pageok
PDF version (633k)

LLECHEKLEL
ME A OMESODEL

Picture

written by Mahensia Thomas
illustrated by Remasech Teriong

LLECHEKLEL ME A OMESODEL

Omesodel a ultutelel tia el babier:

Tia el babier a milekedmokl el bo lousbech er ngii a rengalek. A ngakl el ngar er a chelsel tia el babier a di mekesai. Aika a di olecholt a mekesai el ngklel a bebil er a charm me a dellomel.

Tia el babier a dirrek el olecholt el kmo a tekinged a rechad er a belau a ousbech a di mekesai el llechukl me a lechub e ng ngor. Ng sebechel el ochotii el kmo aike el de blechoel el ousbech el llechukl a di truich me a euid me a lechub e ng truich me a eai (17 or 18). Aika a mengai er a chelsel a lluich me a elolem el llechukl (26 alphabets). Aika el truich me a euid me a lechub e ng truich me a eai a diak el uldimukl er ngii a ngklir a rechad Ng sebechel a chad el ousbech er a ta er a llechukl er a ngklel el ngii a diak de blechoel el ousbech er ngii. Ng di sebeched el ousbech er ngii er a ngklel ngike el chad. Tiakid a ta er a olechotel.

1. P atrick
2. X avier

A uchul aika el eru el ngakl a diak dousbech er a tekinged. Ng di kede ousbech er a ngakl.

Aikakid aike el truich me a euid me a lechub e ng truich me a eai el llechukl me a lechub e ng ngor el kulekoi er a chelsel tia el babier.

A B CH D E H I K L

M N NG O R S T U Z

Se el kot el llechukl "A" a kmal mekesai el dousbech er ngii. Ke er di mo mesang er tia el babier.

A

A

Ngak a llechukl el blechoel el okiu a uchei er a ngklel a chad me a klalo me a charm. Ak dirrek el okiu a uchei er a tekoi el ngii a omerellel a chad me a lechub e ng charm. Ng ua tia kid a teletelek.

1. A Joseb a mei.
2. A Joseb a mei el me melai er a belatong.
3. A Joseb a mei el me melai a ngikel.
4. A Joseb a remurt.
5. A bilis a mengang er a katuu.

B

1. bambuu
A bambuu a dellomel. Ng mo metongakl el dellomel. Ng diak el meklou a rechelel. A bambuu a sebechel el mo ulaol me a lechub e ng reakl me a lak e ng brer. Ng kall aike e dirk mekekerei el desebel.

Picture

2. bedaoch
A bedaoch a suebek el charm. Ng ngar er ngii a bsechel e mechedelekelek a bedengel. Ng sebechel el kall.

Picture

3. bedel
A bedel a dellomel. Ng ta er a bedengel a kerrekar. Ng diak el sal el mo meklou el kerrekar. Ng diak el kall. Ng di sebechel el idungel.

Picture

4. belochel
A belochel a suebek el charm. Ngar er ngii a bsechel. Ng ko er a bekekerekard e oumellemau a bedengel. Ng meklou er a bedaoch. Ngar er ngii a boklel el ngar er a bebul a isngel. A belochel a kall.

Picture

5. bekai
A bekai a charm. Ng ngar er ngii a bsechel. Ng ko er a bedengel a chutem. Ng di kmeed el ua a meklungel a malk ng di diak a kemril A ngisel a kuk meklou er a ngisel a malk. Ng kall.

Picture

6. bekersiu
A bekersiu a dellomel. Ng ua a meklungel a cheluchau ng di ng bekirecherachel. A redechel a bekersiu a ua a meklungel a redechel a cheluchau e ng di mekemim le ng ongerekur. Ng kall.

Picture

7. bersoech
A bersoech a charm. Ng diak a ochil me a chimal. Ng dirrek el diak a bsechel. Ng di ua a teletelel a nguis el chetngaid e kekemanget. Ng diak el kall.

Picture

8. biib
A biib a suebek el charm. Ngar er ngii a bsechel el ua a belochel. Ng bibrurek me a chemadech a bedengel. Ng mekekerei er a belochel.

Picture

9. bisech
A bisech a dellomel. Ng diak el meklou el dellomel. Ng di ua a meklungel a dait. Ngar er ngii a bebil el kall e a bebil a kuk diak el kall le ng mekekad.

Picture

10. bkau
A bkau a dellomel. Ng kmal el mo klou el kerrekar. Ng mo ua a klungel a klou el iedel A llel a mekekerei er a llel a iedel Ng diak el kall e ng di kmal ungil el idungel.

Picture

11. brak
A brak a dellomel. Ng di ua a teletelel a bisech ng di kuk meklou. Ng kall.

Picture

12. btaches
A btaches a dellomel. Ng ta er a bedengel a kerrekar. Ng no meklou el kerrekar. A redechel a mekekeriei e mechaibibeob. Ng diak el kall e ng di sebechir a rengalek el olab el outama. A chelechedal a btaches a dirrek el kmal ungil klalo le ng kmal mesisiich. Ng sebechel el no mlai.

Picture

CH

1. chaklsel
A chaklsel a dellomel. Ng diak el sal el mo klou el dellomel. Ng no metongakl e di mechetngaid. Ng di ua a teletelel a deb. Ng diak el kall.

Picture

2. chebechab
A chebechab a dellomel. Ng ta er a bedengel a meduu. Ng dirrek el mo klou el kerrekar. Ng kall a redechel e klalo a chelechedal. A chelechedal a sebechel el no mlai.

Picture

3. chebouch
A chebouch a dellomel. Ng ta er a bedengel a kerrekar. Ng di ua a teletelel a buuch. Ng kall a chederdubech er ngii.

Picture

4. cheluu
A cheluu a ta er a bedengel a dellomel. Ng diak el sal el no klou el kerrekar. Ng di ua telongklel a buuch. Ng diak el kall.

Picture

5. chelaiechang
A chelaiechang a charm. Ng mekekere e ko er a mechedelekelek a bedengel. Ng ua a teletelel a sechesech. Ng di telkib el meklou er a sechesech. Ng diak el kall.

Picture

6. chellabed
A chellabed a dellomel. Ng diak el sal el mo meklou el kerrekar. Ng di kmeed el mo ua a teletelel me a meklungel a kidel. A redechel me ng ua a meklungel a redechel a kidel. Ng becheleleu a redechel e kall.

Picture

7. chedebsungel
A chedebsungel a dellomel. Ng mo meklou el kerrekar. Ng di sebeched el ousbech er a budel a chelechedal el kar. A redechel a kmal mekekerei e bekerekard. Ng ko er a diak el sal el mechaibibeob. Ng diak el kall.

Picture

8. chemeridech
A chemeridech a dellomel. Ng diak el sal el mo meklou el kerrekar. A redechel a ua a meklungel a redechel a cheluchau e ng di telkib el derbengais a teletelel. Ng diak el kall.

Picture

9. cheremall
A cheremall a dellomel. Ng di kmeed el ua a meklungel a bedel. Ng diak el bekirecherachel. Ng sebeched el ousbech el mo cheriut me a lechub e ng besebes. Ng diak el kall.

Picture

10. cheritem
A cheritem a dellomel. Ng diak el sal el mo meklou el kerrekar. Ng mechaibibeob a redechel Ng sebechir a resechal el ousbech a redechel el omtanget a biskelengir. Ng diak el kall.

Picture

11. chesisebangiau
A chesisebangiau a charm. Ng suebek el charm. Ngar er ngii a bsechel e bekerekard. Ng mekekerei el ua a meklungel a chesisebasech. Ng diak el kall.

Picture

12. chesisebasech
A chesisebasech a charm. Ng suebek el charm. Ngar er ngii a bsechel. Ng ko er a bedengel a chutem e mekekerei el di ua a meklungel a chesisebangiau Ng diak el kall.

Picture

13. chesisualik
A chesisualik a charm. Ng ua a teletelel a olik e ng di mekekerei Ng mechedelekelel a bedengel. Ng diak el kall.

Picture

14. chisebsab
A chisebsab a dellomel. Ng diak el sal el mo klou el dellomel. Ng di kmeed el mo ua a meklungel a temring. Ng ko er a medemedemek a chelechedal. Ng diak el kall ng di sebechel el besiich.

Picture

15. chosm
A chosm a dellomel. Ng diak el sal el mo klou el kerrekar. Ng di ua a klungel a bedel. A redechel a mekekerei e mo mellemau a bo lemarek Ng kall a redechel.

Picture

D

1. dait
A dait a dellomel. Ng di ua a bisech e ng di telkib el mekekerei Ng kall a techel me a chelebedel me a llel.

Picture

2. debechel
A debechel a dellomel. Ng diak el sal el mo klou el kerrekar. Ng di kmeed el ua a klungel a cheluchau ng di mekekerei a redechel Ng mekemim a redechel le ng ongerekur. Ng kall.

Picture

3. debuongel
A debuongel a cheled. Ng meklou er a ngduul. A ulekngellel a okrokr e medecherecher. Ng mechedelekelek a ulekngellel. Kede metik er a keburs el kmeed er a klechutem. Ng kall.

Picture

4. dekool
A dekool a dellomel. Ng diak el sal el mo klou. Ng di kmeed el mo ua a meklungel a diokang a lsekum ng kmal el mo meklou. Ng diak el kall. Ng di sebechir a remelamech a buuch el ousbech el mengeech.

Picture

5. demailei
A demailei a dellomel. Ng ta er a bedengel a kerrekar el ua a teletelel a buuch. Ng diak el sal mekedelebuu a chelechedal. Ng di ua a mekldelebungel a buuch. Ng diak el kall.

Picture

6. denges
A denges a dellomel. Ng diak el sal el mo klou el kerrekar. Ng mekekemanget a redechel e mechetngaid. A denges a dechor er a keburs. Ng sebechel el kall a redechel Kede meliokl a redechel e melilech er a ralm el mo meketeket e mochu mengang.

Picture

7. derariik
A derariik a charm. Ng ta er a suebek el charm. Ngar er ngii a bsechel. Ng ko er a mengeriich a bedengel. Ng telkib el mekekerei er a terriid. Ng diak el kall.

Picture

8. derudm
A derudm a charm. Ng ta er a bedengel a ngikel er a daob. Ng diak el sal el meklou el charm. Ng becheleleu a delel e chedelekelek a ulkel. A tengdel a di ultom er a ikrel a budel. A tengdel a ua a tengdel a sausab e ng di medecherecher. Ng kall.

Picture

9. diokang
A diokang a dellomel. Ng diak el sal el mo meklou el dellomel. Ng kall a techel.

Picture

10. dudek
A dudek a suebek el charm. Ng ngar er ngii a bsechel. Ng di becheleleu a bedengel e kemanget a kemril Ng diak el sal el mo meklou el charm. Ng di ua a meklungel a sechosech. Ng kall.

E

1. ekoek
A ekoek a ta er a ngklel a semum Ng charm er a daob. Ng dirrek el cheled. Ng okrokr e medecherecher a ulekngellel. Ng klalo a ulekngellel e kall a techel Ng oumesingd el ngar er a chelmoll me a lechub e ng dmolech el daob.

Picture

H

1. hosengka
A hosengka a dellomel. Ng mekekerei el dellomel. Ng bung. Ng mekekerei a bngal e bek el bedengel. Ng diak el kall.

Picture

I

1. iaml
A iaml a dellomel. Ng mekekerei e melekesako el di ua a kangkum. Ng oumesingd el duubech er a meselech me a lechub e ngar er ngii a ralm er ngii el chutem. Ng ko er a medemedemek a chelechedal Ng diak el kall.

Picture

2. ibuchel
A ibuchel a cheled. Ng mechaibibeob e outoched. Ng di kmeed el ua a meklungel a redechel a cheluchau Kede meruu er a kereker. Ng kall.

Picture

3. imekurs
A imekurs a dellomel. Ng diak el sal el mo meklou el kerrekar. Ng di kmeed el mo ua a meklungel a chersachel. A redechel a mekekerei el kuk mekekerei er a redechel a titimel. Ng kall a redechel.

Picture

4. irimd
A irimd a cheled. Ng kmeed el ua a teletelel a sekesakel e ng di mekekerei Ng ngar er ngii a ko er a dechus el berriid er ngii. Kede metik er a kereker. Ng kall.

Picture

5. iuud
A iuud a cheled. Ng di bita a ulekngellel e medecherecher. Ng chedelekelek a ulekngellel Ng bereked er a bad me a lechub e ng mechut el deel el ngar er a daob. Ng kall a techel.

Picture

6. iusbeluu
A iusbeluu a charm. Ng kmal mekekerei el charm. Kede metik er a beluu. Ng ko er a mechedelekelek a bedengel. Ng diak el kall.

Picture

K

1. kairs
A kairs a dellomel. Ng diak el sal el mo meklou el kerrekar. Ng di ua a meklungel a koranges. Ng oumesingd el duubech er a tkul a klechutem el kmeed er a daob el diak el sal mecherocher a debel. Ng mechetngaid e mekemanget a redechel. Ng diak el kall a redechel e ng di sebechel el chemachel.

Picture

2. kaming
A kaming a charm. Ng kloa a ochil e ngar er ngii a eruo el orsul. Ng di telkib el kekerei er a babii. Ng kedeb a kemril. Ng kall.

Picture

3. kangkum
A kangkum a dellomel. Ng mekekerei e melekesako el di ua a chemutii. Ng mekekerei a llel. Ng duubech er a meselech me a lechub e ng klechutem Ng kall.

Picture

4. keam
A keam a dellomel. Ng kmal el mo meklou el kerrekar. A redechel a mechaibibeob e ko er a debretech. Kede meliokl a redechel e ng kall. Ng dirrek el sebechel el klalo a chelechedal.

Picture

5. kebeas
A kebeas a dellomel. Ng mechetngaid e mekemanget. Ng meklou a llel e mechaibibeob. Ng melekesako el ua a kangkum. Ng diak el kall e ng di sebechel el besebes.

Picture

6. kedam
A kedam a charm. Ng suebek el charm e ngar er ngii a bsechel. Ng mo meklou el charm el kuk meklou er a malk. Ng mechedelekelek a bedengel. Ng diak el kall.

Picture

7. kerdikes
A kerdikes a dellomel. Ng ta er a bedengel a chudel. Ng di duubech er a meselech. Ng mechetngaid e mekemanget. Ng sebeched el mengaus el mo lkou me a lechub e ng tet. Ng di kmeed el ua a kerengimes e ng di telkib el ngodech a bngal Ng diak el kall.

Picture

8. kerebou
A kerebou a charm. Ng kloa a ochil e kemanget a kemril. Ng mo meklou el charm el kuk meklou er a babii. Ng kall.

Picture

9. kerekur
A kerekur a dellomel. Ng diak el sal el mo meklou el kerrekar. Ng di ua a meklungel a cheluchau e ng di mekekerei a redechel. Ng mechaibibeob a redechel. Ng kall.

Picture

10. kerengimes
A kerengimes a dellomel. Ng ta er a bedengel a chudel. Ng di duubech er a meselech. Ng mechetngaid e mekemanget. Ng sebechel el dongaus el mo lkou me a lechub e ng tet. Ng diak el kall.

Picture

11. kesiamel
A kesiamel a dellomel. Ng diak el sal el mo meklou el kerrekar. Ng di ua a teletelel a bobai e ng di lmuut el meklou a llel er a bobai. Ng diak el kall.

Picture

12. kesuk
A kesuk a dellomel. Ng mekekerei el diak el sal el mo meklou el kerrekar. Ng di ua a meklungel a sis. Ng diak el kall e ng di sebechel el besiich. Ng dirrek el sebechel el kar.

Picture

13. ketat
A ketat a charm. Ng kmeed el mo ua a teletelel a chum e ng di meklou. Ng diak el ua a chum el ngar er ngii a blil A ketat a lorael e ng oubetetelluut. Ng eaiuong a kekemengel e eruong a techetechel. Ng kall.

Picture

14. kidel
A kidel a dellomel. Ng mo meklou el kerrekar el kmeed el ua a meklungel a chellabed. A redechel a ua a meklungel a redechel a chellabed e bekerekard. Ng kall.

Picture

15. kilkuld
A kilkuld a dellomel. Ng di ua a meklungel a chudel. Ng sebeched el ousbech el melik a chelased a debo dolengimes. Ng diak el kall.

Picture

16. koranges
A koranges a dellomel. Ng diak el sal el mo meklou el kerrekar. Ng di ua a meklungel a chosm. Ng sebechir a rengalek el ousbech a redechel el meruul a teriobs e meloko. Ng diak el kall.

Picture

L

1. laib
A laib a charm. Ng suebek el charm e ngar er ngii a bsechel. Ng di telkib el meklou er a belochel. Ng blechoel el melakl a kelel er a chutem me se el kuk bolak el betik a kelel e ng mo mengiis er a chutem e melai aike el delekull el mei me ng mengang. Ng kall.

Picture

2. lild
A lild a dellomel. Ng diak el sal el mo meklou el dellomel. Ng di mechetngaid e mekemangel. Ng kmeed el ua a teletelel a bambuu e ng di ng melebleb. Ng oumesingd el dullokl a ldechor el diak el melemalt. Ng diak el kall. Ng di sebeched el ousbech el ordemelel a biskang.

Picture

3. lius
A lius a dellomel. Ng mo metongakl el dellomel. Ng ta er a kmal el klou a belkul el dellomel. Ng sebechel el kall a redechel e dirrek el ilumel. A chelechedal me a llel a dirrek el sebechel el klalo.

Picture

4. lulk
A lulk a dellomel. Ng kmal el mo meklou el kerrekar. Ng mo ua a meklungel a iedel Ng diak el kall.

Picture

5. luut
A luut a charm. Ng ta er a bedengel a charm er a daob. Ng ko er a medemedemek el mo ua a chedead. A lorael e ng oubetetelluut. Ng kall.

Picture

M

1. mais
A mais a dellomel. Ng diak bo lemeklou el dellomel. Ng ua a teletelel a deb. Ng di ourodech a chebaod er ngii. Ng kall a redechel.

Picture

2. matakui
A matakui a dellomel. Ng diak bo lemeklou el kerrekar. Ng di ua a meklungel a kadenia. A redechel a mekekerei e mechaibibeob. Ng ko er a oumellemau a bedengel. Ng kall.

Picture

3. melatemudes
A melatemudes a charm. Ng diak el meklou el charm. Ng di ua a teletelel a sechesech e ng di meklou. Ng ko er a bedengel a chutem a bedengel. Ng diak el kall.

Picture

4. meliik
A meliik a dellomel. Ng diak bo lemeklou el dellomel. Ng di kmeed el ua a teletelel a kebeas. Ng ngar er ngii a ko er a olmelel el melechiir a chull. Tia a melechiir a chull me ng mo sebechel el lerebet er ngii a charm e ng mad. Se el bo lemechut e ng kelel tia el meliik A meliik a diak lolai a kelel er a chutem. Ng di melai er tia el olmelel. A meliik a diak el kall.

Picture

5. mengidab
A mengidab a charm. Ng diak el bo lemeklou el charm. Ng di telkib el meklou er a bubuu. Ng di ua a teletelel a bubuu. A ochil me ng di ua a ildisel a ochil a bubuu el eaiuong. A bedengel a ko er a chedelekelek. Ng diak el kall.

Picture

6. meriaur
A meriaur a dellomel. Ng ta er a bedengel a meduu. Ng mo klou el kerrekar. A redechel a mo meklou el ua a redechel a ziabong. Ng meaiu a redechel. Ng kall a redechel. A chelechedal a dirrek el sebechel el klalo.

Picture

7. mesiedel
A mesiedel a dellomel. Ng mo klou el kerrekar el ua a titimel. A mesiedel a di ua a teletelel a titimel. Ng di meklou a redechel er a redechel a titimel. Ng merekos a redechel. Ng kall.

Picture

8. miich
A miich a dellomel. Ng kmal el mo meklou el kerrekar. Ng kmeed el ua a keam. A redechel a mekekerei el di ua a meklungel a redechel a titimel. Kede ometech e melai a techel le ng kall.

Picture

9. mengalius
A mengalius a charm. Ng diak el meklou el charm. Ng di ua a meklungel a kerellang e ng di medecherecher a osebekel. Ng ko er a mengeldoech a bedengel. Ng kllolem a ochil A mengalius a ta er a kmal mekngit el charm e le ng melemall a lius. Ng diak el kall.

Picture

10. melimdelebdeb
A melimdelebdeb a charm. Ng ta er a suebek el charm. Ng ngar er ngii a bsechel e ko er a bekekerekard a bedengel. Ng di ua a klungel a chesisebangiau. Ng diak el kall.

Picture

N

1. nappa
A nappa a dellomel. Ng mekekerei el dellomel. Ng kuk mekekerei er a dait. Ng ta er a bedengel a iasai. Ng kall el rokir.

Picture

NG

1. ngalimesei
A ngalimesei a charm. Ng diak el meklou el charm. Ng kllolem a ochil e diak a bsechel. Ng ngar er ngii a osebekel. Ng kmal mekngit el charm e le ng menga a kerrekerul a blai. Ng diak el kall.

Picture

2. ngduul
A ngduul a cheled. Ng di ua a teletelel a debuongel e ng di ng kuk mekekerei. Ng meliliut a ulekngellel e becheleleu. Kede melai er a chelsel a ilachetomel el bekord edei el sak a delechel. Ng kall.

Picture

3. ngel
A ngel a dellomel. Ng ta er a bedengel a kerrekar. Ng diak el sal el meklou el kerrekar. Ng di kmeed el mo ua a meklungel a sausab. A redechel a mekekerei e mo becheleleu se el bo lemarek Ng diak el kall.

Picture

4. ngelngal
A ngelngal a charm. Ng ta er a bedengel a ngikel. Ng mo meklou el ngikel. Ng oumesingd el kie er a dmolech el daob. Ng kmeed el ua a teletelel a katsuo e ng di kuk mekemanget er a katsuo Ng kall.

Picture

5. ngolm
A ngolm a dellomel. Ng diak el sal el meklou el kerrekar. Ng ua a meklungel a koranges. Ng diak el kall.

Picture

6. nguis
A nguis a charm. Ng di ua a teletelel a bersoech. Ng oumellemau a bedengel e chedelekelek a chural. Ng di ua a teletelel a bersoech a lorael. Ng diak el kall.

Picture

O

1. olik
A olik a charm. Ng suebek el charm. Ng di ua a teletelel a chesisualik e ng di meklou. Ng mechedelekelek a bedengel. Ng kall.

Picture

2. olumud
A olumud a dellomel. Ng diak bo lemeklou el dellomel. Ng di ua a meklungel a kmal mekekerei el chudel le ng ta er a bedengel a chudel. Ng ko er a kebtot a llel. Ng diak el kall.

Picture

3. ongolngebard
A ongolngebard a dellomel. Ng diak el sal meklou el dellomel. Ng diak a rechelel. Ng di kmeed el ua a teletelel a choais. Ng ourodech e kall a redechel.

Picture

4. orredakl
A orredakl a dellomel. Ng diak el sal el mo meklou el kerrekar. Ng di mo ua a telongklel a bobai e ng di lmuut el mechetngaid a chelechedal er a bobai. A llel a debechiut e diak el sal mekemanget. Ng di kmeed el mo ua a meklemengetel a mekekerei el llel a sis. Ng diak el kall e ng di sebechel el besebes a llel.

Picture

5. otord
A otord a charm. Ng ta er a bedengel a ngikel er a daob. Ng mo meklou el ngikel. Ng ngar er ngii a cheleuel. A medal a btelul a ko er a kmal ultobed e diak el ungil a teletelel. Ng kall.

Picture

R

1. rambotang
A rambotang a dellomel. Ng mo meklou el kerrekar. Ng mo ua a meklungel a iedel A redechel a telkib el mekekerei er a redechel a mesiedel Ng ngar er ngii a ko er a techedel a redechel el ua a teletelel a sausab. Ng kall a redechel.

Picture

2. rebotel
A rebotel a dellomel. Ng mo meklou el kerrekar. Ng kmeed el mo ua a meklungel a kidel. A redechel a ua a meklungel a redechel a kidel. A llel a kar e a redechel a kall.

Picture

3. rekung
A rekung a charm. A ta er a ngklel a rekung a kakum. Ng mekekerei el ua a meklungel a kesako. Ng eaiuong a kekemengel e eruong a techetechel. Ng sebechel el kie er a beluu e ng di ng omechell er a daob. Ng kall.

Picture

4. remiang
A remiang a dellomel. Ng diak el sal el mo meklou el kerrekar. Ng di kmeed el ua a meklungel a cheluu. A llel a ko er a teletelel a llel a demailei. Ng diak el kall e ng di sebechel el besiich.

Picture

5. rereek
A rereek a charm er a daob. Ng di ua a teletelel a rekung e ng di telkib el debretech. Ng eaiuong a kekemengel e eruong a techetechel. Ng ngar er a okeburs. Ng dirrek el sebechel el kall.

Picture

6. ribkungel
A ribkungel a charm er a daob. Ng cheled. Ng ta er a bedengel a kim. Ng dirrek el kmal el mo meklou. Ng kall. A ulekngellel a dirrek el sebechel el klalo.

Picture

7. rrusech
A rrusech a charm er a daob. Ng ua a teletelel a ibuchel e ng di lmuut el meklou e mekemanget a techedel. Ng omekodall me se el lekang a bebil er a cheled me a lechub e ng bad e ng di mad e diak el luut el duubech. Ng diak el kall.

Picture

S

1. sangoeas
A sangoeas a dellomel. Ng mo meklou el kerrekar el ua a meklungel a lius. Ng ua a teletelel a lius el diak el ourachel. A redechel a mekekerei. Ng diak el kall a redechel. Ng di chelechedal a kall. Ng sebeched el rusechii a chelechedal el kmal el mo mekekerei e ruemech e a rengul a kall.

Picture

2. sausab
A sausab a dellomel. Ng diak el sal el mo meklou el dellomel. Ng di kmeed el ua a meklungel a ngel A redechel a mo meklou el kmeed el ua a meklungel a redechel a meriaur me a lechub e ng chebechab. Ng outoched a redechel e ng di diak el medecherecher a techedel. Ng kall.

Picture

3. sebus
A sebus a charm er a daob. Ng ta er a bedengel a ngikel. Ng mo meklou el ngikel. Ng oumesingd el kie er a dmolech el daob. Ng kall.

Picture

4. sechosech
A sechosech a suebek el charm. Ng ngar er ngii a bsechel. Ng di ua a meklungel a dudek e dirrek el becheleleu Ng di diak el ua a dudek el kemangel a kemril. Ng di mekedeb a kemril.

Picture

5. sechou
A sechou a suebek el charm. Ng ngar er ngii a bsechel. Ng diak el sal meklou. Ng di ua a meklungel a malk e ng di mekemangel a chiklel me a ochil Ng kakerous a bedengel Ngar er ngii a becheleleu me a chedelekelek me a ko er a bedengel a chutem. Ng diak el kall.

Picture

6. sekesakel
A sekesakel a charm er a daob. Ng ta er a bedengel a cheled. Ng di ua a irimd e ng di telkib el mekemanget. Ng meaiu e ko er a mechedelekelek a bedengel Ng kall.

Picture

7. sekos
A sekos a charm er a daob. Ng ta er a bedengel a ngikel. Ng diak el sal el mo meklou el ngikel. Ng ko er a di mechetngaid e mekemangel. Ng kall.

Picture

8. senges
A senges a charm er a daob. Ng di ua a teletelel a rereek. Ng eaiuong a kekemengel e eruong a techetechel. Ng ngar er a okeburs. Ng kall.

Picture

9. sis
A sis a dellomel. Ng diak el sal el mo meklou el kerrekar. Ng di kmeed el ua a telongklel a kesuk. Ng diak el kall e ng di sebeched el ousbech a llel el mo cheriut me a lechub e kede ousbech el omail a billum.

Picture

10. smuuch
A smuuch a charm er a daob. Ng ta er a bedengel a ngikel. Ng diak el sal el mo meklou el ngikel. ng di kmeed el ua a meklungel a meas. Ng ko er a bedengel a chutem. Ng kmal meringel a techebel e le ng dok. A demetacheb er ngii e ng mo oburek a bedenged. Ng di sebechel el kall.

Picture

T

1. tebudel
A tebudel a dellomel. Ng diak el sal el mo meklou el kerrekar. Ng di kmeed el ua a telongklel a sis Ng diak el kall e ng di sebechel el besiich. Ng sebeched el ousbech a budel el besebes.

Picture

2. telngot
A telngot a dellomel. Ng diak bo lemeklou el dellomel. Ng di ua a teletelel me a meklungel a chemutii. Ng kall a techel.

Picture

3. temring
A temring a dellomel. Ng diak bo lemeklou el dellomel. Ng di kmeed el mo ua a meklungel a sis A llel a kmeed el mo ua a llel a sis Ng mechetngaid e medecherecher a chelechedal. Ng diak el kall.

Picture

4. tengadidik
A tengadidik a suebek el charm. Ngar er ngii a bsechel. Ng di ua a meklungel a kiuid. Ng mellemau a btelul me a ulkel e becheleleu a ulul el me er a delel. Ng diak el kall.

Picture

5. terrid
A terriid a suebek el charm. Ng ngar er ngii a bsechel. Ng di telkib el meklou er a derariik. Ng bekekerekard e btelul e ko er a bedengel a chutem a chelechedal. A terriid a di blechoel el merael er a chutem el ua a malk. Ng diak el blechoel el suebek el ua a kiuid Ng sebechel el kall.

Picture

6. titimel
A titimel a dellomel. Ng mo meklou el kerrekar. Ng dirrek el kmeed el mo ua a meklungel a iedel Ng mekekerei a redechel el kuk mekekerei er a redechel a mesiedel Ng kall a redechel me a llel.

Picture

7. tochedulik
A tochedulik a dellomel. Ng diak bo lemeklou el dellomel. Ng di kmeed el mo ua a telongklel a temring. A llel a ngar er ngii a toched er a tkul. A redechel a mekekerei el ua a meklungel a tama e ko er a mengeleu. Ng diak el kall e ng di sebechir a rengalek el olab el outama.

Picture

8. toechel
A toechel a dellomel. Ng diak el sal el mo meklou el dellomel. A llel a ua a teletelel a llel a lius e ng di telkib el tubechebachel. A redechel a kmeed el ua a teletelel a redechel a tuu e ng di lmuut el kmal kaiuesedem. Ng medecherecher e ko er a mechedelekelek a bedengel. Ng sebechir a rengalek el ometech a redechel el ua a miich e mengang.

Picture

9. tuarekiuid
A tuarekiuid a dellomel. Ng diak el sal meklou el dellomel. Ng di kmeed el ua a teletelel a temring e ng di lmuut el mo metongakl. Ng diak el kall.

Picture

10. tudaol
A tuadaol a charm. Ng ua a teletelel a chelaiechang e ng di meklou. Ng ko er a bedengel a chutem a bedengel. Ng diak el kall.

Picture

U

1. uek
A uek a suebek el charm. Ng ngar er ngii a bsechel. Ng di ua a meklungel a malk. Ng oumellemau a bedengel el rokir e becheleleu a delel. Ng mekemanget a ochil el kuk mekemanget er a ochil a malk. Ng soal el menga a meklou el kukau. Ng di reboreb er a chetebtel a metongakl el kerrekar e omes a meklou el dait er a meselech e suebek el mong me ng menga a techel.

Picture

2. uel
A uel a charm er a daob. Ng mo meklou. Ng ngar er ngii a chimal me a ochil. Ng dirrek el ngar er ngii a ukebel el bereked a chelibel er ngii. A uel a kall. Ng dirrek el klalo a chelibel Kede ousbech el mo toluk.

Picture

3. ulach
A ulach a charm er a daob. Ng ta er a bedengel a ngikel. Ng ko er a debretech e kekemanget. Ng diak el sal el mo klou Ng kall.

Picture

4. uloi
A uloi a charm er a daob. Ng ta er a bedengel a ngikel. Ng diak el sal el mo klou Ng di kmeed el ua a klungel a meas e ng di kedelebuu. A bedengel a oudelmedimech er a mechedelekelek me a bibrurek. Ng diak el kall.

Picture

5. uosech
A uosech a dellomel. Ng diak el sal el mo meklou el kerrekar. Ng di kmeed el mo ua a klungel a imekurs. A redechel a mekekerei e mechaibibeob el ua a tama. Ng melebleb. Ng sebeched el kisous a budel el mo diak el melebleb e mengang.

Picture

Z

1. ziabong
A ziabong a dellomel. Ng diak el sal el mo klou el kerrekar. Ng di ua a klungel a cheluchau. A redechel a mo klou el mo ua a meklungel a redechel a meriaur. Ng kmal okrokr a budel me se el dildii e ng di mo kekerei a techel. Ng kall.

Picture