original story by Patsy Lavne
retold by Rioichy Johnny
illustrated by Donald L. Buchholz

Preparation for reading:

Teacher:
1. Ewe sense epwe ekis pworaus ngeni ekkewe chóón sukuun iká meet sókkun wiis rekan saani repwe ááni iká ra watte.

2. Makkeetá ekkewe kapas iká sókkun wiis ekkewe semiriit raa apasa wóón ewe pinakpot.

3. Apasa eew me eew ekkewe kapas pwe ekkewe semiriit repwe sineei ngiingiin iká weewen.

4. Úreni ekkewe chóón sukuun repwe néúnéw ekkewe kapas nón kapasattam.

5. Eppi ngeni ekkewe chóón sukuun ekkewe nios #1, 2, 3, 4, reen aar repwe chék katon.

6. Eisiniir iká "Meeta aa fis nón eew me ewe kewe nios." Emén me emén kewe chóón sukuun aa toongeni úúta apworausa meet meefian reen ekkewe nioos.

7. Annea ngeniir ewe pworous reen aar repwe éúsening iká mei pwúng meet kewe ra apasa reen ekkewe nioos. Iir ra toongeni pwisin annea iká raa toongeni.

Eei pworaus pworausan únúmén semiriit; Nell, Mark, me Jack. Non eew ráán ekkeei semiriit raa kan pworaus fengen neefiiner.

"Ngaang úpwe emén chóón attaw," Jack aa apasa. "Ngaang úwa saani neeset."

"Een kose toongeni kopwe emen chóón attaw," Nell aa apasa. "Een kesaamwo niapa emén iik."

"Ewer, ngaang mei niap." Jack aa apasa. "Ngaang úkan fiti paapa ne nó attaw, iwe áám mei kan fókkun niap chómmong iik."

"Pwata kaa mwochen chómmóng iik?" Mark aa ais.

"Pwún úpwe toongeni améémé," Jack aa apasa. "Aramas raa mwochen mwéngé iik, iwe meinisin raa pwan saani iik. Iwe, ngaang úpwe nó attaw wóón efóch mwoota mei watte."

"Ngaang, úsapw ina," Mark aa apasa. "Ngaang úwa mwochen úpwe emén chóón atake. Chóón atake raa fót rais pwan pwúna. Aa pwan wor néúúr siike me chukó. Ekkóóch chóón atake aa pwan wor néúúr óris. Ngaang úwa saani maan."

"Ewer, nge chóón atake raa chék nónnómw," Nell aa apasa. "Chóón atake ra chék nómw nón atake nge ngaang úwa kan pwan mwochen nó neein teniniimw."

"Neein teniniimw aa watte pwan ekúrang." Mark aa apasa. "Een kosapw sineei chómmóng aramas pwún aa kón chómmóng. Ina pwopwun ngaang úwa saani áái nómw nón atake."

"Ngaang úwa pwan saani nómw nón atake," Jack aa apasa. "Ngaang úwa saani túútú nón pwuupwu, iká pwan attaw nón sáát. Ngaang úwa mwochen mééni efóch pwoot, iwe úwa emén chóón attaw. Chóón attaw aa fókkún namwot ngeni kiich."

"Aúsening." Nell aa apasa. "Paapa emén chóón atake. Meeta chóón atake rekan fééri? Ngaang mei sineei meet paapa ekan fééri. Ii ekan chék pwáátá me kunók nimu iteitan neesossoor. Ii ekan nó amwéngééni ekkewe chukó me piik iteitan kunók nimu-esópw. Mwúrin aa nó angaang nón áán we atake. Ii ekan fót rais, pwúna, eep, pwan uuch. Fansoun ese kan pwung ráán, aa kan nó kááp kónik me nón ewe pwuupwu pwe aa kan atúútú ngeni fetáán kewe irá. Paapa aa men fókkun angaang weires. Ii ekan méúr iteitan kunók wanú neepwin. Ngaang úwa sineei pwe chóón atake ra men fókkun angaang weires."

"Ewer, mei pwúng," Mark aa apasa. "Chóón atake raa angaang weires nge mei namwot. Aramas raa aúchááni mwéngé. Ngaang úwa mwochen úpwe emén chóón atake.

"Iwe, ngaang úsapw," Nell aa apasa. "Ngaang úwa mwochen úpwe emén tókter. Tókter raa anisi mei semwmwen, iwe ngaang úwa mwochen ánisi aramas."

"Nengngin rese toongeni tókter." Mark aa kapas nge takir.

"Meet pwopwun?" Nell aa eis.

"Nengngin rese mwó sineei óóch mettóóch, ina pwopwun," Jack aa apasa. "Een kose sineei wiisan tókter. Meeta tókter rekan fééri?"

"Ngaang mei sineei meinisin," Nell aa apasa. "Tókter rekan affewú chúú. Mark e kup chúún péún, iwe ewe tókter aa afféwú. Tókter raa kan pwan awúnú mei semwmwen safi pwe repwe péchékkún. Iir raa kan pwan wotaini kinas pwan anisi semiriit. Iei usun aan tókter angaang?"

Mark aa apasa, "Iká pwe kopwe emén tókter, kopwe nó fiti sukuun nón fansun nangattam. Iir repwe achóóchó káé aar nesen."

"Ngaang mei toongeni achóóchó ne káé áái nesen," Nell aa apasa. "Ngaang úwa mwochen nó sukuun."

"Nengngin rese toongeni repwe tókter pwún iir raa fen ééch repwe chóón angaang neeimw. Kose mwochen kopwe emén chóón angaang neeimw? Jack aa apasa.

"Ewer, ngaang mei mwochen," Nell aa apasa. "Nge, úwa pwan mwochen úpwe emén tókter. Ngaang mei toongeni emén tokter pwan emén chóón angaang neeimw."

"O, aapw, kose toongeni. Een kose toongeni kopwe fééri ruu mettóóch," Jack aa enini ngeni.

"Ewer, ngaang mei toongeni," Nell aa apasa. "Mark mei toongeni epwe emén chóón atake pwan emén saam. Een ka pwan toongeni kopwe emén chóón atake pwan emón saam. Iwe, ngaang úwa pwan toongeni úpwe emén tókter pwan emén iin."

Activity #1: Discussion

Purpose:  Reen aan ewe sense epwe sineei iká ekkewe chóón sukuun mei weeweti ewe pworaus. Eei epwe pwan anisiir ne pworaus fengen neefiner.

Procedures:   
1. Sense epwe eis ekkeei kapas eis fáán.
2. Chóón sukuun repwe pénúweni.

Kapas eis:
1. Meet chóón atake ekan fééri? Chóón attaw?
2. Meet wiisan tókter?
3. Meeta we Jack aa saani? Mark?
4. Meeta Nell aa mwochen?
5. Meeta namwotan chóón atake?
6. Tókter rekan nó sukuun nón fansoun
nangngattam. Meet pwópwun?
7. Meet pwópwun ewe saam ekan nó kááp
kónik fáán ekkóóch me nón ewe pwuupwu?
8. Ifa usun Mark, aa saani neein teniniimw? Pwata?
9. Meet pwópwun Mark me Jack raa erá pwe
Nell ese toongeni epwe emén tóókeche?
10. Meet sókkun nengngin Nell?

Activity #2: Drawing and Role Play

Purpose:  Reen aan epwe pwan watteenó aan ekkewe semiriit sineei nón peekin chúnga ika pwan mak, are ekiek are pwisin apworausa meet kewe raa chungaani. Iir repwe pwan pwomweni meeta ekkewe semiriit raa fééri.

Procedures:
1. Drawing

a. Ekkewe semiriit repwe en me chúngaani meet raa mwochen repwe fééri iká ra wattetá.
b. Iir repwe makkeei iká aporausa meet kewe ra chúngaani.

2. Role Play

a. Ewe sense epwe fini únúmen semiriit repwe Mark, Nell, me Jack.
b. Ekkewe semiriit repwe pwomweni meeta ekkewe semiriit nón eei pworaus raa fééri ika apasa.
c. Aa ééch iká ekkewe semiriit meinisin nón ewe ruumw repwe akkasaiwin ne fééri meeta ekkewe semiriit raa fééri.