written by Alvios William
illustrated by Starla Stone

Aa nónnómw káttu me konaak wóón fénúweer we. Raa pwopwuta nee fiti sukuun nge raa men tipáchchem. Néúr we sense aa men fókkun pwaapwa reen tipáchemeer we. Káttu me konaak rekan chék amwmwet me wóón ekkóóch ekkewe mwiich reen aar we tipáchchem.

Fetán, fetán toori atun raa toori awanuwen mwiich raa sochungio. Raa angei ewe tesin nó High School iwe iir me rúwemen re anuka ekkewe chóón angei ewe tes. Káttu me konaak raa emwmwet ngeni High School. Atun aar we nómw High School, iir chék pwan asan meinisin.

Nón ewe atun konaak aa tungóreei káttu pwe repwe ne pwúpwpwúnú. Káttu aa tipe-eew ngeni konaak aar repwe pwúpwpwúnú. Iwe nge raa pwan pwon pwe repwe asópwóónó aar sukuun akkoomw iwe repwaapw pwúpwpwúnú.

Fetán, fetán raa sochúngio seni High School, iwe raa ammón ngeni aar repwe ne apwúpwpwúnú. Konaak aa fókkún isoongasi nee amonaatá mwéngéén aar we apwúpwpwúnú. Aa kan nó neein petewen pwe aa kan nó tapw piikken aar we ráán.

Káttu aa fókkún pwan osúkosúk ne kút peen tiin pwe repwe sóóneenong ochaar kewe piik nón. Káttu aa pwan kuku chómmóng tirapwen sáát pwe repwe ááni sóón ngeni ochaar kewe piik.

Aa toori ewe ráán repwe ne apwúpwpwúnú nge raa monetá reen mettóóch meinisin. Raa infait meinisin aar kewe frent pwe repwe fiti aar we ráán. Chómmóng maan raa fiti aar we ráán. Aa fókkun watte ewe mwéngé raa amonnaatá. Meinisin chóón fiti aar we ráán raa fókkun en me chúkúni nussuur pwe raa uwei ngeni imweer. Pwokiten konaak me káttu raa fókkun pwaapwa pwan kinissou ngeni ewe penen chóón fiti aar we raan, raa einetaanó ekkewe mwéngé meinisin. Eew chék tinnan kiriis ewe raa isóni pwe únúmeer.

Konaak aa ereni káttu pwe epwe túmwúnú únúmeer we kiriis pwe repwaapw únúmi iká aa wor senieer. Káttu mei pwan tipe-eew ngeni aan konaak we kóót. Iwe, konaak aa kan nó tiniman fetán aneer maai neeman nge ewe káttu aa kan nómw nón imweer we. Iwe káttu aa nómw nge aa kan tini pwoonnan ewe kiriis. Ese chúwen no ééch reen aan mwochen ún.

Káttu aa ekieki pwe epwe ne sótuni ekis nee únúmi nge esapw ereni konaak. Iwe aa areti eew sepi pwe aa únúmi. Káttú aa fókkun saani ewe kiriis reen annéén we. Káttu aa eitaanó ewe nón ewe sepi iwe aa mómmóót nge ese fókkun tawe reen aan we saani aan epwe pwan únúmi ooch ewe kiriis.

Káttu aa pwan nó ereti ooch pwe aa pwan únúmi. Aa fókkun iwe chék aan káttu we angaang ne únúmi ewe kiriis atun aan konaak kan nó kút fetán aneer mwéngé. Káttu aa únúmi, únúmi ewe kiriis itenó.

Iwe nón eew Rááninfen wareer me fiti fáán raa kan kókkóón nge konaak aa chemeni únúmeer we kiriis. Konaak aa ereni káttu pwe repwe ne ún únúmeer we kiriis. Káttu aa kan tipitipin fééri pwe itá nge ese wor meet e fééri.

Konaak aa nó pwe aa nó eki ewe tiin. Ewe tiin aa men chow pwún káttu e ammasowa ngeni faaw nón pwe konaak epwe erá pwe mei masou. Iwe atun aan konaak we eki ewe tiin nge aa fókkun súr chénún awan reen aan we mwochen ún ewe kiriis.

"Káttu," konaak aa kéé ngeni káttu. "Isenaatiw ekkena mwéngé pwe sipwe ne fókkun ún únúmach eei kiriis."

Konaak aa ekieto ewe tiin iwe aa suuki. Epwe ne suukáátá, ese mwo wor ekis kiriis nón pwe ekkóóch faaw ekkewe nón. Ina atun nge káttu aa fen chék amonaatá aan epwe ne sú pwe aa chék sineei pwe konaak epwe ne nii.

Káttu aa nómw pen ewe asam nge aa chék éúréúrénó pwe epwe ne mwetewow núkún. Iwe konaak ina e mweteri káttu pwe itá epwe nii nge káttu enó wesewesen pwan mweteei aa mwetewow núkún. Konaak aa pwan mwetewow mwúrin nge ese chúwen toori pwe aa mwetetá wóón efóch irá.

Ina pwata toori ikenáái konaak e kan chék kúna káttu iwe aa pwan tapweei pwe epwe nii. Ina kopwe kúna pwe káttu me konaak rese toongeni aar repwe nómw fengen pwún seni chék ena atun. Úse sineei iká ineet repwe cháfengen. Een mei sineei ineet repwe cháfengen?