text by Alvios William
illustration by Startla Stone

Raa nónnómw Sarú Pwáápwá wóón fénúweer we. Nón eew ráán, Pwáápwá aa mómmóót únúkkún eew chénúpwuupwu nge aa kúna efóch uuch pwe aa pasetiw me asen ewe chénúpwuupwu.

"Kóóff," ewe pwáápwá aa turunong nón ewe chénúpwuupwu. Pwáápwá aa áári ewe fóchun uuch. Ewe pwáápwá aa kúú pwopwun ewe uuch iwe aa áári ngeni pen ewe pwuupwu.

"Meeta na Pwáápwá?" ewe Sarú aa ais. "Witiei pwe úpwe katon irá meet ena."

"Efóch uuch." Pwáápwá aa kéénó reen Sarú. "Iwe, nge iká pwe ke ánisiei úpwe ngonuk esópw pwe kopwe fétááni. Sipwe chék ekienó nón áái naan atake iwe sia pékú-fesenni kaa fétááni esópw iwe ngaang esópw."

Sarú me Pwáápwá raa eki ewe uuch raa wóónó nón áán Pwáápwá we atake. Pwáápwá aa angeei ewe took aa pékú ewe fóchun uuch.

"Ngaang úpwe fétááni únún na," Sarú aa kéétá. "Kitirin uuch ekan nómw wóón únún ina pwata úpwe fókkun fétááni ena únún."

Pwáápwá aa angeei pwopwun we pwe fétáán. Raa en me nó fótuki fétáán nón áán atake.

Mwúrin ruu wiik Sarú aa nó katon fétáán we. Atun áán toori nón áán we atake aa kúna pwe fétáán we uuch aa pwasenó pwe aa peenó. Sarú aa fókkun neetipengngaw reen aan we aa pe fétáán we uuch.

Pwáápwá aa pwan nó katon fétáán we. Fétáán Pwáápwá we uuch aa fókkun arawaraw nee chéén reen mááriééchchún. Pwáápwá aa fókkun pwaapwa reen fétáán we uuch.

Fetán, fetán, mwúrin ekkóóch maram aa uwa fétáán Pwáápwá we uuch. Pwáápwá ese chúwen pós neetipan reen aan mwochen epwe chék kakkaton kitirin fétáán we uuch. Iteiten ráán Pwáápwá aa chék nó nónnómw nón aan we atake nó fókkun mammassa fétáán we uuch.

Mwúrin ekkóóch ráán, aa nupw kitirin fétáán Pwáápwá we uuch. Pwáápwá aa nó nón áán we atake pwe epwe ne osumwu fétáán we uuch. Iwe, aan Pwáápwá we osukosuk, ese toori kitirin fétáán we uuch.

Epwe nee rú nge aa pwereto Sarú. "Meeta na Pwáápwá?" Sarú aa ais ngeni Pwáápwá.

"Oo," Pwáápwá aa kéétá. "Etto pwe kopwe téékaatiw ocháách eei uuch pwe aa nupw."

"Oo, iwe," Sarú aa erá. "Kaa chék nómw faan na iwe kaa meen pwe iei úpwe kan móneetiw reemw iwe kaa kan supwuri."

Sarú aa téétá wóón ewe uuch aa pwopwutá nee ocheei kitirin ewe uuch we. Aa kan angeei sinin kewe aa móneetiw reen Pwáápwá pwe ocháán. Sarú aa ocheei, ocheei, kitirin ewe uuch kewe eitaanó ese mwo ngeni Pwáápwá eféú epwe mwosar ocheei. Aa mwetetiw chék Sarú me wóón ewe uuch iwe aa sú.

Pwáápwá aa fókkun soong reen Sarú. "Meet eei úpwe ne fééri ngeni Sarú pwe epwe fókkun niiwin aan eei kirikiringngaw ngeniei," Pwáápwá aa kan ekieki. "A, a, aa, úwaa sineei meet úpwe ne féér ngeni."

Pwáápwá aa nó kút áán appachen maai. Aa enénú, enénú iwe aa anapanapaa ngeni emén aramas iwe aa nó anomwu nón ewe aan. Ewe aan, iwe anen Sarú we ngeni nón aan we atake. Iwe Pwáápwá aa tininong oponó neein ewe petewen.

Sarú aa pwereto nge aa kúna ewe appach mei úútá nón ewe aan.

"Sú me nón ena aan ke eppet," ewe Sarú aa kééngeni ewe appach. "Meet weewen óómw na eppet nón anei na? Mwúttir chék sú nge iká pwe kose sú ngaang úpwe emwúchchú ngonuk eew kéfén pwún kopwe sótuni ngúsáásáán pei keei."

Ewe appach ese mwo mwékútúkút. Nge Pwáápwá aa chék fókkun takir nge ese mwenin aan epwe néúwémmóng pwe Sarú ete kúna.

"Mwaa kose sú?" Sarú aa soong. "Kaa pe!"

"Kachaak!" Sarú aa emwúchchú ngeni ewe appach eew kéfén. "Nikitienó pei na! Kose nikitaanó? Kaa pwan pe."

"Ketapwaapw!" Sarú aa pwan efén ngeni ewe efóch. "Nikitaanó pei na! Mwittir! Iká pwe kose nikitaanó pei na úpwe pwan emwúchchú ngonuk eew sait kik."

Ewe appach ese mwo mwékútúkút. Pwáápwá aa chék fókkun pwénú awan reen aan we fókkun takir reen napanapan Sarú we.

"Pwumw!" Sarú aa pwan kikin ngeni ewe appach eew sait kik. "Nikitaanó tangei na! Mwittir! Kaa pwan pe!"

"Pwumw!" Sarú aa pwan kikin ngeni ewe appach ewe efóch.

Sarú aa pachenó wóón ewe appach iwe aa turunó nón ewe aan. Iwe, Pwáápwá aa kúú, kúú, kúú úwan ewe Sarú iwe aa peenó Sarú. Pwáápwá aa nó nón imwan ewe nge aa fókkun pwaapwa.