translated by Chirano Cheipot
illustrated by Joy Goodenow

Itei Johnny. Ieei úwa káráán chék áweesi engoon me ruuen mwiich nge e chemeto usun napanapen ekkeei méttóóch nón ekkewe ier aa nó. Aám mé paapa éú kan nó attaw wóón ooch.

A men fókkun apwaapwa neekúkkúni we. Áám we nó attaw me paapa wóón ooch, ekkewe iik raa men fókkun fesir rese toongeni niweitikeem. Iir mi toongeni sááfátán únúkkúm. Úwa ekieki pwe nón ekkei fansoun iik raa niweiti aramas are fen mwóchoonó pwokiten aach keei sakkopaaten attaw ikanáái .

Fókkun mecheres áám attaw mé paapa neekúkkúni we. Aám éú kan chék angeei eew ruumen sarasko ninifátánei nón ewe sáát iwe ese mwo pwongienó nge meinisin iik re nómw ewe ie raa peenó. Ese nifinifin kúkkún pwan ekkewe wátte. Iwe áám éú chék angeei úkúúkún meet éú toongeni uwei, nge poútaanó nussun are unusan. Raa chék fókkun soonapónó.

Nón chómmóng ier áám éúse fókkun úkútiw seni ewe sakkun attaw. Esapw áám chék pwe pwan chómmóng chienem chóón ááni ewe sakkun attaw. Ekkewe sitoowa raa mén fókkun achooch ne améémé ngenikem ekkewe sarasko.

Paapa aa fókkun neneiruk nón ekkei fansoun úwa wátteenó pwokiten ese chiwen chómmóng iik úpwe niapeni nón áái attaw ieei. Ese usun nóómw, nóómw. Eni epwe iteiten ier epwe feitto nge ekkewe iik repwe fen pwan chókúkkúnúnó. Pwan ieei aramas raa pwan kapas chómmóng, pwata ieei ese chiwen ikan epwe ussun nón ekkewe fansoun.

Mi wor émén mwáán ekeráán chék war me fiti mwiich. Imwan me mi chék arapakkan ngeni imweem we me paapa. Nón eew pwinin aa feitto nón imweem we. Aa pwóróóus ngenikem me paapa me pwan ruémén pwii kewe usun meet aa sineei me nón aan we mwiich reen pwóróóusen ekkewe ooch me ikenan kewe.

Aach keei ooch iir mi manaw are pwan maar. Nupwen aach aa sarasko ne attaw ekkewe kúkkún maan raa foráátá aach ekkei ooch raa wesewesen peenó. Sise mwo sineei pwe ekkewe ooch raa fen peenó pwokiten iir rese toongeni aar repwe piitá wóón sáát usun ekkewe iik.

Úwa attona paapa aa chék wichiki mékúran. Meni ekeran weeweiti. Ewe mwáán aa úreni pwe ekkewe iik raa manaw seni ekkewe ooch mi manaw. Nupwen raa mááno, ekkewe iik repwe pwan máánó pwún ese chiwen wor meet repwe eni.

Ewe mwáán aa pwan eiis ika áám mei chiwen kúna ekkewe iik wátte re kan sou pwá me ikewe iteeiten neesossor me neekunion nón ekkewe neeni re kan attaw ie. Paapa aa úreni pwe aapw rese chiwen nónnómw. Ekkewe iik mi wátte raa chék manaw seni ekkewe iik raa manaw seni ekkewe mettóóch are maan aar repwe nónnómw are aa pwan pwisin meet sókkun tuufich mi wor reer aar repwe manaw are chómmóngónó.

Paapa ese chiwen méngúúngú, aa chék fanafanónó. "Mwa meet? Úse mwo fókkun weewe reen meet ekkewe sia féffééri nón ekkewe fansoun. Úwa wesetaan tongeei ekkewe iik. Sipwe fókkun túmwúnúúr pwan ekkewe ooch. Sisapw chiwen efeiengngaweer."

Mwirin ewe mwáán aa úrenikeem. "Sise toongeni siwini meet mi nómw mwurich nge sipwe toongeni siwini meet mi nómw mwach." Onowe aa úúta aa fátán ngeni imwan we, nge paapa aa úreni pwe epwe fiti. Iwe raa mwinenó.

Ruu ier mwirin toori ikánái, paapa ese chiwén efich ewe sókkun attaw. A fókkun soong ika pwe aa rongorong pwe áám me pwii kewe éú chiwen ááni ewe sókkun attaw aa opwutónó. Úwa fókkun meefi nómwoten aan paapa me ewe mwáán pwóróóus ngeni aramas ussun ewe sókkun attaw pwokiten ieei chómmóng aramas raa úkútiw seni toori ikenai. Sia áneán pwe amwo aramas repwe fókkun wewweiti pwe ekkewe iik arun aach kewe ooch repwe chómmóngenó usun chék me nóómw nupwen áai kúkkún.