ÚNÚMÉN SIIKE

translated by Alvios William
illustrated by Vernette Miner

Nón eew fansoun mei wor únúmén pwiipwi siike re nómw epeek eew chénúpwuupwu. Wóón ewe chénúpwuupwu mei wor eew piriis re kan pwer wóón atun áár kan nó mwéngé petewen me epeek ewe chénúpwuupwu. Iwe, fáán ewe piriis mei wor emén énú ekan souni chóón pwereto wóón ewe piriis.

Nón eew ráán, ewe siike e kúkkún aa pwereto wóón ewe piriis pwe epwe nó mwéngé fetin epeek ewe chénúpwuupwu.

"Een ié na ke pwereto wóón áái na piriis?" Ewe énú aa ais.

"Ngaang emén kúkkún siike," ewe kúkkún siike aa pénúweni.

"Kopwe ne mwo pe pwe úpwe ne ocheok," ewe énú aa erá. "Meet pwopwun óómw fetán wóón áái na piriis?"

"Aapw, kosapw i ocheeiei pwún ngaang mei chék kúkkún. Witi pwii na e watte seni ei kopwe ocheei pwún ina epwe mwan kiriis," ewe kúkkún siike aa úreni ewe énú.

Mwúrin, aa pwereto ewe nampa ruu wóón ewe piriis.

"Een ié na ke pwereto wóón áái na piriis?" Ewe énú aa pwan ais.

"Ngaang siike nge ú chék kútta pwii we kúkkún," ewe siike nampa ruu aa erá.

"Kopwe ne mwo pe pwe úpwe ne ocheok," ewe énú aa erá. "Meet pwopwun óómw fetán wóón áái na piriis?"

"Aapw, kosapw ocheeiei pwún ngaang mei chék chiwen kúkkún. Witi pwii na e watte seni ei kopwe ocheei pwún ina epwe mwan kiriis," ewe siike nampa ruu aa úreni ewe énú.

Epwe ne rú nge aa pwereto ewe siike mei fókkun watte. Aa pwereto wóón ewe piriis iwe ewe piriis aa fókkun mwaúchúúch reen choun ewe watteen siike.

"Een ié na ke pwereto wóón áái na piriis?" ewe énú aa ais.

"Ngaang! Nge meet ke ais reen?" ewe watteen siike aa pwúchéér ngeni ewe énú.

"Mwa itá ke kan feet?" ewe énú aa soong.

"Kopwe ne fen pe úpwe ne ocheok!"

Iwe ewe watteen siike aa úreni ewe énú pwe nge epwan feet.

Ewe énú aa téétá me fáán ewe piriis. Ewe siike aa sááiti ewe énú aa posuu ngeni fénún kewe. Siike echek chimweri ewe énú fókkun pwisi oturaatiw peenó ewe énú fáán ewe piriis.

Iwe ekkewe siike raa nó mwéngé mwéngé epeek ewe chénúpwuupwu iwe weesiir raa niwin nó nón imweer we nge ewe énú aa peenó.