adapted by Alvios William
illustrated by Don Dougherty

Ekkewe mwáán tipáchchem iir mei fen umwes. Chómmóng aramas re kan erá pwe iir mei tiparoch me sókko umwes nón chamweer. Aramas meinisin sou áániir atakirikir reen sókko umwesiir we.

Wóón fénúweer we mei wor eew énnúk pwe iká ewe kiing e raun iká kukkunou, ikewe ie e fetán ie epwe ne winiiti eew anenap. Ewe ie epwe ne féér efóch áán pwe meinisin aramas repwe fetán wóón.

Nón eew ráán ewe Kiing aa appiooni pwe epwe kukkunou nge epwe pwereto wóón aparin ekkewe mwáán we. Ekkewe mwáán rese saani áán apariir we epwe winiiti neenien fetánin aramas chómmóng. Iwe raa pékúpékútiw sópwun irá nón ewe aan pwún ewe Kiing epwe pwereto nge esapw toongeni toonong nón apariir we.

Fansoun ewe Kiing aa pwereto toori ewe neeni, aa niwin sefáán pwún ese toongeni áán epwe toonong. Ewe Kiing aa niwin sefáán nge aa fókkun soong. Iwe ewe Kiing aa tiinaanó néún we chóón kúné pwe epwe nó pii meet pwopwun ewe napanap áán aa fis. Pwata chóón ewe neeni rese assamwoon ééch ngeni néúúr we Kiing.

Ke sineei meet ewe chóón kúné e kúna? Ewe chóón kúné aa toori ewe neeni iwe aa kúna únúmén mwáán re sónumi saramen ewe akkar nón áár kewe tuken taka. Mei wor eew áár imwenfen re éúwetá nge aa men kiroch nón pwún ese wor asammwachoon. Iwe ina pwopwun áár we sónumi saramen ewe akkar pwún repwe áápaanong nón áár we Fáán pwe epwe saram.

Ewe chóón kúné aa pwan pwerenó iwe aa kúna ekkóóch mwáán. Ekkewe mwáán raa men mesemesen neetipengngaw.

Iwe aa ais pwata re neetipengngaw. Raa erá pwe re neetipengngaw pwún áár kewe angaang ese toongeni wees pwún ewe akkar epwan kan tupwunó. Nge iká pwe ewe akkar e chék nónnómw áár kewe angaang epwe wees. Iwe raa pwan erá pwe raa fen fééri eew póó pwe ewe akkar epwe feittiw chék póssónó wóón nge ese fen nómwónó wóón. Ina pwata áár kewe angaang ese wees ngeniir.

Ewe chóón kúné aa pwereto aa kúna engoon-me-rúwemen mwáán re nómw únúkkún eew pwuupwu. Ekkewe mwáán re resin kútta emén me neeiir pwún re erá pwe aa máánó me nón ewe pwuupwu.Re túkken nón ewe pwuupwu iwe atun raa toowu me nón ewe pwuupwu nge ese nómw no emén neeiir.

Fansoun áár we toowu me nón ewe pwuupwu, emén me neeiir aa erá.

"Ouke witiwit pwe ngaang úpwe anneááni kich iká pwe mei wor neeich ese nómw."

"Mei pwung!'' emén neeiir aa erá. "Anneááni kich pwún ina sipwe engoon- me-rúwemen .

Iwe ewe aeménún aa anneáániir, iir engoon-me-emén.

"Engoon-me-emén!" aa erá. "Een kopwe sótun anneááni kich," aa úreni ewe arúweménún.

Ewe arúweménún aa anneá anneá pwan engoon-me-emén.

"Engoon-me-emén!" aa pwan úreniir. "Oo, emén me neeich ese nómw! Een anneááni," aa pwan úreni ewe nampa únúngát.

Ewe aúnúménún aa pwan anneá anneá pwan engoon-me-emén. Iir meinisin raa anneá anneá iwe meinisin iir erá pwe engoon-me-emén.

"Meet? Fókkun emén neeich ese nómw," iir meinisin raa apasa. Iwe raa fókkun sááfetán únúkkún ewe kónik ne kútta chieneer we.

Repwe ne rú nge néún Kiing we chóón kúné aa pwereto reer.

"Meet pworaus?" aa ais ngeniir.

"Áám feitto ikkeei engoon-me-rúwemén. Áám uwa túkken túkken wees iei wa anneááni kem wa chék engoon-me-emén," raa úreni ewe chóón kúné.

"Iwe sókun anneááni kemi!" aa úreniir. Iwe raa pwan anneá anneá pwan iwe chék, engoon-me-emén.

"Iwe meet oupwe niwini ngeni ei iká pwe ú kúna aengoon-me-rúweménúmiina?" ewe chóón kúné aa ais.

"Meeta úkúúkún mwooni mei wor reem áám úpwe ngonuk," raa úreni.

Iwe ewe chóón kúné aa angeei efóch sópwun mwúúch aa pwopwutá anneáániir.

"Emén!" aa ópwunaatiw ewe sópwun mwúúch wóón mékúran.

Rúwemén!" pwan ópwunaatiw wóón mékúran.

"Unúmén!" pwan afiti ngeni eew ópwuupw. Toori ewe aengoon-me-rúwéménún iwe aa fókkun emwúchchú ne ópwun ngeni wókun we nge aa apwasáásini, "engoon-me-rúwémén!"

Ewe nampa engoon-me-ruu aa fókkun, pwúchéér reen áán we metek.

"Ieei ii aengoon-me-rúwéménúmi eei," aa itini.

Iwe ekkewe mwáán raa fókkun kinissou ngeni. Raa ngeni meinisin úkúúkún ewe mwooni e nómw reer iwe raa niwin ngeni imweer kewe.

Iwe ewe chóón kúné aa niwin nó reen ewe Kiing. Aa úreni pwe ese wor namwoten áán epwe chuuri ekkewe mwáán reen áán epwe kapas ais ngeniir.  Ennetin pwe iir mei fókkun tiparoch.

Men pwúng pwe iir mei tiparoch?