Mick and the Fish by Patsy Layne
retold by Rioichy Johnny
illustrated by Arthur Kodani

Preparation for reading:

1. Ewe sense epwe makkeetá ewe kapas Káirú wóón ewe pinakpot.

2. Eis iká ekkewe chóón sukuun mei sineei weewen ewe kapas iká iir mei pwan kúkkúna eei maan itan Káirú.

3. Eis iká ia eei maan aa kan nómw ia.

4. Eis iká meeta aa kan mwéngé.

5. Eis iká iir mei saani iká opwut. Meet pwopwun aar saani iká opwut.

6. Makkeeta itanapan ewe pworaus ka ekis pworaus usun .

7. Annea ewe pworaus nqeni chóón sukuun.

Kapas eis ewe sense epwe eis iká aa wees me annea ewe pworaus:

1. Meet sókkun pwuk ewe ekkewe chóón sukuun raa annea?

2. Meet sókkun nios aa wor nón ewe pwuk?

3. Meeta we Mick aa waato nón sukuun?

4. Ia we Mick aa kúna me ia ekkewe kúkkún maan?

5. Meeta we ekkewe maan ra mwéngé?

6.Ifa itan ekkewe kúkkún maan?

7.Meeta aa fis nupwan aan Chin we mang?

8. Kopwe ekis apworausa usun ekkewe kúkkún káirú. Ia raa kan nómw ia?  Meet raa kan mwéngé?

9. Meet sókkun áát Mick?

10. Een mei saani kopwe néúni sense Chin? Pwata?

Eei pworaus pworáusan emén áát itan Mick Ong. Mick mei wor emén néún konaak. Ié epwe toongeni esissina iká ifa itan néún we konáak? Itan néún we konaak Chip. Nge itan néún we sense Mr. Chin.

Nón eew ráán Chin aa makkeetá itechikin ekkóóch kapas wóón ewe kokupang. Ekkewe semiriit raa annea eew pwuk usun kúkkún maan. Nón ewe pwúk áa chómmóng nios nón. Mei wor niosun maan súúsú, maan téété, maan feffetán, pwan niosun sokkopatin iik.

Mick aa eitátá péún, "Mr. Chin," ii aa apasa. "Mei wor reei eew ruume mei masow reen ekkóóch kúkkún iik. Ekkeei iik uwa kúneer me non eew kónik me nukun imwei we."

Iwe, Mick aa angeei ewe ruume aa waatá wóón eew cheepen arapakkan ngeni ewe asam. Ekkewe kúkkún mettóóch nón mei feú móng mékúreer pwan tam úkúúr. Iir mei mwúttir ne sá fetán nón ewe ruume.

Meinisin ekkewe semiriit raa katon ewe ruume. Iir raa kúna ekkewe mettóóch aar mékútúkút fetán. "Meeta keei, Mick?" ekkewe semiriit raa eis. "Meet sókkun mwéngé raa kan mwémwmwéngé?"

"Ekkeei iik," Mick aa era, iwe aa makkeei IIK wóón eché taropwe iwe aa appachaatá wóón ewe ruume.

"Ngaang úse sineei iká meet raa kan mwéngé, nge úpwe kútta. Iei úpwe waanong ekis pinawa, ekkóóch nikanúpwún, pwan ekkóóch chéén irá. Iwe, kiich meinisin sipwe katon."

Nón aruwan, ekkewe semiriit raa waato pinawa, nikanúpwún, me chéén ira. Kunók engoon ekkewe semiriit raa mammasa iká meet ekkewe iik repwe mwéngé. Ekkewe iik rese mwéngé ekkewe chéén irá me ekkewe nikanúpwún pwé raá mwéngé ewe pinawa.

Mick áá makkeéi IIK MEI MWEMWMWENGE PINAWA wóón eché taropwe, iwe aa waatiw reen ewe ruume wóón ewe cheepen. Mwúrin eew me ruu wiik ekkewe kúkkún maan raa watteenó. Úkúúr raa wawatteenó iká chémmóngónó.

Nón animu, Mick aa etto reen ewe cheepen pwe aa etto katon ewe ruume. "Mr. Chin, ii aa kékké. Etto katon pwe esapw iir iik pwe mei woor pecheer." "Nge meet chék kana?" Mr. Chin aa eis.

"Kopwe witiwit ina kopwaapw kúna," Mr. Chin aa pwan erá. "Nge mei éech epwe kesiiwin neenieer na nge epwe ne watte. Pwata sise ne iseniirenong nón eei paan mei watte?"

Mwúrin ruu wiik ese wor aar sukuun pwun ráánnap nge sukuun mei aséésé. Nón sarinfáán mwúrin ewe ruu wiik aséésé, aa fókkún ngaw ráán. Ina epwe kunók wanu ekkewe semiriit raa chék úkkúútá núkún ewe imwen sukuun pwún ewe asam mei chék kesip. Mr. Chin aa mang. Ekkóóch ekkéwé áát me nengngin raa úútá núkún ewe asamanap. Ekkóóch raa nóm fáán ekkewe irá arapakkan ngeni ewe tit. Ekkóóch ekkewe áát raa kan utusáreei ekkewe nengngin ngeni kónik.

Kunók wanú esópw, Mr. Chin aa nikesessáto. Ii aa rongorong aan ekkewe semiriit tattakir nge pwúpwpwúchéér. Iwe, aa uuúki ewe asam, nge aa fókkún mááirú.

Emén káirú aa mwemwmwet wóón ewe cheepen. Ekkóóch raa mwet fetán neefinan ekkewe cheepen. Emén aa sussupw ochan nóóng nón ewe asam.  Ekkewe semiriit raa nefetán raa kúna káirú ekis meinisin nón ewe ruumw. Iir raa nikesessafatán are mwet fetán are takir ngé katon ekkéwe káirú. Ekkewe káirú raa pwan mwet fetán nge rese chék takir.

Iwe, ekkewe semiriit raa nó katon ewe paan ngé ese chúwan wor ekkewe iik nón pwe aa chék ewe kónik. Mr. Chin aa chék kékkémwéch seningan nge takir.

Kunók tiwu, wanimén ekkewe káirú raa mwetew núkún. Iir raa mwetenó fáán ekkewe irá reen ewe tit. Iwe, raa mwetenong nón ewe ekis nééné aron ewe tit. Emén mei chék chúwan tur ochan nóng wóón ewe asam.

Mr. Chin aa makkeei ekkóóch kapas wóón ewe kokupang reen aan ekkewe semiriit repwe káé. Ekkóóch ekkewe semiriit raa annea nge Mick Ong ese annea. Ii aa chúngaani ekkóóch niosun káirú nge aa men atakirikir.

Pwan ekkóóch mettóóch chóón sukuun repwe fééri:

1. Ewe sense epwe awora únúché niosun káirú eché nupwan aar kúkkún; eché nupwan aar ekis watte; eché nupwan raa toongeni mwet fetán.

2. Ngeni ekkewe nios repwe chúngaani.

3. Ekkewe semiriit repwe pwomwoni usun napanapan aan káirú mwet, iwe emén epwe apasa iká meeta we ewe emén aa fééri.  Ekkewe semiriit repwe néúnew ekkewe kapas, neefinan, wóón, neepekin, faan, nón, núkún (preposition).