written by: Elizabeth Heine

language: Marshallese

Unin An Jool Lôjet

        Juon ien etto, juon emmaan kab lio ippän erro kar jokwe ilo juon äne jidikdik. Etan löllap eo, Lowaan. Etan lellap eo ippän, Jerata. Elap aerro kwöle im aikuj. Äne jidikdik eo, bök em na bajjek. Mweo imeroo juön ajjuur. Elap aerro buromöj. Epaaktok ranin Kurijmaj, a ejjelok kijerro möñä.

        Lowaan eaar etal inelok in bukötlôk leo jein. Elap an jeraamman leo jein. Elöñ imön em remman. Elöñ kijen möñä. Elöñ doon armej. Ej jokwe ilo eoonene eo.

        Lowaan eaar kajjitok kijen möñä ippän leo jein. Larök, leo jein eaar kanooj illu ippän leo jatin. Eba, "Aolep ien koj uñar jabdewöt men jän ña. Bök ne kijöm bao em etal."

        Elap an Lowaan emmönönö kön bao eo kijerro lellapeo. Ej bar etal ienelok ñan añeo añerro. Eaar iion juön löllap ej jekjek kane. Lowaan eaar ba, "Yokwe eok." Löllap eo eba, "Yokwe eok. Elap wöt bao ne kijöm ñan Kurijmaj." Lowaan eba, "Koj mool."

        Lowaan im löllap eo etto aerro bwebwenato. Lowaan ej kennanek löllap eo kön aerro lellap eo ippän jerata. Ej kennaneke kön an leo jein jeraamman.

        Löllap eo eaar ettoñ im ba, "Juon men inaaj kennaanek eok, im ejjelok juön ejelä kake." Böklôk bao ne kijöm im lelôk kijen rimmenanuwe ran. Elap aer ijol bao, ak ejjelôk kijeer kiö. Rimmenanuwe ran, jet armej uddik, ak ranijta."

        Ekaburörö mejän Lowaan ke ej roñ naan ko. "Ta koj mool ke rejelä anijinij!"

        "Lukkuun mool. Ñe emöj aö juok wöjke e, kwonaaj lo köjam eolôk ñan mweo imweer. Konaaj deloñ lôk ie."

        "Kwonaaj lelôk bao ne. Konaaj ba ren lewaj juön iep jidikdik. Kein anijnij ko rej päd iloan. Böktok iep eo ñan ippa."

        Ebar kaburörö mejän Lowaan ke ej roñ naan ko. Elap an kalmänlokjen mool ke jaab ke! Eba, "Inaaj kömman äinwöt am ba."

        Löllap eo ej juok wöjke eo. Ej kwalôk köjem eo ñan Lowaan. Juön köjem edik. Lowaan ej jibwe bao eo im toballôk ilo roñ eo lôk.

        Jiljino emmaan jiddik rej etok im wönmae. Ruo ne aetokäer. Eaetok kilan böräer. Aetok löñlôk at ko aer. Ainikieer äinwöt ainikien leddik jiddik.

        Raar ba, "Letok ne kijim bao. Lewaj marmar e maröm."

        Lowaan eba, "Ijjab könaan marmar. Ikönaan iep in anijnij eo amieañ. Letoke bwe in lewoj bao e."

        Armej jiddik ro redike bebe eo. Rerool im etal jän Lowaan. Reba, "Enaaj kijkan bao en!"

        Juon iaereañ eba, "Jen lelôk iep en. Ejaje wäween köjerbale. Innäm enaaj letok bao en." Lömaro jet reba, "Emman bebe in."

        Juön iaan armej jiddik ro eba, "Lewaj iep ne." Lowaan eaar böke iep eo. Ear lelôk bao eo.

        Lowaan ej walôkliñtak. Eaar lelôk iep eo ñan löllap eo. Löllap eo ej ettöñ im ba, rimmenanuwe ran renaaj kañ bao en, ñe emaat emöj.

        Löllap eo eba, "Itok kejro lale iep e mök. Konaaj konono naan kein ñan iep ne." Löllap eo ej unoojdikdik ñan Lowaan. "Iep ne enaaj kömman äinwöt am jiroñe. Konaaj bar ba naan kein." Ej bar unoojdikdik ñan Lowaan. "Innem enaaj böjrak."

        Lowaan ej katak kilen an köjerbal iep eo. Eba, "Ikönaan bwe lio ippa en lo iep e." Eaar bök iep eo im ettör.

        Eboñ ke ej töbarlôk mweo imön. Lio ippän ej jañ. Emarôk im ejjelok möñä.

        Lowaan eba, "Kwon jab jañ. Juön e menin jeraamman. Konaaj mönönö toon wöt am mour."

        Loowan ej konono naan ko. Möñä im, aolep men in aikuj ko aerro raar waloktok. Elap aerro mönönö. Epojak jabdewöt ñan ranin Kurijmaj en. Erro ar jab kiki boñön eo joñan aerro mönönö.

        Raan eo juön, Lowaan ebar bukötlôk leo jein. "Ta ne kwobar aikuji kiö?" Leo jein eaar kajjitök.

        "Kwomarön ke ja itok ippatok ñan änen änemro?" Wajjiköt? "Leo jein eaar kijjitök." Lowaan eba, "Eor juön men ikönaan kwalôk ñan eok."

        Erro etal. Leo jein elap an ilbök. Rökääl im aiboojaj aolep men imweo. Möñä ko renno tata eor. "Kwaar böki ia men kein?"

        Lowaan ejaje en et joñan an emönönö. Ej böktok iep eo. Ej konono jet naan. Möñä im aolep menin aikuj rej walôktok jän iep eo. Lellap eo ippan ij lilôk ñan ro riaikuj.

        Elap an bwilöñ leo jein Lowaan. Elap an könaan iep eo. "Enaaj kejkan bwe in böke?" Larök, leo jein Lowaan eba, "Imaroñ ke ja böke iep ne iomwin wöt juön raan?"

        Lowaan elömnak, "Larök ekübbon, ijoke eaar naajkid eö. Ña ejjab kübbon. Inaaj lelôk mokta iep en ñane."

        Larök, leo jein, ebök iep eoim rool ñan añeo änen. Eba, "Kiö aolep men ikönaan renaaj walok. Moktata inaaj kajjitök kön möñä. "Ej konono naan in onijnij ko." Aolep kain möñä raar lutöktok jän iep eo. Raar kobrak mweo. Aolep armej raar kanne iep, kilök, banennoor im jebe ko. Raar lutöklok im töbar äneo änen Lowaan.

        Lowaan eaar ettör im bök iep eo. Eaar konono ñan iep eo, im eaar böjrak. Eaar böke iep eo im jeblaak ñan mweo imön.

        Juön wa eaar emmaan iarin äneo. Leo waan wa eo, Liktak, eaar roñ kön iep eo. Eaar ba, "Ikönaan lo iep eo." Eaar pukötlôk Lowaan. Eaar kajjitök iep eo.

        Lowaan eaar kwalôk iep eo ñane. Eaar konono ñan iep eo im ewalôktok möñä. Liktak eba, "Kwokönaan ke wiakake iep ne ñan ña?" Lowaan eba, "Jaab."

        Liktak ej jeplaak. Elap an lömnak kön iep eo. Eba, juön raan inaaj böke iep en, ijoke enaaj ewi kilen aö böke?"

        Juön lukön boñ, ekar marok jilöñlöñ. Liktak eaar ilôk ñan mweo imön Lowaan. Lowaan im lellap eo ippän raar kiki im ettoñ. Liktak eaar böke iep eo im jerak jän äneo.

        Liktak elap an emmönönö. Eba, "Kiö aolep men ko ikönaan renaaj töprak. "Meneo moktata inaaj kajjitök kake ej, jool." Liktak ej jino an konono naan in anijnij ko, im elutöktok jool. Jeela ro raar kanne iep, külök, banennoor, jebe im raar aolep lutöklôk. Liktak ejaje ta eo enaaj ba bwe en böjrak an lutöktok jool. Aolepän wa eo im obrak kön jool. Ejino lutöklôk ñan lojet.

        Wa eo ejino an douj. Eaar tuññulallôk, tuññulallôk, epäd ikibin lometo.

        Jool eaar lutöklôk wöt jän iep eo. No ko rellap raar böktoböktak jool eo ñan aolep lometo ko.

        Iep eo ejjänin jemlôk an lutöklôk kön jool. Eñiin unin an jool lojet.

ACTIVITIES

I. Readi kajjitök kein im lömnak kaki ñan am kwalôk uwaak eo am jän am kar readi bwebwenato eo.

A. Wön eo eaar kömman bwe lôjet en jool? Ta unin am lömnak bwe e eo?

B. Ewi iaan Larök ak Lowaan kwöj lömnak kokönaan bwe en kar kwe? Etke?

C. Töre et eo Liktak eaar böke iep in anijnij eo jän mweo imön Lowaan im men, im etke?

D. Konañin ellolo ke rimmenanuwe? Ewi aetokäer ilo an bwebwenato in kwalôk?

E. Ewi wäween am lömnak kön bwebwenato in? Emool ke? Eriap ke?

F. Ta ko renana kab ta ko remman im emöj am katak kaki ilo bwebwenato in?

II. Readi naan kein rej laajrak ijin ilal. Uköt naan ko im melelier rej äinwöt juön im kömman lain ñani.

anijnij rimmenanuwe Kurijmaj liktak

koot ekkopäl armej jiddik Tijemba 25

III. Material: Pepa, pinjel im yardstick ak ruler. Juön maañ/kimej/nok/alal/to. Maañ eo 2 ne aetok. Kimej 6 in. aetok. Nok eo 4 in. aetok. Alal eo 3 in. aetok. To eo 2 in. aetok.

Ñan rukaki eo: Maañ eo, kimej eo, etc. kwe eo koj joñi kadede, bwe ajri ro ren kab joñi im kömmane graph eo aer make ekkar ñan jonan aetokan men ko kajjajo. Elaññe rejjanin jelä kömman graph, ekwe katakin er mokta jän aer köjerbal material ko. Kömman am example na ion board eo.

IV. Readi naan kein ijin ilal. Uköti ñan naan eo ejimwe im jipeel eo ejimwe.

jinjina  ________________

juod     ________________

kouj     ________________

id         ________________

katkil   ________________

pei       ________________

looj      ________________

V. Jän am readi bwebwenato eo, komaroñ ke kwalok melelein naan kein, jän nömba juon lok ñan nömba jiljino. eo.

B. Juön naan eo ej kwalok kön ial in itoitak.

C. Jet naan ko rej kwalok kön jikin ak äne rot.

D. Juön naan eo ej kwalok ta eo koj ba ñan armej eo koj iione.

E. Jet naan ko rej kwalok jekjekin rimmenanuwe ro, kab ta kajoor eo epäd ippäer.

F. Juön naan eo ej kwalok dettan Lowaan bwilöñ.