written by Alvios William
illustrated by Matias O

Aa nónnómw eew pwúpwpwúnú me néúúr emén áát itan Sonter. Raa túmwúnú, túmwúnú néúúr eei áát toori áán aa ier wonu, iwe raa waanó pwe epwe ne fiti sukuun. Nón ewe aeewin ráán Sonter aa fiti sukuun. Ewe sense aa ngeni eew néún pwuk pwan efóch piin. Iwe echék toori atun aséésé nge Sonter aa rikinó aa nó op fáán imweer ewe. Aa okkop fáán ewe iimw nge aa kan éúsening meet inan me seman kewe raa kan ááni pworaus fengan pwe repwe kuku pwe epwe áni iká aa war me sukuun.

"Sipwe kuku ooch anan Sonter rais pwan únúféú ochaan sokun iwe sia anomwu fáán sepiach naan waspeesin," ewe saam aa úreni pwúnúwan ewe. "Iwe nge iká Sonter aa war me sukuun sipwe sótuni ais ngeni meet si amonnaatá pwe anan iká epwe sineei."

Iwe Sonter echék rong meeta we repwe kuku pwe anan iwe aa mwetewow me fáán ewe iimw. Ina atun nge ekkewe chóón sukuun raa pweretiw me wóón ewe aan pwe aa sár sukuun. Sonter aa nekesássááwow reer iwe aa fitiir nee kan tenitiw wóón ewe aan. Aa kan éménúngngawenó pwe itá nge mei aweesaanó sukuun nón ewe ráánin. Sonter aa fiti, fiti ekkewe chóón sukuun toori awenewenan imwan we iwe aa rikinong.

"Paapa me maama," Sonter aa asoriir. "Úwaa war me sukuun. Ikkeei nei keei pwuk me piin. Pwan ikkaan meet ú ááni sukuun ikenáái." Ina atun nge Sonter aa eri, eri ekkóóch nain wóón néún we chéén taropwe iwe aa kan fókkun iteni chamwan nge úchúkichúki mékúran.

"Masowan áái sukuun ikenáái," Sonter aa fóósetá. "Iei ekeei nain nón nei ei taropwe re pwáári ngeni ei pwe mei wor ánei rais me ocháái sokun ú kuku iwe ina ouwaa isóni fáán sepiach na waspeesin." Iwe seman me inan kewe raa chék nefengen reen áár we fókkun mááirú reen áán Sonter we sineei meeta kewe re amonnaatá pwe anan. Sonter aa sareti ewe sepi iwe aa kúna ewe rais me ocháán kewe sokun. Inan me seman kewe raa fókkun pwaapwa pwún raa erá pwe néúúr we aa men fókkun tipáchchem pwún iwe e sineei meet re amonnáátá pwe anan.

Iwe maseta neesor aa pwan nó sukuun. Sonter aa pwan tipin pweretá nón ewe aan iwe aa pwan erikirik chék aa toonong faan imweer we. Aa pwan op fáán ewe iimw. Aa op, op iwe aa pwan rong seman we áán aa pwan úreni pwúnúwan we pwe repwe ne nu emén ocháán Sonter chukó pwún raa pwaapwa reen tipáchcheman we. Iwe Sonter e chék rong meeta we repwe kuku pwe anan mwéngéén neanowas iwe aa pwan mwetewow me fáán ewe iimw iwe aa nó awitiwiti chienan kewe chóón sukuun nón ewe aan.

Chienan kewe chóón sukuun raa pwan sár iwe Sonter aa pwan orukorukonong neeir pwe aa pwan fitiir nee pweretiw wóón ewe aan. Sonter aa pwan rikinong reen imwan we.

"Maama me paapa," aa pwan asoriir. "Úwaa war nge masowan áái sukuun ikenáái pwe áámi úwaa pwan nu emén néúch kewe chukó pwe ocháái."

Inan me seman kewe raa fókkun ingeiti pwan fókkun pwaapwa reen aan we tipáchchem nge mei chék kúkkún. Raa kan erá pwe epwe ne fen ia me tipáchcheman iká aa watte. Iwe Sonter aa suuki aar we kapet aa isettiw ocháán we chukó pwe aa ochooch. Inan kewe me seman raa fókkun fééri ngeni meet áán mwochen pwún raa erá pwe epwe fókkun watte namwotan iká aa watte pwún iwe aa mei tipáchchem. Iwe nge atewe Sonter ese mwo toongeni aan epwe makkeei eféú féún mak pwún ese mwo fiti sukuun nge iwe e chék kan asona inan kewe me seman.

Fetán, fetán nón eew ráán Sonter aa pwan nó sukuun. Inan kewe me seman raa erá pwe repwe ne pwan nu emén néúúr kewe piik pwe ochaan Sonter iká aa war me sukuun. Iwe repwe ne oopa nón ewe eew ruumw pwe repwe fókkun cheki iká pwe pwúngún áán nóúúr we áát we tipáchchem. Atun aar we kan fóffóós nge Sonter aa fen pwan nómw fáán ewe iimw. Sonter e chék rong meet we re ááni pworaus nge aa pwan mweteei pwe aa pwan no efitifitinong neein ekkewe chóón sukuun. Aa pwan fitiir toori imwan ewe iwe aa pwan pwerenong nón.

"Meet kaa ááni sukuun ikenáái?" Seman we aa ais.

Sonter aa isettiw néún we pwuk iwe aa iteni neefiinen fétún. Aa pwan angeei néún we piin iwe aa kan eri nón néún we pwuk. Fetán, fetán aa chimwetá iwe aa erá, "Fókkun kinisou reen áámi eei waa pwan nu emén ocháái piik. Úwaa pwan sineei pwe ouwaa amonnaatá emén ocháái piik nge ina e nómw nón ruumwmwei naan." Seman me inan kewe raa fókkun núkú pwe néúúr we áát mei pwúng áán we tipáchchem. Iwe raa apworausa fetán eei wóón fénúweer we.

Ekkóóch sou tipáchchem raa pwan rong pworausan Sonter we iwe raa war pwe repwe satúni áán we tipáchchem. Aar kewe kapas ais iká pwe Sonter e sineei iwe mei pwúng pwe ii mei tipáchchem. Iwe aar kewe kapas ais únúngát chék. Emén me neeir epwe chék ais eew kapas ais. Aan ewe aeménún epwe ais ngeni Sonter fite féún ocháán we naimis. Aan ewe erúweménún, Sonter epwe esinna menni neein aan ewe kiing kewe ruu kap ewe kiing e kon ien éúcheááni. Ekkewe ruu kap mei chék fókkun weewe fengen napanapeer. Ese wor epwe toongeni sineei menni neeiir ewe kiing e éúcheááni. Ewe chék kiing e sineei menni ewe e éúcheááni pwún mei wor aan esissa me woor. Aan ewe éúnúménún we esissin, ewe áát epwe esinna ié neein néún kiing kewe rúwémén féépwún e watte. Néún kiing kewe féépwún fókkun weewe fengen chék mesemeseer me napanapan inisiir. Iwe nge iká Sonter e pwúng reen ewe esissin epwe pwúnúweni ewe féépwún epwe esinna me neeiir.

Sonter e chék sineei pénúwan ewe iwe aa nó nón imwan ewe nge aa fókkun pwaapwa. Aa nó annutenó pwún aa pwaapwa. Iwe maseta neesor aa pwan nó operi néún kiing we féépwún. Sonter e chúwen nómw neein ewe petewen nge néún kiing kewe féépwún raa pwereto reen ewe kónik pwe repwe itiit kónik. Iwe ewe watte aa kan úreni ewe kúkkún pwe iká Sonter e chék attona éúti epwe esinnaaei pwun úpwe emwékútú efóch pwe epwe sineei pwún úpwe fen pwúpwpwúnú.

Iwe Sonter aa rong chék meeta we ewe féépwún e erá iwe aa pwan sáánó nón imwan we pwe aa nó kóón nge fókkun pwaapwa. Maseta neesor aa ina atun ewe meinisin aramas repwe ne kiito katon ewe mwiich. Kiing me meinisin aramasan ewe fénú raa kiito non ewe iimw únúkkún imwan ewe kiing we. Ewe áát me seman kewe me inan raa pwan wareto. Iwe ekkewe únúmén mwaan tipáchchem raa móót wóón neenieer kewe pwan aar kewe pisekin esissin. Iwe ewe eménún aa úútá aa apasa, "Únúmei eei naimis mei wor féún nge iká pwe ennetin óómw eei tipáchchem Sonter, iwe kopwe esinna fite féún mei wor nón." Sonter aa pwan angeei néún we taropwe me piin pwe aa pwan eri fetán eei nón. Fetán, fetán aa kan iteni neefiinen fétún iwe aa erá, "Áái ei tipáchchem e erá pwe ena naimis eféú chék féún."

Iwe meinisin ewe aramas raa fókkun mweiráásini áán Sonter we esinna ewe aeewin esissin. Ewe kiing aa fókkun mááirú reen ewe áát aan we toongeni esinna ewe esissin. Iwe ewe érúwéménún aa pwan úútá aa erá, "Ekkeei ruu kap mei fókkun weewe fengen chék. Iwe nge eew me neeiir mei fókkun éúchea pwún e féér seni koon. Iwe eew núkún chék e féér seni koon. Iwe Sonter, kopwe ne pwan esinna menni e féér seni koon unusan me neeiir."

Iwe Sonter aa pwan eri, eri nón néún we chéén taropwe aa pwan fókkun iteni neefiinen fétún. Fetán, fetán ee aa tuketiweei eew ekkewe kap pwe itá nge epwe ne móneetiw wóón ewe simeen. Iwe tittipan ewe kiing pwe epwe ne fókkun móneetiw ewe kap wóón ewe simeen iwe aa pwúchéér. "Kosapw móneetiw áái na kap ú fókkun éúcheááni wóón ena simeen pwe ete mék." Sonter aa takir iwe aa erá pwe iwe ewe kap kiing e fókkun éúcheááni. Iir meinisin ekkewe aramas raa fókkun pwan pwúchéérútá nge episi Sonter aan we aa pwan pwúng reen ewe éruuwen esissin.

Aa pwan úúta ewe éúnúménún iwe aa erá, "Iwe iei émwúchúnóón esissin nge eei eew iká pwe e pwan pwúng reen Sonter iwe epwe ne pwúnúweni néún kiing we finniichi." Iwe, Sonter aa fókkun wóónó me wóón pwe itá nge aa kan nóniinen iká aa ninniinó are pwe ese pwúng reen ewe esissin. Néún kiing kewe féépwún raa tettenninó pwe Sonter epwe ne fini ié neeiir e watte. Iir me rúwémén fókkun weewe nó chék napanapeer me mesemeseer. Sonter aa pwan angeei néún we pwuk me néún we piin aa pwan eri fetán eei nón ewe taropwe. Aa kan fééri pwe itá nge aa kan fókkun ekieki pwúngún ewe esissin. Aa pwan iteni neefiinen fétún pwan kan úchúchúki mékúran. Sonter aa kan attona ekkewe pwiipwi ese toongeni epwe kúna ooch mettóóch repwe sókko-fesen wóón. Aa fókkun moonoon reen aan we ese sineei no meet epwe fééri pwe epwe sineei pénúwan ewe eew. Seman kewe me inan raa pwan fókkun nóniinen. Fetán, fetán epwe chék eew minich me mwen áán epwe ne toori kunókun aan epwe esinna nge ese chék sin reen iwe aa ninniinó. Ina atun nge ewe féépwún aa fókkun nóniinen iká raa niienó Sonter. Iwe aa emwékútú efóch éútún kewe iwe Sonter aa turufi neminnewe aa erá pwe iweeii. Chóón ewe mwiich raa fókkun pwúpwpwúchéérútá pwún aa pwúng reen Sonter ewe esissin. Iwe ewe kiing aa úúta aa angeei mwaran we mwárin kiing aa amwaramwaraa-ngeni Sonter. Sonter aa pwúnúweni néún kiing we féépwún iwe raa siikkitá pwe raa kiingen ewe fénú me mwúrin ewe kiing áán aa máánó.