Omerolel A Elilai El
Mo Er A Beliliou

written by Maria Otto
illustrated by Deby Nakamura

A Elilai me a Ltelatk a ngelekel a Bkau me a Elibeob. Tirka kilie er a Keiukl.

A Elilai a ulemuchel er a skuul er a Keiukl. Ng mla er a skuul er a Keiukl el mo lmuut er a ltobed er a ongeai el skuul.

A chelsel a taem er a lemechell el mo lmuut er a ltobed er a ongeai el skuul e ng dirkak a ta el lebo er a Desbedall me a lechub e lebo er a Iouldaob.

Ngika ulemdasu el kmo a rokui el beluu er a Belau a kmal di osisiu. Ng osisiu a teletael er a blai me a teletael er a delengchokl. Ng dirrek a bedengel a chutem me a teletael er a omellemel a dellomel.

Ng mlo er ngii a techellel a Elilai el mo er a cheroid er a belual. A Elilai a mlo er a Oreor el mlo ongetiu el skuul er a Palau High School.

A ta el tutau me le ngar er a klas er ngii er a omesubel a siukang er a Belau e a sensei a kmo, "Ng mo er ngii a omerollel tia el klas el mo er a Beliliou. A uchul tia el omerael a mo mesuub a teletael er a delengchokl el uldimukl er ngii a chesols me a rebetii me a ngloik me a kldachelbai me a ruk.

Chelecha el mo lmuut er se el sils el bo dorael er ngii e ngak a mo ouchais er kemiu er a mo kiriu el olab. E a omesubed a diak di el bo el turk er a siukang me a kldachelbai er a Belau. A uchelel a beluu er a Beliliou me a rechad me a aike el ho betik el klekakerous me a lechub e ng kaisisiu. Ng dirrek el teletael er a delengchokl me a lechub a omerellir a rechad a dirrek el suobel. A Beliliou a ta er a kmal mle meringel a mekemad er ngii er tia el mlo merek el mekemad me a lta e ng dirrek el mo somiu el oker aika er tirke el mo chad er a blimiu.

A lebocha el merek a klas er tir e a Elilai me a sechelil er a Ngais me a Oidudul a dilak el merael el mo remei. Me a le ngar er a rael e ng dimlak a ngodech el lulsaod. Ng di mle tia el omerael el mo er a Beliliou. Tir el tede el sechele el kmal mlo semeriar er a uldasu e le ng dirkak a di ta er tir el mo er a Beliliou.

A Elilai a millekoi er tirka el sechelil el kmo, "Ak kmal di mo er a blik e luchesii a babirengek el mo er a rechad er a blik."" A ldela el ua ise e a Ngais me a Oidudul a kmal di mle ta ngerir el kmo, "Ngak me ak dirrek el di mo reme el ouchais er a delak."

Tirka kmal dimlak el orreched el merael le ng dirk mle sorir el chachedecheduch el kirel tia el omerael. E ng di ko er a dimlak a mengedecheduch er tir el mo meketeket el taem. E a Elilai a luueta el melekinga er a resechelil el kmo, "Alii a debo er a Beliliou e ke er di dmak. Kede mo er a aike el ho dekie el blai e ng di kede kmal mo osiik a roled el mo kasoues e kauchais aike el dosuub me a doruul er a aike el blai el dekiei."

Me a Ngais me a Oidudul a kilenge aika el tekingel a Elilai. Tir me te dirrek el ko er a kmal mle medakt a lolatk el kmo ng mo diak el kasoues a le ho er a Beliliou.

Tirka di milrael el telkib e merma er a tuchekill el mo er a blil a Elilai me te mocha kasmesumech e a Elilai a touchakl . Ng di Ngais me a Oidudul a dirk millemolem er a omerollir el mo remei.

Me a Elilai a kmal di mle reme e mocha meluches el mo er a delal me a demal me a merrengel er a Ltelatk. Tiakid a babirengel:

Koror, Palau, W.C. is. 96940
March 9, 1979

Betik er a renguk el Chedam me a Chedil me a Ltelatk,

Kom ua ngerang? Ngak tie el kmal mesisiich el diak secher. E a rolel a skulek a kmal di ungil besul a rokui el tekoi.

Chedil me a Chedam ng soak el ouchais er kemiu el kmo, ng mo er ngii a omerolam el ngalek er a skuul el mo er a Beliliou. A uchul tia el omerael a mo mesuub a teletael er a delengchokl me a kldachelbai me a chesols me a rebetii me a lmuut el bebil. A sils el kibo morael er ngii a dirkak bo el moterkokl. E ng di locha mo chelsel chelecha el me el buil. Ko er se el lebo lemoterkokl a sils e ngak a lmuut el meluches el leko ouchais. Ng di soak el mo medenge a uldesuiu el kmo, ng di ungil a kbo er tia el omerael, ada ng diak? Ng soak a chomoluches el me me bokudengei.

Ngak el,
Elilai

A rechad er a blil a Elilai a di mle mereched el meluches me ho el sebechel a babier er tir el ngar er a bilas er a lebo el kukuk el mo er a Oreor. Me tiakid a babier er tir.

Keiukl, Babeldaob
Palau District 96940
March 11, 1979

Betik er a rengmam el Elilai,

Rungalek ke ua ngerang? E kemam tie el kmal di mesisiich el rokui.

Ke kmal mlo mesaul er a babierengem. E kemam a kmal mlo ungil medenge a tekoi er a chelsel.

Ng ko er a mlo telkib el suebek a rengmam el kmo, ke le msecher. Ng ko er a kmal mlo meketeket el di diak moluches.

Elilai, kom tela el ngalek er a skuul a mo er tia el omerael? A sensei er kemiu ng mong? A rolel a delengchekliu ng mo ua ngerang? Se el lebo lemoterekokl a rokui el tekoi e ke lmuut el meluches el mei.

Me a da mongedmokl a bedengem me lak ho msecher.

Kemam el,
Delam, Demam me a Ltelatk

A lluut el mocha er a klas er ngii er a osisecheklel a siukang er a Belau e a sensei er tir a mocha ouchais el kmo, "A omerolled el mo er a Beliliou a mla mo moterkokl. A sils el bo dorael er ngii se el kot el urreor er a ongede el Sandei er a Ongeua el Buil."

"A ta er a chedal a Bilingual Education Program a mo obengked el mo er tia el omerael. A deruchellel ngika el chad a ua ldid er a delongelel a skuul me a buai."

Me ng dirk melemolem a tikingel e a chimorir a rengalek er a skuul a mla mo er bab. Me a Buikruu a mocha lmuk e okerir a ngklel a Eos. "Ka bong. Ngara kerim?"

Me a Eos a uleker el kmo, "Ng techa ngklel ngika el klou el chad el mo obengked el mo er tia el omerael?"

A sensei a ulenger er ngii el kmo, "A ngklel a Ngis."

A chimal a Merraoch a mlo er bab me a sensei a ulekerir a ngklel. "A kerik a kmo: Se el de bo er a Beliliou e ng mo ua ngara rolel a delengcheklam a rengalek er a skuul?"

Me a sensei a ulenger er ngii el kmo, "Kemiu a mo obii el mo kie a derta el obliil. A ngkliu a kngai el mo msa a merreder er a beluu er a Beliliou e a rechad er a beluu a mo melmors. Se el luut er ngak e kemiu a mo medenge el kmo, ng techa el chad er a beluu a chobo mkie el obengkel."

A Eos a liluut el odersii a chimal me a Buikruu a liluut el okerir a ngklel. Me ng uleker el kmo, "Tirke el mo oungalek er kemam te mo oungalek er kemam er se el taem el ho dekerd el mo lmuut er a sils el deluut er ngii el me er a Oreor?"

A Buikruu a ulenger er tia el ker el kmo, "Ng ua isei. Me kemiu a ongtiall el mo mekedung e mo meruul aike el ngercheliu el lebo lebeskemiu."

A Elilai a uldersii a chimal me a Buikruu a ulekerir a ngklel. Me ng dula el kmo, "A kerik a kmo: Ngara el klalo a kmal kiram el olab el mo er tia el omerael?"

Me a sensei a dula er tir el kmo, "Aikakid a aike el klalo el kmal kiriu el olab me mo tobed a babirengiu me a olechesiu e mluches melak me mobes. A ongermetellel a ngeriu me a osengdiu me a toriu me a sebengiu me a oidelliu el sebechel a truich me a eua el klebesei."

Me a bocha el moterkokl a sils er a omerael me a mo olideiuul me a aike el klekedall el kirir a rengalek er a skuul el olab e a Elilai a liluut el melechesa el mo mesubed er a rechad er a blil E ng di tiaikid el taem e a Elilai a dirkak el ho lodenge el kmo, te rua techa el chad er a Beliliou a lebo el kie el obengterir el di mereko a leme a sensei er tir el ngar er a Beliliou.

A sensei er a Elilai a liluut el mla er a Beliliou el me er a Oreor. Me tia er a le me e a Elilai a mlo medenge el kmo, ng te rua techa mo oungalek er ngii er a Beliliou.

A Dirrabkau me a Ltelatk a mle er a Oreor el me omes er a Elilai er a uche er a lorael el mo er a Beliliou. Tirka a ullab a klab me a mengur el me er a Oreor el mo blebelel a Elilai el mo er a Beliliou.

Me a le me e tia el kesus er a uche er a lorael a Elilai e a Dirrabkau me a Ltelatk a di mle mekar el mo kmeed el sueleb er a klebesei. Tirka a milruul a bento me a aika el mo blebelel a Elilai el mo er a Beliliou.

A Elilai a kmal di mla er a delemerab er ngii el mengedmokl a kloklel el mo er a omerael. Ng mus a kloklel e moket e di rengul remel a kmo, "Aika el bilek ng locha sebechel a truich me a eua el klebesei?" Ng nguu a ta er a subelengel me a ta er a chelchedal a bilel el lmuut lodak er a aika el bla lebus e tobeda el me er a uum me ng okere er a delal el kmo, "Edil a chomomdasu e a kllolem el subong me a kltiu el chelchedal a bail e ng sebechek el ousbech el mo e mei?"

Me a delal a dula el kmo, "A kumdasu e a ailecha kmal betok."

Me a Elilai a luueta el mo er a delemerab er ngii e luueta el mocha melas a aika el bilel. Ng di mlo mus a kleim el subong me a aika el kltiu el chelchedal a bilel e dula el kmo, "A kuubail e a lebo el selokel e a ksmilek."

A delal a mla er a uum e omekedo el mo er ngii er a delemerab el kmo, "Elilai mereko e bo bad e a lak ho bad er a chelecha e ke mo el duob er a bilas er a klukuk."

Me a Elilai a dimlak lemesulaul e mocha mechiuaiu. Ngika di mle mekekerekar e ng tutungang.

A lluut el okisii a btelul e ng mla buu a llomes. Me ng kmal di milekiis el mo dengchokl el kmo: "Chelechang! Chelecha el sils e kemam a mo er a Beliliou." Me ng mekisa el nguu a torel me a sebengel me a oidellel e mocha melechong.

A omerollel el me tmuu er a blai e ng miles aika el bilel el blus er a mamed me a bento er ngii me a lmuut el ta er a sualo el mui er ngii a kall e kmal ungil selemosem. Aika a chelderodel el obengkel aika el kloklel a kled er a bita er a tuangel.

Tia er a leues aika e ng kmal mlo mekngit a rengul er a delal me a merrengel er a Ltelatk. E ng di se el bo llatk a cheldechedechal ngii me a resechelil e ng kuk mo semeriar a mo er a omerael.

A Elilai me a sechelil er a Ngais me a Oidudul a mle medenge el kmo te mo kakerous el delengchokl a lebo er a Beliliou. A Elilai a mo kie el obengkel a Railchol me a Rirs me a ngelekir er a Kebeaschol. Tirka el ongalek a kilie er a Kloulkubed.

Ng ko er a di ua ngara el mo taem er a omerael. Ng kmal ko er a melkedukem a ulul se el ho lolatk er a omerolir el mo er a Beliliou. Tirka el mo chad er a blil er a Beliliou a mla meluches el me er ngii. Ng di ngii a kmal imis el semeriar me ng kmal di bekikl.

Ng mla mo truich me a derngel taem el lotebedii tia el babier er a telungalek er a Railchol el mo er ngii el me me ng menguiu er ngii.

Peleliu Municipality
Palau District 96940
March 20, 1979

Betik er a rengmam el Elilai,

 . . . Ngak a Railchol me a bechik er a Rirs me a ngelekam er a Kebeaschol el meluches el me er kau el kmo, ng mla er ngii a omelmors el ngakl er a chelii me a telungalek er ngak a mera el mle ngaltengat el ngilmersii a ngklem. . . . e kemam a kmal di kldmokl e mad el tmuil e mengiil er kau. A le ngar er ngii a soam el mo medenge er a uche er a chome e moluches.

Kemam el,
Telungalek er a Railchol

A Elilai a ko er a di melatk el kmo, "Tirka te locha ua ngara el chad? A Kebeaschol ng locha mo soal ngak?" Ng dirrek el ko er a mo melatk aike el bla lrenges el kirel a Beliliou. Ng ko er a mo melecheluches er a uldesuel a chelebacheb me a chelechol. E ng di ko er a diak el sa el sebechel el mesa klekakerous er ngii me a Keiukl. Me ng ua ise el ko er a ombeberrous er a beluu me tirka el mo chad er a blil er a Beliliou e a delal a omekedo el kmo, "Elilai ng mla mo taem el kired el merael."

A Elilai me a delal me a merrengel er a Ltelatk a ngiluu a taxi el mo er a btelulachang. A lebo er a btelulachang e a resechelil me a rechad er a blirir a mla mong. Tia er a losterir a resechelil e ng kmal mlo imis el semeriar el kirel tia el omerael. Ng mera el ko er a meriked me a delal a dula er ngii el kmo, "Elilai ho mokokau e a omerael a locha dirk telkib."

A Elilai a milsa sechelil er a Ngais el dechor el obengkel a delal Ng ko er a kmal mle klebokel a bilel me a cheiul a kmal mle ungil blungt Ng mlo chelellakl e omdasu el kmo, "Ngak ng locha di ungil aika el bilek?" Ng mileltii lomes er a delal me a merrengel er a Ltelatk e uleker er tir el kmo, "Aika el bilek ng di ungil?"

A delal a milchulii a Elilai e kmo, "A bilem me kau a kmal klebokel. Ka me melak kobekikl."

A sensei er tir er a Buikruu a dilekouii a ngokel me a cherrodech a di mlo diak E ng ulemekedo er a rokui el ngalek er a skuul el mo chelludel er a telkib Ng dilu er tir el kmo, "Modekdak a klokliu e se el kukerir a ngklem e ke ngma a kloklem e mo doiderekl er a bilas."

A Elilai me a delal me a merrengel er a Ltelatk a dilak el dechor e a osengir a ko er a kmal mle suebek a rengrir er a Elilai. A sensei er a Elilai a ulekerir a ngklel a Elilai me ng di mileltii el mechulii a Ltelatk me a delal e merola el mo doiderekl er a bilas.

A Elilai a kmal millasem el melisiich er a rengul. E ng di ko er a lemengeo a okul a bilas e bocha lecheroid er a cheldukl e ngii a mocha mereberebet a iuechel a medal el mekngit a rengul er a delal me a merrengel er a Ltelatk.

A Elilai me a sechelil er a Ngais me a Oidudul a dilak el dengchokl er a bebul a bilas. Tirka dilengchokl e kmal dimlak lechachedecheduch le ng kmal mle mekngit a rengrir er a rechad er a blirir.

Ko er a bocha liuekl a bilas er a aika el chelebacheb me a Oreor a mla mo diak lemeues e a Elilai a melekinga er a resechelil el kmo, "Ak ko er a telkib el bekikl el mo er a Beliliou. Ng ko er a kmal diak kudenge a llechul a beluu me a ko er a metitur. E lmuut ku alsekum a mo chad er a blik a diak belosiueklak e ak mekerang?"

Me a resechelil a dula er ngii el kmo, "Elilai me me lak ko bekikl e kemam me ng dirkak a ta el kibo er a Beliliou. Lmuut a Buikruu a obengked me a lebo er ngii a mo diak a blil er kid e ngii a mo oungerachel er kid." Me a Elilai a ko er a klunga a rengul e dengchokl Tirka mla er a bilas el mocha soiseb er a klou el toi el mocha mes a kmal betok el chelebacheb. A Elilai a ko er a kmal di mle mechas a rengul me ng uleker er a chad er a bilas el kmo, "Aike ng chelbechebil a Beliliou? E ngara ngklel?"

A chad er a bilas ulenger er ngii el kmo, "Chochoi. A ngklel a Ngerukeuid. E aike el chelechol el momes a ngklel a Euid el Llechol."

Me a Elilai a ko er a mle merur el oker me ng dimlak el oker e ng di mle rengul remel a ulumdasu el kmo, "A Beliliou ng locha di ua ia aika el chelebacheb el kumes er a chelechang?"

Ng di mle telkib e ngii a mocha olengasech a eanged e ko er a mla mo er ngii a telkib el daob. A Ngais a ko er a di dimlak a ngara el du er a diak el ngerang. Ng mla mo merecherached a rengul er tia el bilas se el ometeuitech. A chull a ulitii el kmal mle imis el klou me a betok el chelebacheb a mlo diak lemoues er a delongelel a toi me a Beliliou. Tirka di milngebou er a chull er a bebul a bilas el tmurk er a Beliliou.

A lebo e ng kmal klou a chull er a beluu. A btelulacha a kmal mle meseked er a rechad me a mlai el mle olsiuekl er a rengalek er a skuul. E oumesingd er tir tirke el mo oungalek er a rengalek er a skuul a kmal di mla er a btelulachang.

A Elilai a urrekedii a chimal a Ngais e kmo, "Ak kmal ko er a bekikl a blo lak leme a rechad er a blik e ng ko er a kmal klou a chull."

Me a Ngais a dula er a Elilai el kmo, "Ka msall er a kmal mo bekikl e me denga a klokled el mo er a cheldukl e dongiil a tekingel a Buikruu el kmo ngara kired el meruul er a chelecha el bla deme er a beluu."

A Buikruu a ngiluu a ngokel & dilekeuii me ng mlo diak a cherrodech e ng kmo, "Se el kukerir a ngklem e kodersii a chimam el mo er bab me ng mo sebechel ngike el mo chad er a blim el mesekau e ngoikau. Me ng ko er a kmal dimlak a cherrodech e ngii a okerir a ngklel a Elilai. Tia er a lokerir a ngklel a Elilai e ng kmal milsa a ngalek er redil el kmal silechesokl me ng kmal di mle rengul er emel a kmo, "Ng Kebeaschol."

A Kebeaschol me a delal a milrael el mo er tia el lengar er ngii a Elilai me te mocha ngosuir er a kloklel e te merola el mo doiderekl er a mlai el me er a blirir.

Me a omerolir el me er a chelsel a beluu e a Elilai a kmal mera el mechas a rengul e le beluu a kmal mera el di moded. E lmuut a chetemel a beluu a diak el dechudech le ng di chelechol.

A Elilai a kmal mle ketengel el mes a chutem el ua ise a bedengel. Ng ulemdasu el kmo a chetemel a Belau el rokir a di bekerekard. Ngika mileltii el mo chemau a Kebeaschol e uleker er ngii el kmo, "Kebeaschol a Beliliou el rokir ng di ua ise a bedengel a chetemel el di becheleleu?" Me a Kebeaschol a ulenger er ngii el kmo, "Chochoi."

A delal a Kebeaschol a dirrek el millekoi el kmo, "A chetemel a Beliliou a di chesechaem me a chelechol. E bechere e ng diak el okor el mo er ngii a techelled el mo meliuekl er a uche er a chomorael me ke kmal mo ungil el mesa beluu."

A lebocha er a blirir e a Elilai a mle telkib el ko er a mekii el merael er a chelechol. Ng dirrek el mle mekelmolm a ochil se el redered a chelechol.

Te mlo tmuu er a blai me te mlo dengchokl e ullengull el telkib. E a Elilai a mocha ocholt aika el blebelel el ulruul a delal me a merrengel er a Ltelatk el mo er a telungalek er a Railchol Me a Railchol a dilengchokl e melikinga er a Kebeaschol el kmo, "Rungalek mngesuir a Elilai er a kloklel e mnguu el mo er a delmerab er kemiu me mo chotii a lebo er ngii a kloklel e ltelkib el olengull e ng mesaul e le ng mla er a omerael."

A Kebeaschol a mocha nguu a blil a kloklel a Elilai e te mocha er a delmerab er tir me a Elilai a mocha moket a kloklel e mocha oidii e te merema er a uum me te mle chachedecheduch el ongalek.

A kot el sils er a rengalek er a skuul er a Beliliou a dimlak a kmal ngara el lulruul. Ng mle taem el rengalek er a skuul me tirka el beches el chad er a blirir a mo kaodengei. Ongeru el sils e tir el rokui a mlo kldibel er a bai tir me a remechas me a rubak el mo olisechakl er tir a kakerous el kldachelbai me a chelitakl er a Belau me a ngloik me a cheldecheduch er a Belau me a kuk di ngodech el suobel.

A taem el kirel a kakerous el suobel a mlo moterkokl me a basio el bo er ngii a rengalek er a skuul el mo mesuub. Me a omesuub a ulemuchel er tia el mo me ng ongeru el sils er tir er a Beliliou.

A rengalek el sechal a mlo melai a toechel el ho el ousbech el merasm el mo chadou. A rengalek el redil a mlo omuchel el mesuub a ngloik er a Belau. Ongede er a sils er a rengalek er a skuul a millemolem aike el lulsuub er a ongeru el sils. Ongeua er a sils e a rengalek er a skuul a liluut el melemolem aike el ble lekot el omuchel el mesuub e dirrek el kuk mlo muchel a beches el suobel. A rengalek el sechal a mlo omuchel e] mesuub a ruk me a rengalek er redil a omengaus el ousbech a such.

Ongeim er a sils a ulemelekl aika el eru el bedengel a suobel. Ongelolem er a sils a mle ngerchelir a rechad el ulungalek er a rengalek el kmo: Alsekum a obliil a ulungalek er a ngalek el sechal e a rubak a ngerchelel el nguu el mo er a kereker me a lechub e ng msa ngerchelel er a blai el ngii a ngerachelel kirel a ngalek el sechal. Alsekum a ngalek a redil e ng ngerchelel a mechas el nguu el mo er a mesei me a lechub e ng sers. Me a lechub e ng ngerachel er a blai el kirel a ngalek el redil.

Me a Rirs a melekinga er a Elilai el kmo, "a klukuk e kau me a Kebeaschol a debo er a mesei me ke kuk mes a mesei er a Beliliou." Me a lebocha lekukuk e a Rirs a mocha kudmokl a oruklir e locha derteluo el mekekere el oles er a chelsel Me a Elilai er a lesenge aika el oles e ng okere el kmo, "E ede er a Rirs kid kede mo melai a klab a da kerdi mo mengiut?"

Me a Rirs a dula el kmo, "Ke er di mo melai a eruo el brak el mo keled er a klukuk."

Me a Elilai a dula el kmo, "A olsenged a ko er a kmal mekekerei."

Me a Rirs a melekinga el kmo, "A mesei er tia el beluu a di mekekere a brak er ngii. E sall e kede mo me ke mes er a medam." Me a lebocha er a mesei e ng kmal mera el mlo mechas a rengul a Elilai. A brak a kuk mekekedeb er ngii. E mera el sebechir el di ousbech er a teluo el kekere el oles el mesubech e dirrek el mengeseb.

A Elilai a kmal mlo klou er a rengul a di me reme e meluches el mo er a delal me a demal er a Keiukl el ouchais er tir er a rokui el bla leues me a lsuub er a Beliliou.

Tia el kebesenge e a Rirs a dilu er a Elilai el kmo, "Mdak kau me a Kebeaschol el mo er a bai e a remechas el mo olisechakl er kemiu a chelsols me a rebetii a mla mong." A Elilai me a Kebeaschol a dilak el mo er a bai el mo mesuub a chesols me a rebetii. Ng dimlak a kmal klkakerous er a omesubel a chesols me a rebetii er a Beliliou me a aike el bla lsuub er a Keiukl.

A Elilai a ko er a kmal mlo diak lemeruul a rengul er a teletelel a mesei er a Beliliou. Me ng ko er a di mle ngii el mengedecheduch er a rengul el kmo, "Alsekum a mesei er a Beliliou a ua ise a urerel e a sers e ng locha ua ngerang?"

Ongeuid me a Ongeai me a Ongetiu er a sils a ulemelekl a suobel er a ongeru me a ongeua er a sils. Dirrek a chelitakl er a Belau.

Ongetruich me a Ongetruicab me a ta er a sils e a rengalek el redil me a resechal a milsuub a ngloik me a ruk me a chesols me a rebetii me a cheldechedechal a uchelel a beluu er a Beliliou. A urerel me a omesuub el mla er ngii er a ongetruich me a ongeru el sils a mle ua ongelolem er a sils.

A leuaise e a Elilai a melekinga er a delal er a Rirs el kmo, "Edil, kid ng diak debo er a sersem me dengemlii er a uche er a kurael?"

Me a delal er a Rirs a kmo, "Bechere me a klukuk e debo me mera el denga a eruo er a diokang me a deme e kisous me bo el dechelel aike el brak el mo okeuim er a bilas."

Me a lebocha er a sers e a Elilai a dirrek el kmal mlo mechas a rengul. A sers a diak loucheleliuis. E a chelechedal a diokang a di dellemakl er a chutem.

A Ongetruich me a ede er a sils a mle ureor el beluu el di mle tedobech el sils e a uriul e ng mla er ngii a klou el omililir. A rechad er a beluu me a rengalek er a skuul a mlo milil er a ta er a chelechol er a ikrel a beluu.

A klsel a Elilai el ngar er a Beliliou e ng kmal mlo kmeed er tirka el mle chad er a blil Ng kmal mle imis el kmeed er a Kebeaschol.

Tia el sils er a uche er a lorael a Elilai el lmuut el mo er a Oreor e ng melekinga er a delal er a Rirs me a demal er a Railchol me a merrengel er a Kebeaschol el kmo, "Ng kmal soak el oureng a suliu el kmal mlo mesaul el omecheliu er ngak er a aika el mla mo merek el truich me a ede el klebesei. .Ng kmal mle betok el ngodech el teletael a ksiluub. Chelecha a kbo er a Keiukl e a kmal mo ungil el ouchais er a delak me a demak me a merrengek er a Ltelatk aike el rokui el kules me a ksiluub. E a urungulek a kmal ulekum a Kebeaschol a mo sebechel el mo ta el leme er a Keiukl me ng kuk mo sebechek el ocholt a teletelel a delengchokl er a Babeldaob el kmo ng ua ngarang."

Tia el kesus er a uche er a luut er ngii el mo er a Oreor e a Elilai me a Kebeaschol a dimlak lebo el bad. Te di kilie el mo tutau el di mle chachedecheduch. A Elilai a uluchais er a Kebeaschol er a teletelel er se er a le bo lodenge el kmo te me er a Beliliou. Ng dirrek a taem er a lenguu a babier er a rechad er a blil a Kebeaschol. A klemeriar er ngii el kirel a omerollir el uldimukl er a dektelel. Me a Kebeaschol a dirrek el uluchais er a Elilai el kmo, "Ak mera el di ulemechur a klebese er se er a kibo modenge el kmo kom me er a oingerang. Me se el sils er a chome e ngak me a delak a di mla medal e a ki mo er a btelulachang e mengiil er a bilas. Me se er a chomkerd me lomekedo ngkliu a sensei er kemiu e ngak a di mererikrik a medak e a uluk a melekedukem el kmal bekikl el kmo, ke le lemlak el mei. E se er a chomodersii a chimam e ng mera el mlo ungil a renguk."

A cheldechederir a di millemolem e ng tutungang.

A bocha el tutau e te mocha mengedmokl er tir el mo er a bai. Me a Elilai a mocha kudmokl a kloklel e a delal er a Rirs me a demal er a Railchol me a ta er ngii er a Kebeaschol a mocha merader er ngii er a bai.

Me a lebocha er a bai e te mle dengchokl el telkib e ngii a merema sechelil er a Ngais me a Oidudul el dirrek el ulebengterir a rechad er a rekeblirir.

A Elilai a di uldersii a chimal er tir e di mle dengchokl el mengedecheduch er a delal er a Rirs me a demal er a Railchol me a ta er ngii er a Kebeaschol.

Ng mocha taem el kirir el merael el mo er a btelulachang. Tirka el ulungalek er a rengalek er a skuul el mla er a bai a milrael el obengterir a rengalek er a skuul el mo er a btelulachang el mo merader er tir.

A lebocha er a btelulachang e a Elilai me a Ngais me a Oidudul a mlo dmak e mocha olengasech a kloklir er a bilas. Te mle sorir el lmuut el mo dmak el dengchokl Te rirechebesul a kloklir me a kingellir er a bebul a bilas e liluut el me er a cheldukl el me melmesumch er a rechad er a blirir.

Tiaikid el taem e a Elilai a kmal mocha mekngit a rengul me ng dikea el sa el sebechel el dmu klmesmechel. E ng di milchulii a Kebeaschol me a delal er a Rirs e merael el me doiderekl er a bilas.

Ko er a lemenga a okul a bilas el mocha er a cheroid e a ngais me a Oidudul a okere er a Elilai el kmo, "Ngara me ke ko er a dilmuk?"

A Elilai a kmal mlo bekerekard a medal a dimlak el onger er tir. Ng di dilengchokl el chemau a btelulachang el di ulemes er ngii el mocha mengemengemed.

Bebil er a Tekoi el Udesuall e Ruoll

I. Ng soam el kmo, ngara el tekoi e ke mo er a omerael el obengkel a klas er kau el mo er a ta er a beluu er a Belau? E ngarang? Bo e msodii el kmo, ngara me ng soam me a lechub e ng diak el soam.

II. Ka momes er a teletael er a delengchokl er a Belau er a chelecha el taem e mo chotii a uldsuem el kirel tia el ker. A chomomdasu e ng ngar er ngii a ultutelel el ngalek er a skuul a mesuub a kldachelbai me a siukang er a Belau? Msodii a nger er kau.

III. Aika el beldukl er iou a bebil er a tekoi el dilubech me a lechub e ng dimlak el dubech er tia el cheldecheduch Mlia X er a medal aike el dilubech er tia el cheldecheduch
1. ____ A Elilai me a Ltelatk a di mle teru el ngelekel a Bkau me a Elibeob.
2. ____ A Elilai a mlo ongetiu el skuul er a Palau High School el ngar er a Oreor.
3. ____ A Elilai me a resechelil a kmal mle chetirir el mo er a Beliliou.
4. ____ A mle moktek er a omerollir a rengalek er a skuul el mo er a Beliliou a di mlo milil.
5. ____ Tirka el ngalek er a skuul er a le bo er a Beliliou e te kilie er a bai.
6. ____ A Elilai a mla mo eru el bo er a Beliliou me tia el omerolir el ngalek er a skuul a mo me ng mo ongedei.
7. ____ A Elilai a mlechell e mlokeroul er a Oreor.
8. ____ A Kebeaschol me a Elilai a dimlak el sa el ta rengrir.
9. ____ A Elilai a kmal mle semeriar e a osisiu el taem e ng mle medakt el mo er a Beliliou.
10. ____ A Elilai a dimlak a kmal lebetik el klekakerous er a beluu er a Beliliou me se el mla er ngii el mei.

IV. A ulebengelel tia el cheldecheduch e a Elilai a di liluk e dengchokl el chemau a btelulachang er a Beliliou e ulemes er ngii el mocha mengemengemed. A chomomdasu e ng ngara me ng mle ua isei?

V. Tia el cheldecheduch a kirel a Elilai. A omerollel el mo er a Beliliou me a delengcheklel er a chelsel a truich me a eua el klebesei. Chelecha e kau a leko ke Elilai e mla lmuut el me er a Oreor e soam el meluches el mo er a Kebeaschol. Mlechesii a babier er kau el oltirakl er a teletael er a omeluches el babier el ngar tia el cheldecheduch.