ochik me a chimak. Ak kie er a kereker e menga a chelechol. Ng diak ki msal betok. Ng di kemiu a rechad a kmal ousbech er kemam. Ng kiriu el chome er a chei e ng diak meterekakl er kemam. Ng sebechiu el di ngmai a delecherir a remekesai e meklou er kemam. Ng diak molai er a remekekerei e le ki kmal mereched el mo diak. A lsekum ko meterekakl er kemam e chomluut el mei e a ki mla mo diak.

Ka molangch el kmo ak ngarang?

Picture

6 Ngak a rodech. Ng kmal betok a cheldengelek. Se el bo lemarek e ng mo mellil (bibrurek) a bedengel. Ak dirrek el kmal merekos me a rechad a sorir el menga er ngak.

Ka molangch el kmo ak ngara el rodech?

Picture

7 Ngak a dellomel. Se el lousbech er ngak a rechad e te medelak. A techek a sebechel el ongraol. Ng dirrek el sebechel el mo kliou. Aki betok el osisiu el dellomel e ng di kakerous a ngklam.

Ka molangch el kmo ak ngara el dellomel?

Picture

8 Ngak a dellomel. Ak melekesako er a bebul me a delongelel a cheleliuis. A llek a kmal ungil el odoim. A techek a dirrek el ungil el ongraol. Ng dirrek el sebechel el mo kliou.

Ka molangch el kmo ak ngara el dellomel?

Picture

9 Ngak a kerrekar. Ak kmal klebokel. Ak dirrek el kmal mesisiich. Ng ngar er ngii a redechek el mechaibibeob e ng di diak el kall. A rengalek a blechoel el ousbech a redechek el outama. Ng kmal soak el kie er a tkul a daob.

Ka molangch el kmo ak ngara el kerrekar?

Picture

10 Ngak a kerrekar. Ak kmal klou. A bngak a kmal bechochod. Se el moruul a chiltem el cheluch e ng sebechem el ousbech er ngak. Ke ngmai a bngak el odak er a cheluchum e smongoes. Se el msengoes e ng kmal mo ungil a bul.

Ka molangch er ngak el kmo ak ngara el kerrekar?

Picture

11 Ngak a dellomel. Ng diak a rechelek. A lsekum ak omung e sechal e te dobechak. A lsekum ak lmuut el duubech e dirrek el omung el sechal e te lmuut el dobechak. Ng di mereko ak omung el redil e ng mo diak lolobech er ngak. Se el bo kuurodech e bo lemarek a redechek e ng kmal ungil el kall. Ng kmal ungil el kelir a retolechoi.

Ka molangch el kmo ak ngara el dellomel?

Picture

12 Ngak a melekesako el dellomel. Ng ngar er ngii a bngak el mechaibibeob. Ng kmal klebokel. Se el rutech a llek a rechad e ak mo mechiuaiu. Ng kmal mekedorem a techedek.

Ka molangch el kmo ak locha ngara el melekesako el dellomel?

Picture

13 Ngak a dellomel. A chelechedak a sebechel el mo ulalol. A llek a sebechel el mo oruikl. A churul a llek a sebechel el mo oriik. A bngak a mengai a ilaot er ngii A redechek a kall e dirrek el ilumel a osechel.

Ka molangch el kmo ak ngarang?

Picture

14 Ngak a ta er a bedengel a chudel. Ak dechor er a tkul a rael. Tirke el mo olengimes a sorir el melai er ngak. Te melai er ngak el mo ousbech er ngak Te ousbech er ngak el mo lkir a chelasir.

Ka molangch el kmo ak locha ngara el dellomel?

Picture

15 Ngak a ta er a melekesako el dellomel. A cheberdik a kmal ungil el odoim. A bngak me ng dirrek el sebechel el odoim. Ng dirrek el kmal klebokel a bedengel. Ng sebechem el mekbuch a sechal me a redil el bngak e ng mo rodech. A redechek a mo meklou e oumesingd el bibrurek a bedengel.

Ka molangch el kmo ak locha ngara el dellomel?

Picture

16 Ngak a charm er a chereomel. Ak ngar er a teluo el kerrekar e omtar el mo er a teluong. Ng kemanget a kemrik. Ng sebechek el nguu a kemrik el lochetii er a rechelel a kerrekar e omtar. Ng dirrek el sebechek el merael el ua a Bilis.

Ka molangch el kmo ak locha ngara el charm er a chereomel?

Picture

17 Ngak a suebek el charm. Ak di menga a rodech. Aki kmal mla mo mekesai el charm. Se el bo el sim er a kelel a charm er a Babeldaob e a ki mong. A kuk bo el sim er er a kelel a charm er a chelebacheb e a ki dirrek el mong. Ak kmal sorir a rechad le kmal ungil el odoim. Ng di diak el kirir a rechad el di melai er ngak er a ngii di el taem. Ng ngar er ngii a belsechel e te melai er ngak.

A lsekum ko melai er kemam e ng di mekesai a chomngiteterir le ki kmal mla mo mekesai. A lsekum ko meterekakl er kemam e a ki kmal mereched el mo diak.

Ka molangch el kmo ak locha ngara el charm?

Picture

18 Ngak a ta er a suebek el charm. Ng kot el mekemanget a ochik me a chiklek. Ng mekemanget a ochik le ak ousbech el osiik a kelek. Ng becheleleu a bedengek. Te ngar er ngii a rebebil er ngak el mechedelekelek me a cheriich a bedengir. Ng sebechek el menga a ngikel me a laes.

Ka molangch el kmo ak ngara el charm?

Picture

19 Ngak a dirrek el suebek el charm. Aki kmal kesiokel el charm. Ng kmal ungil a bedengek. A rechad a kmo ak ngelekel a Kim. Te blechoel el omdechem er ngak el mo chermir. Ng di se el kbo er a blirir e ng diak lomeskak a mera el kelek me kungang. Te di blechoel el omeskak a ngodech el kall me a kmengang. A lebeskak a ngodech el kall e ak mo smecher.

Ak oureng el kmo chuleku me a rechad me ng diak el omdechem er kemam. Ng diak el odengei aki mongang me a ki kmal mereched el mad se el le ngikemam.

Ka molangch el kmo ak locha ngara el charm.

Picture

20 Ngak a ta er a beab. Ng di sebechek el suebek. Ak di melim a bodes er a rodech. Ak kmal klikiid e beches el charm. Ak dirrek el oltut a ngelekek. Ka molangch el kmo ng locha a techa a ngklek el charm?

Picture

Picture

Picture

Kid a rechad a kot el mellomes a rengud. Ng mellomes a rengud er a rokui el charm er a beluulechad. Ng dirrek el kmal betok a tekinged. Kede mengedecheduch er a dodengelterir el melekoi a dodengei el tekoi. A dongedecheduch er a chad e lak lodengei e ng sebeched el ousbech a chimad. Ke er di ousbech a chimad el melutk e a chad a mo medengei.

Picture

A rokui el charm a dirrek el melekoi. Te dirrek el ousbech a bedengir el mengedecheduch. A katuu a lsekum ng kesib a rengul e ng mo outellouch. A lsekum ng ngar er ngii a soal e ng mengsous er a bedengel er a chad. Ng dirrek el lolekoi e ng kakerous a delecherul a ngerel. A lsekum ng klou a ngerel e ng kesib a rengul. A lsekum ng kuk kekerei a ngerel e ng songerenger.

Picture

A dechuu el Malk a kmal ungil el omecheliu er a rengelekel. A lsekum a ngodech el charm a mo kmeed er ngii e ng mo outellouch. Ng blechoel el merk a osebekel e mo oldechelakl a ngodech el charm. A loleker er a rengelekel e ng kakerous a delecherul a ngerel. A lsekum ng metik er a kengaol e ng mo mereched el oukerruk. A lsekum ng kuk metik a kall e ng dirrek el mo ngodech a ngerel.

A bebil er a suebek el charm me ng dirrek el kakerous a ngerel a lolekoi. Ng mo klou a ngerel a bo lekeed er a kdekudel. A lebebil er a taem e ng kmal mo mekudem el melekoi.

Picture

A Demul a dirrek el kmal mellomes a rengul el charm. Ng sebeched el osisecheklii el mo meduch el me-lekoi. Ng ngar er ngii a bebil el medengei a tekoi er a chelechang. Ng dirrek el sebechel el remuul a dedu er ngii el tekoi.

A Ngikel me ng dirrek el mengedecheduch. Ng dirrek el ngar er ngii a nglikir a lekaokedong.

Picture

A Bilis me ng melekoi. A lsekum a ngodech el chad a me er a blai e ng oteb. A delecherul a tebul a ochotii el kmo ng kesib a rengul. A lsekum ng kuk medengelii a chad e ng kuk ngodech a delecherul a tebul.

Picture

Kid a rechad me a charm a ngar er ngii a osisiu er kid. Kede osisiu el mengedecheduch el ousbech a kakerous el tekoi. Kede dirrek el osisiu el mengedecheduch el ousbech a bedenged. Ng dirrek el kuk ngar er ngii a ka-kerous er kid. Ng kakerous a tekinged me ng diak bo do-dengei a charm a longedecheduch. A osisiu el taem e a charm a diak el sal mo medengei a tekinged.

Picture

 

Picture

Semum Me A Char

Picture

A Semum me a Char a kausechelei. A Semum a kie er a eungel a klou el bad. A Char a kuk di dechor er a bertakl.

A ta el tutau e a Semum a milrael el mo engelakl er a blil a Char. A Char a oker er ngii el kmo, "Semum, ke mo er ker el di tutau e ke chellungel er a blim el omai s?"

A Semum a kmo, "Ak mo melngot."

A Char a kmal mlo soal el obengkel. Ng di diak el sebechel el merael.

A Semum a milrael e di mle rrau a rengul. Ng ulemdasu el kmo ngika el sechelil er a Char kele lsecher. Ng ko er a di dechor er a di telkib er a bek el sils. Ng dirrek el dirkak a ta el losaod a teletelel a losiik a kelel.

Picture

Ng merael e ko er a di omtab a teletelir a rokui el charm me a dellomel er a daob. Ng milrael el mo metik er a Cheleched. Ng di dimlak el ongedecheduch er ngii. A lomes er ngii el Cheleched e ng dirrek el kmal mechesang. Ng omdasu ngii el Semum el kmo ngika el Cheleched a dirrek el melngot.

Picture

A Semum a mocha omtab a rokui el dellomel er a daob. Se el bo lomdasu e a Char a kmal meleolt a rengul. Ng sebechel el di dechor e a keriik a mei el choteklii el bedul a beluu. A lechub e a cheraches a mei el choteklii el bedul a chelmoll. Ng mocha remei ngii el Semum e ko er a kmal dikea bo lemeruul a rengul.

Picture

A bo lekukuk e ng mocha omes er a sechelil er a Char. A lebong e a Char a dirrek el kmal dirk ke dechor. A Semum a dula el kmo, "Ke ko er a kmal meketeketang el dechor er tiang. Se el kumdasu er kau e ng kmal diak bo er ker. Kau ke di dechor er tia er a bek el sils?"

A Char a dula el kmo, "Chochoi, ng dirrek el kmal mla mo seselk a renguk el dechor er tiang. A be lengelakl a bebil er a recharm e ng diak el ongedecheduch er ngak."

Picture

A Semum a dula el kmo, "Ng ko er a kmal mla mo mechas a renguk er kau. A uchul ak meremang se el kumes er kau e ke kmal mededaes. A rokui el charm a mera el di mechesang er a rolel a omelngot. Ng di se el kumes er kau e ng ko er a diak molngot. Kau ke omengur ng diak?"

A Char a ulecherchur el kmal mlo klou a cheril. Ng ouchisa er a Semum el kmo, "A rokui el charm me a dellomel er a beluu me a daob a kmal di osisiu. Te ousbech a kall me a ralm me a eolt. Te ousbech el mengang me a lolim me a louteliil me ng diak el mad. Ng di ngar er ngii a telkib el kakerous er kid. A charm a merael el osiik a kelel e ng di dellomel a diak. A dellomel a di dechor er a telkib e melai a kelel."

Picture

A Semum a mlo mechas a rengul. Ng di kmal sokol tia el teletelel a Char. Ng ua sei, "Ng diak mrellak el mo ua teletelem a chomolai a kelem? A chomochotii e ng mo sebechek el di melai a kelek er a telkib. Ng diak mechesang el osiik."

A Char a dula el kmo, "Ng diak el sebechem el mo ua ngak A dellomel a kuk di mla rruul el ua isei. Ng ngar er ngii a klalo el ngar er a chelsel. Ng di murachem e ng ousbech a dellomel. Ng dirrek el remuul a llel a dellomel me ng chemadech (green) a bedengel."

Picture

A Semum a dula er a Char el kmo, "A da kid a kmal ngeltengat. Ke ngeltengat el mlo Char. Ngak a kuk ngeltengat el mlo Semum."

Ng di mle telkib e a Semum a mocha melmesumech er a Char. Ng mocha er a blil e mesbeda a rengul. Ng kmal mocha medengei el kmo ngara a uchul me a Char a di dechor er a telkib.

MEKEBUD

Picture

Picture

A Mekebud a kmal mekekerei el ngikel. Ng diak de blechoel el metik el di dertang. Ng blechoel el mo delebechel e dmak el merael.

A ta el delebechel el Mekebud a kmeed el osisiu a meklungel. Ng diak a merreder er tir. Ng dirrek el diak a olsisechakl er tir.

A delebechel el Mekebud a diak el sal kaiuekeed a lorael. Ng di lsekum te metik er a kengaol e te mo kaiuekeed. A ta er a uchul e te mo kaiuekeed a mengeblad a meklou el ngikel. Te omdasu el kmo a lekaiuekeed e a meklou el ngikel a mo medakt. Te medakt a meklou el ngikel a longa er tir.

Picture

Picture

A Mekebud a ngar er a edei el mo er a eua el rak el mochu omechell. A ta el Mekebud a mechell a okoa el telael (40,000) el ngais. Aikang a sebechel el rullii a ta el delebechel se el omeu.

A Mekebud a kmal meoud el mo betok el ngikel. Ng kired el mengereomel. A lsekum ng diak dongereomel e ng mereched el mo diak.

Picture

Aikakid a bebil er a rolel a omengereomel el sebeched el ousbech. Ng sebeched el di ngmai a mekesai el Mekebud el dousbech. Ng diak a ultutelel a dolai er a ta el delebechel. Ng mo el metemall a bebil e mechoit. Ng dirrek el sebeched el omeklatk er a resechelid me te mengereomel. Kede kmu er tir me ng diak el omekoad a mekekerei.

A Mekebud a kmal ungil el odoim. Ng dirrek el kmal ungil er a bedenged.

Picture

A Ngirbabul a kmal mle chad er a chei. Ng mla er ngii a ngelekel el chimo el sechal. A ngklel a Eungel. A Eungel a di mle kekerei e a demal a blechoel el oba el ngar er a chei. Ngika el rubak a mle blechoel el olsisechakl er a ngelekel. Ng uluumesingd el olsisechakl er ngii er a tekoi er a daob.

Picture

A ta el kebesengei e te ulemesoil e a Ngirbabul a mengedecheduch er a ngelekel. Te mle chachedecheduch el teru el ongalek el mesaod a kakerous el tekoi.

A Eungel a kmo, "Chedam ak omdasu e ng mla mo kirem el osisecheklak er a kuk ngodech el tekoi. Ak mla mo meduch er a rokui el teletelel a daob me a omenged. Ng di ngar er ngii a ta el dirkak bo kudengelii. Tiang a teletelel a dosiik a Uel."

A Ngirbabul a ko er a kilbetiekl. Ng dimlak el omdasu el kmo a Eungel a mla mo omdasu a meklou el tekoi. Ng ko er a mlo chelellakl el telkib e dula el kmo, "Ng mera el tekoi e rungalek. Ng mera el mla mo kirem el suub. Ke kmal mesulang el omeklatk er ngak."

Ngika el rubak a mocha mengedereder a dosiik a Uel. Ng dirrek el ullecholt er a ngelekel a ngiuul el Uel me a diak.

Ng dilu er ngii el kmo, "A dotirii a redil el Uel ng diak dolai er ngii. Kede mecherei le ng mo omechell. Ng di lsekum kede otirii a sechal e ng sebeched el nguu. A lak dongereomel a Uel e ng mereched el mo diak. Ng kmal mla mo kesiokel me ng diak de meterekakl. Ng dirrek el diak ngii di lekereker a blil a Uel. Ng ngar er ngii a ultebechechel el blil."

A Eungel a uleker el kmo, "Ng tela el bedengel a Uel a chomodengei e chedam?"

A Ngirbabul a dilu, "Ng di erung a kudengei. Ng di Melob me a Ngasech. Aika dul di odoim. Becherei me se el bo el belsechel el bo doltoir a Uel e dedak el mong. A debong e mues er a medam e ke kmal mo ungil el medengei."

Tirka el ongalek a milengiil el mocha belsechel a mur er a belurir. A uchei er a mur e a remeklou el chad a mlo er a Bai e melib a teletelel a mur. Te ulemii a klekedall el bo losiik.

Picture

A remechas a mlo oungerachel a ongraol me a kliou. Te dirrek el uluungerachel a ngloik el kirel tia el mur. A resechal a kuk mlo oungerachel a bek el bedengel a odoim. Tirka liluut el omii er tir el mo oungerachel a kakerous el odoim. Te ngar er ngii a mlo oungerachel a Babii. A rebebil a kuk mlo oungerachel a Ngikel. Ng dirrek el rebebil a kuk mlo oungerachel a Uel.

Picture

A Ngirbabul a miltutk el ta er a mo osiik a Uel. Ngika el rubak a mle mengeteklel a ta er a cheldebechel. A bocha el belsechel a omenged e a Ngirbabul a ngiluu a ngelekel me te dmak.

Tirka el teru el ongalek a di mla merael el mo er a taoch e mengiil er a rechad. Te mlong me a Ngirbabul a omes aika el mlai. Ng dirrek el liluut el omeklatk er a ngelekel er a blekerdelel a Uel. A osisiu el taem e ng dilu er a Eungel el kmo, "Ke mo obengkel a Orudii el ngar er a ongeru el mlai." Ngika el buik a kilengei a tekingel a demal.

Ng di mle telkib e te merema tirka el bek el chad. Te mocha oldiderekl er a kldei el mlai. A Eungel a mlo doiderekl er a ongeru el mlai el obengkel a Orudii A Ngirbabul a ulemekrael er tir el mo er a blil a Uel. Te di mlong e mocha kebii e osiik a chelderir.

Ng di ulemekall a mlil a Orudii el telkib e a Eungel a mesa a Uel. Ng ochotii me te mocha a oltoir er ngii Te di mlo kmeed e a Eungel a dongchii el Ngasech. Ng dilu er tir el kmo, "Ngika el Uel a Ngasech. A lsekum kede nguu me ng redil e kede lmuut el mecherei." A Orudii a kmal chilitii a cheril el mo klou. Ng dimlak el oumerang a uldesuel a Eungel.

Tirka a uleltoir er ngika el Uel. Te mildechemii e ongesechii er a mlirir. Ng klou el Ngasech ng di redil. Te mocha kaititekangel er a omechei er ngii me a melai er ngii.

A Eungel a dula el kmo, "Bai deluut el loia er a daob. Ng sebeched el koreomel a kmal betok el Uel a lsekum kede osebelii ngika el redil. Ng dirk sebechel el mo omechell."

Tirka el chad a di mlo chelellakl er a lrrenges a aika el tekingel a Eungel. Ng dirrek el mlo mechas a rengrir er a uldesuel a Eungel. A Orudii a dula er tir me te lmuut el nguu el loia er a daob. Te liluut el osiik e metik er a chimong. Ngika a dirrek el Ngasech e ng di ng kuk sechal. Te ngoura el ongesechii er a mlirir. Te liluut el mo osiik e lmuut el metik er a chimong. Ng dirrek el sechal e ng di ng Melob. Te liluut el nguu el ongesechii er a mlirir.

Picture

Ng di mle telkib e a Ngirbabul a melebusech. A Aika el kldei el mlai a ulemekall el mo omak er a telkib. Te mocha omechur a chelderir. A lomechur e ng kloang. Aika el teblo er a mlai a di mle dersechimong a chelderir. Ng di mlil a Orudii a mla er ngii a teblong.

A Ngirbabul a dula el kmo, "Aika a mla mo ungil besul el cheldid. Kele bai el ungiang el boderei?"

Te kilengei e mocha oltak a kul a mlirir. Te siluches a resel a mlirir e omekellang. A bocha lekeed er a beluu e a Eungel a mocha mengedmokl. Ng ulemuchel el otengelii a Ears e ilii. Ng di mlo merek e mocha nguu a Besos e mo meius. Ng di mle ngii el tang el meius el mo er a klubed. Te mlo me te omak e a Eungel a mo ungil el kudmokl a mlirir. Te dirrek el milak aika el chelderir me ng diak el chiis.

A Ngirbabul a kmo, "Bechei aika el Uel me a klukuk e doruul kung."

Tirka el chad a mocha kasmesumech el rokui e merael el mo kairirei.

Picture

A bo lekairirei tirka el chad el dilak tir me a Eungel e ng kmal chisir. Te uluchais er a rengelekir er a blekerdelel a Eungel. Ng kmal mlo mechas a rengrir a rengelekir.

A bo lekukuk e ng klunga a skel a Eungel. Tirka el buik el rirenges a chisel a Eungel a mlo osiik er ngii Te mlo er a blil me te oker er ngii a chisel a omenged.

A Eungel a mocha ouchais er tir a rolel a daob. Tirka el buik a kmal mocha semeriar. Te mocha a melib er a omengederir. Te kmal mocha semeriar el leko di loltoir ku a Uel.

A Eungel a dula er tir el kmo, "Becherei me a bo lemerek a Mur er a beluu e debong. Ng sebechek el melekoi er a demak me kede dmak. Ak omdasu e ng locha bai ungil a dorael el mo mesterir a rubak. Ng locha bai sebeched el ngosuterir el meruul a Uel. A osisiu el taem e ng sebeched el mesuub a omerellel a Uel."

Picture

Tirka el buik a kilengei a tekingel a Eungel. Te merola el mo olengeseu er tirka el rubak.

KAKEROUS EL OMERAEL

Picture

Picture

A charm el kie er a bebul a chutem a kakerous a teletelel a lorael. Ng ngar er ngii a merael. Ng ngar er ngii a melechesokl. Ng ngar er ngii a melekesako. Ng ngar er ngii a melemiakl. Ng ngar er ngii a melidab. Ng dirrek el ngar er ngii a olingatech me a omolobel.

Aikakid a bebil er a kakerous el teletael. A Bilis a merael el ousbech a ochil. Kid a rechad a dirrek el merael a eruo el ochid. A Dechedech a lorael e ng melechesokl. A Kesako a lorael e ng melekesako. A Sechesech a lorael e ng melemiakl. A Bubuu a lorael e ng melidab. A Katatsumuri a lorael e ng olingatech. A Nguis a lorael e ng omolobel.

Ng di ta el Mongkii a telkib el ngodech a teletelel. Ng sebechel el melemiakl e dirrek el sebechel el merael a ochil.

Aika el rokui el charm a osisiu. Ng osisiu el ngar er ngii a chiuesel. Ng dirrek el osisiu el ngar er ngii a techel. A chiuesel a mesisiich el sebechel el oltekau er a bedengel e ng merael.

Picture

A rokui el suebek el charm a ngar er ngii a er bita el osebekel. A bebil er ngii a sebechel el suebek el mo cheroid. Ng di bebil a kuk diak.

Aika el suebek el charm a dirrek el kakerous Ng kakerous a berredel a chiuesel. Aike el suebek el mo cheroid a telkib el mekebekakl a chiuesel. Aike el diak el sebek el mo cheroid a obereod a chiuesel.

Ng ngar er ngii a lmuut el ta er a kakerous er a suebek el charm. A bebil a ultuu a chiuesel er a chelsel a bedengel. A bebil a kuk ultobed a chiuesel er a ikrel. A bebil er a ultuu a chiuesel el charm a Malk me a Kedam. A kuk bebil er a ultobed a chiuesel el charm a chemaiong me a iaes.

Picture

Charm er a chelsel a ralm

A charm er a chelsel a ralm a dirrek el kmal kakerous. Ng ngar er ngii a mengikai. Ng ngar er ngii a melekesako. Ng ngar er ngii a olingatech. Ng dirrek el ngar er ngii a omolobel.

A mengikai el charm a ngar er ngii a oisal. Ng ngar er ngii a bebil el kuk ngar er ngii a bekellel.

A Chedeng a ousbech a oisal el mengikai. Ng dirrek el ousbech er a bekellel el omesiul er ngii.

A Kmai a ousbech er a kekerei el kekemengel el bedesil. Ng dirrek el melekesako a lorael.

A Semum a kuk olingatech a lorael. Ngii me a Katatsumuri a osisiu a lorael. Te dirrek el osisiu el di mengol a blirir el omais.

A Kesebekuu me a Kitelel a kuk omolobel a lorael. Te dirrek el di ua Nguis a lorael.

Picture

A rokui el chad me a charm a osisiu el ouedikel er a bek el sils. Ng kakerous a teleteled a douedikel. Ng di uchul a uldkeled a di osisiu. Kede osisiu el osiik a keled me a lechub e ng delengchekled.

Picture

Picture

A ta el tutau e a Cherchur a kmal ulemkokl el mekiis. Ng milsa a Kesako el reboreb er a tkul a omoachel. Ng merola el mo mengedcheduch er ngii. Ng uleker er a Kesako el kmo, "Kau ngara me ke di blechoel el dibus? Ke di mengesuch er ngii er ker?"

A Kesako a ulecherchur e ouchisa er a sechelil. Ng dilu er a sechelil el kmo, "Ak di blechoel el mo er se er bab el beluu. Ng blechoel el mo kedeb a telik se el di kiei er tiang."

Ng okere a Cherchur el kmo, "Ng kuk ua ngara el beluu. Ng ua tia el dengar er ngii el mui er a ralm? Ng dirrek el ngar er ngii a Ii er ngii? Ng locha sebeched el milil a chelsel a Ii er ngii?

Ng okere a Kesako el kmo, "E rrang, kau ng dirkak a ta el bo er sei? A lsekum ng dirkak e ng kmal kired el mong. Ng diak el sebechem el di kie er tia el mo cherechar. A debong e ke kmal mo ungil el mesang."

Picture

Picture

A Cherchur a mlo chelellakl e telkib el omdasu. Ng dirrek el di ngellomel er a Kesako e diak el du el kmo ngarang. A uldesuel se el mera el mediderurt.

A Kesako a luueta el oker er ngii el kmo, "Ng chetim el mong? Ng diak el chetim le ng kmal ungil el beluu. Ng diak a ralm er ngii. Ng di diak ko bekikl le ng diak mekesakl. A bo de ua ngarang e kede lmuut."

A Cherchur a kmal sokol a uldesuel a Kesako. Ng di ko er a di mad el dakt. Ng ko er a di bekikl a bo lemeched a rengul. Ng dula er a Kesako el kmo, "Becherei e ak mo smuk a ralm er a ulekngall. Ng mo sebechek el ngar er a chelsel e ke ngoikak."

A Kesako a ulemes er ngii e kmal mlo meklou a medal. Ng dula er a Cherchur el kmo, "Ngak a kmal ousbech a rokui el kekemengek el merael. Ak mekera a kubekau e kurael er a osisiu el taem. Becherei e ke er di dmak el merael. Ak omdasu e ng ungil el dorael er a klukuk. Ng dirrek el ungil el domkokl me de mereched el mei."

A Cherchur a kilengei a uldesuel a Kesako. Ng ko er a kmal ungil a rengul. A leko di lemereched el mo tutau me lorael.

Picture

Picture

A bo lekukuk e te kmal ulemkokl el merael. Te mlo ngmasech er a tkul a omoachel. Ng di mle telkib e ng meklunga a medal a Cherchur. Ng ko er a kmal mechas a rengul. Ng dirrek el omelechesiu er ngii el ko er a ngedechang. Ng milrael el telkib e mo dechor.

A Kesako a oker er ngii el kmo, "Ng ngara chised?"

Ng dula a Cherchur el kmo, "Merekong e deluut e ngak e kedebenga a telik. Ak omdasu e ng kmal dikea el sebechek el ngar er tiang."

Picture

Tirka el teru el sechelei a luuetang. Te di milrael el kmeda er a omoachel e a Cherchur a kmal mo orreched. Ng di mlong el tuchelbakl. Ng dirrek el di osisiu el taem e ng oleker er a resechelil. Tirka a mle kldibel e ng mengedecheduch er tir. Ng uluchais a chisel tia el beluu el leblo er ngii. Ng ko er a kmal ungil el beluu se el louchais. Tirka el sechelil a kmal mla mo sorir el mong.

Tirka el rokui el ulerrenges er a Cherchur a dula el kmo, "A klukuk e kede mo mesarech er ngii." Te dirrek el millekoi er a Cherchur el mo obengterir.

A Cherchur a millekoi er tir el kmo, "Ng diak el sebeched el mong. Se kmal mesisiich a eolt er ngii A debong e ng mo mekedeb a telid."

Tirka di ulutekangel er a Cherchur. Ng okor e mocha kongei. A bo lekukuk e te merolang. Te dirrek el di ngilasech el telkib e mocha chacherodech. A lomelechesiu er tir e ng mocha mekedeb a telrir.

Picture

A Cherchur a mocha oleker er tir me te luuetang. Tirka kmal di orreched el merael. Te di mlo er a omoachel el oketa mo mengikai. Te mengikai e chachedecheduch el kmo, "Ng kmal dikea deluut el mo er se el beluu. Ng kmal mesisiich a eolt er ngii. A beluad a bai kmal ungil. A dengar er ngii e kede kmal ungil el milil." Te di dilu el ua isei e mocha kaidesachel el mengikai.

Picture

NG EIM

Picture

Picture

A ta el tutau e a Irisong a kmal ulemkokl el mekiis. Ng orrenges er a ngerel a chimo el Chesuch el melekoi. Ng melekoi er a chetebtel a Iedel er a rebai er a blil. A Irisong a mocha tuobed el mo omes er ngii. Ng mlo er a uchul a Iedel e omes e diak lesang. Ng di lorrenges er ngii e ng dirk melekoi. A Irisong a mlo ungil el omes e dirrek el diak lesang.

Ng ko er a rro rengul a Irisong. Ng di ngii el mengedcheduch er a rengul el kmo, "Ngak ak locha meiko? A lechub e a kulemerrous el leko a kurrenges er a Chesuch el melekoi." Ng dikea el rengesii ngii el charm. Ng mocha melemelamet a bedengel. Ng di dirk omdasu el kmo ng ulemerrous.

Picture

Ng di mle telkib e ngii el Chesuch a luueta el melekoi. Ng mla suebek el mo er a chetebtel a Meduu me ng reboreb. A Irisong a omdesua el kmo ng dimlak lomerrous. Ng mera el rirengesii a Chesuch el melekoi. Ng luueta el merael el mo omes er ngii.

Ng kmal orreched me ng ko er a di remurt. Ng mlo diak lesa a rechelel a Meduu e sorechii me ng mecham. Tia kmal mlo klou el merereek. A lebocha er a uchul a Meduu e ng kuk dikea el rengesii ngii el Chesuch. Ng omes el mo er bab e dirrek el diak lesang. Ng mocha meliuekl er tia Meduu e omditm a rokui el rechelel. Ng dirrek el diak a ngara el lesang.

Picture

Ng ko er a kmal el rro a rengul a Irisong. Ng dechor e omdasu a lmuut el mo remei. Ko er a lomakes e ngii a lmuut a Chesuch el melekoi. A lechisngekl a Irisong e ng mesang. Ng kuk ngar er a chetebtel a Kesiamel. Tia el Kesiamel a telkib el cheroid. Ng di ngika el Chesuch a ngar er a techakl me ng sebechel a Irisong el mesang.

A Irisong a omes er ngii e ko er a mla mo eru a rengul. Ng ko er a soal el mo omes er ngii e diak. Ng mocha dechor e kmal ungil el omes er ngii el Chesuch. Ng kmal di ngar er eou el sebechel a Irisong el rutechii. Ngii el Chesuch a omes er a Irisong e kuk mo melekoi. Ng melekoi el kmal el mo klou a ngerel.

Picture

A Irisong a ko er a ngosecha a rengul er ngii el Chesuch Ng dula el kmo, "Ke mede er a chelechang e Chesuch. Ke ko er a omekako er ngak? Chelechang e a kmal otirau el mdechemau. Ak mdechemau me ke mo cheremek." Ng di dilu a Irisong el ua isei e kebelruul el remurt. Ng rirurt el bedul a Chesuch.

A Chesuch a ulemes er a Irisong. Ko er a lsa el mo kmeed e ngii a suebek. Ng suebek el mo okiu a medal a Irisong. Ng di suebek er eou el sebechel a Irisong el mdechemii. Ng kmal merengul a Irisong el remurt. A lodersii a chimal e ng diak el orekedii ngii el Chesuch. Ng kmal menga el ngosecha a rengul. A Irisong a di uleltoir er ngii me te kmal cheridang.

Picture

A lomelechesiu a Irisong e ng meklengang. Ng okor e mocha dechor. Ngika el Chesuch a dirrek el kuk mocha reboreb. Ng mlo reboreb er a kekedeb el kerrekar.

Ng dechor a Irisong el kmal dirk ke mesel. A lomes er ngika el Che such e ng di olengeng er ngii. Ng ko er a tobeda cheril a Irisong. A kuk lomelechesiu er ngii e ng kmal songerengerang. Ng mocha orreked er a delel. Ng di ulrekedii a delel e lotka el kmo ng diak leblengur. Ng di milekiis er a tutau e mo tmaut el oltoir er a Chesuch. Ng omdesua el kmo bai merekong e kurael el mo remei. Ak bai mong me a kumengur me ak mo medinges. Ak oltoir er ngika el Chesuch e ng diak el sebechek el mdechemii. Ak bai di mo mesel e merekong.

Picture

Ng merola el di omeksaik le ng songerenger. Ng dirrek el kmal dirk ke mesel er a rurt er ngii. Ng milrael el okiu a delul a kerrekar. Ng di mle telkib e turengur a bechochod el bau. Ng mocha dechor e omtab el kmo ng locha bul a ngarang.

A bo el ungil el omtab er ngii e ng bul a Kuabang. Ng mocha omes el kmo ng ngar er ker. Ng di diak a leues. Ng liluut el omdid er tia el bau. Ng di mle telkib e ng mo metik.

Aika betok el chelechedal a Kuabang. Ng di berikt el rokui. Ng dirrek el kmal di marek a uchul me ng kmal bechochod. A Irisong a mlo chibngii a chimo er a redechel. A lsechesechii e ng kmal mekemim. Ng milecherei e kuk chibngii a redechel a teluong. A lsechesechii e ng merekos. Ng mocha chuib el mo betok. Ng ngilai el mei e mo dengchokl e mengang. Ng milengang el mo mesisiich e merolang el mo remei.

Picture

A lebo el rei a Irisong e te mla mekiis a rechad el rokui. Te oker er ngii el kmo ke mla er ker. Ng ouchisang. Ng uluchais a teletelel a lotoir er a Chesuch. Tia el louchais e tir el rokui a kmal di ulecherechur. Ng tuobed a cherrir e dirrek el mechas a rengrir er a Irisong.

Suobel: Ng soak el omes e orrenges a ngerel a charm. Ng dirrek el soak el melungl a bechochod el bung me a marek el rodech. Ng soak el mengib e menga a ungil rodech.

Picture

Cherou me a Iumd

A Cherou me a Iumd a mle kausechelei. A Iumd a mle soal el kie er a bad me a lechub e ng kerrekar. Ng di diak el sebechel. A ta er a klebesei e ng mocha chachedecheduch ngii me a Cherou. A Iumd a uluchais er a Cherou el kmo ng soal el kie er a bad. Ng di diak el sebechel el orekedii me ng di ruebet.

A sechelil er a Cherou a ulecherechur. Ng kuk uluchais er a Iumd el kmo, "Ngak a kuk ngodech. Ng sebechek el kie er a bad me a lechub e ng kerrekar. Ng di kuk diak el sebechek el meruul a kelek. Ng sebechek el di dengchokl e mad er a kall.

A Iumd a ocherchur e dula el kmo, "Ak omdasu e kede kmal osisiu. Kele bai el ungil el bo de kaingeseu?"

A Cherou a oker el kmo, "Kede kaingeseu el mekerang?"

Picture

Picture

A Iumd a kmo, "Kede mo dmak el kiei e mii a urrered. Kau a oungerachel er a delengchekled. Ngak a kuk oungerachel er a omengeled. Ng sebechek el meruul a kall me ak mo meruul a keled. Kau a kuk sebechem el orekedau er a bad. Ke di orekedau e ak mo bereked er kau me ng diak rebet."

A Cherou a mlo soal tia el uldesuel a Iumd me ng kilengei. Te mocha dmak el kiei e kaingeseu. Te kmal mlo kausisbech. Te mlo kausisbech el me lmuut er a chelechang.

Suobel: A Iumd a sebechel el di ngii el meruul a kelel. Ng di diak el sebechel el orekedii er a bad. A Cherou a kuk diak el sebechel el di ngii el meruul a kelel. Ng di sebechel el orekedii er a bad. A Iumd a ousbech er a Cherou el blil. A Cherou a kuk ousbech er a Iumd el meruul a kelel.

Meliik

A Meliik a ta er a bedengel a dellomel. Tiang a ngar er ngii a olmelel. Ng di cheltekill er ngii er a bek el taem. Ng dirrek el oudangeb ngii el Ollumel. Ng blechoel el ngar er ngii a sesei el ralm er a chelsel. Aika el ralm a merekos e dirrek el bechochod.

A Meliik a blechoel el cheltekill er a olmelel. Ng kmal klou a ultutelel me ng diak el sebechel el mecherei. Ng ousbech er ngii el omedikl a mekekerei el charm. Ng omedikl aike el mekekerei el charm el soal el melenges.

Picture

Aika el charm a soal a bul a ralm el ngar er tia el Ollumel. Se el sebek el tmuu er a chelsel e ng medangeb. Ng mo diak el sebechel el tuobed me ng di mesesbesebek. Ng di suebek el mo mesaul e ruebet el remos.

Aika el charm a di ulduleb er tia el Ollumel el mo bediu. Ng medechel el mo bediu e metebtib a techel. Se el lemetebtib a techel e a Meliik a mochu ousbech. A Meliik a ousbech el mengang me ng diak el mad.

A Meliik a sebechel el duubech er a ngii di lechutem. Ng diak el ousbech el melai a kelel er a chutem. Ng di ousbech el melai a kelel er a olmelel. Seikid a uchul e a rokui el Meliik a di ouellumel.

Picture

Picture

Lius

Aika kmal betok el lius. Ng kmal betok me ng kaiuetitech. Ng kaiuetitech er a kmal di telkib el chutem. Ng ngar er ngii a metongakl me a mekedeb.

A metongakl a mereched el metik er a dichel a sils. A mekedeb a kuk diak. Ng blechoel el telenget er a metongakl me ng diak a leues.

A risel aika el Lius a dirrek el blechoel el kaidesachel. Te kaidesachel el osiik a kelir. A rais a smiik a kall e odurokl er a ralm. A ralm a ngmai el mo merous. Ng mo merous er a llel me a redechel a Lius.

Suobel: A Lius a dirrek el ousbech a ralm me a eolt me a chutem. Ng ousbech me ng sebechel el duubech el mo klou.

Mengelel a Biboik

Ng ngar er ngii a ko er a telelluk el ngar er a bita er a Kansok (Weather Bureau). Tia a ngar er a Ngerbeched. A Ngerbeched a ta er a rengedel a Oreor.

Tia el telelluk a kmal el betok a ngikel er a chelsel. Ng kmal mekekerei el ngikel. Ng kuk mekekerei er a Mekebud. A uchul me kede oleker el kmo, "Mengelel a Biboik" ngii el menga a Biboik.

Ke medengei el kmo ng ngara a Biboik? Ka msall e kuuchais er kau. A kot e a Rekas a di mechell a ngisel e merael. Se el omeu aika el ngais e ng mocha Biboik. A uchul me kede el kmo, "Biboik" ng omiboik a lorael. A Biboik a medemedemek. Ng kmal ungil el kelel a ngikel. Ng dirrek el beketimel el mengikai. Ng sebechel aika el ngikel el mereched el mdechem.

Suobel: Aika el mekekerei el ngikel a diak dongang. Ng di dirrek el kmal klou a ultutelel. Ng menga a cherroed me ng diak bo lebetok e lomangch er kid.

Picture

Picture

Merekel a Koro el Bobai.

A Koro a mla er ngii a dellemelel el Bobai. Tia a dilechor er a rebai er a blil. Ng mla er ngii a redechel el kmal klou. A Koro a mlo oldingel er ngii. A lebong e ng mla mo mengesiuch. Ng kmo becherei me lemedechel me a Sabadong. A Sabadong e ak me nguu me ng kelek el mo er a chei.

A tutau er a Sabadong e a Koro a ulemkokl el mo mengib er tia el Bobai. A lebong e a Kiuid a mla okiu uechei el mong. Ng di mlong el kolii tia el Bobai el rokir. Ng di mlo medechel a telkib el budel.

A Koro a di mlo dechor e ngellomel. Ng ulemes er tia el Bobai e dula el kmo, "Ng mera el mekngit a tekingel a kiuid. Ng diak el odengei el ko tia el Bobai a okuik el mo er a chei?" Ng di dilu el ua isei e luuetang. Ng luueta el mo remei. Ng di mlo el ngmai a klekedellel e merolang. Ng mlo er a chei el diak a okuil.

Suobel: A rechad me a bebil er a charm a ousbech a osisiu el dellomel. Te ousbech el mengang me te mo mesisiich.

Picture

Bngal A Dellomel

Picture

Picture

Bngal A Dellomel

A dellomel a kmal betok. Ng kakerous a meklungel me a teletelel. Ng diak el rokui el dellomel a omung. Ng ngar er ngii a bebil el omung. Ng dirrek el kuk ngar er ngii a bebil el diak el omung.

Aikakid a bebil er a diak el omung el dellomel. Ng ngar er ngii a Cheluu me a Chitouch me a Olcheiul-a-Beab. Ng dirrek el ngar er ngii a Kilkuld me a Iumd.

Picture

A bngal a dellomel a kakerous. Ng kakerous a teletelel. Ng kakerous a meklungel. Ng dirrek el kakerous a bedengel me a bul.

Ng ngar er ngii a bngal a bebil er a dellomel el dechor el bedul bab. Ng dirrek el ngar er ngii a kuk cheliraro. Ng kuk ngar er ngii a ua lak el bung.

Aikakid a bebil er a di dechor a bngal el dellomel. Ng ngar er ngii a Chaklsel me a Deb me a Chiul.

Ng kuk ngar er ngii a bebil er a dellomel el cheliraro a bngal. A Koranges a ta er a cheliraro a bngal.

A bebil er a dellomel a diak el ultebechel el ko ng bedul ker a bngal. Ng sebechel a bngal el bedul bab me a lechub e ng bedul eou. Ng dirrek el sebechel el bedul a bitrongel a dellomel.

Picture

Ng ngar er ngii a meklou el bngal a dellomel. Ng dirrek el ngar er ngii a ungil a meklungel. Ng ngelmuut el ngar er ngii a kmal mekekerei.

A Lius a ta er a klou a bngal el dellomel. A rua Bussonge me a Chelilai a kuk di ungil a meklungel a bngal. A Chiul me a Ouemoket a bebil er a kmal mekekere bngal el dellomel.

Picture

A bul a bngal a dellomel a dirrek el kmal kakerous. Ng ngar er ngii a kmal bechochod. Ng dirrek el ngar er ngii a diak el sal bechochod. Ng dirrek el ngar er ngii a kuk diak a bul.

A Chelilai me a Chirang me a Kadenia a kmal bechochod. A rua Bussonge a diak el sal bechochod. A Chiul me a Ouemoket a diak a kmal bul.

Picture

A bung a kakerous a teletelel me a bul me a meklungel. Ng di ngar er ngii a ta el tekoi el osisiu er ngii. A kot el ngerechelel e dirrek el osisiu er a bngal a dellomel el rokui a meruul a chius.

A chiuesel a dellomel a omuchel er a bngal. Ng mukeroul er a bngal el mo klou. Se el bo lemeduch e ng ruebet. Ngelmuut el duubech el kekerei el dellomel e kuk mo klou. Seikid a uchul e ng diak bolak a dellomel. A bngal a mekdubech a beches el chius. Aika el chius a kuk mekdubech a mekekerei el dellomel. Ng di ua isei el meliuekl.

Suobel: A kot el klou el ngerechelel a bung a meruul a chius. Ng diak di lebesichel a dellomel e lemerekong.