adapted by Alvios William
illustrated by June Urada

Aa nónnómw eew faaminien piik nón imweer we. Eew ráán Maamapiik aa kuk eneer mwéngé. Raa móót pwe repwe ne mwéngé. Paapapiik aa erá.

"Ooo enei eei mei fisikkar," Maamapiik aa pwan kéétá.

"Ooo enei eei mei pwan fisikkar," aa pwan kéétá néúúr we mwékkúnún piik.

"Sia nó mwo kukkunow neein ekkenaan irá pwe epwe patenó anach keei mwéngé iwe sipwaapw niwinto sia mwéngé," Paapapiik aa erá.

Iwe raa nó kukkunow neein ekkewe irá. Emén kúkkún nengngin itan Manúnnú aa pwereto me neein ewe petewen. Aa kúna imwen ekkewe piik we. Manúnnú aa fichifich wóón ewe asam ese wor e suuki ngeni.

Manúnnú aa toonong nón ewe iimw aa kúna eneer kewe mwéngé mei chék nómw wóón cheepen. Manúnnú aa neni enen Paapapiik we. E kon nien fisikkar. Aa pwan neni enen Maamapiik we. Ese saani pwún e kon nien nepatapat. Manúnnú aa saani enen Kúkkúnpiik we iwe aa áni áni eitaanó.

Manúnnú aa toonong nón eew ekkewe ruumw iwe aa kúna únúfóch neenien móót. Manúnnú aa téétá wóón áán Paapapiik we. Ese saani pwún aa men fókkun péchékkun. Aa téétá wóón áán Maamapiik we ese pwan saani pwún e kon nien pweteete. Iwe aa téétá wóón áán Kúkkúnpiik we. Manúnnú aa fókkun saani ékúnamwmwein wóón. Aa móót móót wóón iwe taanó áán Kúkkúnpiik we seea.

Mwúrin, Manúnnú aa toonong nón áár we neenien annut. Aa kúna pwe mei wor únúngát peet nón. Iwe aa pwan téétá wóón áán Paapapiik we. Ese saani pwún mei fókkun péchékkún. Aa pwan téétá wóón áán Maamapiik we ese pwan saani pwún e kon nien pweteete. Aa téétá wóón áán Kúkkúnpiik we iwe ina ewe aa fókkun saani. Aa kóón kóón wóón iwe aa annutenó.

Mwúrin ekkóóch kunók raa niwin ekkewe piik me kukkunou. Raa fókkun kingngaw reen áár we echik. Paapapiik aa pwerefócheiti anan we.

"Oo, emén neei e áni enei we," Paapapiik aa kéétá.

"Oo, emén aa pwan áni enei eei," Maamapiik aa pwan nanetá.

"Oo, ennet emén aa pwan ánaano enei eei," Kúkkúnpiik aa fóós nge ngiingiin usun itá epwe ne kechiw.

Ekkewe piik raa pwerengeni áár kewe seea.

"Oo, emén e móót wóón áái eei seea," Paapapiik aa kéétá.

"Oo, emén aa pwan móót wóón áái eei," Maapapiik aa pwan erá.

"Oo ennet emén mei pwan móót wóón áái eei iwe iei aa ataai," Kúkkúnpiik aa kechiw.

Mwúrin, raa toonong nón áár we ruumwmwen annut.

"Oo, emén e kóón wóón áái eei peet," Paapapiik aa kéétá.

"Oo emén aa pwan kóón wóón áái eei,"  Maamapiik aa pwan kéétá.

"Oo, emén mei pwan kóón wóón áái eei. Ieei ii mei chék annut!" Kúkkúnpiik aa néúwemmóngetá.

Manúnnú aa rong néúwen Kúkkúnpiik we iwe aa nenó. Aa eppichóónó mesan iwe aa kúna ekkewe piik. Manúnnú aa fókkun nuwokkus reen aan ekkewe piik we fókkun annefóta chék. Iwe aa kitipéppétá me wóón ewe peet. Aa sááiti eew kúkkún asammwacho aa mwetewu me nón. Iwe Manúnnú aa emwmwúch ne sáánó neein ekkewe irá. Iwe ekkewe piik rese chúwen kúna ia aa sáánó ie.