MEET EPWE ÁNI MEET

translated by Chirano Cheipot
illustrated by Calvin Fujioka

Aa nónnómw wóón ewe fénú itan Pis-Losap. Mei wor emén mwáán itan Tarus. Aa fókkun achoocho ne túmwúnúúw néún kewe rúémén chukó. Néún kewe chukó raa nónnómw nóón tittiir we. Emén niemwáán pwaan emén niefeefin.

Tarus aa amwééngéni néún kewe chukó. Iteiten neesossor me nekkunion aa pwan amwééngeniir. Ese mwo etiwa eew fansoun.

Tarus mei wor ruémén néún áát. Ewe watte itan Wakin nge ewe kúkkún itan Tomuo. Raa men fókkun efich néúr kewe chukó nón tittiir we. Fáán chómmóng raa kan atoneer pwan tóttóófiir.

Ewe niafeefin aa féér fasan. Fasan we aa nómw nón we chúúk. Ewe chukó epwe ne sokuun.

Wakin me Tomuo raa kan urumwmwot ngeni néúúr kewe chukó. Raa kan fókkun kékkéériir nge ekkewe chukó raa kan kékké. Ekkewe áát raa ekiiewuu néúúr kewe chukó núkún ewe tit pwún raa mwechen urumwmwot ngeniir nón péwúúr.

Wakin aa uwaau ewe niemwaanin chukó núkún ewe tit. Ekkewe semiriit raa fókkun urumwmwot ngeni néúúr we chukó. Ewe chukó aa pwan fátán fein núkún ewe tit.

Mwirin Tarus aa war me angaang.  Aa kan ekis mwo aséése. Aa fátánenó pwe epwe amwéngéni néúúr kewe chukó. Nupwen aa waatiw eneer we iwe aa kúna pwe ese chiwen nómw ewe niemwáán. Ewe chék niefeefin aa nónnóm nón ewe tit.

Tarus aa kékkééri néún kewe áát. Aa eisiniir ewe niemwaanin chukó. "Ia oua úóno ia ewe emén chukó?"

"Aam éúse sineii. Mei chék enniwin núkún imwach eei."

Tarus aa ereniir, "Feitto sipwe kútta."

Tarus me néún kewe áát raa kútaa fátáneei núkún ewe iimw, núkún aar we pinché núkún ekkewe ekkóóch iimw pwan toori núkún aar we tittiin piik.

Raa pwan kútta nón aar we ataken pweteeto. Wakin aa kúna ooch mettóóch mii énú parapar, chóchchón, are énúen kurukur. Iwe aa sá ngeni, aa kúna pwe ewe chukó nge aa chék émméúr mesan.

Wakin aa pwúchéérútá. "Paapa, ieei ewe chukó aa nómw ikeei nón ekkei chóón pwetéétó."

Iir meinisin raa sááu pwe repwe attona. Ewe chukó a chék amóúrúr mesan. Tarus aa, pwisi ewe chukó nón péún. A fókkún attona fichi iwe aa úreni néún kewe áát pwe ewe chukó aa úri semwmwen. Wakin me Tomuo raa fókkun neetipengngaw.

Tarus aa attonetiw nón ekkewe chéén pweteto iwe aa kúna ekkewe pweechar nón ewe pwún. Aa pwan kúna ooch mettóóch mi pwechepwech mi pwenni unusen aar we atake.

Tarus aa kékkééri néún kewe áát iwe aa áiti ngeniir ekkewe pweechar me ekkewe mettóóch mei pwechepwech nón ewe pwún. Iwe raa toonong nón imweer we. Raa sáfeeni ewe chukó.

Tarus aa éúnú safei ewe chukó. Ewe chukó aa ekis aséésé. Tomuo aa eiis ngeni semmer we. "Paapa meet pwopwun aa semwmwen ewe chukó?" Tomuo aa fókkun toongeei ewe chukó.

Tarus aa ekis fanafanónó, iwe aa úreniir. "Ewe chukó aa ocheei ewe pweechar, ewe pweechar aa áni ewe ninniin pweechar, ewe ninniin pweechar mei poison."

Wakin aa pwan kéétá. "Oh mi pwúng, úwa kúna ekkewe pweechar wóón ewe ninniin pweechar, ekkewe pweechar mei poison. Fókkun ina pwúngún. Paapa ié a waato ekkewe mettóóch mei poison?"

Semeer we aa pwan éréniir. "Inach we chinnap aa waato pwún ese éfich ekkewe pweechar. Ekkewe pweechar raa áni ekkewe pweteeto. Ewe chinnap aa fokkun achoocho faanitach. Kiich sia men fókkun efich pweteeto."

Tomuo aa chék newenewenenó iwe mwirin aa pwan kéétá. "Weween pwe ewe chukó aa ocheei ewe pweechar, ewe pweechar aa áni ewe poison, iwe ewe chukó aa semwmwen reen ewe poison."

"Aa feiééch ewe niefeefinen chukó pwún e nómw nón ewe tit. Ese mwéngé ewe mettóóch mei poison. Aa fókkun chómmóng sokunnan kewe. Maama epwe kukuu pwún sipwe ochooch nekkunion eei." Semeer we aa ereniir.

Semeer we aa pwopwuetá ne aiti ngeni néún kewe áát. "Chechchemeni pwún poison aa fókkun efeiengngawa ekkewe mettóóch mii wor manaw reer."

Kiich aramas, maan fáffátán, maan téété oo pwan pétéwén kana meinisin. Ina epwe ruu ráán me mwirin ewe niemwáánin chukó aa máánó. Ekkewe áát me chóón ewe faamini raa fókkun neetipengngaw reen néúúr we chukó.

Tarus aa kékkééri néún kewe áát. "Etto sipwene peiaseni néúch eei chukó. Pwún ika sia ocheei iwe sipwe fókkun semwmwen reen. Pwún ewe chukó ee ocheei ekkewe pweechar mei poison."

Ekkewe áát raa angeei aar kewe séfén iwe raa tuuetá ewe pwún iwe raa ireenó ewe chukó.

Ekkewe áát raa fókkun túmwúnúúw néúúr we niefeefinin chukó. Aa néunéutiw iwe fokkun raa chómmóngéno.

Inenapen semeer we aa kékkéérir. "Oupwene no kuttoto umwoumw núkún imwacheei. Ekkewe umwoumw raa men fókkun mwochen nómw nón péén maan. Nupwen raa mwochen nómw nón eew ekkewe péén maan iwe raa áá éútúúr kewe ne weitaawu masoweer kewe. Iwe raa toonong nón pwe neenieer."

Nupwen aa toouu masowan ekkewe pweechar, iwe ekkewe umwoumw raa ocheei masowan nge ekkewe péén raa toonong nón. Nupwen raa watteeno iwe ekkeewe umwoumw raa pwan kútta ekkewe pweechar mei pwan watte pwún repwene pwan aweteer iwe raa pwan toonong nón peer kewe mei watte.

Inenapeer we ese chiwen áá ekkewe poison aan epwe awata ekkewe pweechar, aa chék áá ekkewe umwoumw ne nii ekkewe pweechar.

Mwirin ekkewe áát raa toongeni ekiieu néúúr kewe chukó núkún. Raa urumwmwot núkún imweer we nge néúúr kewe chukó raa fetán fein núkún.

Néwúúr we chukó aa neúnéútiw. Raa fókkun chómmóngónó. Ekkóóch me neiir niemwáán nge ekkóóch niefeefin. Ekkewe áát raa men fókkun túmwúnúúw.