written by Alvios William
illustrated by Starla Stone

Nikkichmwacho me Nikkichfesir iir pwiipwi. Nikkichmwacho epeek ii énú nge epeek aramas. Neminneei ekan nómw wóón Romanum. Nikkichfesir e nómw Udot. Ii aa men aramas ééch. Neminneei mei wor pwúnúwan. Aa néúnéw néúni emén áát. Fansoun aan ewe aat aa énúwén, aa tungóreei inan we pwe epwe nee nó kukkunow reen pwiin we e nómw Romanum. Inan we ese mwúút ngeni. Ii mei sineei usun napanapan pwiin we e nómw Romanum.

Iwe pwan mwúrin ekkóóch maram ewe áát pwan tungór sefáán aan epwe nó kunou Romanum. Aa saany pion Romanum aan kan nennetiweei. Inan we ese mwúút ngeni. Twe aa chek anniféwu aa úraatiw waan ewe iwe aa fétún ngeni Romanum. Fansoun aan ewe áát fétúnnong nón ewe saraataan Romanum, ewe feefin wóón Romanum aa kúna. Nikkichmwacho aa fókkun pwaapwa pwe aa wor ocháán aramas aa pwúsin etto reen.

Nikkichmwacho aa etiwaanong ewe áát. Aa aiti ngeni ewe áát efóch núú epwe kini pwe epwe ún. Ewe áát aa kini ewe núú. Weesin, aa téétiw aa ún ekkewe núú. Nikkichmwacho aa pweikeri eew taka. Aa epiti ngeni ewe áát. Mwúrin raa nó túútú. Weesiir me túútú raa etinó nón imwen Nikkechmwacho we. Nik-kichmwacho aa wowtiw mwéngé pwe raa mwéngé.

Nupwen aan ewe áát aa wees me mwéngé ewe énú aa ngeni eew kieki epwe aséésé nón. Ewe áát aa kóón, kóón chék iwe aa annuténó. Iwe ewe énú, Nikkichmwacho, aa enniféwu pwe aa nó os aan émwúch.

Atun aan ewe áát chúwen annut nge emén niffich aa kúú me nón ewe kieki. Ewe niffich aa kééta reen ewe áát, "Meet wei kaa fééri nge Nikkichmwacho iei epwe ne ocheek. Kopwe mwúttir niwiniiti Udot iei chék."

Ewe áát echék toowu núkún ewe iimw pékú efóch uuch. Aa ekienong nón ewe kieki iwe aa akukkusóónó. Iwe aa úraatiw waan ewe aa fétúnetá Udot. Atun aan toori Udot aa apworausa ngéni inan we napanapan Nikkichmwacho we ngénii.

Nupwen aan ewe áát aa tiwenong, Nikkichmwacho aa pwan úreni pwe epwe tééta kini ewe núú. Ewe áát aa téétá wóón ewe núú. Aa túnú eew ekkewe núú móneetiw mékkú-fesen. Iwe aa asori Nikkichmwacho epwe cheeri ewe núú aa mék.

Nikkichmwacho ina e cheeri ewe núú, e pwóretiw pwe e angeei nge ewe áát e chék angeei eew móneetiw mwúrin úwan peenó.

Nikkichmwacho aa mááno. Ewe áát aa téétiw me wóón ewe núú. Aa eki Nikkichmwacho aa waatá wóón eew chuuk itan Newema. Ina ikewe ie aa nó asokoponaatiw Nikkichmwacho me ie. Iwe ewe áát aa niwiniiti Udot.

Fetán, fetán, mwúrin ekkóóch maram, ewe áát aa pwan tungóreei inan we pwe epwe nee pwan nó Romanum. Inan we ese mwochen aan epwe nó. Iwe, ewe áát aa úraatiw chék waan ewe aa pwan nó Romanum. Iwe Nikkichmwacho aa kúna ewe áát. Aa ekieki pwe epwe ne nienó akkoomw iwe epwaapw nó kút aan émwúch.