written by Alvios William
designed and illustrated by Calvin Fujioka

Aa nónnómw Pénúwenap me néún kewe rúwemén áát. Emén itan Rongechis nge emén itan Rongenap. Rongechis aa men fókkun apwenúwétá meet saman we aa kan ereni pwe epwe kan fééri. Rongenap ese kan apwenúwétá meeta semeer ewe e kan ereni pwe ii mei fókkun anneaa-soonap ngeni saman ewe.

Fansoun semeer we mei chiwen manaw ngeniir, Rongechis aa men fókkun achoocho ne anisi nón aan angaang pwan achoocho nee káé rongan seni semeer we. Iwe nge atewe Rongenap ese mwo wor fansoun aan epwe anisi semeer we iká fen móót ngeni reen aan epwe éúsening ngeni meet semeer we epwe kan ááni aúrewúr ngeniir. Ina pwata semeer we e kon ien éúcheááni Rongechis seni Rongenap.

Nón eew fansoun Rongechis aa tungóreei semeer we pwe epwe fana efóch waan. Iwe, seman we aa nó fana fana waan we wees iwe aa war nge aa ereni Rongechis pwe, "Neesor ina kopwe etiwow neeppi nge ina kopwe kúna wóómw na pwe epwe ammis neeset." Iwe Rongechis ese chiwen toongeni annut nón ewe pwinin reen aan chék ekieki waan ewe pwún aa men fókkun mochen waawa.

Neesossoor chék nge Rongechis aa sáátiw neeppi. Epwene sáátiw, aa kúna efóch waa mei chék amis neeset nge wesewesen napééééch. Rongechis aa kan wawwaawa waan ewe nee seres fetán arossetin fénúweer we. Aan Rongechis we sesseres fetán wóón waan we nge Rongenap aa fókkun mwochenia aan epwe pwan wááni efóch usun wáán Rongechis we.

Iwe, nón eew ráán Rongenap aa pwan ereni semeer we pwe epwe ne pwan fana efóch wáán usun wáán Rongechis we. Pénúwenap me Rongenap raa pwopwutá nee fana wáán Rongenap we. Eew ráán, Pénúwenap aa ereni Rongenap pwe epwe nó sópweenó angaangan ewe waa.

Atun áán Rongenap etinó reen ewe waa nge ewe waa aa pwan úútá wóón pwopwun we. Iwe, Rongenap aa niwin nó reen seman we pwe aa nó ereni pworausan ewe waa we. Pénúwenap mei chék sineei pwe epwe iwe usun pworausan ewe waa ina pwata e tiinaanó Rongenap pwe epwe nó pii. Pénúwenap e mwochen epwe ameefi ngeni Rongenap niwinin aan we ese kan mwochen éúsening ngeni meeta e kan ereni pwe epwe fééri.

Fansoun áán Pénúwenap we faffana wáán Rongechis we nge Rongechis aa kan nó attaw iik pwan kama kón pwe e kan wáánó reen Pénúwenap pwe anan nee angaang iwe pwan apweteeteen neetipan énúún ewe waa aan we aa fanafan. Iwe nge atewe Rongenap, atun waan we aa fanafan, ese mwo wor aan epwe ekiekin wownó mwéngé reen seman we pwe epwe áni fansoun aan we akkangaang wóón waan we. Ina pwata ekkewe énú rese pwaapwa iká tipeeew ngeni aan epwe waawa.

Pénúwenap aa nó pwúsin attaw, aa pwan kama kón iwe aa uwei pwe anan ekkewe énú nón ewe waa pwún repwe fang ngeni ewe waa. Iwe inaa chék pwopwun aan aa wees wáán Rongenap we.

"Paapa, kose mwochen kopwe ne áiti kem pénú pwe áám úpwe ne kan sótuni nee seres fetan wóón wáám keei?" Rongechis me Rongenap raa tungóreei semeer we.

"Ewer!" semeer we aa erá. "Iwe nge pwata nge iei sipwe ne pwopwutá nee sukuunen pénú."

Iwe atun ate kewe raa sine pénú, raa ekiekietá pwe repwe ne sáái. Rongenap aa erá pwe ii epwe ne akkoomw ne sáái. Iwe Rongenap aa amonnaatá pisekin iwe aa su wóón waan we.

Aa fetán, fetán, toori eew pi me neemataw. Wóón ewe pi mei wor emén chiinnap e nómw wóón. Ewe chiinap aa soriir pwe repwe tókkónó mwo pwe repwe aséésé nge Rongenap aa fen okkouna pwe e erá pwe ewe chiinnap e kéémwiriir. Ewe chiinnap aa chék kéénó mwiriir pwe, "Ouwaa nó nge oupwe chék nó máánó."

Rongenap aa sá sá sá wóón waan ewe toori efóch pwuna mei chék nómw wóón sáát. Rongenap aa ereni chóón waan kewe repwe oturuwetiw aar ereni chóón waan kewe repwe oturuwetiw aar kewe sáán pwe repwe óói ngeni ewe pwuna. Aar kewe sáán ese mwo attapa ewe pwuna. Raa pwan sá, sá, sá raa toori eew fénú. Ewe fénú fénúwen chék énú. Raa toori nón ewe saraata Raongenap aa angeei aar we ókiitur aa posuwenong nón eew mweán iwe raa tiwenong neeman.

Atun áán chóón wáán Rongenap kewe nómw wenifénú nge ewe iik aa mwetenong neeféén waar ewe toori aan ewe waa aa mwoonó fáán sáát. Iwe ewe mweán aa tééwou faan aar we ókiitur aa uwei uwei waar we toori neemataw. Nón ena atun nge ekkewe énú raa nukei chóón wáán Rongenap kewe raa nó atúútúúr nón eew kónik mei fókkun fat. Chóón túútú nón ewe kónik re kan mwochen annut iká raa wees me túútú nón.

Weesiir nee túútú raa etinó nón uttan ekkewe énú we iwe raa turunó pwe raa annut. Nón ena atun ekkewe énú raa kiito nón ewe uut pwe raa ocheei ocheei chóón wáán Rongenap kewe meinisin eitaarenó. Pénúwenap me Rongechis iir mei chék sineei pwe raa máánó chóón wáán Rongenap kewe.

"Paapa kopwe ne witi ei pwún úpwe nee nó kútta Rongenap me chóón waan kewe!" Rongechis aa ereni seman we. "Úpwe chék pwan mwittir nee niwinto."

Rongechis aa amonnaatá pisekin nee sáái wees iwe aa su. Aa fetán fetán fetán toori ewe pi ewe ia ewe chiinnap e nómw wóón. Iwe ewe chiinnap aa asoriir pwe repwe aséésé. Rongechis aa tókko-ngeni ewe pi iwe raa kan akkaséésé me chienan kewe.

"Kinissou chaapwúúr ngonuk kone pwan nómw pwe áám úpwe ne pwan su," Rongechis aa ereni ewe chiinnap. Iwe raa sá sá sá pwan toori ewe pwuna. Rongechis aa ereni chienan kewe pwe resapw mwo atora ooch inisin ewe pwuna. Raa pwan sá sá toori ewe fénú fénúwan ekkewe énú we. Rongechis aa mwetetiw angeei aar we ókiitur posuposuuetiw wóón apachapachan ewe énú we pwún itá ewe énú aa pineeienó ewe pwaang pwún Rongechis esapw kúna nge Rongechis mei chék sineei. Rongechis aa ereni chóón waan kewe pwe repwe ameresienó aar we amara pwún ekkewe iik repwe mwetenong nón waar we nge repwe chék mwechúnó nón ewe amara.

Rongechis me chóón waan kewe raa tiwenog wenifénú iwe ekkewe énú raa paaniir pwe repwe nee nó túútú. Ekkewe énú itá raa pwan paan-ngeniir nón ewe kónikin mwochen annut nge Rongechis aa ereni chienan kewe pwe resapw túútú nón pwe repwe nó túútú nón ewe esapw chénún annut. Iwe raa túútú túútú wees raa etinó nón ewe uut pwe raa nó akkaséésé. Iwe Rongechis aa ereniir pwe repwe assak ekkewe taka iwe atun raa mwochen annut repwe isettá ekkewe sakken taka wóón meseer iwe repwaapw annut. Rongechis chék esapw annut pwe epwe chék mammasaar nón ewe pwinin. Toori neesossoor ekkewe énú rese fókkun tawe aar repwe ocheer pwún Rongechis mei chék nennenó iwe me reen ekkewe énú pwe chienan Rongechis kewe rese mwo pwan annut reen pwechan ekkewe sakken taka re isettá wóón meseer.

Aan we aa rááninó, Rongechis aa angeei aan we safei iwe aa etiwou núkún ewe uut pwe aa ongutaatiw wóón chúún Rongenap me chienan kewe. Iwe raa manaw-sefáán meinisin. Iwe Rongechis aa uweei Rongenap me chienan kewe uweei ngeniir fénúweer we.