translated by Chirano Cheipot
illustrated by Calvin Fujioka

Ewe ráán Sancher me neún kewe áát raa nó attaw. Raa nó attaw nón ewe mwóóch.

Nupwen raa toori ewe ie, raa fókkun máirú ren ewe efóch kúkkún siipw aa chék saa fátán nge ettiki wesenin we. Raa fókkun meseiik ren kúkún ewe pwáá raa chék saa fátán nón.

Sancher aa chék anchaangeei chómmóngen niapen ewe waa toku me angarap. Ese nifinifin kúkkún me wátte.

Raa niwin sefáán pwun raa niap. Sancher aa kinikinietiw emen pwun aa nimeti pwe repwe áni.

Rancher aa chék nengeni meet ewe seman we aa fééri. Aa kúna ekkóóch kúkkún iik nón affen ewe toku.

"Meet kewe kúkkún iik raa féeri nón upwen ewe toku?" Rancher aa pwan eiis.

Sancher aa pwan pénueni. "Ekkewe toku rekan mwéngé ekkewe kúkkún iik.

Sancher aa nimetifichienó ewe iik, iwe aa úreniir pwe repwe ne kukuu. Meinisin chóón imwan we raa chék fókkun witiwit pwun repwe ne mwéngé iik nón ewe pwinin.

Rancher aa men fókkun sou pworous. Aa pwan eiis ngeni seman we. "Paapa ifa ussun áán ekkewe iik wátte kúút eneer?"

Sancher aa pwan úreni. "Ekkewe toku rekan sou sá fetán nón mwiich. Raa toongeni sá seni we neeni toori eew neeni. Pwan ina chék ussun ekkewe kúkkún iik. Weweffengen chék áán ekkewe watte me ekkewe úkkún iik kúút eneer mwéngé.

Ekkewe pwooniik raa kúna ekkewe kúkkún iik. Raa ásinó wóón ekkewe kúkkún iik pwun raa pwiniir. Ekkewe iik raa fókkun mewtemwet fetán chék nón ewe sáát.

Ekkewe watteen iik raa pwan kúna ekkewe kúkkún iik raa fókkun mwetemwet fetán chék reen ekkewe pwooniik, iwe raa pwan etto raa pwan ánisi ekkewe pwooniik ne áni ekkewe kúkkún iik.

Nupwen aa kan ieei ussun áán ekkewe machchang soosoori ekkewe kúkkún iik, iwe aa ina atun áán ekkewe chóón attaw raa tapwenó mwúrin pwún raa sineei pwe ekkewe toku raa pwan chómmóng nón ewe neeni aa wor ekkewe pwooniikie.

Ekkewe sein attaw raa chék tapwei ekkewe pwáá pwun repwe attawa toku me angaraap non ewe pwaa.

Rancher aa pwan eisini seman we. "Meet ekkewe kúkkún iik rekan ani?"

Sancher aa pwan ereni neún we áát. Ekkewe toku raa áni ekkewe kúkkún iik. Ekkewe kúkkún iik raa ani ekkewe ekkóóch kúkkún maan mii chék pappas fetán nón sáát. Ekkewe kúkkún maan sise toongeni kúneer non mesach."

Rancher aa pwan eiis. "Ekkewe kúkkún iik raa áni ekkewe kúkkún maan nón ewe sáát, nge ekkewe kúkkún maan, meet raa pwan áni?"

Sancher aa pwan pénúeni. "Ekkewe kúkkún maan nón sáát raa mwéngé seni ekkewe irá nón sáát.

Rancher aa chék nengeni seman we. "Wewen pwe eei pworaaus aa popuetá seni ekkewe irán non sáát sopono uon aramas. Sancher aa ureni néún we pwe ei napanap sia eita ngeni food chain.

"Sia áni ekkewe toku, ekkewe toku raa áni ekkewe kúkkún iik, ekkewe kúkkún iik raa áni ekkewe kúkkún maan, ekkewe kúkkún maan raa áni ekkewe iráán neeset." Sancher aa pwan erá.