Onesinipa

written by Alvios William
illustrated by Eric Woo

Eew pwúpwpúnú raa nónnómw wóón fénúweer we. Raa men kan sou áneán aar repwe néúnéw semiriit. Fansoun chómmóng re kan pworaus fengen neefiineer, napengeni chék pworausen meeta repwe toongeni néúnéw reen.

Fetán, fetán nón eew atun ewe feefin aa pwoopwo. Aa pwopwutá opwutenó ekkóóch sókkun mwéngé. Nge aa fen chemeni ekkóóch sókkun mwéngé aan epwe mwéngé. Iwe ewe mwáán aa fókkun fééri iká kútta meet kewe sókkun mwéngé e tipeni aan epwe mwéngé.

Toori áán we maramen néúnéw aa néúnaatiw emén áát. Iwe raa eita ngeni néúúr we áát Onesinipa. Raa men fókkun pwaapwa reen áán we aa wor néúúr. Raa túmwúnúú, túmwúnúú néúúr we toori áán aa ier engoon. Onesinipa aa memmááritá nón áán we áte mwúrinné pwan péchékkún.

Nón eew atun, ewe feefin aa toori eew samwaau iwe aa máánó. Onesinipa ese chúwen wor inan. Fansoun Onesinipa ekan war me kukkunow neein chienan kewe semiriit, ese worono ié epwe etiwa iká kútte ngeni anan mwéngé. Ese pwan chúwen wor emén epwe túmwúnúú ngeni pisekin. Ina atun Onesinipa aa fókkun ngawenó pwan kichchúúchúúnó inisin. Onesinipa ese wor áán pwaapwa nón ewe atun me mwúrin inan we aa má seni. A fókkun kan pwossiiti inan we. Aa kan chemeni inan we áán kan túmwúnúú pwún áán we aa osupwpwang nón ewe fansoun.

Semen Onesinipa we ese nónnómwetiw nón imweer we pwún e kan nónnó chék attaw. Fansoun áán ewe saam kan war me attaw aa akkatona néún we pwe aa fókkun ngawenó. Ewe saam aa sineei pwe néún we áát aa nap áán pwossiiti inan we. Pwan eew, ese, ese chúwen túmwún anan mwéngé pwún ese wor emén e túmwúnúú ngeni me mwúrin áán kan nó attaw.

Nón eew pwinin, atun áár raa mwémwmwéngé áneer kewe iik niapen ewe saam, ewe saam aa úreni Onesinipa pwe epwe ne kút pwúnúwan. Pwopwun aan epwe ne kút pwúnúwan pwún epwe siiwinin inan we. Epwe túmwúnúú ngeni anan mwéngé me pisekin. Onesinipa ese mwo fóós pwe aa chék súrútiw chénún mesan pwún aa chemeni inan we. Nge Onesinipa aa tongeei seman we pwún e kan war me attaw aa pwan pwúsin kukkuu niapan iik. Iwe, Onesinipa aa erá pwe mei mwúrinné.

Ewe saam aa angeei emón pwúnúwan. Eei feefin emén mei ngaw. E kan chék fééri napanapan ngeni Onesinipa iká pwe ewe saan mei nómw. Nge atun ewe mwáán aa kan nó attaw, ewe feefin aa fókkun ékkúné ngaw ngeni Onesinipa. Angaang weires meinisin áán chék Onesinipa. Onesinipa mei fókkun weires ngeni ooch angaang pwún. Ii mei chék kúkkún, inaamwo nge achoocho ngeni ne fééri. Iká pwe Onesinipa ese kii ngeni ooch mettóóch ewe feefin e kan úreni epwe ekii iká fééri, ewe feefin aa kan awata.

Ekis mwo mwttóóch Onesinipa e fééri ese kúúri neetipan ewe feefin, ewe feefin aa pwan awata. Onesinipa aa kan chék kechiwenong nón neetipan pwún aa kan chemeni inan we. Onesinipa ese pwan úreni seman we napanapan ewe feefin we ngeni. Pwopwun áán ewe feefin we iwe usun napanapan ngeni Onesinipa pwún ese tipe - eew ngeni áán kan áni annéén áneer mwéngé fansoun ewe mwáán mei nómw. Ina pwata atun áán ewe mwáán kan nó attaw, ewe feefin e kan amwéngéén ngeni Onesinipa affan iik, kiten taka, chúún iik me sinin maai. Pwokiten áán Onesinipa  kan echik aa pwan áni ekkewe mettóóch mei nimengngaw ewe feefin e kan ngeni pwe anan.

Onesinipa aa fókkun sórongngawenó, kichchúúchúúnó reen ekkewe mettóóch aa ákkáni nge ese pwan toongeni áán epwe pwáári ngeni seman we. Seman ewe aa fókkun rukáásini pwata néún we ese fen kitinnupwunó pwe efen ngawenó. Aa kan resin etittina néún we nge ese fókkun pwáári ngeni pwata aa iwe esin inisin.

Fetán, fetán, nón eew ráán ewe saam aa úreni néún we áát pwe epwe fiti ne nó attaw. Iwe atun áár raa toori ewe ie repwe attaw ie, ewe saam aa úreni Onesinipa pwe epwe chék nómw wóón waar we. Nge ewe saam aa turutiw nón ewe sáát pwe aa kan nikappich.

Seman Onesinipa we aa men niap iik nón ewe ráánin. Atun áán ewe mwáán kan túúnó fáán sáát, ngúnún inen Onesinipa we saa pwáángeni Onesinipa. Inan we aa éúnóónó wóón emén esies. Ewe esies aa changetiw awenewenan ewe áát iwe aa kan ais ngeni ewe áát meeta inan me seman kewe re kan ngeni pwe anan.

Onesinipa aa úreni pwe re kan amwéngéén ngeni affen iik, sinin iik, kiten taka me sinin maai. Iwe ngúnún inan we aa erá pwe ne uweei. Onesinipa aa erá pwe e tongeei seman we. Iwe Onesinipa aa kan kechiw pwún aa sineei pwe ngúnún inan we ewe.

Seman we aa túútá aa kúna néún we áát pwe mei kechiw.

"Pwata ke kechiw?" seman we aa ais.

"Pwún ekkaan iik re ini éúti," Onesinipa aa pénúweni.

"Kosapw urummoteer pwún kote feiengngaw." ewe mwáán aa úreni.

Iwe aa pwan túúnó fáán sáát. Áán we aa pwan túúnó nge ewe machchang aa pwan changetiw wóón ewe áát.

"Meeta ko inomw me semwomw re kan ngonuk pwe onomw?" ewe machchang aa pwan ais.

"Sinin iik, affen iik, chúún iik, kiten taka me sinin maai, " ewe áát aa pwan úreni nge kechiw.

"Iwe kone etto fiti ei!" ewe machchang aa kééri.

"Ngaang úwa mwochen fituk nge ú tongeei paapa," ewe áát aa úreni.

Ewe mwáán aa pwan túútá me fáán sáát. Ewe áát mei chék kekkechiw.

"Pwata ina kaa chék kekkechiw?" ewe mwáán aa pwan ais.

"Pwún ekkeei iik re kan ini éúti," ewe áát aa úreni seman we. Iwe ewe mwáán aa operi meeta we e ekkechiwa néún we áát. E chék atupwun túúnó nge aa túútá me fáán farafen ewe waa. Epwe ne rúng nge ewe machchang aa pwan changeto.

"Meeta ko inomw me semwomw re kan ngonuk pwe onomw?" ewe machchang aa pwan ais.

"Sinin iik, affen iik, chúún iik, kiten taka me sinin maai, " ewe áát aa úreni ewe machchang nge kan kechiw.

"Iwe kone etto pwe kopwe ne fiti ei," ewe machchang aa kééri.

"Ngaang úwa mwochen fituk nge ú tongeei paapa," ewe áát aa erá.

Áár we fóffóós fengen ewe machchang me ewe áát nge ewe mwáán mei chék ékkéúsening ngeniir.

Iwe ewe mwáán aa téétá wóón wáár we. Aa fókkun tongeei néún we áát reen napanapan pwúnúwan we ngeni. Aa kan kechiweiti pwún aa fókkun tongeei. Ewe mwáán aa úreni néún we pwe epwe apworausa ngeni meet pwúnúwan we ekan féér ngeni. Iwe ewe áát aa apworausa ngeni napanapan ewe feefin we ngeni.

"Atun ke kan nómw, ngaang ú kan mwéngé wesewesen mwéngé. Nge iká ka kan nó attaw, iwe ngaang ú kan mwéngé affen iik, sinin iik, chúún iik, kiten taka me sinin maai," ewe áát aa úreni seman we. "Iwe aa men ékkúné ngaw ngeni ei. Iká pwe ú kan chék ekis mang ne fééri meeta e erá úpwe fééri iwe aa kan niiei arapakkan chék úpwe kan peenó."

Ewe áát e kan fóós nge fókkun súrútiw chék chénún mesan pwún ese mwochen páári ngeni seman we ewe napanap.

Iwe ewe mwáán aa erá pwe repwe ne niwin ngeni fénú. Atun áár raa toori fénú ewe mwáán e chék mwetetiw me wóón wáár we aa sá ngeni imweer we.

Meeta ke ekieki pwe aa fis nón ewe atun?

Meet pwopwun ke ekieki pwe ina ewe metóóch aa fis?