Kattu me Konaak

retold by Francis Sain
illustrated by Wren

Raa nónnómw chóówe maan wóón fénúweer we. Raa imwúúnó chóówe machchang, raa pwan imwúúnó chóówe maan watte, pwan imwúúnó maan mwékkún. Nón ewe imwen mwékkún konaak, káttu, kuuch, piik me chóówe maan mei téété néúpweer. Nón ewe imwen watte raa nónnómw chóówe aan enefan, náion, táiker, peear, me pwan ekkóóch maan watte.

Nón eeú ráán chóówe maan watte raa mwiich fengen, raa pwúngúpwúng pwe repwe efisi apwaapwaan upwutiwen atewe enefan. Iwe raa pwúngúwenó pwe repwe ne efisi nón ewe pwinin epwe etto. Raa annúkú pwe chóón fiti ewe paari repwe úféúf sekit, nektái iwe ipweipwe suus. Nge iká emén ese fééri eei énnúk repwe awata iká fen ocheei. Raa pwan óóta masowen aar we paari, meinisin kóótun ewe paari aa wees me nón chék ewe ráánin. Nge atewe káttu mei akkaúsening me núkún meet ewe ekkewe maan watte raa pwúngúwenó reen aar we paari.

Káttu aa sáánó reen chóówe chienan maan mwékkún iwe aa  éréniir pworóóusen aan chóówe maan watte we paari. Iwe nge atewe konaak usun ii ewe epwe nemeni ewe mwiichen maan mwékkún. Káttu me konaak raa kééri aar we mwiich. Ewe mwiichen mwékkún maan raa resin ekieki meet repwe pwan pwaapwa reen epwe usun ewe eeú mwiichen maan. Raa pwúngúú ineet repwe efisi aar we paari nge usun rese nien tipeeú fengen pwe chóówe mei téété neeúpweer ree tipeeú ngeni ooch, nge chóówe mei feffetán wóón pééúr me pecheer, eeú tipeer.

Atekkewe káttu me konaak ma fókkun neetipengngaú reen aar we rese tipeeú fengen me ewe eeú mwiich nón neenieer we. Iwe káttu aa eisini konaak iká ese mwochen fiti aan ewe mwiichen watteen maan we paari. Iwe konaak aa, "nge efeet iká raa esinnaaei pwe ngaang konaak esapw pwan ngaang chieneer?" Káttu aa erá, "úpwan mochen fiti nge úwe niw iká ese wor chienei nge iká ke nó, iwe sia kútta meet sisapw toongeni pwá reen."

Káttu aa nó nón imwen chóówe aan náion me taiker we aa angei úfen taiker we sekit iwe aa waato reen konaak. Konaak aa, "iwe sipwe ne wessen nó nge meet kopwe ne úféúf?" Káttu aa, "ina úpwaapw kút." Fetan, fetan, toori ewe raanin paari, káttu ese kúnékún úfan. Aa pwinitiw ewe pwinin, iwe aa fis ewe paari. Káttu me konaak raa ewein fengen, iwe raa annifeto neepwopwun efóch watteen aaw ina ewe ie e nómw imwen chóówe watteen maan. Ewe paari aa pwopwutá. Atewe káttu aa wessen mwétééres reen ewe pwérúk, me ewe mwéngé, ur meinisin cheepen reen sakkun mwéngé meinisin.

Iwe ewe konaak aa éréni káttu. Kene nó waato ekkena úúf úpwe ne akkoomw. Úpwe chék etinong pwérúkú eché, iwe úa angei enei, iwe úa toou. Iwe kaa tonong pwérúkú eché iwe kaa pwan angeni anomw iwe úa pwan wiiuk. Iwe káttu aa, nge pwata chék nge epwe ina. Konaak aa toonong iwe aa pwérúk fáán eeú chék, aa angei anan we aa toou.

Iwe raa kiifengen chóówe watteen maan pwe raa cheei konaak repwe ne awata. Konaak aa sú. Iwe konaak aa mwetewú me nón eeú asammwacho nge káttu aa wessen takir. Iwe aa sú pwe konaak aa cheei pwe epwe ne awata. Konaak aa pwopwutá nee opwut káttu reen kirikiringngawan we. Aa kúkkútta chék káttu epwe awata. Iwe mwirin chék eei, rese chiwen saani fengenniir. Nge atewe konaak ese fókkun niapeni káttu toori aar raa imwúú fesen nón imweer.

EKKÓÓCH ACTIVITIES
KÁTTU ME KONAAK

A. Pénúweni ekkeei kapas eis faan seni meet pwisin óómw weeweeiti.

1. Óómw ekieki pwe eei pworóóus mei wesewesen fis? Pwata?

2. Kopwe makkeetiw meet mei fis me nón ewe pworóóus, ke meefi ese toongeni fis.

B. Minen apwaapwa reen ekkóóch kapas.
Kopwe katon eeú me eeú ekkeei mesen mak nón ekkeei náin faan. Down iká across. Kopwe kútta nimu kapas iká een mei toongeni kúna. Ekkeei kapas, sikan néúnéú reen méngúúngúún maan ese nifinifin.