Reumwes Erinis

retold by Alvios William
illustrated by Eric Woo

Emén mwáan néún emén féépwún mei fókkun niaééch. Eei mwáán mei pwan chómmóng néún mwooni, nge ese wor áán pwaapwa.

Aa úreni aramasen nón neenian we, "Ngaang wa men neetipengngaw.  Nei eei nengngin úse kúna áán epwe takir. Ese pwan fóós. Meet epwe toongeni takir iká fóós reen?"

"Waanó pioing reen tókter repwe chekii," emén ekkewe mwáán aa erá.

Ewe mwáán aa waanó reen ewe tókter. Ewe tókter aa chekii ewe nengngin iwe aa erá.

"Noumw eei nengngin iká pwe e takir iwe epwe pwan fóós. Kopwe ekieki meet epwe toongeni takir reen pwún epwe pwan fóós."

Ewe mwáán aa niwin nó nón sópwun we iwe aa úreniir, "Oupwe atakiri nei eei nengngin pwún iká e takir epwe pwan fóós. Iwe nge iká e takir reen emén neeimi, ngaang úpwe mééni ngeni mwooni."

Iwe ekkewe aramas iir mei fókkun atakirikir raa kiito nón imwan ewe mwáán we. Raa pwopwutá ne atakiri neminne we. Ekkóóch re kéén atakirikir. Ekkóóch re pwérúk. Ekkóóch re apworaus atakirikir. Ewe nengngin e móót únúkkún seman we nge ese mwo erá pwe epwe takir.

"A! A! Aa!" seman we aa kan fókkun takir. "Me atakirikirin ekkeei mwáán."

Seman ewe nengngin we aa attona néún we nge ese mwo karapan áán epwe takir. "Meet eei epwe takir reen?"

Iwe aa úreni ekkewe aramas pwe repwe ne niwin nó nón imweer kewe.

"Kinisou ngeni kemi," aa era. "Áámi mei fókkun atakirikir, nge neei ei nengngin ese fókkun toongeni epwe takir."

Iwe nge mei wor emén feefin me néún emén áát mei fókkun chipwang. Ese sine attaw. Chipwang epwe itiit kónik, iká fen tu pwuna. Aa men fókkun chipwang. Itan ewe áát Erinis.

Nón eew ráán inan Erinis aa fókkun soong. Iwe aa erá, "Erinis, pwata iei átin ikeei raa men achooch ne angaang. Een chék tiwenóón. Ka men fókkun chipwang."

"Ngaang ú chék saani áái úpwe kukkunow. Use mwochen úpwe angaang," Erinis aa era.

"Ese chúwen wor néúch mwooni. Ke nó kút fetán óómw angaang. Wees me chipwang pwún sia osupwpwang," inan we aa úreni.

"Ewer, Maama," Erinis aa erá. Erinis aa fetán, fetán, aa chuuri emén mwáán me nón ewe aan. Ewe mwáán mei uweei emén néún chukó.

Ewe mwáán aa kapwong ngeni Erinis. Iwe aa erá, "Iká pwe ke atoura neei eei chukó ngeni nón imwei naan úpwe niwinuuk."

Erinis aa angeei ewe chukó iwe aa wóónó nón imwen ewe mwáán we. Aa niwinó reen ewe mwáán. Ewe mwáán aa ngeni rúwéféú féún senis rúwe-me-nimu.

"Kinisou," Erinis aa úreni ewe mwáán. "Upwe ne wóónó reen maama ekkeei mwooni."

Mei wor eew chénúpwuupwu ewe ie Erinis aa pwerenó ie. Erinis aa nenong nón ewe kónik iwe aa kúna emén iik mei on.

Aa apasa, "Úwa saani eei iik. Úpwe ne supwuri pwe neei."

Erinis aa supwuri ewe iik. Iwe, ekkewe mwooni ra turunong nón epin ewe kónik.

Iwe aa nó nón imwan we. Aa apworausa ngeni inan we pworausen ekkewe mwooni.

"Een emén áát mei umwes," inan we aa soong ngeni. "Mwooni, kopwe uweei nón pwekitomw. Kosapw fetán nge kémwéch nón pouumw."

Masetá neesor, Erinis aa pwan nó kút áán angaang. Aa chuuri emén mwáán fáán néún ekkóóch siike. Ewe mwáán aa era, "Panaanó nei keei silke iká e wor ie fetin pwe repwe mwéngé iwe ka etto angeei unumwomw een minik."

"Ewer!" Erinis aa pwaapwa. "Inaan enaan neeni e wor ie fetin. Úpwe uweiir nó ikenaan."

Ewe mwáán aa ngeni eew kap mei ur reen minik.

"Iwe maama e erá úpwe wow nón pwekitei," Erinis aa chemeni. "Úpwe ne isennong nón pwekitei.

Aa sessaan imwan ewe. Inan we mei chék nómw. "Maama, iei únúmach eei kapan minik," aa kékké. Iwe aa angeei ewe kap me nón pwekitan. Ewe kap aa péén.

"Een emén reumwes," aa soong ngeni. "Attona pwe ese wor néénéén eei kap. Kopwe úweei wóón mékúromw. Iwe kosapw sá."

Masetá, Erimis aa pwan nó. Aa chuuri emén feefin. Ewe feefin aa úreni pwe iká e amwéngééni néún kewe chukó epwe ngeni eew pwórun aiskiriim.

Inan we aa ais, "Ka war? Meet na ke úri nón ena pwún?"

"Ocháách eei peekin futuk, maama. Enaan mwáán e erá úpwe nimeti nón imwan naan iwe iei aa ngeni ei eei futuk pwe ocháái."

"O! O! Meet reumwes? Sótun attona ena futuk! Ese chúwen ééch pwún aa fétépwún. Pwata kose uweei wóón afaromw?"

Mwúrin Erinis aa pwan nó. Aa pwan chuuri emén mwáán. Ewe mwáán aa úreni pwe epwe nimeti nón áán we titin piik nge epwe ngeni néún we óris pwe néún.

"Men ééch," Erinis aa erá. Iwe Erinis aa nimeti, nimeti ewe titin piik wees. Aa etinó reen ewe mwáán. Iwe ewe mwáán aa ngeni néún we óris.

Erinis aa erá, "Meeta we maama e erá úpwe féér ngeni? O! E erá úpwe uweei wóón afarei."

Ewe óris aa nien fókkun chow. Iwe nge Erinis aa toonong faan iwe aa ekii. Aa wesewesen pwór faan reen chowun. Ese mwenin aan epwe fetán mwúttir.

"O! O! Eei óris aa men fókkun chow. Iinei we e erá úpwe ekii wóón afarei. Úse kofich pwún e pwan kitipéppé wóói. E pwan ékúrang."

Nón ewe atun, ewe mwáán me néún we féépwún raa pwereto nón ewe aan. "Néúwen meeta eei ú rong usun néúwan óris?"

Iwe repwe ne rú nge raa kúna Erinis pwe aa pwereto. Erinis mei fókkun pwóreei fáán ewe óris.

"A! A! Aa!" ewe féépwún aa takini Erinis.

"Paapa katon enaan reumwes. Umwesin ne eki enaan óris wóón afaran. A! A! Aa!"

"A! A! Aa!" ewe mwáán aa pwan takirii. "Pwúngún pwe ii emén mei fókkun umwes."

Ewe mwáán aa fanafanenó. Aa attona néún we féépwún.

"Neei féépwún! Kaa takir. Iwe kaa pwan fóós. Ieei kaa toongeni kapas," seman we aa apasa. Ewe mwáán aa fókkun pwaapwa.

"Ewer paapa. Ngaang úwa kapas. Úwa pwan takir. Úwa takirii enaan aat mei umwes," ewe féépwún aa erá.

Iwe ewe mwáán aa sáánó reen Erinis. "Úwa fókkun pwaápwa reemw. Een kose umwes. Attona neei we féépwún aa takir reemw. Aa pwan toongeni fóós. Iwe kópwe angeei nóumw eei tuken mwooni pwún ka atakirii neei naán féépwún," ewe mwáán aá era.

Erinis áá óturáatiw ewe óris. Aa angeei ewe tuken mwoóni iwe aá sá ngeni imwán we. Aá fókkun pwaapwa.

Iwe ewe mwáán me néún we féépwún raa niwiniiti imweer ewe. Ewe féépwún áá nó ápworáusá ngeni ekkewe aramas ewe napanap e kuna.

"A! A! Aá!" ekkewe aramas ra takirii Erinis. "Ennet áá men atakirikir."

Erinis áa sááiti imwan ewe. Inan ewe aa kúná áán áa sááto.

"Meet pwóraus Erinis?" aa ais. "Meeta na nón ena tuuk?"

Erinis aa era, "Néúch eei tuken mwooni. Ewe mwáán e ngeni ei pwún néún we féépwún áa takir iwe áá pwan fóós reei. Een ke úreni ei pwe úpwe ekii wóón afarei. Iwe úwa ekii ewe óris wóón afarei. Aa men fókkun chow. Ewe oris aá pwuchéér pwan fókkun kitipéppé me wóói. Ewe féépwún e kúna iwe áa takiriiei."

"Ngaang úse mwó úrenuk pwe kópwe ekii emén óris wóón afaromw. U erá pwe kopwe ekii ewe futuk wóón afárómw," inan we áá mina. "Iwe, mei mwúrinné. Aa wor néúch mwooni. Een kosapw chúwen iteni reumwes. Een emén áát mei tipáchchem."

Een kópwe ne iteni Tipáchchem Eri," inan we aa úreni.

Eri me inan we rese chúwen osupwpwangen pisekiir me áneer mwéngé. Aa fókkun chómmóng néúúr mwooni. Eri ese chúwen chipwáng iwe iir raa nómw nón áar fókkun pwaapwa.