written by Rioichy Johnny
designed and illustrated by Donald L. Buchholz

Maan raa éúchááni chónimóng rnettóóch. Maan raa éúchááni mwéngé me kónik. Iir raa súúseni pwichikkaren akkar, pwúngún ráán, pwan súúseni patapat. Fáán ekkóóch raa sú, iwe oposeni pwan ekkóóch maan.

Maan raa súú seni eew neeni ngeni pwan eew neeni. Ifa usun áán maan mwékútúkút? Ekkóóch maan raa fetán are sá. Iir raa fetán wóón tangeer iká pecheer. Kaa toongeni apasa itan ekkóóch aa wor rúwófóch tangeer?

Ekkóóch raa fetán iká sá wóón féffóch tangeer. Menni aa wor féffóch tangeer?

Nukukutong me nipisipiskón aa wor wonofóch tangeer. Kopwe apasa itan pwan ekkóóch aa wor wonofóch tangeer.

Spaiter me nipwpwei aa wor wanifóch tangeer. Iir raa fetán wóón wanifóch pecheer. Ménúkamw aa wor engoon-me-onofóch pecheen. Ménúkamw aa pwan mwittir ne sá. Een mei tóóngeni turufi ménúkamw? Kosapw turufi pwe ina epwe kuuk.

Pweechar aa wor pecheen nge ese wor tangan. Een kaa sineei? Kopwe toongeni waato eew niósun sipwe katon iká ifa usun napanapan áán fetán.

Ekkóóch maan ese woor tangeer, nge iir mei chék toongeni mwékútúkút.

Tikit iká nópwut ese wor pecheer iká tangeer nge mei chék toongeni mwékútúkút. Tikit raa tófón wóón pwún iká á non sáát.

Chómmóng maan raa toongeni á. Kaa toongeni apasa itan pwan ekkóóch?

Raaw me kúu ese wor pecheer iká tangeer. Iir aa wor úkúúr aa amókútúkútúúr áár sáá fáán sáát. Úkúúr kewe aa toongeni awana fetáneer fansoun aar sá.

Iik raa pwan toongeni mwékútúkút. Iik raa mwékút reen péúúr kewe. Iik raa pwan mwékútúkút reen úkúúr kewe.

Ekkóóch maan raa pwan toongeni mwékútúkut nge ese wor péúúr iká úkúúr. Nippach ese wor péún iká pecheen nge aa pwan toongeni fetán.

Ekkóóch maan raa toongeni áás wóón péúúr kewe. Nóóng me nikken aa wor pecheer, iwe raa pwan toongeni fetán. Iir raa pwan toongeni áás pwun aa wor féffóch péúúr.

Machchang me péúté raa pwan toongeni áás. Emén machchang aa wor rúwófóch pecheen, pwan rúwófóch péúún. Iir raa áás wóón péúúr kewe. Ekkóóch machchang aa wor péúúr nge rese toongeni áás. Penkwin aa wor péún nge ese toongeni áás. Een ka sineei pwata?

Een kaa pwan toongeni mwékútúkút. Ifa usun ómw mwékútúkút?

Aramas raa mwékútúkút nón sókkópatin napanap. Aramas aa wor pecheer iká tangeer, iwe iir raa sá pwan fetán wóón. Aramas raa toongeni mwet, tanis, iká pwan sókkopatin mwékútúkút. Aramas raa toongeni té wóón pwun wóón péúúr me pecheer. Iir raa pwan toongeni marókkun wóón pwún usun emén sneik, Aramas raa pwan toongeni á nón sóót usun iik nge ese wor úkúúr. Aramas ese wor péúsúúsúúr. Ifa usun, aramas raa toongeni áás?

I. Comprehension Questions:

Teacher: Ewe sense epwe eisni ekkewe chóón sukuun pénúwan ekkeei kapas eis.

Kapas eis:
1. Ifa usun aan maan mwékútúkút?

2. Ifa usun aan maan fetán iká sá?

3. Ifa usun aar á?

4. Pwata aa ééch aan maan repwe mwékútúkút?

5. Ifa itan ekkewe maan raa toongeni áás?

6. Meni raa mwittir ne sá?

7. Pwata aa ééch aan maan repwe mwittir ne sá?

8. Pwata aa ééch aan iik iká raaw epwe péchékkún úkúúr?

9. Pwata penkwin ese toongeni áás?

10. Menni maan kaa mwochen kopwe usun?

Other Activities: Pwan ekkóóch mettóóch chóón sukuun repwe fééri.
1. Emén me emén chóón sukuun epwe pwomweni emén maan, iwe chienan kewe repwe asisina iká meni maan ewe. Iká emén aa pwúng reen iwe ii epwe pwan fééri aan.

2. Ekkewe chóón sukuun repwe fich fetán niosun sókkopatin maan reen aar repwe fééri eew aar bulletin board. Iwe, repwe aimúfesenni: Ménún Neeset; Ménún Neeman; Ménún Fáán Nááng; Menún Neeset Pwan Neeman.

3. Iir ra pwan toongeni chúngani ekkóóch iwe ra pwan pacheetá wóón ewe bulletin board.