written by Rioichy Johnny
illustrated by Mathias

Eei pworaus pworausen emén áát itan Mick Ong. Fáán ekkóóch Mick aa kan mang ngeni sukuun. Ifa usun een, ka kan pwan piin mang ngeni sukuun? Iteiten ráán Mick aa kan mang ngeni sukuun. Kunók fisu esópw ewe pennin sukuun aa kan nech nge kunók wanú nge Mick epwaap keran kan toonong nón ewe asam.

Nón eew ráán néún we sennse itan Mr. Chin aa ngeni Mick eché taropwe. Mr. Chin aa apasa, "Mick, kopwe ngeni inomw we eei taropwe, kose mwochen."

Makkan nón ewe taropwe aa apasa, "Achengicheng Mr. Ong, pennin sukuun ekan nech kunók fisu esópw nge Mick epwaap keran kan war kunók wanú esópw. Kese mwochen kopwe ereni epwe kan ekis mwittir. Seni Mr. Chin." Ong aa ánnea ewe taropwe. Iwe, aa apasa. "Mick een kekan fetan seni imwach eei kunók fisu esópw. Een kekan fetan wóón ewe anenap kaa fetan ngeni ewe áewin aan mei chéékis.

Iwe, kaa tókkongeni peniemwaanumw ngeni ewe kapú. Aan Mr. Lee we sitoowa ina aa nómw nón ena kapú. Ewe sukuun ina aa nómw arapakkan ngeni ena sitoowa. Ena ese pwan mwo tówaw pwe mei chék arapakkan. Pwata chek iei ka kan mang? Pii ika kekan weneiiti aan Mr. Lee we sitoowa iei ke kan mang?"

"Aapw," Mick aa apasa. "Ngaang úse kan weneiiti aan Mr. Lee we sitoowa. Esapw ina ena aan ngaang úkan fiti áái kan feinnó ngeni sukuun. Ieei eei aan ngaang ukan fiti áái feinnó ngeni sukuun. Kopwe fetán wóón ewe anenap, iwe ina kopwe toori eew iimw mei watte mei peinit ón. Kopwe weneiiti ena pwanang, iwe ka kékké, 'Nesor Annim'." Iwe, ina ena chinnap feefin Mrs. Fong epwe toou. Ina epwe ngénuk efóch piruum iwe ka pirumwei wóón pwenangen imwan na. Een ka fen sineei pwe ena feefin aa fókkun chinnap. Iwe, ina Mrs. Fong epwe ngénuk etúkúm pisikit. Nón aúnúngat ina epwe pwan epwe pwan ngénuk eféú tempúra. Ngaang úwa fókkun saani tempúra, iwe ii ina ekan chék akkamwoot tempúra nón arúaanún ráán.

Iwe, mwirin ka pwer nón ena atake. Iwe, ina kopwe kúna ena machchang mei par wóón ena ira mei watte. Ena machchang ina epwe kéénú ngénuk éché kéén. Nepeekin pwan ena tit ina kopwe kúna ena eféú faú watte mei chón. Emen nakkich ina aa kan nómw faan. Iwe, ina kopwe waatiw ekkóóch féwún ira ka móót nge fanefanenó, iwe ina epwe toou aa ááni ekkana féwún ira. Nengeni iei ngaang mei chuwen uweei ekkóóch nussun nón pwekittei.

Iwe, ina kopwe pwan pwerenong nón ena tit ina kopwe toori ena kónik. Chómmóng kairu ina ra nómw pen ena kónik. Ika ke móneenóng eféú faaú, iwe ina repwe mwetenong nón ena kónik, iwe ina repwe fókkun nikesessá fetán.

Iwe, ina kopwe pwan fetán nepeekin ena kónik fáán ekkana ira ina kopwe kúna ééw tit mei tekia. Kopwe tééta wóón ena tit, iwe ina kopwe kúna ena imwen sukuun.

Iwe, ina ena aan ngaang úkan fiti fansoun áái feinnó ngeni áái sukuun.

1. Mwirin ekkewe chóón sukuun repwe wees ne anneá ewe pworaus, ewe sennse epwe eiis ekkeei kapas eiis.

1. Kunók fitú ekan pwopwutá sukuun?
2. Inet Mick aa kan toori sukuun?
3. Pwata Mr. Chin aa makkeei ewe éché taropwe?
4. Ifa ussun aan Mick ánisi ewe chinnap Mrs. Fong.
5. Meeta Mrs. Fong aa ngeni Mick?
6. Meeta aa nómw arapakkan ngeni imwen Mrs. Fong?
7. Meeta inan Mick we aa feeri nupwen aan anneá ewe taropwe?
8. Meet Pwopwun Mick aa chék mammang ngeni sukuun?
9. Meet sakkun áát Mick?
10. Kepwe apworausa ifa ussun Mrs. Fong.
11. Pwan ekkóch mettóóch chóón sukuun repwe fééri.

1. Ekkewe chóón sukuun repwe chúngaani niosun ekkewe mettóóch ika neeni nón eei pworaus. Ika pwe raa wees repwe apachááta pwe repwe fééri ééw map reen aar repwe apworausa ewe pworaus. Iir repwe fééri ussun meet Mick aa apasa reen ewe aan aa kan fiti iwe aa féératá aan mang ngeni sukuun.

2. Ekkewe chóón sukuun repwe kéén, "Emen Chóón Attaw."