retold by Alvios Williams

Aa nónnómw siike me néún kewe fúúmén kúkkún. Ekkeei kúkkún raa men fókkun kitinnupw. Nón eew ráán ewe inenap aa úreni néún kewe pwe repwe ne witi pwe epwe nó kút fetán aneer.

"Úpwe ne nóó-seni kemi nge ouwa túmwúnú-fengenni kemi," ewe inenap aa kan úreni néún kewe. "Ouwaa pii pwe oute fen suuki ngeni emén ena asam."

"Úú," ekkewe kúkkún raa kan kéétá. "Kaa chék mwittiritó reem."

Iwe ewe inenap aa nó. Nge néún kewe raa nókkenóónó ewe asam iwe raa kan urummwot nón imweer we.

"Suuki ena asam," emén fóks aa fichifich wóón asameer we. "Ngaang inemi we nge iaa war me kút anach mwéngé."

"Súúnó," raa kééwow reen. "Esapw ina usun néúwen maama."

Ewe fóks aa nó nó ee aa pwan niwin sefáán nge aa siiwini néúwen.

"Suuki ena asam," ewe fóks aa kéénong reen ekkewe kúkkún siike.  "Ngaang maama nge iei iaa wareto nge iaa uwow ánemi mwéngé mei anné."

"Iwe nge pwata," raa kééwow reen. "Sótun kopwe eitaanong poumw nón ena asamwacho pwe áám úpwe katon."

Iwe ewe fóks aa eitaanong efóch péún kewe nón ewe asammwacho.

"Esapw ina usun péún maamo," ekkewe kúkkún siike raa kééwow reen ewe fóks. "Peun maama ese mwo ina usun meteréúnan reen poumw kana."

Iwe ewe fóks aa nó nón eew imwen fich aa ureni ewe chóón fich pwe epwe raiséénaanó meteréúnen péún kewe. Iwe mwúrin aa war aa pwan fichifich wóón ewe asam.

"Suuki ena asam," ewe fóks aa pwan kéénong. "Ngaang maama nge iaa wareto. Ouke suuki, ena asam pwe oupwe angeei anemi kaan mwéngé."

"Sótun kopwe eitaanóng póumw kana pwe áám úpwe katon." Raa pwan kééwow reen ewe fóks. "Een maama pwe ina ese meteréún poumw. Witi pwe úpwe suuki ena asam."

Atun áár raa suuki ewe asam raa kúna pwe esapw ineer ewe pwe emén fóks. Raa kitir fesen pwe raa nó op. Ekkóóch raa op fáán ewe peet. Ekkóóch raa op nón ewe pinché nge ekkóóch raa op nón ewe sitoof. Iwe ewe e kúkkún me neeiir aa oponong fóón eew sepi.

Ewe fóks aa etinong ocheerenó meinisin tiwenóón chék ewe kúkkún e oponó fáán ewe sepi. Mwúrin áán ewe fóks we ocheerenó, aa fókkun mét, aa nó kóónenó fáán efóch irá pwe aa annut. Aa wesewesen annutechchow reen aan we mét.

Mwúrin ekkóóch kunók aa war ewe inenap. Aa kúna pwe asaman ewe iimw we met chék sukkun. Iwe aa toonong nge ese chiwen nómw néún kewe. Epwe ne rú nge aa mwetewu ewe me fáán ewe sepi.

"Maama," aa kééri inan we. "Pwii kewe raa máánó pwe ewe fóks aa ocheer."

Aa fókkun soong ewe inenap iwe aa kútta ewe fóks. Raa kútta nón ewe iimw ese nómw. Raa pwan toowu kútta núkún ewe iimw iwe raa kúna pwe aa wesewesen annutengngaw fáán ewe irá. Iwe raa angeei efóch fich raa fichi upwan iwe raa mwetewu ekkewe kúkkún siike me nón. Iwe raa ketikinong faaw nón upwan ewe iwe raa pwan teeióónó. Ewe fóks aa annut annut ee aa nenó pwún aa meefi áán kaaka. Aa pwáátá aa nó nón eew kónik pwe epwe ka. Iwe aa téétá wenikaaman ewe kónik pwe itá epwe chappetiw ka nge echék mit tangan iwe turunong nón ewe kónik. Ekkewe faaw nón upwan raa nukeei etiw nón epin ewe ito iwe aa máánó pwe aa mwopw.